லாக் டவுன் நாடகங்கள் - விமர்சனம் பகுதி 12

30. சிட்னி காலிங் - பாகம் 1

லிங்க்: https://youtu.be/nr_5is7iSQw

நடிப்பு: கவிதா சுரேஷ், பாலாஜி, சுசீலா, ஜோதி, பாலசந்தர், ஹரி மற்றும் சிலர்.
எழுத்து, இயக்கம்: பம்பாய் சாணக்யா.

   

வீட்டடங்கு காலத்தில் ஆஸ்திரேலிய குடும்பம் ஒன்றில் நடக்கும் நிகழ்வுகளை சொல்கிறது முதல் பாகம். செய்தி சேனலில் பணியாற்றும் ஸ்வேதா கூறும் அறிமுக படலங்களுடன் ஆரம்பிக்கிறது பயணம்.  

'பெற்றோர்களை ஏன் பார்க்க வருவதில்லை?' என தாயார் வருத்தப்படுகிறார். அதை போக்கும் விதமாக வீட்டிற்கு வந்து சேர்கிறார்கள். நிகழ்ச்சிகள் ரத்தானதால் வருத்தத்துடன் இருக்கும் இசைக்கலைஞர் அதிலிருந்து எப்படி மீள்கிறார் என்பதே கதை.

கேமரா கோணங்கள், பின்னணி ஒலியமைப்பு உள்ளிட்டவை ஒரு கதைக்கு வலு சேர்க்கும் காரணிகளாக இருக்க வேண்டுமே தவிர தேவைக்கதிமான ஆதிக்கத்தை செலுத்தினால் ரசிகர்களுக்கு கவனச்சிதறல் மற்றும் எரிச்சலை மட்டுமே உண்டாக்கும். இங்கு நடந்திருப்பதும் அதுதான்.

வீட்டின் உட்புறம், வெளிப்புறம் என அதிகப்படியான காட்சி மாற்றங்கள் மற்றும் விடாமல் ஒலிக்கும் பின்னணி இம்சை. ஆனாலும் இவ்வளவு ஆர்வம் ஆகாது இயக்குனர் சாணக்யா அவர்களே.

மனரீதியாக சோர்ந்து போனவர்களுக்கு தெம்பளிக்கும் விதமாக ஒரு ஆக்கத்தை தர முயன்றுள்ளார் இயக்குனர். ஆனால் சொன்ன விதம் மற்றும் தீர்வு ஆகியவை தட்டையான டெம்ப்ளேட்டை கொண்டிருப்பதுதான் இதன் பின்னடைவு. 

ஒருவேளை சிறுவர்களை ஊக்கப்படுத்த எடுத்திருந்தால் பள்ளி ஆண்டுவிழாவில் விருதினை வென்றிருக்க வாய்ப்புண்டு. ஆனால் பெரியோர்களுக்கு ஊக்கம் தர எடுக்கப்பட்டுள்ள இக்கதைக்கு ஊட்டம் மிகக்குறைவு.    

31. கான்ஃபரன்ஸ் கால்

லிங்க்: https://youtu.be/JiiOlh2x4f8

நடிப்பு: ரமணன், ஸ்ரீராமன்.

ஒளிப்பதிவு: அருண்.

ஒலியமைப்பு, படத்தொகுப்பு: ஆனந்த் ஸ்ரீனிவாசன்.

எழுத்து, இயக்கம்: டி.வி. ராதாகிருஷ்ணன்.  

கொரோனா ஆக்ரமிப்பால் பிறரைப்போல இக்கதையில் வரும் இளைஞருக்கும் ஒரு இழப்பு ஏற்படுகிறது. இதனால் மனம் நொந்து போகிறார் தந்தை. இச்சூழலை வைத்து ஒரு படைப்பை தந்துள்ளார் டி.வி.ராதாகிருஷ்ணன். 

கதையமைப்பிற்கு போதுமான வாய்ப்பின்றி நான்கு நிமிடத்திற்குள் முடிந்து விடுகிறது. பெரிதாய் ஈர்க்கவில்லை.  

  

  

32. பொண்ணுங்க மனசு 

லிங்க்: https://youtu.be/agj_dBQZ60w 

நடிப்பு: ஆனந்த் ஸ்ரீனிவாசன், சுகாசினி.
எழுத்து: டி.வி.ராதாகிருஷ்ணன்.
ஒலியமைப்பு, படத்தொகுப்பு, இயக்கம்: ஆனந்த் ஸ்ரீனிவாசன்.

தந்தைக்கு போன் செய்து புலம்புகிறாள் மகள். என்ன காரணம்? 

இதனை ஒரு குறும்படைப்பாக தந்துள்ளனர் டி.வி.ராதாகிருஷ்ணனும், ஆனந்த் ஸ்ரீனிவாசனும்.

சீரியஸ் கேரக்டரில் நகைச்சுவையாகவும், நகைச்சுவை கேரக்டரில் சீரியஸாகவும் நடித்து மிரள வைக்கிறார் ஆனந்த் ஸ்ரீனிவாசன். இங்கும் அப்படியே. எப்படியோ நமக்கு என்டர்டைன்மைன்ட் உறுதி!!

டைட்டில் கார்டை கழித்து விட்டு பார்த்தால் இரண்டு நிமிட நீளம் கூட இல்லை. இந்த மிகக்குறுகிய நேரத்தில் நம்மை சிரிக்க வைக்க எதையோ முயன்று பார்த்துள்ளனர். ஒன்றும் நடக்கவில்லை. 

குறும்படம்/குறுநாடகம் என்கிற பெயரில் வருபவை எல்லாம் பத்து நிமிடத்தில் இருந்து ஐந்து, மூன்று, இரண்டு என மொட்டை மாடி வத்தல் போல சுருங்கிக்கொண்டே போகின்றன. இதில் எப்படி ஒரு கதாசிரியர் மற்றும் இயக்குனரின் திறமையை கண்டறிவது?

போகிற போக்கை பார்த்தால் 'ஹலோ வணக்கம். ஸ்டே ஹோம். ஸ்டே சேஃப்' என்று ஒரே ஒரு நடிகர்.. இரண்டு நொடிகள் மட்டும் நடித்து விட்டு... மன்னிக்க... பேசிவிட்டு போய் விடுவார் போல.    

  

லாக் டவுன் நாடகங்கள் - விமர்சனம் பகுதி 11

27. குட் மார்னிங்

லிங்க்: https://youtu.be/XtAVnOJxKZ4

நடிப்பு: காத்தாடி ராமமூர்த்தி, கீதா, எஸ்.எல்.நானு, மகேஷ்வர், ஸ்ரீனிவாஸ், சந்துரு.

எடிட்டிங்: நந்தினி. இசை: கௌஷிக் வெங்கடேசன்.
எழுத்து, இயக்கம்: எஸ்.எல்.நானு.
தயாரிப்பு: ஸ்டேஜ் கிரியேஷன்ஸ்.

நித்தம் காலை மற்றும் இரவில் நட்பில் உள்ளோருக்கு அலைபேசி வாயிலாக குட்மார்னிங், குட்நைட் சொல்வது சிவராமனின் வழக்கம். அத்தோடு நின்றால் பரவாயில்லை. பேசும் நேரமும் நீண்டு கொண்டே போகும். இதனால் குடும்ப விஷயங்களை தந்தையிடம் பேச இயலவில்லையே என  மகன் சீனுவிற்கு எரிச்சல். 

வாட்ஸ் அப் மூலமே அல்லது நேரிலோ இப்படி காலை மற்றும் மாலை வணக்கம் சொல்வது ஒருதரப்பினரின் வழக்கம். இன்னொரு தரப்பிற்கோ இது ஒவ்வாத விஷயம். மெசேஜை பார்த்த மாத்திரத்தில் நீக்கி விடுவார்கள். ஆனால் சிவராமன் போன்ற சிலர் வணக்கம் போடுவதற்கு பின்னே அர்த்தம் உண்டு.

தரமான நகைச்சுவைக்கு காத்தாடி - ஸ்ரீனிவாஸ் காம்போ. கீதா, எஸ்.எல்.நானு, மகேஷ்வர், ஸ்ரீனிவாஸ், சந்துரு உள்ளிட்ட சக கலைஞர்களும் நடித்துள்ளனர். 

கருத்தும், நகைச்சுவையும் கலந்த விஷயத்தை யார் சொல்கிறார்கள், எப்படி சொல்கிறார்கள் என்பதை பொறுத்துதான் அதன் பலம் அமையும். இங்கே காத்தாடி ராமமூர்த்தி இருப்பது மிகப்பொருத்தம். 

இந்நாடகத்தை பார்த்த பிறகு குட்மார்னிங், குட்நைட் செல்வோரின் எண்ணிக்கை கூடும் என நிச்சயம் நம்பலாம். 

எஸ்.எல்.நானுவிடம் இருந்து இன்னொரு 'குட்' படைப்பு. 

28. கடனாளிகள்

லிங்க்: https://youtu.be/SHgt7dq0bCk

நடிப்பு: முத்துக்குமரன், கணபதி சங்கர், பாலசுப்ரமணியம், வித்யா தீபக், ரேவதி, ஹிதேஷ், ஸ்ருதி மாதவன், தீபக், கிருஷ்ண ராம், நுதனா.

ஒளிப்பதிவு: பிரசாந்த் கணபதி சங்கர்.

எடிட்டிங்: விஸ்வஜெய்.

இசை: குகப்ரசாத்.  

எழுத்து, இயக்கம்: முத்துக்குமரன்.

தயாரிப்பு: கணபதி சங்கர் - PMG மயூரப்ரியா. 

நோய்த்தொற்று பரவலாகிப்போன இச்சமயத்தில் மருத்துவர்கள் எப்படி தன்னலமற்று பணியாற்றுகிறார்கள் என்பதை எடுத்துச்சொல்கிறது இக்கதை. 

நடிகர்கள் அனைவரிடமும் நடிப்பில் எந்த பின்னடைவுமில்லை. தொலைக்காட்சி மற்றும் நாளிதழ்களில் தினமும் மருத்துவர்கள் செய்யும் சேவை மற்றும் அவர்கள் படும் இன்னல்களை பார்த்து வருகிறோம். அதில் உள்ள சில முக்கிய விஷயங்களை எடுத்து கையாண்டுள்ளார் இயக்குனர் முத்துக்குமரன். நல்ல எண்ணம் என்பதில் ஐயமில்லை.

ஆனால் பொதுவான சென்டிமென்ட் டெம்ப்ளேட் மட்டுமே இக்குறும்படம்/குறுநாடகத்தில் மேலோங்கி இருப்பதால் 'டைரக்டர்ஸ் டச்' பெரிதாய் இல்லை. அதற்கு திரைக்கதையில் இன்னும் கொஞ்சம் மெனக்கெட்டு இருக்கலாம்.     

29. தி கிஃப்ட் ஆஃப் கொரோனா 

லிங்க்: https://youtu.be/cRMUU07O3YM 

நடிப்பு: ரவிசங்கர், சாந்தி. 

எழுத்து, இயக்கம், தயாரிப்பு: ரவிசங்கர்.

லாக் டவுனில் வீட்டில் இருக்கும் கணவர் தனது மனைவியை நடிக்க வைத்து ஒரு படமெடுக்க நினைக்கிறார். இதுகுறித்து பேசப்போனால் வீட்டில் தான் படும் பாடுகளை பட்டியல் இடுகிறார் மனைவி.

இந்த சமூகத்திற்கு எதையோ சொல்ல நினைத்துள்ளார் இயக்குனர் ரவிசங்கர். ஆனால் ஒரு குறும்படைப்பிற்கு தேவையான அம்சங்கள் போதவில்லை என்பதால் பார்த்து முடித்ததும் நீராவியைப்போல மனதில் இருந்து மறைந்து விடுகிறது.   

அடுத்தமுறை உருப்படியான கதையுடன் வர வாழ்த்துகள். 

லாக் டவுன் நாடகங்கள் - விமர்சனம் பகுதி 10

23. என்ன ஆச்சு?

லிங்க்: https://youtu.be/fYAUj2Aqcac

நடிப்பு: எஸ்.எல்.நானு, கௌஷிக் வெங்கடேசன்.
கதை, வசனம், இயக்கம்: எஸ்.எல்.நானு.
தயாரிப்பு: மீனாட்சி லட்சுமிநாராயணன்.

பிள்ளைகளை பிரிந்திருக்கும் தந்தை அவ்வப்போது அலைபேசி மூலம் அவர்களுடன் இணைகிறார். 'எதிர்பார்ப்பு' என்கிற ஒற்றை வார்த்தைதான் கதையின் ஆஸ்தானம்.  

ஐந்தரை நிமிடத்திற்குள் ஒரு நிதர்சனத்தை சொல்லியிருக்கிறார் இயக்குனர் எஸ்.எல்.நானு. நடிகர்களாக இவரும், கௌஷிக்கும். பிரமாதம் என்று சொல்ல இயலாவிட்டாலும் 'ஜஸ்ட் ஓகே' என சொல்ல வைக்கிறது இப்படைப்பு.   

24. மீனா 

லிங்க்: https://youtu.be/U5b3Wtccs0c

நடிப்பு: சிறுமி சௌம்யா, கிரிஷ் வெங்கட், சசிகலா.

எடிட்டிங்: சுரேஷ்.

எழுத்து இயக்கம்: பூவைமணி மற்றும் சந்திரமோகன்.

செவிலியர் வேலை பார்க்கும் இல்லத்தரசி. ஒருநாள் கணவரிடம் தங்கள் செல்ல மகளை பத்திரமாக பார்த்துக்கொள்ள சொல்லிவிட்டு வேலைக்கு செல்கிறார். அதன்பிறகு நடப்பதென்ன?

கதையின் நாயகி சிறுமி சௌம்யா, கிரிஷ் வெங்கட் மற்றும் சசிகலா ஆகியோரின் நடிப்பு இயல்பு. 

நீளம் ஐந்தரை நிமிடம். இச்சிறு இடைவெளியில் சிறுமியின் மூலம் ஒரு நல்லெண்ணத்தை நம்மிடம் விதைக்க முயன்றுள்ளனர். ஓகே என சொல்லும்படி இருந்தாலும்.. இறுதியில் திரைப்பட பாடல் மூலம் நிறைவு பெறுகிறது.

இரண்டு இயக்குனர்கள் இருந்தும்.. ஒரு படைப்பின் முக்கியமான இறுதி தருணத்தில் தங்களது வசனம் மற்றும் இயக்கத்தின் மூலம் இன்னும் அழுத்தமான முத்திரையை பதித்திருக்கலாம். ஆனால் தாக்கத்தை ஏற்படுத்த ஒரு திரைப்பட பாடலையா துணைக்கு அழைக்க வேண்டும்? 

25. இருமனம் 

லிங்க்: https://youtu.be/R6QnoISmHio

நடிப்பு: சங்கர் குமார்.

எழுத்து: சங்கர் குமார்.

இயக்கம்: நிதிஷ் சங்கர்.

தயாரிப்பு: ப்ரேம் குமார்.

மகனுக்கு பெண் பார்க்கும் படலம் பற்றிய பேச்சை எடுக்கிறார் தந்தை. இருவருக்குமான உரையாடலாக நகர்கிறது கதை. 

இரு கேரக்டர்களிலும் சங்கர்குமார் நடித்துள்ளார். டி.வி. வரதராஜனின் நாடகங்களில் பரிச்சயமானவர் இவர்.

தந்தையாக வித்யாசம் காட்ட குரலில் செய்திருக்கும் மாற்றம்... விக்ஸ் கவர் தொண்டையில் சிக்கியது போல செயற்கையாக உள்ளது. இன்னும் யதார்த்தமாக முயற்சித்திருக்கலாம். 

கதை, வசனம், இயக்கத்தில் போதுமான அழுத்தமும், சுவாரஸ்யமும் இல்லாததால் சிலாகிக்க இயலவில்லை. அடுத்து ஒரு நல்ல ஆக்கத்தை எடுக்க வாழ்த்துகள்.

26. இல்லத்தரசன் 

லிங்க்: https://youtu.be/Yk5OJLMsnnY

நடிப்பு: சங்கர் குமார்.

எழுத்து: சங்கர் குமார்.

இயக்கம்: நிதிஷ் சங்கர்.

தயாரிப்பு: ப்ரேம் குமார்.

நீளம் நாலரை நிமிடம். முதல் காட்சியில் கத்தியுடன் நிற்கிறார் சங்கர். அடுத்து ரசிகர்களுக்கு ஒரு திருப்பத்தை தரப்போகிறோம் என இயக்குனர் நிதிஷ் நினைத்திருப்பினும்.. அது என்னவாக இருக்கும் என்பதை எளிதில் யூகித்து விட முடிகிறது.

க்ளைமாக்ஸும் பலமுறை பார்த்த திருப்பங்களில் ஒன்றாகவே ஆகிப்போகிறது. இயக்குனராக அடியெடுத்து வைத்திருக்கும் நிதிஷ் சங்கர் இன்னும் மேம்பட்டு யோசிக்க வேண்டும். 

ஐந்து நிமிடங்களுக்குள் எடுக்கப்படும் குறுநாடகம்/குறும்படம் என்பது ஒருவகையில் இயக்குனர்களுக்கு அனுகூலமான விஷயம் என்றாலும்.. அதில் கூட நேர்த்தியான கதை, வசனம் மற்றும் இயக்கத்தினை தந்தாக வேண்டிய கட்டாயமும் இருப்பதை தவிர்க்கவே இயலாது. 

லாக் டவுன் நாடகங்கள் - விமர்சனம் பகுதி 9

22. வந்தவன்.

லிங்க்: https://youtu.be/TlVuA1SfLZk

நடிப்பு: மாதவ பூவராக மூர்த்தி, மகேஷ் வெங்கடேஷ், சாவித்திரி ரகுராமன்.
இசை: ராதிகா வெங்கடேஷ், ஸானிகா வெங்கடேஷ்.
எடிட்டிங்: மகேஷ் வெங்கடேஷ்.
எழுத்து: சுஜாதா.
திரைவடிவம், இயக்கம்: மாதவ பூவராக மூர்த்தி, மகேஷ் வெங்கடேஷ்.
தயாரிப்பு: பூர்ணம் நியூ தியேட்டர் நண்பர்கள்.

எழுத்தாளர் சுஜாதாவின் ஏழு பக்க சிறுகதையாக நூல் வடிவில் 'வந்தவன்' தற்போது யூ ட்யூப் திரைக்கு வந்திருக்கிறான்.

வருடம் 1970. மெஸ் என்று சொல்லப்படும் ஒரு சிறு உணவு விடுதி. இரவு டிபன் வியாபாரம் முடிந்துவிட்ட நேரத்தில் ஒரு இளைஞர் 'சாப்பிட ஏதேனும் கிடைக்குமா?' எனக்கேட்டு உள்ளே வருகிறார். அவருக்கும், மெஸ் ஓனர் (மணி) ஐயருக்குமான  உரையாடல்தான் கதை.

14 நிமிடம் முழுக்க சுஜாதாவின் வெகு யதார்த்தமான Black காமடி ரசிக்க வைக்கிறது. மிகச்சுமாரான வருவாயில் இயங்கும் மெஸ் மற்றும் அதன் முதலாளிகளின் நிலையை  நமக்கு விளங்க வைத்திருக்கிறார்.

கதையின் தன்மைக்கேற்ப மெஸ் ஓனராக மாதவ பூவராக மூர்த்தியின் நடிப்பு மிகச்சிறப்பு. மனதில் பட்டதை பேசும் வெகுளியான மனிதராக நடிக்கவில்லை. வாழ்ந்திருக்கிறார். அருமை!!  

இளைஞராக வரும் மகேஷ் வெங்கடேஷ் மற்றும் (மணி) ஐயரின் மனைவியாக நடித்துள்ள சாவித்திரி ரகுராமனும் நிறைவான நடிப்பை தந்துள்ளனர்.

சுவாரஸ்யமான இறுதிக்காட்சி.   

தரமான சிறுகதையை திரையில் பார்த்த முழு திருப்தியை தந்த மாதவ பூவராக மூர்த்தி மற்றும் மகேஷ் வெங்கடேஷ் இணைக்கு மனமார்ந்த வாழ்த்துகள்.     

வந்தவன்...மனதை வென்றவன். 

லாக் டவுன் நாடகங்கள் - விமர்சனம் பகுதி 8

20. டோன்ட் மிஸ்.


https://youtu.be/jG00BAc1vCo

நடிப்பு: கிரிஷ் அய்யபத், அபர்ணா, அஸ்வின் கிருஷ்ணா.
எடிட்டிங்: அருண் கே.
வசனம்: சாய்ராம், சுஜாதா கோபால்.
எழுத்து, இயக்கம்: சாய்ராம்.

மனைவிக்கு உடல் நிலை சரியில்லை. மகனும், மகளும் வெளிநாடுகளில். தனி ஒருவராக மனைவியை கவனிக்க கடுமையாக போராடுகிறார் கணவர். பிள்ளைகளுக்கு அலைபேசி அழைப்பு விடுத்து இக்கடின சூழல் பற்றி சொல்கிறார். 'எதிர்பார்த்த' பதிலைத்தவிர அனைத்தும் வருகிறது. இதனை எப்படி கடக்கிறார்?

இந்த ஆக்கத்தின் நீளம் பதின்மூன்றரை நிமிடங்கள். அதில் குறைந்தபட்சம் பாதிநேரம் உணர்வுபூர்வ நடிப்பில் கட்டிப்போட முழு அர்ப்பணிப்பும், நடிப்பாற்றலும் வேண்டும். அதை சற்றும் சிந்தாமல் சிதறாமல் தான் தோன்றும் முதல் நொடியில் இருந்து இறுதிவரை தந்திருக்கிறார் தந்தையாக நடித்துள்ள கிரிஷ் அய்யபத். 

கிரிஷ் அய்யபத்.. தமிழ் நடிப்புக்கலைக்கு கிடைத்த ஆகச்சிறந்த வரம்!!  

பாராட்ட மேலும் வார்த்தைகள் இல்லை. பார்ப்போரின் கண்களில் தவழும் வெம்மையான நீர்த்திவலைகளே அதனை பூர்த்தி செய்யும். 

பலமுறை அடித்து துவைக்கப்பட்ட கதையென்றாலும்... 'சரியான' நடிப்பு மற்றும் வசனம், இயக்கம் மூலம் ரசிகர்களுக்கு தரும்போது அவை மீண்டும் போற்றப்படத்தான் செய்யும். அவ்வகையில் சுஜாதா மற்றும் சாய்ராம் இருவரின் எழுத்தும், நெறியாள்கையும் அருமை. 

டோன்ட் மிஸ். 

21. தொற்று.

https://www.youtube.com/watch?v=cnHl3ZXmirQ

நடிப்பு:
வர்ஷா ஜெயராமன், ஆதித்யா பரத்வாஜ், சுமதி ஜெயராமன்,  முத்துக்குமரன்,
ஜெயராமன், மீனாட்சி முத்துக்குமரன், கோபிநாதன், ரவிச்சந்திரன்.

ஒளிப்பதிவு: பிரசாந்த் கணபதி சங்கர்.
எடிட்டிங்: ம்ரித்யுஞ்ஜெய்.
இசை: விஸ்வஜெய்.
கதை, வசனம், இயக்கம்: முத்துக்குமரன்.
தயாரிப்பு: கணபதி சங்கர் (பி.எம்.ஜி  மயூரப்ரியா).

சென்னை ஊரடங்கால் வீட்டினுள் இருக்கும் மூன்று தலைமுறை குடும்பத்தினர். வீட்டின் செல்ல மகள் சிறுமி தான்யா. குறும்பும், திறமையும் ஒருசேர கொண்டிருப்பவள் செய்யும் ஒரு முக்கிய செயல் என்னவென்பதை சொல்லும் கதை.

குழந்தை நட்சத்திரங்களை மையமாக வைத்து சமூகப்பார்வையுடன் எடுக்கப்படும் பல்வேறு நாடகங்களை விமர்சிப்பதில் ஒரு பெரும் பிரச்னை உண்டு. எப்படி அம்மா சென்டிமென்ட் மற்றும் கடவுள் பக்தி கொண்ட நாடகத்தை எதிர்மறை விமர்சனம் செய்தால் பெரும் கலவர சூழல் ஏற்படுமோ அதை விட அதிக எதிர்ப்பு இதுபோன்ற குழந்தை நட்சத்திரங்கள் நடிக்கும் நாடகங்களை குறை சொல்லும்போது வந்து சேரும். 

'கதை, வசனம், இயக்கம் எல்லாம் எப்படி இருந்தா என்ன? பாவம். அந்தக்குழந்தை எவ்வளவு கஷ்டப்பட்டு நடித்துள்ளது. அதை பாராட்ட மனம் இல்லையா?' என்று நமது மண்டையை பூரிக்கட்டை, கர்லாக்கட்டைகளால் தாக்கி விடுவார்கள். 

ஆனால் இந்த தொல்லை எதுவுமின்றி நல்ல நடிப்பு மற்றும் இயக்கத்துடன் ஒருசில படைப்புகள் சுவாரஸ்யமாக இருப்பதுண்டு. அதில் ஒன்றுதான் இது.

தான்யா மட்டுமல்ல. தாய் சுமதி ஜெயராமன், தந்தை ஜெயராமன், அண்ணன்  ஆதித்யா பரத்வாஜ் என ஆளாளுக்கு செய்யும் சின்ன சின்ன சேட்டைகள் அனைத்தும் மத்தாப்பு சிரிப்பிற்கு உத்திரவாதம். குறிப்பாக அந்த ரசம்... பட்டாசு!!

ஆட்டோ ஓட்டுனர் கோபிநாதன், தாத்தா பாட்டியாக முத்துக்குமரன் மற்றும் மீனாட்சி முத்துக்குமரன், வங்கி மேலாளர் ரவிச்சந்திரன் போன்றோர் துணை நடிகர்களாக பங்காற்றியுள்ளனர்.

வெகுஜனங்களை ஈர்க்கும் வண்ணம் நல்லதோர் நாடகத்தை தந்திருக்கும் இயக்குனர் முத்துக்குமரனுக்கு வாழ்த்துகள். 

   

2020 சிறந்த குழந்தை நட்சத்திர விருதுப்பிரிவிற்கான பந்தயத்தில் தற்போதைக்கு தான்யா முன்னிலை வகிக்கிறார். திருஷ்டி படாமல் இருக்க சுற்றிப்போட வேண்டியது பெற்றோர்களின் உடனடிக்கடமை!!  

லாக் டவுன் நாடகங்கள் - விமர்சனம் பகுதி 7

19. கடைசி நிமிடங்கள். 

லிங்க்: https://youtu.be/VgX72dutHFk

நடிப்பு: கௌரிசங்கர்.
இதர கலைஞர்கள் வெவ்வேறு கேரக்டர்களுக்கு பின்னணிக்குரல் தந்துள்ளனர்.

ஒளிப்பதிவு, எடிட்டிங், எழுத்து, இயக்கம்: கார்த்திக் கௌரிசங்கர்.

தனிமையில் காலத்தை கழிக்கும் வயதான தந்தை. வெளிநாட்டில் குடிபெயர்ந்து விட்ட செல்ல மகன். ஒருமுறை கூட நேரில் பார்க்க வரவில்லை. அலைபேசி அழைப்புகள் மட்டுமே.

'இதேபோன்று எத்தனை ஆயிரம் கதைகள். மீண்டும் ஒன்றா?' என்று உள்ளூர பதற்றம் தொற்ற ஆரம்பிக்கிறதா? பீதியடைய வேண்டாம்.

பெற்றோரை தனிமையில் கிடத்தி, வெளிநாட்டில் நிரந்தர முகாமிட்டு, இறுதியில் 'குடும்பம் என்பது ஆலமரம். பெற்றோர் அதில் ஆணிவேர். கிளைகள் வேர்களை தாங்கும் காலமும் வருவதுதானே நியாயம்?' என ரக ரகமாக 'நீண்ட' வசனங்கள் பேசி உங்கள் செவியில் இருந்து ரத்தத்தை காவு கேட்கும் ஈவு இரக்கமற்ற படைப்பல்ல இது. 

இதே கதையமைப்பில் ஏகப்பட்ட மேடை நாடகங்கள் மற்றும் (குறும்)படங்களை பார்த்திருப்பினும்... அவற்றுக்கெல்லாம் சிகரம் வைப்பது போல் இருக்கிறது 'கடைசி நிமிடங்கள்'.  

கதையின் நாயகனான கௌரிசங்கர் ஒற்றை வசனம் பேசவில்லை. ஏன் முழுமையாக முகத்தை கூட காட்டவில்லை. சிலரது குரல்கள் பின்னணியில் ஒலிக்கின்றன. அவ்வளவுதான். ஆனால் வாடித்தவிக்கும் தந்தையின் மொத்த வெறுமையும், வலியும் நம்முள் ஆழமாய் இறங்கி பதம் பார்க்கிறது. 

தமிழ் மேடை நாடகங்களில் பல்லாண்டுகள் வலம் வந்து சிறந்த கேரக்டர்களில் நடித்து வரும் கௌரிசங்கருக்கு இது மிக முக்கியமான மைல்கல். 

ஒளிப்பதிவு, எடிட்டிங், எழுத்து, இயக்கம் என நான்கிலும் ஒரே நேரத்தில் சிக்ஸர் அடித்துள்ளார் கார்த்திக் கௌரிசங்கர். காலத்தால் அழியாத ஆகச்சிறந்த படைப்பினை தந்திருக்கும் இவருக்கு சிரம் தாழ்ந்த வணக்கமும், மனம் நிறைந்த நன்றியும்!! 

லாக் டவுன் நாடகங்கள் - விமர்சனம் பகுதி 6

16. கரங்கள்.

லிங்க்: https://youtu.be/ohB9ygg_Wsc

நடிப்பு: இளங்கோ குமணன், சூரஜ் ராஜா, ரேமண்ட்.
ஒளிப்பதிவு, எடிட்டிங்: டெரி டிரேஸ்.
இசை: தக்ஷின்.
கதை: ராஜேஷ் பாலமுருகன்.
எழுத்து, இயக்கம்: இளங்கோ குமணன்.
தயாரிப்பு: K ட்ரீம் வோர்ல்ட்.

ஒயிட் காலர் வேலை பார்க்கும் பீட்டருக்கு ப்ளூ காலர் வேலை பார்த்து ஓய்ந்த தந்தை மீது ஒருவித ஒவ்வாமை. அவரை மீண்டும் அழைத்து கடிந்து கொள்கிறான். பிறகு பாதிரியார் ஒருவரை சந்தித்து அளவளாவுகிறான். தெளிந்த நீரோடை போல அவர் சொல்லும் விஷயத்தால் பீட்டரின் ஒயிட் காலரில் கறை மேலும் படிந்ததா அல்லது நீங்கியதா?

சின்னஞ்சிறு கதையம்சம். சுமார் எட்டரை நிமிட நீளம். ஆனால் ஒவ்வொரு வசனத்தையும் திறம்பட செதுக்கி இருக்கிறார் இளங்கோ குமணன். நடிப்பிலும் இதையே பிரதிபலிக்கிறார். இணையான கேரக்டரில் நன்றாக ஸ்கோர் செய்கிறார் சூரஜ்.

இதே கதையை உணர்ச்சி பொங்க சிந்தித்து எளிதில் சொதப்பலாம். ஆனால் இளங்கோ குமணனுக்கு நேர்த்தி தெரிந்திருப்பதால் இப்படியொரு ஆக்கப்பூர்வ படைப்பு சாத்தியமாகி இருக்கிறது.

வெற்றிக்'கரங்கள்'.    

17. அப்பாவை காணோம்.

லிங்க்: https://youtu.be/np8y0oqltQ4

நடிப்பு: பின்னி ராமச்சந்திரன், லட்சுமி, ஸ்வயம் பிரகாஷ் மற்றும் மிகப்பலர்.
இசை: கிரிதரன்.
கருத்து: திருமலை ராமானுஜம்.
எழுத்து, படத்தொகுப்பு, இயக்கம்: டிவி வரதராஜன்.
தயாரிப்பு: யுனைடட் விஷுவல்ஸ்.

கொரோனா சமயத்தில் வயது முதிர்ந்த தந்தை நீண்ட நேரம் வீட்டில் இல்லாததை கண்டு அதிர்கிறார் அவரது மகன். எங்கே போனார் என்பது புரியாமல் குழப்பம் அதிகரிக்க இறுதியில் என்ன நடந்தது என்பதை சொல்லும் கதை.

நீளம் சுமார் 18 நிமிடங்கள். தெரிந்தவர்களுக்கு போன் செய்து விசாரிக்கிறார் மகன். நாலைந்து பேர் என்றால் பரவாயில்லை. யுனைடெட் விஷுவல் குழுவில் இருக்கும் அனைவருக்கும் வாய்ப்பு தர எண்ணியதால்.. அனைவரிடமும் போன் போட்டு விசாரிக்கிறார். விசாரிக்கிறார். விசாரிக்கிறார். விசாரிக்கிறார். விசாரிக்கிறார்.  விசாரிக்கிறார்.  விசாரிக்கிறார்.  விசாரிக்கிறார். விசாரிக்கிறார். விசாரிக்கிறார். விசாரித்துக்கொண்டு இருக்கிறார். 

'அப்பா எங்கே வேண்டுமானாலும் போகட்டும். தயவு செய்து க்ளைமாக்ஸுக்கு வாங்க சாமி' என கும்பிடத்தோன்றும் அளவுக்கு ஜவ்வாக இழுக்கிறது. ஒருவழியாக க்ளைமாக்ஸ் வந்தாலும் அது பெரும்பாலும் யூகிக்க முடிந்ததாகவே இருக்கிறது. மகன்தான் மறதிக்காரர்... மருமகளுக்கு கூடவா இந்த 'எளிதான' தேடலுக்கான யோசனை இல்லை? 

பல்வேறு நடிகர்களை வைத்து ஒரு நகைச்சுவை படைப்பை உண்டாக்க நினைத்திருந்தாலும், அதற்கேற்ப திருமலை ராமானுஜம் மற்றும் வரதராஜன் இணையிடம் செழுமையான கருத்து, எழுத்து மற்றும் இயக்கத்தை காணோம்!!

18. பூமராங். 

லிங்க்: shorturl.at/jxBFN

நடிப்பு: சபரீஷ், மாலதி சம்பத், பூர்வஜா மூர்த்தி, மாதவ பூவராக மூர்த்தி, விஸ்வநாதன் ரமேஷ், வி.பி.ஸ்ரீராம், வெங்கட், அனுராதா, ரமேஷ்.

கதை, வசனம்: கௌரிசங்கர்.

எடிட்டிங், இயக்கம்: கார்த்திக் கௌரிசங்கர்.

தயாரிப்பு: தி ஒரிஜினல் குருகுலம் பாய்ஸ் கம்பெனி '95.    

இளைஞன் ஒருவனுக்கு பெண் பார்க்க ஆரம்பிக்கும் படலம். ஸ்வேதா எனும் பெண்ணுடன் பேசியதில் கருத்து முரண்பாடு வர.. அடுத்த படலம் ஆரம்பம். 

அப்பாவி இளைஞனாக சபரீஷும், நறுக்கென்று பேசும் பெண்ணாக பூர்வஜாவும் கேரக்டருக்கு பாந்தமாய் பொருந்துகிறார்கள். மேற்குறிப்பிட்ட அனுபவம் வாய்ந்த நடிகர்களும் சேர்வதால் நடிப்பில் பின்னடைவு ஏதுமில்லை. 

ஆனால் கதை மற்றும் இயக்கம் போதுமான சுவாரஸ்யத்தை தராததால் மிக சுமாரான நாடகமாய் போய் விடுகிறது. இதுபோக இசையின் இரைச்சலும் ஓயாமல் ஒலித்து செவிக்கு இடையூறு செய்கிறது. அடுத்தமுறை கார்த்திக் மற்றும் கௌரிசங்கர் இருவரும் பூமராங்கிற்கு பதில் கூர்மையான அம்பினை எய்வார்கள்  என காத்திருப்போம்.  

லாக் டவுன் நாடகங்கள் - விமர்சனம் பகுதி 5

13. மலையங்குளத்து நினைவுகள். 

https://youtu.be/vO1wyFPrWh8

குரல்: கே.ஏ.ஸ்ரீனிவாசன், ஆர்.கிரிதரன்.
இசை: ஆர்.கிரிதரன்.
எழுத்து: ஜெ. ரகுநாதன்.
தயாரிப்பு: கீர்த்தி மாரியப்பன்.

லாக் டவுன் காலத்தில் பல்வேறு நாடக கலைஞர்கள் யூ-ட்யூப் நாடகங்களை அளித்து வரும்போது தியேட்டர் மெரினா வித்யாசமான முயற்சியில் இறங்கியுள்ளது. நடிகர்கள் யாரும் கேமராவிற்கு முன்பு தோன்றாமல் 'ஒலி நாடகம்' ஒன்றை உருவாக்கியுள்ளனர். ஸ்ரீனிவாசன் மற்றும் கிரிதரன் என இரண்டே குரல்கள்.

மலையங்குளம் எனும் ஊரை சேர்ந்த இரு நபர்கள் நீண்ட இடைவெளிக்கு பிறகு சந்தித்து உரையாடுகிறார்கள். பழைய நினைவுகளில் மூழ்கி அப்போதைய காலகட்டத்தில் நடந்த சம்பவங்கள் மற்றும் மாந்தர்களை பற்றி விசாரிப்புகளும், பதில்களும் அடுத்தடுத்து வந்து செல்கின்றன. ஆரம்பம் முதல் இறுதி வரை நம் கிராமத்து வாழ்வினையும் மீட்டெடுக்கிறது ரகுநாதனின் அருமையான வட்டார வழக்கு வசனங்களும், அதற்கேற்ப கச்சிதமாக பேசும் ஸ்ரீனிவாசன் மற்றும் கிரிதரனின் குரல் வளமும். குறிப்பாக இறுதி சில நொடிகள் சிரிப்பிற்கும், ஆச்சர்யத்திற்கும் உத்திரவாதம்.

ஒலி நாடகத்தின் வெற்றி என்பது நல்ல குரல் வளம் - ஏற்ற இறக்கம் என்பது மட்டுமல்ல. உரையாடல்களை கேட்கும் ரசிகர்கள் அந்த கதாபாத்திரங்கள் இருக்கும் சூழல் மற்றும் மனவோட்டத்துடன் தாமே இருப்பது போன்று உணர்வை தர வேண்டும். அதை இவர்கள் சிறப்பாக செய்திருக்கிறார்கள். 

கிராமம் சார்ந்த நாடகங்களை காண/கேட்க கிடைப்பதே அரிது என்றாகி விட்ட காலத்தில் புத்துணர்வு தரும் தென்றலாக நம்மை வருடிச்செல்கிறது இந்நாடகம். மேடையில் குறுநாடகமாக அரங்கேறினாலும் நிச்சயம் வரவேற்பை பெறும். தியேட்டர் மெரினா குழுவினர் அனைவர்க்கும் வாழ்த்துகள். 

14. காலை எழுந்தவுடன் கொலை.

https://youtu.be/PnpJ6hPIiHo

நடிகர்கள்: சூரஜ் ராஜா, ஸ்வேதா ஸ்ரீனிவாசன் மற்றும் சிலர்.

இசை: குகப்ரசாத்.

ஒலி, இசைக்கோர்வை: விஸ்வஜெய்.

எடிட்டிங்: ம்ரித்யுஞ்ஜெய்.

நாடகமாக்கம், இயக்கம்: தாரிணி கோமல்.

கதை: சுஜாதா.

1990 ஆம் ஆண்டு எழுத்தாளர் சுஜாதா எழுதிய சிறுகதை தற்போது நாடக வடிவில் வந்துள்ளது. 

பூங்காவில் நடைப்பயிற்சிக்கு செல்லும் இளைஞர்.. அங்கே ஒருவர் இறந்து கிடப்பதை கண்டு அதிர்ச்சி அடைகிறார். இதன் தொடர்ச்சியாக வந்து சேரும் தொல்லைகள் என்ன?

சுஜாதாவின் எழுத்தில் இருக்கும் விறுவிறுப்பை அப்படியே நாடகமாக்கம் செய்து ஒன்றை வைத்து விடுகிறார் தாரிணி கோமல். கதைக்கேற்ப சூரஜ் மற்றும் ஸ்வேதாவின் நடிப்பு நம்மை ரசிக்க வைக்கிறது. நல்லதோர் சஸ்பென்ஸ் த்ரில்லர்.

15. நிசப்தம். 

https://youtu.be/j-6RQbWXe6c

நடிப்பு: எஸ்.எல்.நானு.

இசை, ஒளிப்பதிவு: கௌஷிக் வெங்கடேசன்.

எழுத்து, இயக்கம்: எஸ்.எல்.நானு.

தயாரிப்பு: மீனாட்சி லட்சுமிநாராயணன்.

  

மொத்த நீளம் ஆறு நிமிடங்கள். நானு எனும் ஒற்றை நடிகர். வசனம் எதுவுமில்லை. ஆனாலும் முற்றிலுமாக ஒன்றி விட முடிகிறது. சுற்றி நடக்கும் அசைவுகள் அனைத்திற்கும் மனமே முக்கிய காரணம் என்பதை உணர்த்தும் குறுநாடகம்.

வீட்டின் அறையில் அமர்ந்தபடி கணினியில் வேலை பார்க்கிறார் எழுத்தாளர் மௌனதாசன். அமைதியாக இருந்தால் மௌனதாசன், வழக்கறிஞர் என்றால் சட்டநாதன், வைத்தியர் என்றால் வைத்தீஸ்வரன். இன்னும் எத்தனை யுகங்களுக்கு இதுபோன்ற பெயர்களை வைத்து நம்மை கொல்வார்கள்? இந்த கொசுக்கடிக்கு மருந்தே இல்லையா?

இறுதியில் இரைச்சல், நிசப்தம் பற்றிய குறிப்பு ஒன்று எழுத்து வடிவில் வருகிறது. அது இல்லாமல் இருந்திருந்தால் இன்னும் நேர்த்தியாக இருந்திருக்கும் இந்நாடகம். 

இவ்விரு குறைகள் தவிர்த்து பார்த்தால் ஆர்ப்பாட்டம் இல்லாத தரமான படைப்பை நானு தந்துள்ளார் என்றே சொல்ல வேண்டும். வாழ்த்துகள்.   

   

லாக் டவுன் நாடகங்கள் - விமர்சனம் பகுதி 4

10. ஜில் ஜில்லும் கொரோனாவும்.

https://youtu.be/VOoyFqwh9ac 

நடிப்பு: லாவண்யா வேணுகோபால், மகேஷ்வர்.
மூல வசனம்: ஏ.பி.நாகராஜன், திரைப்பட இயக்குனர்.
நாடகமாக்கம், வசனம்: சுப்பு.
படத்தொகுப்பு: அனிருத்.
ஒளிப்பதிவு: ஐஸ்வர்யா ரவிசங்கர், அனிருத்.

க்ளாஸ்ஸிக் படங்கள் மற்றும் புகழ்பெற்ற நடிகர்களின் கேரக்டர்களை  மீட்டுருவாக்கம் செய்வது அக்னி பரீட்சைக்கு சமம். தமிழ் சினிமா என்று எடுத்துக்கொண்டால் சாவித்ரி, மனோரமா, சிவாஜி, நாகேஷ் ஆகிய ஜாம்பவான்களை போல நடிக்க நினைப்பது எரிமலைக்குள் வாக்கிங் போவதற்கு சமம். 

இதுபோன்ற முயற்சிகளை செய்து மண்ணை கவ்வியவர்கள் ஏராளம். மிகச்சிலர் மட்டுமே அந்த ஜாம்பவான்களின் புகழுக்கு களங்கம் இன்றி நடித்து பெயர் வாங்கி இருக்கிறார்கள். அப்படியான ஒரு முயற்சிதான் இது. 'தில்லானா மோகனாம்பாள்' ஜில்ஜில் ரமாமணி மனோரமாவாக லாவண்யாவும், 'மைனர் நாகலிங்கமாக  மகேஷ்வரும் நடித்துள்ளனர்.  

ஊரே முடங்கிப்போய் இருக்கும் சமயத்தில் கச்சிதமாக ஆடை மற்றும் ஒப்பனை பொருட்களை எங்கிருந்து பிடித்தார்கள் என்று தெரியவில்லை. நல்லவேளை மதன்பூர் மகாராஜா நம்பியாரின் கேரக்டரை தொடாமல்.. மைனர் நாகலிங்கத்தை தேர்வு செய்துள்ளார் மகேஷ்வர்.

ரமாமணியாக லாவண்யா. 'மனோரமா பேசிய வட்டார வழக்கு மற்றும் அவரது பிரமாதமான நடிப்பை எப்படி இவர் பிரதிபலிப்பார்? அதற்கான வாய்ப்பு மிகக்குறைவு' என உறுதியாக நம்பி நாடகத்தை பார்க்க துவங்கினால்.. நடந்தது வேறு.

முகபாவம், வசன உச்சரிப்பு என துல்லியமாக நடித்து மனோரமாவுக்கு பெருமை சேர்த்துள்ளார் லாவண்யா. கொஞ்சம் சொதப்பி இருந்தாலும் 'எதற்கு இந்த விபரீத முயற்சி?' என பலராலும் பகடிக்கு உள்ளாகி இருப்பார். ஆனால் ஜில் ஜில் ரமாமணியின் கேரக்டரை ஆழமாக உள்வாங்கிக்கொண்டு சிறப்பாக பிரதிபலித்து இருப்பது ஆச்சர்யம். வாழ்த்துகள். 

11. வாடகை வீடு.    

https://youtu.be/x6q8_2fC2t0

நடிப்பு: போத்திலிங்கம், சித்தார்த் வெங்கட்ராமன்.

இசை: குகப்ரசாத்.

ஒலி, இசைக்கோர்வை: விஸ்வஜெய்.

படத்தொகுப்பு: ம்ரித்யுஞ்ஜெய்.

கதை, வசனம், இயக்கம்: தாரிணி கோமல்.

    

முக்கியமான மீட்டிங் ஒன்றில் கலந்துகொள்ள செல்லும் இளைஞரின் கார் ஒன்று பஞ்ச்சர் ஆகிவிடுகிறது. அதனை சரி செய்ய காத்திருக்கும் வேளையில் ஊர் பெரியவர் ஒருவருடன் கலந்துரையாடும் சந்தர்ப்பம் வாய்க்கிறது.  பூமியின் வளத்தை வளர்ச்சி என்கிற பெயரில் நாசம் செய்வது பற்றி அந்த இளைஞனுக்கு எடுத்துரைக்கிறார்.

நிலப்பரப்பை மனிதகுலம் எப்படியெல்லாம் சுரண்டுகிறது என்பது பற்றி கருத்துள்ள வசனங்கள் மூலம் அழகாக முன்வைக்கிறார் தாரிணி கோமல். ஊர் பெரியவராக போத்திலிங்கம் மற்றும் இளைஞராக சித்தார்த். இயல்பான நடிப்பு. இறுதிக்காட்சியில் சித்தார்த் எடுக்கும் முடிவு செயற்கை.

குகப்ரசாத்தின் இதமான இசை கிராமத்து சூழலுடன் ஒன்றிப்போகிறது.

இயற்கை வளத்தை பாதுகாத்தல் என்கிற விழிப்புணர்விற்கு இதனை பார்க்கலாம். மற்றபடி ஒரு நாடகமாக பூரணத்துவம் பெறுவதற்கு கதை மற்றும் இயக்கத்தில் ஆர்கானிக் சத்து போதவில்லை. 

12. வெள்ளை மனம்.

https://youtu.be/xTNETtE-OdE 

நடிப்பு: மாதவ பூவராகமூர்த்தி மற்றும் பலர்.

இசை: குகப்ரசாத்.

ஒலி, இசைக்கோர்வை: விஸ்வஜெய்.

படத்தொகுப்பு: ம்ரித்யுஞ்ஜெய்.

கதை, வசனம், இயக்கம்: தாரிணி கோமல்.

எழுத்து, இயக்கம்: தாரிணி கோமல்.

அபார்ட்மெண்ட் ஒன்றில் குடியிருக்கும் சிறார்கள் மற்றும் பெற்றோர்கள் லாக்டவுன் பொழுதினை எப்படி கழிக்கிறார்கள் என்பதை சொல்கிறது இந்த படைப்பு.

யோகா, நடனம், செல்லப்பிராணி மீதான பாசம் என ஒவ்வொரு சிறுவர்க்கும் ஒவ்வொரு பயிற்சிகள் மற்றும் எண்ணங்கள். லாக் டவுன் முடிந்தபிறகு உடனே செய்ய நினைப்பது பற்றி பெரியவர்கள் பேசுகிறார்கள்.

செய்தி சேனல் ஒன்று அபார்ட்மெண்ட்வாசிகளை பேட்டி எடுத்தால் எப்படி இருக்குமோ அப்படி இருக்கிறது. ஒரு நாடக வடிவத்திற்கான கதை, இயக்கம் போன்றவற்றை 300 அடிக்கு ஆழ்துளை போட்டு தேடினாலும் கிடைக்கவில்லை. 

செய்தி பார்க்க விரும்பும் ரசிகர்கள் பார்க்கலாம். நாடக பிரியர்கள் சமூக இடைவெளியில் இருப்பது நலம்.     

லாக் டவுன் நாடகங்கள் - விமர்சனம் பகுதி 3

7. தபஸ்.

https://youtu.be/8qStbXAcZm0

நடிப்பு: கௌரி சுரேஷ், அனு சந்தோஷ், ரவி ஆதித்யா, சுரேஷ், சாந்தி ரவிசங்கர் ரவிசங்கர், ஸ்ரீனிவாசன்.

இசை: விஸ்வஜெய். எடிட்டிங்: ம்ரித்யுஞ்ஜெய். வாய்ஸ் ஓவர்: குகப்ரசதாத்.
கதை வசனம் இயக்கம்: முத்துக்குமரன்.
தயாரிப்பு: கணபதி சங்கர்.

லாக் டவுன் என்பதால் மகனும், தந்தையும் வீட்டில் இருக்க.. ஓயாமல் வேலை பார்க்கும் இல்லத்தரசியின் நிலையை சொல்லும் கதை. 

விடிந்ததும் காலை உணவிற்கு ஆளுக்கொரு மெனுவை தருவது, இரவு வீட்டிற்கு வந்ததும் மீண்டும் சாப்பிட்டுவிட்டு உறங்குவது என பெரும்பாலான ஆண்களின் வருடங்கள் வேகமாக உருண்டோடி விடுகின்றன. பல்வேறு வீட்டு வேலைகளை தனியாளாக சுமக்கும் தாய்/மனைவிக்கு துணையாக அந்த பாரத்தை பகிரும் எண்ணம் லேசில் வராது. 

இந்த யதார்த்தத்தை நம் மனதில் தைக்கும்படி நகைச்சுவை கலந்து படைத்துள்ளார் இயக்குனர் முத்துக்குமரன். நல்ல வசனங்கள் மற்றும் நடிப்பு. 

இரு குடும்பங்களின் கதை ஒன்றில் மாமியாராக வரும் கௌரி சுரேஷ்... பதட்டத்துடன் பார்வையாளர் பக்கம் பாப்பது, வசனத்தை மட்டும் ஒப்பிப்பது என மிக அமெச்சூர்தனமாக நடித்துள்ளார். இதற்கு முன்பாக இவர் நடித்த  மேடை நாடகங்களிலும் இதே நிலைதான். 

ஒன்று இவரது நடிப்பை மெருகேற்ற வேண்டும் அல்லது வேறொருவரை நடிக்க வைக்க வேண்டும். எந்த மாற்றமும் செய்யாமல் இருப்பதால்  தலைவலிதான் மிச்சம். விரைவில் ஆவன செய்து தலைவலியை போக்குமாறு கைகூப்பி கேட்டுக்கொள்கிறோம்.

இந்த ஒரு மைனஸை தவிர்த்து பார்த்தால் நல்லதோர் குடும்ப நாடகத்தை தந்துள்ள மயூரப்ரியா குழுவினருக்கு பாராட்டுகள். நம்மை சுயபரிசோதனை செய்து கொள்ள சொல்லும் நாடகங்கள் பல வந்தாலும் ஒருசில மட்டுமே தாக்கத்தை ஏற்படுத்தும். அவ்வகையில் தபஸை பார்க்கும் ஆண்கள் நிச்சயம் மாறுவார்கள் என நம்பலாம்.

8. ஹாப்பி கொரோனாஷ்வளி.

https://youtu.be/-PpIdJK97wY

நடிப்பு: ப்ரேமா சதாசிவம், லாவண்யா வேணுகோபால், மகேஷ்வர், சுப்பு.
எடிட்டிங்: அனிருத்.
கதை வசனம் இயக்கம்: லாவண்யா வேணுகோபால்.

2040 ஆம் ஆண்டு கொரோனா சம்மந்தப்பட்ட விஷயங்கள் எப்படி இருக்கும் எனும் கற்பனையுடன் உருவாக்கி இருக்கிறார்கள். ஓரிரு வசனங்கள் மட்டும் புன்முறுவலை வரவழைக்கிறது. மற்றபடி சொல்வதற்கு எதுவுமில்லை. இயக்குனர் லாவண்யாவின் கற்பனை குதிரைக்கு ஒரு பெரிய பக்கெட்டில் கபசுர குடிநீரை தந்து தெம்பாக ஓடவிட்டிருந்தால் ரசிக்கும்படி இருந்திருக்குமோ என்னவோ...

9. மனித உறவுகள்.

https://youtu.be/O99FiP1veek

நடிப்பு: வி.பி.ஸ்ரீராம், அனுராதா, ரமேஷ் சீனு, ஆனந்த் ராம்.
எழுத்து: கோமல் ஸ்வாமிநாதன்.
இசை: குகப்ரசாத்.
ஒலி & இசைக்கோர்வை: விஸ்வஜெய்.
படத்தொகுப்பு: ம்ரித்யுஞ்ஜெய்.
நாடகமாக்கம், இயக்கம்: தாரிணி கோமல்.

1984 ஆம் வருடம் விகடனில் வெளியான சிறுகதை இது. 'இலக்கிய சிந்தனை' சார்பாக சிறந்த சிறுகதைக்கான விருதை வென்றார் கோமல் ஸ்வாமிநாதன். 

அமெரிக்காவில் இருக்கும் மகனை பல ஆண்டுகளாக நேரில் காண இயலாமல் இருக்கும் பெற்றோர்கள். அவர்களுக்கு உதவியாக ஒரு வேலையாள் வந்து சேர்கிறார். சில காலம் கழித்து இந்தியாவிற்கு வருவதாக மகனிடம் இருந்து தொலைபேசி அழைப்பு வருகிறது. அவனது வருகை இந்த பெற்றோர்கள் மனதில் எவ்வித மாற்றத்தை உண்டாக்குகிறது?

பெற்றோர்களாக வி.பி.ஸ்ரீராம் மற்றும் அனுராதா. கதாபாத்திரத்திற்கு சாலப்பொருத்தம். 1980 களின் காலகட்டத்தை மனதில் வைத்துப்பார்த்தால் இன்னும் அழுத்தமாக பதியும். நெகிழ்வான இறுதிக்காட்சி.    

கோமல் ஸ்வாமிநாதனின் சிறுகதைக்கு எவ்வித சேதாரமும் இன்றி நன்றாக நாடகமாக்கம் மற்றும் இயக்கத்தினை செய்துள்ளார் தாரிணி கோமல். 

   

லாக் டவுன் நாடகங்கள் - விமர்சனம் பகுதி 2

4. உதவிக்கு வரலாமா?

https://youtu.be/i0cCtWi2bFc

நடிப்பு: ஒய்.ஜி.மகேந்திரன், சுதா, ரத்னம் கூத்தபிரான்.
இசை: அருண் கிருஷ்ணன். கதை, வசனம்: ரத்னம் கூத்தபிரான். இயக்கம்: விக்னேஷ் ரத்னம்.

பென்ஷன் தொகை கேட்டு நீண்ட நாட்களாக அல்லல்படும் நடராஜன் என்பவரை மையமாக கொண்ட கதை. நடராஜனாக ஒய்.ஜி.மகேந்திரன், அவரது இல்லத்தரசியாக நிஜ இல்லத்தரசி சுதா. இருவரின் நடிப்பும் நிறைவு. 

பென்ஷன் - உயில் ஒப்பீடு, காஃபி சாப்புடறீங்களா வசனங்கள் நன்று. மற்றபடி நாடகத்திற்கான தன்மை இன்றி சாதாரண அரசாங்க பிரச்சாரப்படம் போல முடிகிறது. ஒரு இயக்குனராக விக்னேஷின் தனித்தன்மை இல்லாமல் போவது பெருங்குறை.

5. கோமதி அம்மா. 

https://youtu.be/KsS6wOfK3Kw

நடிப்பு: மாலதி சம்பத், கிரிஷ் அய்யபத், ஜெயகுமார்.

எழுத்து, இயக்கம்: பூவைமணி மற்றும் சந்திரமோகன்.

கேமரா: நரேன் பாலாஜி, சிபி, அசோக் குமார். எடிட்டிங்: கௌதம்.     

தயாரிப்பு: கலைவாணி டிஜிட்டல் மீடியா, மதர் க்ரியேஷன்ஸ்.

காலையில் வீட்டின் அறை ஒன்றினை பூட்டியபடி இறைவழிபாட்டில் அமர்கிறார் கோமதி அம்மா. ஏன் என்பதற்கான காரணம் புரியாமல் தவிக்கிறார்கள் அவரை பாதுகாப்பவர்கள். ஆறரை நிமிடத்தில் எடுக்கப்பட்ட குறுநாடகம். 

எப்போதும்போல மனதைத்தொடும் அம்மாவாக நடிப்பில் மிளிர்கிறார் மாலதி. நாடகத்திற்கு வலுசேர்க்கும் விதமாக கிரிஷ் அய்யபத்தின் இருப்பும் சிறப்பு.

ஆனால் கதை, இயக்கம்? பிள்ளைகள் மீது நிபந்தனையற்ற பாசம் வைப்பதில் 'பெரும்பாலான' இந்திய/தமிழக தாய்மார்கள் எப்போதும் ஒரு படிமேல் என்பது அனைவரும் அறிந்ததே. ஆகவே இந்த நிதர்சனத்துடன் ஒருசில நுணுக்கமான காட்சி/வசன அமைப்பு கூட இன்றி தட்டையாக நகர்ந்தால் எப்படி?

வாசகர்கள்/பார்வையாளர்கள் மீது வைக்கப்படும் உச்சக்கட்ட எமோஷனல் ப்ளாக் மெயில் என்றால் அது அம்மா பாசம் மற்றும் கடவுள் பக்திதான். இவை இருந்தால் மட்டும் போதும். மற்ற குறைபாடுகளை கண்டுகொள்ள மாட்டார்கள் எனும் எண்ணம் எட்டிப்பார்க்கும் நேரத்தில் ஒரு வசனகர்த்தா/இயக்குனரின் 'படைப்பினை செதுக்கும் தன்மை' வலுவிழந்து போகும் என்பதற்கு இது மற்றுமோர் எடுத்துக்காட்டு.

அம்மா...அம்மம்மா!!

6. ஒத்திகை.

https://youtu.be/HCFi5z4IEvY

நடிப்பு:  வி.பி.ஸ்ரீராம், கணபதி சங்கர், முத்துக்குமரன், பாலசுப்ரமணியன்.

இசை: குகபிரசாத், விஸ்வஜெய்.  எடிட்டிங்: ம்ரித்யுஞ்ஜய்.

கதை, வசனம், இயக்கம் - முத்துக்குமரன்.

தயாரிப்பு: கணபதி சங்கர்.

லாக்டவுன் நேரத்தில் ஒத்திகை பார்ப்பது சம்மந்தமாக நாடகக்குழுவினர் நடத்தும் உரையாடலை கொண்ட கதை. வி.பி.ஸ்ரீராம், கணபதி சங்கர், முத்துக்குமரன், பாலசுப்ரமணியன் ஆகியோரின் நடிப்பு யதார்த்தம்.

Saree Falls - False, தண்ணி அடிப்பது, நீ தைப்பது எனக்கு மனதை தைக்கிறது என ஹைதர் அலி காலத்து நகைச்சுவை பாணி 2020 ஆம் ஆண்டிலும் தொடர்கிறது.. இதை கேட்பதற்கு பதில் மதிய நேர அக்னி வெயிலில் நிற்பது எவ்வளவோ மேல். 'தயவு செய்து வசனம் எழுதும் பாணியில் மாற்றங்களை கொண்டு வாருங்கள் முத்துக்குமரன்'  என்று அவரது கால் சுண்டுவிரலை இழுத்துப்பிடித்து கெஞ்ச தோன்றுகிறது.

'நாடகத்திற்குள் நாடக ஒத்திகை' என்பது உண்மையாகவே நாடகம் பார்க்கிறோம் எனும் உணர்வை தர வேண்டும். ஆனால் சாதாரண உரையாடல்களைத்தாண்டி சுவாரஸ்யம் எதுவுமில்லை. 

கதை, வசனம், இயக்கத்தில் நன்றாக ஒத்திகை பார்த்திருக்க வேண்டும்.  

லாக் டவுன் நாடகங்கள் - விமர்சனம்

கோடை நாடக விழா நடக்கவிருந்த நேரத்தில் லாக்டவுன் அறிவிப்பு எதிர்பாராதது. ஆனால் அதற்காக முடங்கி விடாமல் யூ ட்யூப் வழியே குறு நாடகங்களை வெளியிடும் நாடகக்குழுக்களின் ஆர்வத்தை பாராட்ட வேண்டும்.  ஏதேனும் ஒரு வடிவத்தில் தமிழ் நாடகங்கள் இயங்கிக்கொண்டே இருக்கும் என்பதற்கு இது ஒரு சிறந்த உதாரணம்.

ஒவ்வொருவரும் வீட்டில் இருந்தபடியே நடிப்பது, அதற்கேற்ப வசனம் எழுதி இயக்குவது, அக்காட்சிகளை கோர்ப்பது என சவாலான விஷயங்கள் இருப்பதை மறுப்பதற்கில்லை. ஆகவே தொழில்நுட்ப குறைபாடுகள் பற்றிய விமர்சனம் தவிர்க்கப்படுகிறது. அதேநேரத்தில்...நாடகத்தின் நீளம் சில நிமிடங்களே என்றாலும்.. அதிலும் நல்ல கதையம்சம், வசனம், இயக்கம் மற்றும் நடிப்பு உள்ளிட்டவை இருந்தால்தான் ரசிக்க இயலும். 

அதுபோன்ற தரத்தில் இந்த யூ ட்யூப் நாடகங்கள் இருந்தனவா? காண்போம் இனி... 

1. அப்பா - சௌம்யா தியேட்டர்ஸ்.  

https://youtu.be/941KDziLgso

நடிப்பு: ஆனந்த் ஸ்ரீனிவாசன், பி.டி.ரமேஷ், கௌஷிகா.
கதை, வசனம் - டி.வி.ராதாகிருஷ்ணன்.
எடிட்டிங், இசை மற்றும் இயக்கம்: ஆனந்த் ஸ்ரீனிவாசன்.

குணச்சித்திர/சோகமான அப்பா கேரக்டர் என்றால் பி.டி.ரமேஷுக்கு அல்வா சாப்பிடுவது போல. ஆனால் நமக்குதான் சற்று திகட்டும். இங்கும் அதே கேரக்டர். மகனாக ஆனந்த் ஸ்ரீனிவாசன். ஆங்காங்கே இவர் தரும் சீரியஸ் ரியாக்சன்கள் நல்ல நகைச்சுவை.

தந்தையின் நற்குணத்தை மகன் மதிக்க வேண்டும் எனும் நல்லெண்ணத்தில் டி.வி.ராதாகிருஷ்ணன் எழுத, ஆனந்த் இயக்கியுள்ளார். இருவரும் நிறைய காம்ப்ளான் குடிக்க வேண்டும்.

2. என்னத்த சொல்ல - ஸ்டேஜ் க்ரியேஷன்ஸ்.

https://youtu.be/QhfDASIFDa0

நடிப்பு: காத்தாடி ராமமூர்த்தி, லாவண்யா வேணுகோபால், மகேஷ்வர்,  கீதா நாராயணன், ஸ்ரீனிவாஸ்.
எடிட்டிங், இசை: கௌஷிக்.
கதை, வசனம், இயக்கம் - எஸ்.எல். நானு.

கணவர், மாமியார், மாமனார் ஆகியோரை பற்றிய அறிமுக படலத்தை செய்கிறார் இல்லத்தரசி நந்தினி. எடுத்த எடுப்பிலேயே ஜானகி பற்றி மாமனார் சிவராமன் சொல்லும் கலகலப்பான விஷயத்துடன் துவங்கும் நாடகம் கிட்டத்தட்ட பனிரெண்டரை நிமிடங்கள் தொய்வின்றி நகர்கிறது.

'ரெண்டு ஆனியன் ரவா ஊத்தப்பம், சீரியலை பார்ப்பது, மகனை கிண்டல் செய்வது என காத்தாடி ராமமூர்த்தியின், ஸ்ரீனிவாசன் கூட்டணி சிரிப்பில் ஆழ்த்துகிறது. 

இரு பெண்கள் பெயரைக்குறிப்பிட்டு வைக்கும் சஸ்பென்ஸ் சுவாரஸ்யம். வழக்கம்போல இறுதியில் ஒரு சமூக கருத்துடன் நிறைவாக முடிகிறது.

லாவண்யா, கீதா, மகேஷ்வர் உள்ளிட்டோரின் நடிப்பிலும்குறையில்லை.

நகைச்சுவை மற்றும் சமூக கருத்தினை கொண்ட குறுநாடகம் எப்படி இருக்க வேண்டும் என்பதற்கான தெளிவுடன் அழகாக கதை, வசனம் எழுதி இயக்கியுள்ளார் நானு. நாடகத்தின் நீளம் சிறிதென்றாலும் முழு மேடை நாடகம் பார்த்த திருப்தி.  

3. காதலிக்க கத்துக்கடா - ஸ்டேஜ் க்ரியேஷன்ஸ்.

https://youtu.be/S9pI4BYYyQU

நடிப்பு: காத்தாடி ராமமூர்த்தி, சுப்பு, லாவண்யா வேணுகோபால், வெங்கடேஷ்.
எடிட்டிங், இசை: கௌஷிக்.
கதை, வசனம், இயக்கம்: எஸ்.எல். நானு. 

தற்கொலை செய்யப்போகும் சுரேஷை பெரியவர் சிவராமன் எப்படி கையாள்கிறார் என்பதே கதை.

இதுபோன்ற கதையமைப்பு முன்பே வந்தவை என்பதால் நேரம் போகப்போக எதிர்பார்ப்பு குறைய ஆரம்பிக்கிறது. தம்பதியர்களுக்கு இடையே இருக்கும் முரணை தீர்க்க சிவராமன் தரும் ஐடியாவும், க்ளைமாக்ஸும் சுமாராகவே இருக்கிறது.  

காத்தாடி ராமமூர்த்தியின் ஒருசில நகைச்சுவை தவிர்த்து பெரிய ஈர்ப்பை தராமல் போகிறது. என்னத்த சொல்ல..