CINEMA SHOULD MAKE YOU FORGET YOU ARE SITTING IN A THEATER – ROMAN POLANSKI

Tuesday, January 28, 2014

Prankly ஸ்பீக்கிங் வித் அர்னாப்!!







தேசிய ஊடகங்களில் 'முதல்வன்' பாணி பேட்டிகளை நான் பார்க்க ஆரம்பித்தது கரன் தாபரின் CNN-IBN டெவில்ஸ் அட்வகேட் நிகழ்ச்சி மூலமாகத்தான். அதிகபட்சம் 20 நிமிடங்கள் மட்டுமே நீடிக்கும் பேட்டியில் வீர தீர சூர அரசியல்வாதிகளைக்கூட நாக்கில் நுரை தப்ப வைப்பார். தாபரின் ரேசர் ஷார்ப் பார்வை, கம்பீர குரல் மட்டுமே போதும். எதிரில் அமர்பவரின் பேஸ்மன்ட் கிடுகிடுக்கும். பர்வேஸ் முஷரப், நரேந்திர மோடி ஆகியோரை தாபர் மடக்கியபோது முகம் சிவந்து அவர்கள் க்ளாஸ் டம்ளர் தண்ணீரை பதற்றத்துடன் அருந்திய நிமிடங்கள் இன்னும் நினைவில் இருந்து மறையவில்லை. கபில் சிபல் போன்ற வெகு சிலர் மட்டுமே தாபருக்கு தண்ணி காட்டிய ஜித்தர்கள். பிற்பாடு அதுபோன்ற அதிரடி பேட்டிகள் அரிதாகவே நிகழ்ந்தன என்று சொல்லலாம். நேற்று அர்னாப் மூலமாக அந்த குறையும் தீர்ந்தது.

விளம்பரம்/தம்பட்டம் அடிப்பதில், அதிக சப்தம் போடுவதில் டைம்ஸ் நவ் சேனலுக்கு இணை அதுதான். குறிப்பாக அர்னாப். சென்ற ஆண்டு சில முக்கிய புள்ளிகளை திணற அடிக்கிறேன் பேர்வழி என்று அவர்களிடம் சிக்கி கோல் வாங்கினார் அர்னாப். அதன் பிறகு 'ந்யூஸ் ஹவர்' பார்ப்பதை பெரும்பாலும் குறைத்துக்கொண்டேன். சமீபகாலமாக தந்தி டி.வி. ரங்கராஜ் பாண்டே 'தமிழகத்தின் அர்னாப்' ஆக கடும் முயற்சி  எடுத்து வருகிறார். 'கேள்விக்கென்ன பதில்' மூலம் பகிரங்கமாக கேள்விகளை முன்வைத்து பேட்டி எடுத்தது அவரை கவனிக்க வைத்தது. 'ப்ரெஞ்ச் தாடி' அவருடைய பிரம்மாஸ்திர உறை. ஒருமுறை கார்த்திக் சிதம்பரத்திடம் சிக்கி சின்னாபின்னம் ஆனார் பாண்டே. பேட்டி எடுப்பதில் கடக்க வேண்டிய தூரம் அவருக்கு இன்னும் இருக்கிறது என ஊர்ஜிதம் ஆனது. 

நேற்று முழுக்க 'இந்திய ஊடகங்களில் மிகப்பெரிய பேட்டி, பார்த்தே ஆக வேண்டும்' என டைம்ஸ் நவ் நம் காதின் மீதமர்ந்து அலறியது. Frankly Speaking with Arnab சிறப்பு பேட்டியில் 'கை'ப்புள்ள ராகுல். மொத்த பேட்டியையும் காணும் வாய்ப்பு கிட்டியது. முதல் கேள்வியிலேயே பட்டாசு கிளப்ப ஆரம்பித்தார் அர்னாப். குஜராத்/சீக்கியர் கலவரம்/படுகொலை, காங்கிரஸ் ஊழல் உள்ளிட்ட எந்த கேள்விக்கும் நேரடி பதில் தரவில்லை ராகுல். 'பெண்கள் முன்னேற வேண்டும், இளைஞர்களை ஒன்று திரட்ட வேண்டும்' ரீதியில் கூச்சமின்றி ஒரு மணிநேரம் சம்மந்தம் இல்லாமலே பதில் அளித்தார் நல்லதம்பி. 'நான் கேட்ட கேள்விக்கு மட்டும் பதில் தாருங்கள்' என அர்னாப் பலமுறை சொல்லியும் பயனில்லை. 


மோடி குறித்து எழுப்பப்பட்ட கேள்விகளுக்கு மழுப்பி தள்ளினார் 'நாளைய' காங்கிரஸ் தலைவர். "சீக்கிய கலவரம் நடக்கும்போது நான் சிறுவனாக இருந்தேன். அப்போதைய காங்கிரஸ் ஆட்சியில் எனது பங்கு எதுவும் இல்லை" போன்ற பிரமாதமான பதில்களை சொல்லி அர்னாப்பை மிரள வைத்தார். "லாலு போன்ற ஊழல் கறை படிந்தவரிடம் கூட்டணி வைக்கிறீர்களே?" என கேட்டதற்கு கிடைத்த பதில் "நாங்கள் அவரது கட்சியுடன் தான் கூட்டணி வைத்துள்ளோம். லாலு எனும் தனிநபருடன் அல்ல".  'என் சம்பள பாக்கிய இப்பவே செட்டில் பண்ணுங்க. ஓடிடறேன்' என்று அர்னாப் அலறாத குறைதான்.

"10 வருஷம் One on One பேட்டி குடுக்காம இருந்தது எவ்ளோ பெரிய ராஜதந்திரம். அப்படியே இருந்து இருக்கலாம். என்னா அடி" லெவலுக்கு ராகுல் முகம் பேயறைந்தது போல் ஆகத்தொடங்கியது. ஒரு கட்டத்தில் வெறியாகி (ஆனாலும் நீங்க ரொம்ப தமாசு தம்பி) "நானும் வந்ததுல இருந்து பாக்கறேன். உருப்படியா ஒரு கேள்வி கேட்டியா? பெண்கள் முன்னேற்றம், இளைஞர்கள் இணைப்பு, Funda'mental' பிரச்னைகள் பத்தி பேசாம எதை எதையோ கேக்குற" (இதுக்கு மேல அடிச்ச அழுதுருவேன்). அர்னாப்: "அதுக்கு உங்க பிரச்சார மேடைல வந்து உக்காந்தா போதாது? இது இன்டர்வியூ ராகுல். இப்படித்தான் கேக்க முடியும்".  தலைகுனிந்தார் காங்கிரஸ் துணை ஜனா.  

அடுத்து: "மோடியுடன் ஒரே மேடையில் விவாதிக்க தயாரா?". நம்ம தம்பி: "பெண்கள் முன்னேற வேண்டும். இளைஞர்கள்....". மண்டை காய்ந்த அர்னாப் "பேசாமல் RTI போட்டு பதில்களை வாங்கினால் என்ன? இந்தாளு நம்மள ராக்கிங் பண்ணிட்டே இருக்காரே?" நிலைக்கு தள்ளப்பட்டார். மூச்சுக்கு முப்பது தரம் "சிஸ்டத்தை மாற்ற வேண்டும். சிஸ்டத்தை மாற்ற வேண்டும்" என்றார் ராகுல். செம அட்டாக். ஒரு வருஷமா ஒரே லாப்டாப்போட டி.வி. ப்ரோக்ராம் பண்ணா? கேக்கத்தான் செய்வாங்க. அட்லீஸ்ட் சிஸ்டம் லேபிளையாவது மாத்துங்க கோஸ்வாமி. சார் சொல்றாருல்ல.

மொத்தத்தில் இப்படி ஒரு 100% மொக்கையான, சம்மந்தமில்லாத, பொறுப்பற்ற பதில்களை எந்த ஒரு இந்திய தலைவரும், ஏன் கட்சியின் கீழ்மட்ட பிரதிநிதி கூட தமது பேட்டிகளில் சொன்னதில்லை. இப்படிப்பட்ட நபரிடம் இந்தியாவை ஆளும் பொறுப்பை தந்தால் மக்கள் என்ன கதிக்கு ஆளாவர்கள் எனும் பேரச்சம் குடிகொள்கிறது. பேசுவதில் கோல்ட் மெடல் வாங்கிய மோடி, லாலு, அருண் ஜெட்லி ஆகியோரையும் அர்னாப் இதுபோன்று வெளுத்து வாங்கினால் அட்டகாசமாய் இருக்கும். பாவம் ராஜா வீட்டு கன்னுக்குட்டியை புலிக்கூண்டுக்குள் அடைத்து மிரண்டோட வைத்து விட்டார். Bad Times Now for the Prince.

எது எப்படியோ கொஞ்சமும் திசை மாறாமல் அனல் பறக்கும் கேள்விகளை கேட்டு பட்டையை கிளப்பிய அர்னாப். ஹாட்ஸ் ஆப்!!
 ..........................................................................





Thursday, January 23, 2014

2014 சென்னை புத்தகக்காட்சி - 4






சென்ற வார இறுதியில் 'இணைய அரசியல் சாணக்யர்' ரஹீம் கஸாலியிடமிருந்து  அழைப்பு வர மீண்டும் புத்தகக்காட்சி பக்கம் ஆஜர். இருவருமாக இணைந்து பல்வேறு கடைகளை சுற்றிப்பார்த்தோம். 'ஒரு சாமானியனின் கதை' எனும் அரசியல் நூலை கஸாலி கரம் பிடிக்க அடுத்து எம்.ஜி. ஆர். பற்றி எழுதப்பட்ட 'நான் ஏன் பிறந்தேன்?' புத்தகத்திற்கான பெருந்தேடலை நடத்தினார். பலனில்லை. 

பயணத்தினூடே பதிவர் ஜாக்கி சேகர் கண்ணில் பட அவரிடம் சற்று உரையாடிய பிறகு புதுகை அப்துல்லாவும், டாக்டர் ப்ரூனோவும் எதிர்பட 30 நிமிடங்களுக்கு அரசியல் கருத்துகள் பரிமாறப்பட்டன. வழக்கம்போல விலைமதிப்பில்லா டீயை ஸ்பான்சர் செய்தார் அப்துல்லா அண்ணன். அவர்களிடம் உரையாடிய பிற்பாடு கலைஞர் ஸ்டாலில் புகுந்தார் 'தி.மு.க. வின் மறைமுக அனுதாபி' கஸாலி. நேராக இருந்த கலைஞர் புத்தகமொன்றை தலைகீழாக வைத்துவிட்டு சட்டென வெளியேறினார். காரணம் பிடிபடவில்லை.  

சனி மற்றும் ஞாயிறன்று பிலாசபி, ஆரூர், அஞ்சாசிங்கம் ஆகியோருடன் உலாத்தல். இம்முறை ஓரளவு உஷார் ஆன ஆரூர் மகுடிக்கு மயங்காமல் தனக்கு பிடித்த புத்தகங்களை மட்டுமே வாங்கினார். குறிப்பாக கல்யாண ஆல்பம் சைசில் ரூ. 500 தந்து பிலிம் நியூஸ் ஆனந்தன் புத்தகத்தை வாங்கியது  டிஸ்கவரி வேடியப்பனாரை அகம் மகிழ செய்தது. புலவர் ராமானுஜம், சுகுமார் சுவாமிநாதன், சிராஜுதீன், கவியாழி, செல்லப்பா, பாலகணேஷ், ஸ்கூல் பையன், சீனு, ரூபக் உள்ளிட்ட பதிவர்களை சந்தித்ததில் மகிழ்ச்சி. இணைய வாசகர் ஷரவ்வுடன் நடந்த உரையாடலும் அடக்கம். புத்தகம் போட்ட குற்றத்திற்காக ஆளுக்கொன்றாக மொத்தம் 14 குல்பி ஐஸ் வாங்கித்தந்த குடந்தை சரவணன் புகழ் வாழ்க.

ஆன் தி வேயில் நாங்கள் சந்தித்த முக்கியமான இலக்கியவாதி நாகராஜ சோழன்( எம்.ஏ., எம். எல். ஏ). சில ஒளிவட்ட நூல்களின் பெயர்களை சொல்லி திணறடித்தார் மனிதர். காலச்சுவடி ஸ்டாலில் கிருஷ்ண பிரபு என்பவர் பிரச்சார பீரங்கியாக முழங்கி பெருமாள் முருகனின் புத்தகங்களை தலையில் கட்ட பெரும் முயற்சி எடுத்துகொண்டிருந்தார். 

                                                             'இணைய அரசியல் சாணக்யர்' ரஹீம் கஸாலி

கண்காட்சியின்  இறுதி நாள் நெருங்கியதால் 22 ஆம் தேதியன்றும் தொடர்ந்தது எனது சிற்றுலா. சீமான், கோபண்ணா, பழ. கருப்பையா போன்ற அரசியல் பிரமுகர்கள் பேச்சரங்க வாசலில் தென்பட்டனர். தோழர் நிஜந்தன் இணையத்தில் குறிப்பிட்ட 'போர்க்குதிரை' புத்தகத்தை அகநாழிகையில் வாங்கினேன்.

தனியுலா தொடர...டிஸ்கவரி புக் பேலஸ் வாசலில் எதிர்பாராத சந்திப்பொன்று நிகழ்ந்தது. அங்கே நான் கண்டது அபி அப்பா மற்றும் அவரது சகோதரர் கொக்கரக்கோ சௌம்யன் ஆகியோரை. கிட்டத்தட்ட ஒரு மணிநேரம் முழுக்க அரசியல் சார்ந்த கருத்து பரிமாற்றங்கள் நிகழ்ந்தன. தி.மு.க.வின் கீழ்மட்ட தொண்டர்கள் பற்றிய சுவாரஸ்யமான தகவல்கள், கருணாநிதி ஸ்டாலின் ஆகியோரின் அரசியல் பண்பு உள்ளிட்ட பல்வேறு தகவல்களை அள்ளித்தந்தனர் இருவரும். 'தி.மு.க.வை மட்டும் கடுமையாக சாடுபவன்' எனும் பிம்பத்தை உடைக்க சௌம்யன் அவர்களிடம் சற்று பாடு பட வேண்டியிருந்தது எனக்கு. அரசியலைத்தாண்டி அன்பான சகோதரர்கள் எனும் முறையில் பொறாமைப்பட வேண்டி இருந்தது எனக்கு. மறக்க முடியாத சந்திப்பு!! 

இனி நான் வாங்கிய புத்தகங்கள்...

கார்த்திக் ஸ்ரீநிவாஸின் 'மர்மயோகி நாஸ்டிரடாமஸ்'.
வெளியீடு: வானவில் புத்தகாலயம். பக்கங்கள் 252. ரூ.160

சசி வாரியாரின் 'தூக்கிலிடுபவரின் குறிப்புகள்'
வெளியீடு: எதிர். பக்கங்கள் 271. ரூ.220

சோவின் 'அதிர்ஷ்டம் தந்த அனுபவங்கள்' 
வெளியீடு: அல்லையன்ஸ் பக்கங்கள் 452. ரூ.200

மாட் விக்டோரியா பார்லோவின் 'நீராதிபத்தியம்'
வெளியீடு: எதிர். பக்கங்கள் 248 ரூ.200

மனோகர் தேவதாஸின் 'எனது மதுரை அனுபவங்கள்'
வெளியீடு: கண்ணதாசன் பதிப்பகம். பக்கங்கள் 368 ரூ.200

தஸ்லிமா நஸ்ரினின் 'லஜ்ஜா'
வெளியீடு: கிழக்கு பதிப்பகம் பக்கங்கள் 231 ரூ.200 

ரகோத்தமனின் 'ராஜீவ் கொலை வழக்கு'
வெளியீடு: கிழக்கு பதிப்பகம் பக்கங்கள் 221 ரூ.200 

பக்கத்திற்கு எட்டணா என்று பட்ஜெட் ஒதுக்கியே புத்தகங்கள் வாங்கி வந்தேன். ஆனால் சென்ற ஆண்டு நிலவரம் 75 பைசா என்றாகி தற்போது கிட்டத்தட்ட ஒரு பக்கம் ஒரு ரூபாய் என்று கலவரமாகும் அளவிற்கு தரமான புத்தகங்களின் விலைகள் ஏறிவிட்டன. எனவே அடுத்த புத்தக கண்காட்சியில் அதிகபட்சம் 5 புத்தகங்கள் வாங்கினாலே சாதனைதான். கேட்டால் ப்ரிண்டிங் செலவுகள் அதிகமாகிவிட்டன என்கிறார்கள். அது உண்மை என்றாலும், சில ஆண்டுகளுக்கு முன்பு வந்த புத்தகங்களை கூட ஸ்டிக்கர் ஒட்டி அல்லது கவர் போட்டு வாசகன் தலையில் கட்டுவது கேவலமான செயலாக படுகிறது. 

இதுபோக பெரிய எழுத்துக்களை அச்சிட்டு பக்கங்களை நிரப்புவது, தேவையற்ற புகைப்படங்களை போடுவது, வரிகளுக்கு இடையே பெரிய இடைவெளி விடுவது போன்ற பல்வேறு டக்கால்டி வேலைகளை செய்கிறார்கள். தயவு செய்து இனி புத்தக விற்பனையை சேவை என்று சொல்லி ஊரை ஏமாற்ற வேண்டாம். இது வெறும் வியாபாரம் மட்டுமே. சிலரிடம் மட்டுமே குடிகொண்டிருக்கிறது நேர்மை. இதே கதியில் இவர்கள் இயங்கினால் வாசிப்பை விரும்புவோர் இனி இணையம் மூலம் மின் இதழ்களை வாசித்தாலே நலம் என பரிந்துரைக்கிறேன். அப்புத்தகங்கள் இடத்தை அடிக்காது, பராமரிக்க பாடு பாடவும் வேண்டாம். 

குறிப்பு: தோழர் கஸாலி படிக்க விரும்பிய 'நான் ஏன் பிறந்தேன்?' புத்தகம் எம்.ஜி.ஆரின் பிறந்த தினமான ஜனவரி 17 ஆம் தேதி கண்ணதாசன் பதிப்பகத்தில் விற்பனைக்கு வந்தது. மொத்தம் இரண்டு பாகம். கவர் போடப்பட்டு இருந்தது.  இரண்டின் விலையையும் சேர்த்தால் 960 ரூபாய்!!!

'தம்பி நான் படித்தேன் காஞ்சியிலே நேற்று. அதை நான் உனக்கு சொல்லட்டுமா இன்று' என புத்தகம் படித்தவர்கள் கதை சொன்னால் மட்டும் கேட்டுக்கொள்க மக்களே!!
 ...................................................................      

            


Friday, January 17, 2014

2014 சென்னை புத்தகக்காட்சி - 3





    ஆல்மோஸ்ட் அதிகாரப்பூர்வ ஊர்தி: நம்ம ஆட்டோ. வலதுபக்க மாடல்: கோவை ஆவி. 

புத்தகக்காட்சியின் இரண்டாம் நாள்(ஞாயிறு) இரவு. சிறிது நேரம் கேபிள் சங்கருடன் உலா. உணவகத்தில் டெல்லி அப்பளம் சாப்பிட றெக்கை கட்டி பறக்க துவங்கினார். பெரிய தட்டு அகலத்தில் இருக்கும் அப்பளத்தின் மேனியில் மசாலாத்தூவல். ருசி பார்த்துவிட்டு வெளியே வந்தால் அதிஷா, சுரேகா தென்பட....ஸ்டான்ட் அட் ஈஸ். அருகில் இருந்த 'மினிமெல்ட்ஸ்' குளுகுளு கூல் பற்றி அதன் ப்ராண்ட் அம்பாசிடர் சுரேகா பேசியதோடு ஒரு ஐஸ்க்ரீம் கப்பையும் எடுத்து வந்து ருசி பார்க்க சொன்னார். சின்னஞ்சிறு பூந்தி சைசில் இருந்த அந்த ஐஸ்க்ரீம் -48 டிகிரியில் குளிரூட்டப்பட்டது என்றவர் சொல்ல 'என்ன இருந்தாலும் சாப்பிட்டதுக்கு அப்பறம் டேஸ்ட் நிக்கல' என்று நின்றவாறே அடுப்பை பற்ற வைத்தார் கேபிள். இருவரும் சிறிது நேரம் ஆக்ஸா ப்ளேடில் கீறிக்கொள்ள சம்பிரதாயத்திற்கு ஒரு துளியை உட்தள்ளினேன்.

நாள் மூன்று(திங்கள்): கோவையில் இருந்து 'உலக சினிமா ரசிகன்' பாஸ்கரன். நேரில் சில முறை அவரை சந்தித்து இருந்தாலும் மனம் விட்டு பேச வாய்ப்பின்றி போனது. அக்குறை அன்றைய தினம் நிவர்த்தி செய்யப்பட்டது. இருவருமாக அரங்கினுள் நுழைந்தோம். முந்தைய ஆண்டுகளில் ஸ்டால் போட்டிருந்ததால் உள்ளே அவருக்கு பல ஸ்டாலாதிபதிகள் வழி நெடுக வணக்கம் வைத்தனர். பரஸ்பரம் இவரும். சினிமா, அரசியல் தாண்டி புத் க்கக்காட்சி மற்றும் கண்ணில் பட்ட சில புத்தகங்கள் உருவான பின்னணி குறித்து பல்வேறு தகவல்களை காலாற நடந்தவாறே அள்ளித்தந்தார் பாஸ்கரன்.

மதிய உணவு வேளை நெருங்கியதால் 'சாப்பிட வாங்க' கூடாரத்தினுள் நுழைந்தோம். கடந்த காலத்தில் கொச கொசவென்றிருந்த உணவக மையம் இம்முறை சிறப்பாக பராமரிக்கப்பட்டு இருந்தது. அட்வான்ஸ் பில் வாங்கும் இடத்தில் நின்றிருந்த நேரம் பார்த்து 'பிலாசபி சொன்ன கரிசக்காட்டு மைனா இதுதானா?' எனக்கூவினார் உ.சி.ர. 'இப்படியா உசிர வாங்கணும்?' என டென்ஷன் ஆகி டாபிக்கை வேறு பக்கம் திருப்பினேன். அக்குயிலை பார்ப்பதற்காகவே மேலும் சிலமுறை கவுண்டர் பக்கம் போய் வரச்சொன்னது படவா ராஸ்கோல் மனசு.

சாதங்கள், சாதா தோசை எல்லாம் ரூ50, 60 க்கும், மூன்று மினி பஜ்ஜிகள் 30 ரூபாய்க்கும், காலி பிளவர் பக்கோடா ரூ.40 க்கும் விற்கப்படுகின்றன. தரம் ஓகே தான். 'இப்படி அநியாயத்துக்கு விக்கறாங்களே? அந்த காசுக்கு இன்னும் ரெண்டு புக்கு வாங்கிடலாம்?' என்று சில அம்பிமார்கள் இணையத்தில் அலறினர். தூரத்தில் இருந்து புத்தகங்கள் வாங்க வருபவர்களுக்கு இதை விட்டால் வேறு சாய்ஸ் இல்லை. அதுபோக தரத்தில் பெரிய குறை இல்லாததால் சபிப்பதிலும் அர்த்தமில்லை. பழைய புத்தகங்களை புதுக்கவர் போட்டு 30 அல்லது 40 ரூபாய் அதிகம் வைத்து விற்கும் அராஜகம் புத்தகக்காட்சி அரங்கினுள் நடப்பதை தட்டிக்கேட்க வக்கில்லாதவர்கள் ஷங்கர் பட ஜூனியர் ஆர்டிஸ்ட் போல பொங்குவது பெரிய காமடி. 
   


அப்படியே வெளியே சென்று சாப்பிட நினைத்தாலும் கஷ்டப்படத்தான் வேண்டும். ஒய்.எம்.சி.ஏ. அருகில் தரம் மற்றும் நியாயமான விலை கொண்ட ஹோட்டல்கள் இல்லை. இடதுபக்கமாக சற்று தூரம் பயணித்தால் புஹாரி மட்டுமே. விலை பற்றி சொல்ல வேண்டியதில்லை. வலதுபுறம் கொஞ்சம் நடந்து பெரியார் மாளிகை அருகே போனால் ஜனதா சைவ உணவகம். அதுவும் பொங்கல் விடுமுறை என்பதால் கையேந்தி பவன் உட்பட பல உணவகங்கள் மூடியே இருக்கும். அதையும் மீறி தேடித்துருவி ஒரு ஹோட்டலில் சாப்பிட்டு விட்டு மீண்டும் வண்டியை பார்க் செய்து நீண்ட நடை நடந்து புத்தகம் வாங்க யார்தான் முன்வருவார்கள்? குறிப்பாக குடும்பத்துடன் வருவோருக்கு அது எந்த அளவிற்கு சாத்தியம்? வாய் புளித்ததோ, Maaza புளித்ததோ? அறியாமல் மனதில் பட்டதை கூறிவிடுகிறார்கள். பல் இருப்பவர் பக்கோடா சாப்பிட்டுவிட்டு போகட்டுமே!!

பிரதான அரங்கின் அருகிலேயே நம்ம ஆட்டோ ஸ்டான்ட். நியாயமான ரேட்டில் வாடிக்கையாளர்களை அழைத்துச்சென்ற வண்ணம் இருந்தது. அதில் உலக சினிமா ரசிகன் மற்றும் கோவை ஆவியுடன் பயணித்தபோது அருகே வந்த இன்னொரு நம்ம ஆட்டோ ஓட்டுனர் ''20, 30 ரூபாய்க்கு எத்தனை ட்ரிப் தான் அடிக்கறது'' என்று 'எங்கள்' நம்ம ஆட்டோ ஓட்டுனரிடம் சலித்துக்கொண்டார். 

அன்றைய நாளில் நான் வாங்கிய பெரும்பாலான புத்தகங்கள் உலக சினிமா ரசிகனின் பரிந்துரை:   

இமையத்தின் 'செடல்' நாவல். வெளியீடு: க்ரியா.
பக்கங்கள்: 244. ரூ.210.

கே.வி. ஷைலஜாவின் 'மூன்றாம் பிறை' நடிகர் மம்முட்டியின் வாழ்வனுபவங்கள். வெளியீடு: வம்சி. பக்கங்கள்: 128. ரூ.80.

ரா.கி. ரங்கராஜனின் 'பட்டாம்பூச்சி'. வெளியீடு: நர்மதா. 
பக்கங்கள்: 856. ரூ.300.

சஃபியின் 'என்றார் முல்லா'. வெளியீடு: உயிர்மை.  
பக்கங்கள்: 270. ரூ.160.

ஊர்மிளா பவாரின் 'முடையும் வாழ்வு'. வெளியீடு: விடியல்.
பக்கங்கள்: 394. ரூ.250.

கி.ராஜநாராயணனின் 'கோபல்ல கிராமம்'. வெளியீடு: அன்னம்.
பக்கங்கள்: 176. ரூ.120.

கி.ராஜநாராயணனின் 'கோபல்லபுரத்து மக்கள்'. வெளியீடு: அன்னம். 
பக்கங்கள்: 272. ரூ.150.

கி.ராஜநாராயணனின் 'கரிசல் காட்டுக்கடிதாசி'. வெளியீடு: அன்னம்.
பக்கங்கள்: 272. ரூ.150.
 
மணாவின் 'எம்.ஆர். ராதா - காலத்தின் கலைஞன்'. வெளியீடு: உயிர்மை.
பக்கங்கள்: 216. ரூ.170.

தியடர் பாஸ்கரனின் 'எம் தமிழர் செய்த படம்'. வெளியீடு: உயிர்மை. 
பக்கங்கள்: 176. ரூ.100.  

மேற்கண்ட புத்தகங்கள் வழக்கம்போல 10% தள்ளுபடியில் கிட்டின. அதுபோக உ.சி.ர. பாஸ்கரன் பரிந்துரையில் மேலும் சில % தள்ளுபடி கிடைத்தது. 


இதுபோக பாஸ்கரன் அவர்கள் அன்பளிப்பாக வாங்கித்தந்தவை:

மர்ஜானோ சத்ரபியின் இரண்டு நூல்கள்:

'ஈரான் - திரும்பும் காலம்' மற்றும் 'ஈரான் - ஒரு குழந்தைப்பருவத்தின் கதை'.

தகவல்களுக்கும், அன்பிற்கும் நன்றிகள் பல பாஸ்கரன் சார்.
 
அனைத்து புத்தகங்களையும் வீட்டில் இளைப்பாற வைத்து விட்டு மீண்டும் ஒய்.எம்.சி.ஏ. பக்கம். பேச்சரங்கில் சிறப்பு விருந்தினராக தமிழருவி மணியன். இன்பத்தேன் காதினில் பாய சில மணித்துளிகள் அங்கே கரைந்தது. 

இவ்வுற்சவத்தில் கலந்துகொள்ள இயலாத அன்பர்களுக்காக சிறப்பு வாசல் ஒன்றும் திறக்கப்பட்டிருக்கிறது:


 
2014  சென்னை புத்தகக்காட்சி - அடுத்த பாகம் விரைவில்...
................................................................

  

Thursday, January 16, 2014

2014 சென்னை புத்தகக்காட்சி - 2






   'சந்தையில் இரண்டு சிங்கங்கள் எதிரெதிர் திசையில் சந்தித்தபோது பேச   முடியவில்லையே...'

சனிக்கிழமை மாலை எட்டு மணி walkகில் புத்தகக்காட்சியை முடித்துவிட்டு ஒய்.எம்.சி.ஏ. வாசலை நெருங்கிக்கொண்டிருந்த சமயம். உண்மைத்தமிழன் அண்ணாச்சி கண்ணில்பட்டார். ஓரிரு வார்த்தைகள் பேச ஆரம்பித்த சமயம் உ.த.வை நோக்கி ஒருவர் வேகமாக நடந்து வந்து சட்டென நலம் விசாரித்த பிறகு 'உங்க blog வாசகர் ஒருத்தர் அங்க நிக்கறார். ஒரு நிமிஷம்...கூப்பிடறேன்'. எம்மிடம் அந்நபரை அறிமுகம் செய்துவிட்டு பார்க் செய்த வண்டியை எடுக்க கிளம்பினார்.  

'வணக்கம் உண்மைத்தமிழன் சார். என் பெயர் பத்மநாபன். சில மாசங்களுக்கு முன்ன உங்க blog பத்தி கனகு சொன்னார். அதுல இருந்து தொடர்ந்து படிக்கறேன். குறிப்பா சினிமா சார்ந்த செய்திகளை..'. லேசான மகிழ்ச்சி இருந்தாலும் பிறரைப்போல முகஸ்துதி செய்கிறாரோ என்று 'நிஜமாவா சொல்றீங்க?' என அழுத்தினார் அண்ணாச்சி. 'உண்மைத்தமிழன்' தளத்தில் தான் படித்த பதிவுகளை பட்டியலிட்ட பிறகு உ.த.வின் நம்பிக்கை வலுப்பெற்றது. 'தங்கள் தளம் முடங்கிப்போனது வருத்தமாக உள்ளது. விரைவில் மீட்டெடுங்கள் என அன்புக்கட்டளை இட்டார் பத்மநாபன்.

'ஆமா உங்களுக்குத்தான் கண்ணு தெரியாதே? எப்படி படிக்கறீங்க?' என உ.த. வினவ 'NVDA (Non Visual Desktop Access) எனும் பிரத்யேக மென்பொருள் உதவி யுடன் படிக்கிறேன். திரையில் உள்ள வார்த்தைகளை குரல் மூலம் சொல்வது இதன் சிறப்பு' என்றார் பத்மநாபன். அண்ணாச்சியின் மொபைல் என்னை அவரது மொபைலில் டைப் செய்தபோது ஒவ்வொரு எண்ணும் உச்சரிப்பாக ஒலிப்பதை எம்மிடம் காட்டினார். உற்சாகம் பொங்க மேலும் சில வார்த்தைகள் பேசியபிறகு விடைபெற்றார் பத்மநாபன். உண்மைத்தமிழன் ஒரு கணம் உறைந்து போய் நிற்க அதற்கான காரணம் எனக்கு விளங்கியது. 'இப்படியும் ஒரு வாசகரா?'  பிரமிப்பு அகலாமல் என்னிடமிருந்து விடைபெற்றார். அந் நெகிழ்வான தருணத்தில் சங்கமித்த பூரிப்பு என் மனதை நிரப்பியது. பொதுவாக 'என்னத்த வாழ்ந்து..' என்று என்னத்த கண்ணையா போலவே பேசுவது உ.த.வின் வழக்கம். ஆனால் அந்த நாள் கண்டிப்பாக அவரது இயல்புத்தன்மையை புரட்டிப்போட்டிருக்கும் என்பதில் ஐயமில்லை. 

உயிர்மை ஸ்டால் அருகே சாரு மற்றும் மனுஷ்யபுத்திரனுடன் நான்...
 
ஞாயிறு(நாள் இரண்டு):  புது வரவாக அஞ்சாசிங்கம். வெள்ளை ஜிப்பா, குறுந்தாடி சகிதம் பிலாசபியுடன் வீரநடை போட்டுக்கொண்டு இருந்தார். இதர தோழர்களுடன் அகநாழிகை ஸ்டாலை அடைந்தோம். பூப்போட்ட சட்டையுடன் கவியாழி!! இருவரையும் சேர்த்து வைத்து அந்த அரிய ஸ்டில்லை எடுத்தோம். புதுகை அப்துல்லா, செல்லப்பா, ரோஸ்விக், அரசன், நேசமித்ரன் உள்ளிட்ட இணைய அன்பர்களை சந்தித்தேன். உயிர்மை ஸ்டால் இருக்கும் வரிசையில் உலா வந்தபோது சலசலப்பு சத்தம் அதிகமாக என்னவென்று பார்த்தால் எஸ்.ரா, சாரு மற்றும் மனுஷ்யபுத்திரன் மூவரும் ஓரிடத்தில். சாருவிடம் சற்று அளவளாவிவிட்டு ஒரு ஸ்டில் எடுத்துக்கொண்டேன். 


அதன் பிறகு முகாமிட்டது திருவள்ளுவர் பெரியார் மானுட ஒன்றியம் ஸ்டால் 273. பேரறிவாளன் குறித்த பிரத்யேக நூல்கள் மற்றும் டி.வி.டி.க்கள் விற்பனைக்கு இருந்தன. அங்கமர்ந்திருந்த பேரறிவாளனின் தாயார் அற்புதம் அம்மாள் அவர்களுடன் பேச வாய்ப்பு கிட்டியது. 'எப்படியும் அவன் வெளில வந்துருவாம்ப்பா' எனும் நம்பிக்கை அவரது குரலில் வலுவாக ஒலித்தாலும், பல்லாண்டு போராட்டம் மற்றும் ஏக்கத்தால் ஏற்பட்ட களைப்பு அத்தாயின் மனதில் குடி கொண்டிருந்ததை உணர முடிந்தது. விடை தெரியாமல் காத்திருக்கிறோம் நாமும்....

அதே அரங்கில் 'தங்க மீன்கள்' இயக்குனர் ராம் பிரவேசிக்க இளைஞர் படை அவருடன் போட்டோ எடுக்கவே பிரயத்தனம் செய்து கொண்டிருந்தது. போட்டோ செஷன் தொடர்ந்து கொண்டிருக்க நேரமானதால் அவரை தனியே அழைத்து 'கற்றது தமிழ்' குறித்து மனதில் தேக்கி வைத்திருந்த சில கேள்விகளை முன் வைத்தேன். IT/BPO துறையில் இருப்பவர்களுக்கு எதிராக வன்முறை மனோபாவத்தை நாயகனுக்கு உண்டாக்கியது நடைமுறைக்கு ஒப்பவில்லை என்றும், சில ஆயிரங்களுக்கு கொத்தடிமை போல வேலை பார்க்கும் சாப்ட்வேர் இளைஞர்களை எப்போது தமிழ் சினிமா பிரதிபலிக்கும் எனும் கேள்விக்கு 'எனது அடுத்த படமான 'தரமணி'யில் இதற்கான பதில் நிச்சயம் கிடைக்கும்' என பதில் சொன்னார் ராம். பார்க்கலாம்!!  

இரண்டாம் நாளில் நான் வாங்கிய புத்தகங்கள்: 

விந்தன் எழுதிய 'எம். ஆர். ராதாவின் சிறைச்சாலை சிந்தனைகள்'. வெளியீடு: கோணம். பக்கங்கள்: 143. விலை ரூ.90.  

இயக்குனர் மகேந்திரனின் 'சினிமாவும் நானும்'. வெளியீடு: கற்பகம் புத்தகாலயம். பக்கங்கள்: 368. விலை: 250.

மின்னல் எழுதிய 'விலகி ஓடிய கேமரா'. வெளியீடு: வம்சி. பக்கங்கள் 176. விலை 120.  

'உயிர்வலி' பேரறிவாளன் பற்றிய ஆவணப்படம். நீளம்: 1 மணி நேரம். விலை ரூ.90.

இத்துடன் நடையைக்கட்ட உத்தேசித்த சமயம் ஒரு அரும்பு மீசை 'செல்லமே' எனும் சிறுவர் மாத இதழை வாங்கிக்கொள்ள பணித்தான். மறுத்தும் விடவில்லை. பதிவர்களுடன் சினிமா நாயகிகள் குறித்து பேசிக்கொண்டிருக்க அவனும் அதில் சங்கமித்து புத்தகத்தை விற்கும் யுக்தியில் கண்ணும் கருத்துமாக இருந்ததால் அத்தம்பியின் சாமர்த்தியத்திற்காக ஒரு பிரதி வாங்கினேன். விகடன் சைஸ் இருக்கிறது. 46 பள பளா பக்கங்கள் 50 ரூபாயாம். சந்தையில் ரூ.40. 

பர்சேஸ் முடிந்து வெளியே நடக்க ஆரம்பித்தேன். பத்தடிக்கு ஒரு தம்பியும், அண்ணனும் 'அண்ணா சுண்டல் வாங்கிக்கங்க'. நிலவொளி. புற்தரை. சுண்டலைக்கவ்வியவாறு சுற்றப்பட்ட காகிதத்தை நோட்டம் விட்டால்... 'நான் எப்பேர்பட்ட பதிவர் தெரியுமா?' என்று சிலுப்பு காட்டி வரும் நபரின் புத்தகம் ஒன்றின் பக்கமது. தெறித்து சிரித்ததில் ரூ.1 மதிப்புள்ள சுண்டல் தரையில் உருண்டோட.... கடவுளே கடவுளே!!  
 
ஐஸ்க்ரீம் பஞ்சாயத்து & கரிசக்காட்டு மைனா குறிப்புகள் விரைவில்....

..............................................................................




Wednesday, January 15, 2014

2014 சென்னை புத்தகக்காட்சி - 1






நந்தனம் ஒய்.எம்.சி.ஏ.வில் ஜனவரி 10 ஆம் தேதி கனஜோராக தொடங்கியது சென்னை புத்தக காட்சி. 'காலம் முழுக்க என்னதான் கம்ப்யூட்டர நோண்டுனாலும் புத்தகம் வாங்கி படிக்கலன்னா சாமி கண்ண குத்திடும்' என்று ஒளிவட்ட ஆசாமிகள் சீசன் தொடங்குவதற்கு முன்பு ஏகப்பட்ட டீசர் விட்டார்கள். ஆம் ஆத்மியாக திரிந்த பதிவர்கள் மற்றும் இதர இணைய நண்பர்கள் திடீர் எழுத்தாளர்கள்/கவிஞர்கள் ஆக உருமாறி வாசகனை ஒரு கை பார்க்க சபதம் பூண்டு தங்கள் புத்தக வெளியீட்டில் மும்முரமாக களப்பணி ஆற்றிக்கொண்டு இருந்தார்கள். நமது பொழுதுபோக்கிற்கு இம்முறையும் உத்திரவாதம் உறுதியானது. எல்லாம் அவன் செயல்!!

சனியன்று மாலை முதல் விசிட். கூட்டம் அம்மும் என எதிர்பார்த்தேன். அவ்வாறில்லை. இரண்டாம் நாளென்பதால் இனிதான் 'க்ரவ்ட்' வர வாய்ப்புண்டு என்றது ஒரு குரல். யாருப்பா அது க்ரவ்டு? பிரதான இடத்தை அடைந்ததும் சில மாற்றங்களை காண நேர்ந்தது. சென்ற முறை புத்தக அரங்கை நோக்கி நடப்போருக்கு சங்கடம் தரும் விதமாக இருந்த பேச்சரங்கம் இம்முறை வேறு பக்கம் மாற்றப்பட்டு இருந்தது. மேடையின் ஓரங்களில் ஜீ தமிழ் சீரியல் ஆன்ட்டிகளின் ஆதிக்கம். மொபைல் ப்ளாஸ்டிக் கழிவறைகளுக்கு பதிலாக தற்காலிக பீங்கான் கழிவறைகள் சுத்தமாக பராமரிக்கப்பட்டு இருந்தன. 

10 ரூபாய் நுழைவுச்சீட்டை வாங்கிவிட்டு உள்ளே நுழைந்தேன். சென்ற முறை இருந்த கச கசப்புகள் பெரிதும் இல்லை. விஸ்தாரமான நடைபாதை, ஆங்காங்கே குடிக்க (இலவச) குடிநீர் உள்ளிட்ட பல முன்னேற்றங்கள். சந்தித்த பதிவர்கள்: பிலாசபி பிரபாகரன், ஆரூர் முனா செந்தில்,  கோவை ஆவி, பாலகணேஷ், சீனு, ஸ்கூல் பையர் சரவணர், ரூபக். பெயர் விடுபட்டிருப்பின் கூறவும் அல்லது தயவு செய்து கோபித்து கொள்ளவும்.

'அது அருமையான புக். இது இன்னும் பிரமாதம்' என்று ஆரூர் முனாவை உசுப்பேற்றி பிலாசபி தனக்குபிடித்த புத்தகங்களை வாங்க வைத்தார். இந்த ராஜதந்திரம் புரியாமல் வெள்ளந்தியாக பணத்தை கரைத்தார் ஆரூர். நண்பனின் நண்பன் எனக்கும் நண்பனே. நம்மளும் அந்த புக்கை வாங்கி படிச்சிடுவோம்' என்று நானும் புத்தகம் வாங்காமல் வேடிக்கை மட்டும் பார்க்க ஆரம்பித்தேன். அந்நேரம் பார்த்து கரகாட்டக்காரன் செந்திலின் வசனம் மனத்திரையில் விருட்டென தோன்றி மறைந்தது: 'ஒல்லியா இருக்கறவன் எல்லாம் சூதுவாது புடிச்சவன். குண்டா இருக்கறவன் எல்லாம் கள்ளங்கபடம் இல்லாதவன்'.

                                               ரோஸ்விக், புதுகை அப்துல்லா, அகநாழிகை வாசு, மணிஜி   

தன்னம்பிக்கை புத்தகம் எழுதுவதில் அசாத்திய தன்னம்பிக்கை கொண்ட சுரேகா அவர்களை சில நாட்களுக்கு முன்பு சந்தித்து பேசினேன். அப்போது அவரெழுதிய 'தலைவா வா' புத்தகம் மீது எனக்கிருந்த சில மாற்றுக்கருத்துகளை சுட்டிக்காட்டி 'எஸ்கேப்' புத்தகத்தில் அதற்கான விடை உள்ளதென சொல்லி இருந்தார்.  எனவே புத்தக காட்சியில் 'எஸ்கேப்'பைத்தான் முதலில் வாங்கினேன். அடுத்து அசோகமித்திரன் எழுதிய 'பயாஸ்கோப்'. ஜெமினி ஸ்டுடியோவில் சில காலம் பணி புரிந்த அவரது அனுபவங்களை புத்தகமாக்கி இருக்கிறார். கிடைக்குமிடம்: புதுப்புனல்(அகநாழிகை. ஸ்டால் 666,667).

பதிவர்கள் மத்தியில் நன்கு பரிச்சயமான டிஸ்கவரி புக் பேலஸ்(ஸ்டால் 307, 308, 353, 354) வேடியப்பன் மற்றும் அகநாழிகை வாசுதேவன், மணிஜி ஆகியோருக்கு வணக்கம் வைத்து விட்டு நடைப்பயணத்தை தொடர்ந்தோம். ஒரு சுற்று முடித்து மீண்டும் டிஸ்கவரி வாசலில் ஐக்கியம். கல்லூரி வரை 'முதல் பெஞ்ச்' மாணவர் கேரக்டராகவே வாழ்ந்தது போல் தோற்றமளித்த ஒருவரிடம் பிலாசபியும், ஆரூரும் என்னமோ ஏதோ பேசிக்கொண்டு இருந்தார்கள். விசாரித்ததில் அவர்தான் வா.மணிகண்டன் என்றார்கள். முதன் முறை பார்த்ததால் மில்லி மீட்டர் சிரிப்புடன் நிசப்தமானேன். அவருடைய வலைப்பூ படிக்க நன்றாக இருக்கும் என சில பதிவுலக நண்பர்கள் சொல்லக்கேள்வி. நேரம் அமைந்தால் வாசிக்க உத்தேசம். ஆனால் கமண்ட் போடும் ஆப்சனை மூடி வைத்திருக்கிறார். அதுதான் உறுத்துகிறது. ஒருவேளை சண்டையில் கிழியாத சட்டை அவரிடம் இல்லாமல் இருக்கலாம். கூல்!!

'மேயற மாட்டை நக்கற மாடு கெடுத்த மாதிரி' மேலோட்டமாக புத்தகங்களை நோட்டம் விட்டுக்கொண்டிருந்த என்னை 'லேட்டஸ்ட் அலப்பறை' எழுதிய காவிய புத்தகங்கள் வசம் திருப்பி விட்டார் வில்லங்கம் ஒருவர். தற்கொலை குறுங்கதைகள் என தலைப்பிடப்பட்டு இருந்தது. 'என்னடி இங்க லுக்கு? அவுத்து போட்டா ஆடறாங்க?' டெம்ப்ளேட்டில் மாநகர ஆன்ட்டிகள் சிலர் செம கலீஜாக வெளுத்துக்கட்டும் சொற்களுக்கு ஈடாக எதையோ சொல்ல ஆசிரியர் அநியாயத்திற்கு முயன்றிருக்கிறார். நாலு வரிகள் கொண்ட கதைகள் கூட அதில் அடக்கம். கேட்டால் குறுங்கதையாம். குறுங்கதையின் கொள்ளுப்பேத்தி என்றால் கூட நம்ப முடியாது. அந்த காலத்துல கோவில் பாறைலயும், கக்கூஸ் செவுத்துலயும் மெர்சலா எழுதி காசு பாக்காம போன முட்டாள்களே. பாவம்யா  நீங்க!!

நீண்ட நேரம் நடந்து மூட்டு நட்டு பேஜார் செய்ததால் பேச்சரங்க மேடை பக்கம் இளைப்பாறினேன். அட பாரதி கிருஷ்ணகுமார்!! ஆவல் பொங்க மொத்தப்பேச்சையும் கேட்டு மகிழ்ந்தேன். பாரதி, விவேகானந்தர் இருவரும் பலமுறை அவரது நாவில் நர்த்தனம் ஆட, இடையிடையே மேடையில் இருந்த பிரபலங்களை பார்த்தும் உரையாற்றியனார். எங்கே பார்வையை அவர் பேசுமிடத்தில் செலுத்தாமல் விட்டால் மைக்கால் அடிப்பாரோ எனும் அச்சமும் அவர்களை தொற்றி இருக்கலாம். எளியோர்க்கும் புரியும் வண்ணம் சிறப்பான பேச்சு. நன்றியும், வாழ்த்துகளும் பாரதி.
 
அதன் பிற்பாடு இரவு கவ்வ ஆரம்பித்ததும் விடைபெற எத்தனித்தேன். 'என்னோட 'சாப்பாட்டுக்கடை' புத்தகம் வாங்காம என்னைய்யா பண்ணிட்டு இருக்க'....துரத்த ஆரம்பித்தார் இயக்குனர் கேபிள் சங்கர். கையில் காசில்லாததால் மினிச்சிரிப்பை மட்டும் உதிர்த்துவிட்டு எஸ்கேப்புடன் எஸ்கேப் ஆனேன்.


.......................................................

அடுத்து வருவது:.

சுடச்சுட ஐஸ்க்ரீம் பஞ்சாயத்து பேசிய பிரபல பதிவர்கள்.

அதிரடி காஸ்ட்யூமில் கட்டிப்பிடித்த இரு சிங்கங்கள்.

பில் கவுண்டரில் கண்ட கரிசக்காட்டு மைனா.


...........................................................





  

Tuesday, January 7, 2014

தாஜ்மகாலுக்கே வாடக வாங்கன பரம்பரடா...




'சிதம்பரம்' என்றாலே தடாலடி ரவுசுகளுக்கு பஞ்சமில்லா பெயர் போல. கடைத்தேங்காயை வழிப்பிள்ளையாருக்கு உடைத்து நாட்டின் பொருளாதாரத்தை செங்குத்தாக நிறுத்திய ப.சிதம்பரம், போனில் பேசியே பல பதிவர்களை மனப்பிறழ்வுக்கு ஆளாக்கும் சிதம்பர மைந்தர் நக்கீரன், சிதம்பரம் கோவில் எங்களுக்கே சொந்தம் என கொப்பளிக்கும் தீட்சிதர்கள். ஆகக்கா. அக்கோவிலை நிர்வகிக்க அரசுக்கு உரிமை இல்லை. முறைகேடுகளை வேண்டுமானால் விசாரிக்கலாம். வழக்கம்போல தீட்சிதர்களே நிர்வகிக்கலாம் என்று சுப்ரீம் கோர்ட் தீர்ப்பு சொல்லி விட்டது. தமிழக அரசு சரியாக வாதத்தை முன்வைக்காததே இப்பின்னடைவுக்கு காரணம் என்று போராட்டங்கள் வெடிக்க ஆரம்பித்து விட்டன. டி.வி.க்களில் கடும் விவாதங்கள் தூள் பறக்கின்றன. அவற்றை குறுகுறுவென்று பார்த்து கிறுகிறுத்ததன் விளைவே இப்பதிவு. 

தில்லை தீட்சிதர்கள் விலைமதிப்பற்ற கோவில் நகை மற்றும் சொத்துக்களை தின்று ஏப்பம் விடுவதாக குற்றச்சாட்டுகள் ஆண்டுக்கணக்கில் இருந்து வருகின்றன. அதுபோல நடராஜர் கோவிலில் தமிழுக்கு இடமில்லை என்று ஆறுமுகசாமியும், அவருக்கு ஆதரவாக சில இயக்கத்தினரும் போராட்டங்களை ,மேற்கொண்டனர். ஆனால் கோவிலை கண்காணிக்கும் இந்து அறநிலையத்துறையிலும் ஊழல் உள்ளது என்று எதிர்க்கணை வீசப்பட்டது. 'அப்படின்னா மசூதி, சர்ச் நிர்வாகத்துல அரசு ஏன் தலையிடல?' என செக் வைத்தார் இந்து முன்னணியின் ராமகோபாலன். 'அங்கே வக்பு வாரியங்கள், மற்றும் கிறிஸ்தவ சபைகள் ஒரு மனதாக தலைவர்களை தேர்ந்தெடுக்கின்றன. அவர்களுக்குள்ளும் சில பிரிவுகள் மற்றும் பிரச்னைகள் இருப்பினும் கட்டுப்பாடு உள்ளது. இங்கே பல்வேறு வழிபாடு முறைகள், ஏகப்பட்ட மதவாதிகள் இருப்பதால் நிர்வாகத்திற்கு தலைவர்களை தேர்ந்தெடுப்பதில் ஒற்றுமை இருக்க வாய்ப்பில்லை என்பதே உண்மை' என்று ரா.கோபாலன் வாயில் கொழுக்கட்டையை சொருக முயற்சித்தது எதிர் தரப்பு. 'அதெல்லாம் எனக்கு தெரியாது? கிழிஞ்ச என் குடை கிழியாம வேணும்' என்று திரும்ப திரும்ப சொன்னார் ரா.கோ.  

சிதம்பரம் கோவிலின் ஹை ப்ரொபைல் தீட்சிதர் உமாநாத்  பயங்கர  கோவக்காரர் போல. அவ்வப்போது அவரை எதிர்த்து பேசும் நபர்களை பார்த்து 'யோவ். சும்மா பொய் புளுகாத. யோவ்' என்று ஹனிசிங் போல சபை நாகரீகமின்றி கொந்தளித்தார். 'நீர் கொஞ்சம் அமைதியா இரும்' என்று நடராஜர் சொன்னால் கூட அவருக்கும் ஒரு 'யோவ்' பார்சல் வைத்திருப்பார் போல. ஆத்தாடி ஆத்தா... சோழ பரம்பரைக்கு முடி சூடுன தெய்வீக பரம்பரைன்னு சொல்லிக்கற தீட்சிதர் டீமோட தலைவரே என்ன காட்டு காட்டுறாரு பாருங்க ஓய்!!

''நீ  எவ்ளோ பெரிய அதிகாரியா இருந்தா எனக்கென்ன? நாங்க இங்கதான் பாய விரிச்சி மல்லாக்க படுப்போம். ராஜன்ட்ட பேசறியா.... நட ராஜன்''  


'சிதம்பரம் கோவிலில் தமிழுக்கு இடமில்லை' என சிலர் கொடி பிடித்தாலும், அதை இல்லை என்று ஆதாரத்துடன் மறுக்கிறார்கள். நித்தம் தமிழிலும் நடராஜருக்கு வழிபாடுகள் நடக்கின்றன என்பதற்கு தரிசனம் செய்யும் இந்து பக்தர்களே சாட்சியாக இருக்கிறார்கள். இந்த பதில் வந்த பிற்பாடு திருமாவளன் மற்றும் திராவிட கட்சி நண்பர்கள் எதிர் வாதம் வைக்காது ஏன் என்பதும் புலப்படவில்லை. பேசாமல் நாமலே ஒரு எட்டு அக்கோவிலுக்கு சென்று நடப்பது என்னவென்று பார்த்துவிடலாம் என நினைத்தால்...எங்கே ஊர் மண்ணில் கால் வைத்த மறுகணம் நக்கீரன் முதுகில் ஏறிக்கொள்வாரோ எனும் திகில் ஆட்டிப்படைக்கிறது!!


'பிற சாதி/இன மக்களுக்கு உள்ளே மரியாதை இல்லை' என்பது இன்னொரு குற்றச்சாட்டு. ஆனால் முன்பொரு காலத்தில் நாடார் இன மக்களை கோவில் உள்ளே வரவிடாமல் சில தீய சக்திகள் தடுத்தது என்றும், அவர்களை விரட்டி அம்மக்கள் இறைவழிபாடு செய்ய வழி வகுத்ததே தீட்சிதர்கள் தான் என்றும் ஒரு வரலாற்று உண்மையை முன்வைக்கிறார்கள். 

மூவாயிரத்தில் இருந்து வெறும் 150 குடும்பங்களாக சுருங்கிவிட்ட தீட்சிதர்கள் பல கோடி பணம் புழங்கும் கோவில் நிர்வாகத்தை அடக்கி ஆண்டால் அதில் நடக்கும் முறைகேடுகளை கேட்க ஜனநாயக நாட்டில் ஆளே இல்லையா என்பது நியாயமான கேள்விதான். அதே சமயம் அரசு நிர்வகிக்கும் கோவில்களில் அரசியல்வாதிகள் எந்த அளவிற்கு நேர்மையாக இருப்பார்கள் என்பதும் பரம்பரை பரம்பரையாக கோவில்களை நிர்வகிப்போர் கேட்கும் கேள்வி. தற்போது அரசின் குடையின் கீழ் கோவிலருகே இருக்கும் கழிப்பிடங்கள் கூட சரியாக பராமரிக்கப்படாதது ஏன் எனும் குற்றச்சாட்டும் உள்ளது. 

இந்த களேபரத்தில் களவு போகும் அரிய ஆபரணங்கள், பல நூறு ஏக்கர் கோவில் நிலங்கள், வசூலாகும் உண்டியல் தொகைகள், நன்கொடைகள் எல்லாம் என்ன கதிக்கு ஆளாகும் என்பது பக்தர்களின் கேள்வி. ஓய்வு பெற்ற நீதிபதி, அறநிலையத்துறை அதிகாரி உள்ளிட்ட சில நேர்மையானவர்களை கொண்ட சுயேட்சையான கண்காணிப்பு குழு அவசியம் என்பது காலத்தின் கட்டாயம். ஒற்றுமையின்றி சிதறிக்கிடக்கும் இந்து அமைப்புகளும், உள்ளூர் பக்தர்களும் கரம் கோர்த்து தெளிவான முடிவை எடுத்தால் மட்டுமே இதுபோன்ற குடுமிப்பிடி சண்டைகளுக்கு தீர்வு கிடைக்கும். 


சீக்கிரம் சிக்கல் தீராவிட்டால் 10 ரூபாய் தேங்காயை 30 ரூபாய்க்குதான் விற்பனை செய்வார்கள். காலம் தாழ்த்தினால் இன்னும் பல ஆண்டுகளுக்கு இப்படியே பேரம் பேசிக்கொண்டு இருக்க வேண்டியதுதான்.

 'சரி 12 ரூபாய்'.  

'இவ்ளோ கேப்பாய்யா விடுவ. உனக்காக 25 ரூபாய் யா'

'உனக்கும் வேண்டாம் எனக்கும் வேண்டாம்'

'அப்படி வா'

'12 ரூபாய்'

....................................................................................... 




Related Posts Plugin for WordPress, Blogger...