CINEMA SHOULD MAKE YOU FORGET YOU ARE SITTING IN A THEATER – ROMAN POLANSKI

Wednesday, December 31, 2014

திரை விரு(ந்)து 2014 - தமிழ் படங்கள் பாகம் 2





காட்சி (வசனமின்றி): அமர காவியம்




காதல் கைகூடுமா ஆகாதா எனும் மன உளைச்சலுடன் காத்திருந்து வெறுத்துப்போய் மியா ஜார்ஜை சத்யா குத்தி சாய்க்கும் காட்சி. அமரகாவியமாக வந்திருக்க வேண்டிய படைப்பு. மெதுவான காட்சிகள் அதிகம் இருந்ததால் அமர விடா காவியமாய் போனது துரதிர்ஷ்டம்.

காட்சி (வசனத்துடன்):  காவியத்தலைவன்


தனது நாடகக்குழுவில் ராஜபார்ட்டை தேர்வு செய்ய பிருத்விராஜ் மற்றும் சித்தார்த்திற்கு பரீட்சை வைக்கிறார் நாசர். சூரபத்மனைப்போல ஆக்ரோசம் பொங்க பிருத்விராஜ் கர்ஜித்து முடித்த பிறகு மெதட் ஆக்டிங் பாணியில் சூரபத்மனை வெளிக்கொண்டு வந்து சித்தார்த் பேசும் காட்சி எனது பேவரிட். 


துணை நடிகை: சுகுமாரி - நம்ம கிராமம்




பாரதம் சுதந்திரம் பெறுவதற்கு முன்பாக கணவனை இழந்த பெண்களின் சுதந்திரம் எப்படி இரண்டாம் கட்டிற்குள் கட்டுண்டு கிடந்தது என்பதை சொன்ன படம் நம்ம கிராமம். தனக்கு நேர்ந்த கொடுமை தன் வீட்டுப்பெண் துளசிக்கும் நேரக்கூடாது எனப்போராடும் அம்மிணி அம்மாளாக வாழ்ந்திருந்தார் சுகுமாரி. கடைசி கட்டத்தில் அவர் எடுக்கும் முடிவு அதிர்வு. கதாபாத்திரத்திற்காக அசலில் தலைமுடியை துறந்து அர்ப்பணிப்பை காட்டினார். உலகை விட்டு போய்விட்டாலும் சிறந்த நடிகை எனும் முத்திரையை மீண்டும் பதித்துவிட்டு சென்றவர். மற்ற துணை நடிகைகளில் ரித்விகாவின் (மெட்ராஸ்) நடிப்பு இயல்பாய் இருந்தது குறிப்பிடத்தக்கது. 

துணை நடிகர்: கலையரசன் - மெட்ராஸ்


மெட்ராஸ் போஸ்டர்களில் முன்னிலைப்படுத்தாமல் போனதாலும், கார்த்தியை விட குறைவான காட்சிகளில் நடித்த காரணத்தினாலும் மட்டுமே இவரை துணை நடிகர் என்று நம்ப வேண்டியதாய் போனது. மற்றபடி அப்படத்தின் அசல் நாயகன் கார்த்திக் அல்ல. கலையரசன்தான். அதனை மேலே இருக்கும் போட்டோவும் நிரூபிக்கிறது. மதயானைக்கூட்டம் மூலம் கவனிப்பை பெற்றவர் 'மெட்ராஸ்' சுவர் அளவிற்கு விஸ்வரூபம் எடுத்தார். 

'கலையரசனுக்கு போட்டி இவர்தானோ?' எனும் பிரமையை உண்டாக்கியவர் சித்தார்த். ஜிகர்தண்டா, காவியத்தலைவன் போன்ற படங்களில் ஹீரோவா, துணை நடிகரா என்று புரியாத அளவிற்கு தம் கட்டி நடித்து ஓரளவு இருப்பை தக்க வைத்துக்கொண்டார். 'ஜீவா' படத்தில் ரஞ்சி போட்டியில் தேர்வாகாத விரக்தியில் இருக்கும் க்ரிக்கெட் வீரனாக லக்ஷ்மணன் நன்றாய் நடித்திருந்தார். கலையரசனுக்கு அடுத்தபடியாக வந்த ரன்னர் அப் பெர்பாமன்ஸ் இவருடையது.

நடிகை: மாளவிகா நாயர் - குக்கூ  



லட்சுமி மேனன், ஹன்சிகா, ஸ்ரீதிவ்யா ஆகியோர் குறிப்பிட்ட அளவு படங்களில் வந்து சென்றனர். கண்களில் நீர் தேக்குவதைத்தாண்டி இன்னும் அழுத்தமாய் நடித்திருந்தால் 'கயல்' ஆனந்தி பிடித்த நடிகையாய் இருந்திருப்பார். கண்பார்வையற்ற நபராக ஆகச்சிறந்த நடிப்பை மாளவிகா தரவில்லை  என்பது உண்மைதான். எனினும் இப்படி ஒரு சவாலான கேரக்டரை ஏற்று நடித்ததும், இவருக்கு போட்டியாக அருகில் எவரும் இல்லாததும் ப்ளஸ் ஆகி இருக்கிறது. 

நடிகர் & வில்லன்: சிம்ஹா - ஜிகர்தண்டா, ஆடாம ஜெயிச்சோமடா.


வில்லன்: சின்ன பயல்களின் கிடுக்கிப்பிடியில் சிக்கிய மதுசூதன ராவ் (கோலி சோடா), செந்தமிழ் பேசி அட்டகாசம் செய்த வளவன் (சதுரங்க வேட்டை), கொஞ்சமே பேசி அதிகமாய் பேசவைத்த அஷுதோஷ் ராணா (மீகாமன்) என இவ்வருடம் கையளவு வில்லன்களே மனதில் நின்றனர். மற்ற கார்ப்பரேட்/மும்பை வில்லன்கள் எல்லாம் சிரிக்க மட்டுமே வைத்தனர். 

அசால்ட் சேது எனும் கனமான கேரக்டரை தாங்க முடியாமல் சில இடங்களில் சிம்ஹா தடுமாறி இருந்ததாக தெரிகிறது. அதையும் மீறி இவ்வருடத்தில் எனக்குப்பிடித்த வில்லன் சிம்ஹா. 

நடிகர்: கமலும், விக்ரமும் இவ்வருடம் விடுப்பில் போய் விட்டார்கள். வி.ஐ.பி.யில் தனுஷின் நடிப்பு வழக்கம்போல் கவனிக்க வைத்தது. குக்கூ, திருடன் போலீஸ் மூலம் நல்ல கதாபாத்திரங்களை தேர்வு செய்யும் அக்கறையை காட்டி இருந்தார் தினேஷ். ஆனாலும் இன்னும் நடித்திருக்கலாமோ எனத்தோன்றியது.

ஜிகர்தண்டாவில் அசால்ட் சேதுவாகவும், ஆடாம ஜெயிச்சோமடாவில் 'பில்டிங் ஸ்ட்ராங் பேஸ்மென்ட் வீக்' போலீஸாகவும் பிரமாதமாய் நடித்ததால் இவ்வாண்டின் சிறந்த நடிகராய் எனக்கு பட்டவர் சிம்ஹாதான். 

இயக்குனர்: ஞானராஜசேகரன் - ராமானுஜன்
 
  
மோகன் சர்மா (நம்ம கிராமம்), விஜய் மில்டன் (கோலி சோடா), மகிழ் திருமேனி (மீகாமன்), கார்த்திக் சுப்பராஜ் (ஜிகர்தண்டா), பார்த்திபன் (கதை திரைக்கதை வசனம் இயக்கம்), ரஞ்சித் (மெட்ராஸ்), மிஷ்கின் (பிசாசு) என என்னை கவர்ந்த மற்றும் உலக சினிமா ரசிகர்கள் கொண்டாடிய படைப்பாளிகள் இவ்வருடம் முத்திரையை பதித்தார்கள்.  

இவர்களைத்தாண்டி 2014 ஆம் வருடத்தில் எனக்கு அதிகம் பிடித்த இயக்குனராய் இருந்தது ஞானராஜசேகரன். கிட்டத்தட்ட அனைவரும் மறந்து போன கணிதமேதை ராமானுஜத்தின் வாழ்வை திரையில் பிரதிபலித்து தமிழ் சினிமாவிற்கு மீண்டும் பெருமை சேர்த்தார். பாரதி, பெரியார் படங்களுக்கு பிறகு மீண்டும் கடுமையான ஆராய்ச்சி, சோர்வடையா தேடல்கள் உள்ளிட்ட சிரமங்களை தாங்கி இந்த முக்கியமான வரலாற்றை பதிவு செய்திருக்கும் இயக்குனருக்கு நன்றிகளும், வாழ்த்துகளும். அடுத்ததாய் எந்த படைப்பை எடுக்கப்போகிறார் எனும் ஆவல் அதிகரித்துள்ளது. 


திரைப்படம்: நம்ம கிராமம், ராமானுஜன் 



பொதுவாக ஒன்றுக்கும் மேற்பட்ட கலைஞர்கள்/படங்களை பட்டியலில் சேர்க்க விரும்புவதில்லை நான். அதையும் மீறி நம்ம கிராமமும், ராமானுஜனும்  பிடித்த படங்கள் வரிசையில் சேர்ந்து இருக்கின்றன. 

1930 களின் இறுதியில் இருந்து சுதந்திரம் பெறும் சமயம் வரை பாலக்காட்டு பிராமண சமூகத்தில் நடந்த பெண்ணுரிமை மறுப்பு பற்றி பேசியது நம்ம கிராமம். கூர்மையான வசனங்கள் மற்றும் சம்வ்ருதா, சுகுமாரி, ரேணுகா போன்றோரின் இயல்பான நடிப்பு ஆகியவற்றின் மூலம் நல்லதோர் படைப்பை தந்தார் மோகன் சர்மா. தானும் முக்கிய கதாபாத்திரத்தில் நடித்திருந்தார். தேசிய மற்றும் கேரள அரசின் விருதுகளை வென்ற படமிது என்பது குறிப்பிடத்தக்கது.

தமிழ், மலையாளம் என இருமொழிகளில் உருவாகிய இப்படம் தமிழில் ஜனவரி மூன்றாம் தேதி திரையரங்குகளில் வெளியானது. மொத்தம் மூன்று பாகங்களை கொண்டிருக்கும் கதை. அடுத்த பாகத்தை காண காத்திருக்கிறேன்.


முன்பு சொன்னதுபோல தமிழ் சினிமாவின் பெருமைமிகு படைப்பு ராமானுஜன். கணிதமேதை ராமானுஜன் பற்றிய முக்கிய குறிப்புகளை எடுக்க இயக்குனர் ஞானராஜசேகரனுக்கு முழுதாய் ஓராண்டு தேவைப்பட்டது .ராமானுஜத்தின் துணைவியாரும் இறந்துவிட அவரைப்பற்றி எழுதப்பட்ட புத்தகம் ஒன்றின் துணையுடன் ஆய்வை துவக்கினார். லண்டன் கேம்ப்ரிட்ஜ் பல்கலைக்கழகத்தில் படப்பிடிப்பு நடத்தவும் பல சோதனைகள். இறுதியில் ராமானுஜன் உயிர்த்தெழுந்து நீக்கமற நினைவில் நின்றார்.
 
வசனகர்த்தா & FIND OF THE YEAR : வினோத் - சதுரங்க வேட்டை


வசனகர்த்தா: 'ராஜாவோட வேலை...வேலை செய்யறது இல்ல. வேலை சொல்றது', 'உனக்கு மட்டும் புரிஞ்சிடுச்சின்னா நான் வேற ஐடியா யோசிக்கணும்' என யதார்த்தம் கலந்த நையாண்டி வசனங்கள் மூலம் பட்டையை கிளப்பினார் வினோத். பெரும்புள்ளி ஒருவரை வலையில் வீழ்த்த நட்ராஜ் செய்யும் ரைஸ் புல்லிங் மோசடி வசனங்கள் அமர்க்களம். இப்படி படம் நெடுக நேர்த்தியான வசனங்களை அமைத்திருந்தார். பார்த்திபனின் கதை திரைக்கதை வசனம் இயக்கம் மற்றும் ரஞ்சித்தின் மெட்ராஸ் ஆகியவற்றை விட சில அடிகள் முன்னே நின்றது வினோத்தின் பேனா வீச்சு.

FIND OF THE YEAR: நடிப்பு, தொழில்நுட்பம், பாடல்கள், இயக்கம் என வெவ்வேறு துறைகளை சார்ந்தவர்கள் இவ்வருடம் தங்களுக்கான அடையாளத்தை பதித்தனர். சைவம், பிசாசு படங்களுக்கு பின்னணி பாடிய உத்ரா, அறிமுக பாடலிலேயே உச்சம் தொட்ட கவிஞர் தமிழச்சி தங்கபாண்டியன், முதல் படமான வல்லினத்தில் தேசிய விருது பெற்ற எடிட்டர் பாஸ்கர்  போன்றோர் முக்கியமானவர்கள். 

உப்மா கமர்சியல்கள் எடுப்பதை ஒதுக்கிவிட்டு உருப்படியான படங்களை எடுப்பதில் இளம் இயக்குனர்கள் தீவிரம் காட்டி வருவது திரைத்துறைக்கு ஆரோக்யம் தரும் விஷயம். பீட்சா, சூது கவ்வும், நடுவுல கொஞ்சம் பக்கத்த காணோம் என உதாரணங்களை சொல்லலாம். இந்த பட்டியலில் வினோத்தும் சேர்ந்து இருக்கிறார்.

பித்தலாட்டங்களை செய்யும் நாயகனை முன்னிறுத்தும் ஜனரஞ்சக படம் என்பதோடு நிறுத்தி விடாமல் யதார்த்தமான கருத்துக்கள், நல்ல தொழில்நுட்பம் உள்ளிட்ட முக்கிய அம்சங்களையும் கலந்திருந்தார் இயக்குனர். சதுரங்க வேட்டை மூலம் ராஜாவாகி இருக்கும் வினோத் வரும் ஆண்டுகளிலும் பட்டத்தை தக்க வைப்பார் என நம்பலாம். 

............................................................................


முந்தைய பதிவு:


     


 

திரை விரு(ந்)து 2014 - தமிழ் படங்கள்






2014 ஆம் ஆண்டில் எனக்கு பிடித்த தமிழ்த்திரை படைப்புகள், கலைஞர்களை இப்பதிவின் மூலம் பகிர்ந்து கொள்வதில் மகிழ்ச்சி. பெரிய ஸ்டார்கள்/இயக்குனர்கள் படங்கள் எதுவும் பெரிதாய் கவரவில்லை. கூடைப்பந்தாட்டத்தை மையமாகக்கொண்டு வெளிவந்த வல்லினம், தமிழகத்தில் நடந்த மோசடிகளை சுவாரஸ்யமாய் தொகுத்த சதுரங்க வேட்டை, விறுவிறு கமர்சியலாய் இருந்த கோலி சோடா உள்ளிட்டவை ரசிக்க வைத்தன. 

சாதி/மத பிரச்னைகள், கார்ப்பரேட் கம்பனிகளின் அராஜகம் போன்ற முக்கியமான பிரச்னைகளை அடிப்படையாக கொண்டு படங்கள் வந்தாலும் அவைகள் எல்லாம் மசாலா பிடிக்குள் சிக்கியதால் 'க்ளாஸ்' வரிசையில் சேராமல் போயின. இருநூறுக்கும் மேற்பட்ட படங்கள் தியேட்டர்களில் படையெடுத்தாலும் மிகச்சிலருக்கே வெற்றி கிட்டியது. பேசப்பட்ட இயக்குனர்கள் கூட தடுமாற்றத்தை சந்தித்தனர். 2015 ஆம் ஆண்டில் வணிக ரீதியான வெற்றிப்படங்கள் அதிகம் வந்தால் மட்டுமே தமிழ் திரையுலகம் தப்பிக்க விட முடியும். 'சமூகத்துக்கு நல்லது சொன்னா போதும்' என்பதோடு திருப்தி ஆகிவிட்டால் போதாது. சிறந்த படங்கள் வசூலையும் சேர்த்து அள்ளினால்தான் முழுமையான வெற்றியை அனுபவிக்க முடியுமென்பது பலரும் அறிந்ததுதான். இனி 2014 இல் எனக்கு பிடித்த படைப்புகள்/கலைஞர்கள் பட்டியல்:

சண்டைப்பயிற்சி: சுப்ரீம் சுந்தர் - கோலி சோடா

    
ஓரளவுக்கேனும் லைவ்வான சண்டைகளை அமைப்பது என்பதே இந்திய சினிமாவில் அருகி வரும் நேரமிது. கயிறு மற்றும் கணினியின் துணையுடன் மட்டுமே நாயகன், வில்லன், அடியாட்கள் அனைவரும் பறந்து வருகிறார்கள். ரத்தம் தெறிக்கும் வன்முறைப்படங்கள் முன்புபோல இவ்வருடம் பெரியளவில் வரவில்லை. வன்மம், மெட்ராஸ், மீகாமன், ஜிகர்தண்டா போன்ற சில படங்களில் மட்டுமே 'மனசாட்சியுடன்' ஆக்சன் காட்சிகள் அமைக்கப்பட்டன.

மாஸ் கோலாக்களுக்கு இடையே பீறிட்டு வந்தது சுப்ரீம் சுந்தரின் கோலி சோடா ஆக்சன் ப்ளாக். மார்க்கெட்டில் நான்கு பசங்களும் ஆக்ரோசமாக போட்ட சண்டைதான் இவ்வருடத்தின் தாறுமாறு தகராறு. ஐம்பதிற்கும் மேற்பட்ட படங்களில் பணியாற்றி இருந்தாலும் சரியான வெளிச்சம் கிடைக்காத வருத்தத்தை காலி செய்து சுந்தரை 'சுப்ரீம்' மாஸ்டர் ஆக்கியது  கோலி சோடா.
 
ஒளிப்பதிவு: கேவி ஆரி - ஜிகர்தண்டா


இவ்வருடம் ஏகப்பட்ட பேர் தங்கள் சிறந்த ஒளிப்பதிவு மூலம் தமிழ் திரையில் ஆளுமை செய்தார்கள். தினேஷ் கிருஷ்ணன் (தெகிடி), ராஜவேல் ஒளிவீரன் (நெடுஞ்சாலை), மனோஜ் பரமஹம்சா (பூவரசம் பீப்பீ), வெங்கடேஷ் (சதுரங்க வேட்டை), சங்கர் (முண்டாசுப்பட்டி), சன்னி ஜோசப் (ராமானுஜன்), , முரளி (மெட்ராஸ்), நீரவ் ஷா (காவியத்தலைவன்), ரவி ராய் (பிசாசு), சதீஷ் (மீகாமன்) என பட்டியல் நீள்கிறது. 

இதுதான் மதுரை என்று பலர் பயாஸ்கோப் காட்டி வந்தபோது இன்னொரு மதுரையை கண்டுபிடித்தார் கேமரா கொலம்பஸ் கேவி ஆரி. பகலையும், இரவையும் தனது கட்டளைக்கு ஆட்டுவித்து அப்ளாஸ் வாங்கிய ஒளி ஓவியர்.
  
பாடகி: உத்ரா - 'போகும் பாதை' (பிசாசு).


கண்ணுக்குள் பொத்தி (திருமணம் எனும் நிக்காஹ்), கோடையில (குக்கூ), நாராயண (ராமானுஜன்), அம்மா அம்மா (வேலையில்லா பட்டதாரி), புத்தம் புது காலை (மேகா), உச்சிமல (காடு), என் ஆள (கயல்) ஆகிய பாடல்கள் மூலம் முறையே சாருலதா மணி, வைக்கம் விஜயலட்சுமி, எஸ்.ஜானகி, ஆனந்தி, மகிழினி, ஷ்ரேயா கோஷல் போன்றவர்கள் அசத்தினார்கள்.   

அனைவரின் பின்னணி குரலையும் விட உத்ராவின் 'போகும் பாதை' பெரிய தாக்கத்தை ஏற்படுத்தியது. தமிழச்சி தங்கபாண்டியனின் பாடல் வரிகள், அர்ரோலினின் வயலின் ஒலி, உத்ராவின் குரல் வளம், மிஷ்கினின் காட்சியமைப்பு என அனைத்தும் கச்சிதமாய் இணைந்து நீண்ட காலத்திற்கு மறக்க முடியாத பாடலை தந்தன. உன்னி கிருஷ்ணன் மகள் என்பதால் உத்ராவின் சாரீரம் வெகு சிறப்பாய் இருந்ததில் ஆச்சர்யம் இல்லைதான்.

பாடகர்: ஹரிஹரன் - 'போடா போ' (ஆள்) 



ஒனக்காக (பலராம் - பண்ணையாரும் பத்மினியும்), இந்த பொறப்புதான் (கைலாஷ் கேர் - உன் சமையல் அறையில்), விண்மீன் (அபே - தெகிடி),  கண்ணம்மா,  பாண்டி நாட்டு (அந்தோணி தாசன் - ஜிகர்தண்டா) போன்ற பாடல்கள் அதிகமாய் பிடித்திருந்தது. நம்ம கிராமம் படத்தில் பாலமுரளி கிருஷ்ணா பாடிய 'இயற்கை அன்னையின்' பாடல் இன்னும் சிறப்பு. ஆனால் இதையும் தாண்டி மனதை கொள்ளையடித்த பாடல் ஹரிஹரன் பாடிய 'போடா போ' (ஆள்). தன்னம்பிக்கை தரும் வரிகளை கொண்ட இப்பாடல் ஹரிஹரன் மகுடத்தில் இன்னொரு வைரக்கல். இடையூறு செய்யாத ஜோஹனின் இசையும் சிறப்பு.

பாடலாசிரியர்: யுகபாரதி - குக்கூ, காடு, கயல்.

   
ஒனக்காக பொறந்தேனே (பண்ணையாரும் பத்மினியும்) பாடலில் அமரர் வாலி, 'போகும் பாதை'யில் (பிசாசு) தமிழச்சி தங்கபாண்டியன் மற்றும் தாமரை, கார்க்கி, கானா பாலா என ஆளுக்கொரு விதத்தில் அருமையான பாடல்களை இயற்றி இருந்தார்கள். எனினும் கபிலன் (தெகிடி, மெட்ராஸ்) மற்றும் யுகபாரதியின் எழுத்துக்கள்தான் என்னை அதிகம் ஈர்த்தன. ஆகாசத்த, கோடையில (குக்கூ), உச்சிமல, ஊரோரம் (காடு), டார்லிங் டம்பக்கு (மான் கராத்தே) மற்றும் கயல் பாடல்கள் அற்புதம். 

இசையமைப்பாளர்: சந்தோஷ் நாராயணன் - மெட்ராஸ், குக்கூ, ஜிகர்தண்டா


பின்னணி மற்றும் பாடலுக்கான இசையமைப்பு என இரண்டிலும் முன்னே நின்றது சந்தோஷ் நாராயணன்தான். மெட்ராஸ், குக்கூ, ஜிகர்தண்டா என சந்தோஷின் 2014 இசைப்பயணம் அட்டகாசம். ராஜா, ரஹ்மானுக்கு அடுத்தபடியாக தமிழ் சினிமாவில் தனியிடம் பெறும் தகுதி நிறைந்தவராக இருக்கிறார். இவ்வாண்டின் இன்னொரு நம்பிக்கை தரும் வரவு இசையமைப்பாளர் சான் ரோல்டன். 

நகைச்சுவை நடிகர்: ராமதாஸ் - முண்டாசுப்பட்டி


போதுமான வாய்ப்புகள் கிடைத்தும் சூரி பிரகாசிக்கவில்லை. பௌலராக சுசீந்திரனின் ஜீவா படத்தில் மட்டும் ஸ்கோர் செய்தார். சதீஷ், பாலசரவணன் ஆகியோரும் சந்தர்ப்பங்களை கோட்டை விட்டனர். கோலி சோடாவில் இமான் அண்ணாச்சி காவல் நிலையத்தினுள் செய்த அலப்பறை சிரிக்க வைத்தது. வி.ஐ.பி.யில் குறைவாக பேசி நிறைவாய் மகிழ வைத்தார் விவேக். கப்பலில் காமடிக்கு உத்திரவாதம் தந்தார் விடிவி கணேஷ். அரண்மனையில் சந்தானத்தின் காமடியால் அரங்கம் அதிர்ந்தது. நாயகனாக நடித்த வல்லவனுக்கு புல்லும் ஆயுதத்தில் எதிர்பார்த்த அளவு கலகலப்பில்லை.

பெல்பாட்டம் காலத்தில் ஹீரோ வாய்ப்பு தேடி அலையும் முனீஷ்காந்த் வேடத்தில் பட்டையை கிளப்பினார் ராமதாஸ். முண்டாசுப்பட்டியில் வட்டார வழக்கு, 'நடிச்சா ஹீரோ சார்' தோரணை, க்ளைமாக்ஸ் கலாட்டா மூலம் நகைச்சுவை நாயகனாய் வெற்றிக்கொடி கட்டினார் இவர்.

..........................................................................

தொடர்ச்சியை படிக்க:

திரைவிரு(ந்)து 2014 - தமிழ் படங்கள் பாகம் இரண்டு





Monday, December 29, 2014

மீகாமன், கயல், கப்பல், வெள்ளக்காரதுரை




வணக்கம் நண்பர்களே,

மீகாமன், கயல், கப்பல், வெள்ளக்காரதுரை விமர்சனங்களை படிக்க:





http://tamil.jillmore.com/meagamann-movie-review/





 http://tamil.jillmore.com/kayal-movie-review/




http://tamil.jillmore.com/vellakkaradurai-movie-review/





Tuesday, December 16, 2014

ஸ்பெஷல் மீல்ஸ் (16/12/14)



மௌனகுரு:



இரண்டு சிறப்பான உணவுக்கடைகளில் சாப்பிடும் சந்தர்ப்பம் சமீபத்தில் அமைந்தது. 'கடல் பயணங்கள்' சுரேஷ் சென்னை வந்திருந்தார். கோவை ஆவி, கே.ஆர்.பி.செந்தில், சுரேஷ் ஆகியோருடன் பாரிமுனை என்.எஸ்.சி. போஸ் சாலையில் இருக்கும் பிரபல 'சீனா பாய் இட்லிக்கடை'க்கு விஜயம் செய்தேன். பத்து மினி நெய் இட்லிகள் மற்றும் இரண்டு ஊத்தாப்பங்கள். இந்த இரண்டு ஐட்டங்களை மட்டும் வைத்தே ஜரூராக வியாபாரம் செய்து கொண்டிருந்தனர். விலை ரூ 40. இட்லிக்கு சட்னி, சாம்பார் தேவையே இல்லை. பிரமாதமான சுவை கொண்ட இட்லிப்பொடியில் குளித்தவாறு சுடச்சுட வரும் இட்லிக்களை உள்ளே தள்ளிக்கொண்டே இருக்கலாம். அந்த இட்லிப்பொடியில் ஏதோ ஒரு மேஜிக் இருக்கிறது. ஊத்தாப்பமும் ஆசம். 

இக்கடை குறித்து விரிவான தகவல்களை 'கடல் பயணங்கள்' சுரேஷ் எழுதி இருக்கிறார்

 http://www.kadalpayanangal.com/2014/12/blog-post_15.html
 

அடுத்ததாக கீழ்பாக்கம் ஓர்ம்ஸ் சாலை எண் 4/2 வில் இருக்கும் மௌனகுரு கண்ணப்பா உணவகத்தை பரிந்துரை செய்து அழைத்துச்சென்றார் கேபிள் சங்கர். பூரி சைஸில் இருக்கும் தட்டு இட்லி அங்கே ஸ்பெஷலாம். அத்துடன் பேபிகார்ன், மைசூர் மற்றும் பன்னீர் தோசைகளையும் ஆர்டர் செய்து உள்ளே தள்ளினோம். ஆப்ரிக்கன், மெக்சிகன், இத்தாலி மற்றும் ஜெயின் சமூக மக்கள் விரும்பும் தோசைகள் பல வெரைட்டிகளில் கிடைக்கின்றன. ஆனாலும் அங்கே தட்டு  இட்லிதான் ஹீரோ. கேபிள், கே.ஆர்.பி. மற்றும் நான் சாப்பிட்டது மொத்தம் நான்கு தட்டு இட்லிகள் மற்றும் மூன்று தோசைகள். பில் வெறும் 300 ரூபாய்தான்!!

இக்கடை குறித்து விரிவான தகவல்களை கேபிள் சங்கர் எழுதி இருக்கிறார்:
 
http://www.cablesankaronline.com/2014/12/blog-post.html


.................................................................................

சும்மா நச்னு இருக்கு:

தேசத்தின் முன்னேற்றத்திற்கு சம்மந்தம் இல்லாத கல்வி, சுகாதாரம், மத நல்லிணக்கம் போன்றவற்றை புறந்தள்ளிவிட்டு மொழித்திணிப்பு, மத துவேஷம் போன்ற அதி அத்யாவசிய செயல்பாடுகளில் ஈடுபட்டும் வரும் பா.ஜ.க. தலைவர்களை பாராட்ட வார்த்தைகள் இல்லை. அங்கே அமளி துமளி என்றால் இங்கே அநியாய அமைதி. நிஜத்தில் சொல்லப்போனால் பக்கோடா சாப்பிடும் பன்னீர் ஆட்சியில்தான் மாநிலம் அமைதிப்பூங்காவாய் திகழ்கிறது. கவட்டைக்கு கீழே பொக்ரான் குண்டை பற்ற வைத்தால் கூட சிலையாய் இருக்கும் கலையில் 100/100 வாங்கிய நபராகவே தெரிகிறார். வி.ஜி.பி. கோல்டன் பீச்சில் அசையாமல் இருக்கும் அண்ணாத்தையை கூட ஒரு நொடி கண்சிமிட்ட வைத்து விடலாம் போல. அருமையான தேசம், அற்புதமான மாநிலம்.

.................................................................................. 


பட்டியல்:

ஓரளவு பெயர் சொல்லும் படங்களை தந்து வந்த ஹிந்தி மற்றும் தமிழ் திரையுலகங்கள் இவ்வருடம் பெருமளவு ஏமாற்றி விட்டன. தெலுங்கில் 'நா பங்காரு தல்லி' ரசிக்க வைத்தது. சிறந்த படங்களை தந்து இவ்வருடம் முதலிடத்தை பிடித்து இருப்பது மலையாள சினிமாதான். இவ்வாண்டின் திரைப்படங்கள் குறித்த எனது பார்வையை tamil.jillmore.com தளத்தில் விரைவில் எழுதுகிறேன். எனக்குப்பிடித்த படங்கள்/கலைஞர்கள் பட்டியல் மெட்ராஸ் பவனில் வழக்கம்போல வெளியாகும். 

............................................................................... 


மூடர் கூடம்:

தொழில்நுட்ப முன்னேற்றங்கள் வரும்போதெல்லாம் உடனே மாறாமல் சற்று தாமதமாகவே அதனுடன் இணைந்து கொள்வேன். அலுவலகத்தில் அனைவரும் மொபைல் வாங்கிய பிறகு கூட பொறுமை காத்து அதன் அவசியம் தேவைப்பட்டபோதே வாங்கினேன். டி.வி. கணினி போன்ற பொருட்கள் புதுவடிவத்திற்கு மாறினாலும் அதே நிலைப்பாட்டைத்தான் எடுத்தேன். அதுபோல ஃபேஸ்புக்கில் பரவலாக நண்பர்கள் உள்ளே நுழைந்து போதும் நிதானமாகவே அடியெடுத்து வைத்தேன்.


நல்ல நட்புகளை வைத்திருக்கும் நண்பர்கள் தடாலடியாக சில வார்த்தைகளை பிரயோகித்து அதன் நீட்சியாக அடித்துக்கொள்வதும், அதுவே மனக்கசப்பாக மாறி பிரிவதும் எளிதாக நடந்து வருகிறது. சில நொடியில் எழுதும் வார்த்தைகள் நிரந்தர பகைக்கு வழி வகுத்து விடுகின்றன. நட்புகளை வலுவாக்க உருவாக்கப்பட்ட ஃபேஸ்புக் அனைத்து மனக்குமுறல்கள் மற்றும் வஞ்சங்களுக்கான ஒரே வடிகாலாய் ஆகி இருப்பது காலத்தின் கோலம். 



பிரச்னைகளை எழுப்பும் ஸ்டேட்டஸ்கள்/கமண்ட்கள் அருமையான நட்புகளை இழக்க வைக்கும் ஆபத்தை கொண்டிருப்பதால் 'கவனம்' அவசியம்.   

............................................................................ 


தாலாட்டு கேக்குதம்மா: 

டிசம்பர் மாதமென்பதால் சென்னையில் இசை விழாக்கள் ஏகத்துக்கும் களை கட்டி வருகின்றன. அனைத்து சபாக்களிலும் சங்கீத கச்சேரிகள் ஆக்ரமித்து இருப்பதால் மேடை நாடக பிரியனான எனக்கு இம்மாதம் ஒரு சில நாடகங்களை மட்டுமே காண வாய்ப்பு கிடைக்கும் என தெரிகிறது. சங்கீத ஞானம் கருவேப்பிலை அளவு கூட இல்லை. ஆனால் கதிரி கோபால்நாத்தின் சாக்ஸபோனில் மட்டும் ஏனோ ஒரு ஈர்ப்பு. சென்ற முறை அவரது அற்புதமான இசையை நேரில் கண்டு/கேட்டு லயித்தேன். இம்முறை டிக்கட் விலை வாயை பிளக்க வைப்பதால் அன்பளிப்பு/சொற்ப விலை டிக்கட் வாங்க திட்டம் தீட்ட வேண்டும். 


'சென்னையில் திருவையாறு' இசை  நிகழ்ச்சி குறித்து எங்கள் தளத்தில் வெளியாகி இருக்கும் செய்தியை படிக்க:  http://tamil.jillmore.com/chennaiyil-thiruvaiyaru-musical-programme-to-begin-on-18th-december/


..........................................................................

பாட்டாளி:
தமிழில் உருப்படியான நிகழ்ச்சிகளை வழங்கும் சேனல்களில் மக்கள் தொலைக்காட்சி தனக்கென ஒரு இடத்தை தக்க வைத்து வருகிறது. காலப்போக்கில் வணிக சமரசத்திற்கு ஆட்பட வேண்டிய கட்டாயம் இருந்தாலும் அதையும் தாண்டி மண்ணின் பெருமையை காத்து வருவது பாராட்டத்தக்கது. எதேச்சையாக ஞாயிறு காலை 10.30 மணிக்கு 'சின்ன சின்ன ஆசை' எனும் நிகழ்ச்சியை பார்த்தேன். முன்பொரு சமயம் இந்நிகழ்ச்சியை அவ்வப்போது பார்த்து வந்தாலும் இம்முறை ஒளிபரப்பிய விஷயம் இன்னும் மனதில் நிழலாடிக்கொண்டு இருக்கிறது.

திரிசூலம் மலையருகே இரண்டு தண்ணீர் பேரல்களை மாட்டு வண்டியில் ஏற்றி அப்பகுதியில் இருக்கும் சிற்றுண்டி கடைகளுக்கு சப்ளை செய்து வரும் பெரியவர் பற்றிய பிரத்யேக நிகழ்ச்சி. 40 ஆண்டுகளாக இத்தொழிலில் ஈடுபட்டு வருகிறார். 'நான்காம் வகுப்பிற்கு மேல் படிக்க இயலாததால் வேறு தொழிலுக்கு செல்ல முடியவில்லை. பிள்ளைகளுக்கு திருமணம்  செய்து வைத்துவிட்டேன். வருடா வருடம் வேறு மாடு வாங்க வேண்டி இருக்கிறது. எனக்கும், மாட்டிற்கும் நித்தம் 150 ரூபாய் செலவாகிறது. மோட்டார் வாகனங்களில் தண்ணீர் சப்ளை செய்பவர்கள் நீக்கமற நிறைந்து இருப்பதால் இன்னும் எத்தனை காலம் தாக்கு பிடிப்பேன் என்று தெரியாது. அப்படி ஒரு நிலை வந்தால் ஊர்ப்பக்கம் சென்று விட வேண்டியதுதான். பயணத்தின் இடையே களைப்பாற சற்று ஓய்வெடுக்கும் சமயத்தில் டயர், பேரல் போன்றவற்றை சிலர் திருடி விடுகிறார்கள்' என கவலை பொங்க கூறினாலும் உழைப்பாளிக்கான பெருமிதம் அவரிடம் ஸ்திரமாக குடிகொண்டிருந்தது.

'உங்கள் ஆசையை சொல்லுங்கள். நிறைவேற்றி தருகிறோம்' என தொகுப்பாளர் கூற '250 லிட்டர் கொள்ளளவு கொண்ட இரண்டு பேரல்களை விட 500 லிட்டரில் ஒரே பேரலாக இருந்தால் வேலை சுலபமாக நடக்கும்' எனக்கூறினார் பெரியவர். சில கடைகளை தாண்டி ஒருவழியாக அவர் எதிர்பார்த்த பேரல் கிடைத்துவிட்டது. 1,857 ரூபாய் மதிப்புள்ள அப்பொருளுக்கான பணத்தை பெரியவரிடம் தந்து கடைக்காரரிடம் தரச்சொன்ன தொகுப்பாளரை தோள்தட்டி பாராட்டலாம்.  
........................................................................

சவாலே சமாளி:
இந்த வருடம் கிட்டத்தட்ட அனைத்து பெரிய நட்சத்திரங்களின் படங்களும் வசூலில் மண்ணை கவ்வி விட்டன. இதற்கு ஒரே காரணம் முன்பைப்போல பொழுதுபோக்கு படைப்பை தர முடியாமல் கற்பனை வறட்சியில் கோடம்பாக்கம் தள்ளாடியதுதான். 2015 ஆம் வருடம் இன்னும் சவாலாக இருக்கிறது. குறிப்பாக இவ்வருடம் வெளியாகாமல் தள்ளிப்போடப்பட்டு இருக்கும் படங்களுக்கு. அடுத்த ஆண்டின் துவக்கத்தில் உலகக்கோப்பை க்ரிக்கட், பத்தாவது மற்றும் பனிரெண்டாம் வகுப்பு தேர்வுகள், அதன் பிறகு ஐ.பி.எல் என பல்வேறு நிகழ்வுகள் காத்திருகின்றன. எனவே கடும் போராட்டத்திற்கு இடையேதான் தமிழ்ப்படங்கள் வெற்றிக்கனியை பறிக்க இயலும்.  தலைவர் கவுண்டமணியின் '49 ஓ' மட்டுமே நான் பெரிதும் எதிர்பார்க்கும் படம். 
................................................................................ 



புருஷ லட்சணம்: 
For Hire - சமீபத்தில் ரசித்த குறும்படம். இரவுப்பின்னணியில் சுவாரஸ்யமாக கதை சொல்லி இருக்கிறார்  இயக்குனர் விஷ்ணு ராகவ்: 
 


..........................................................................................



  

Friday, December 12, 2014

லிங்கா



வணக்கம் நண்பர்களே,

ரஜினிகாந்த், அனுஷ்கா,  சந்தானம் நடித்த லிங்கா படத்தின் எனது விமர்சனம் படிக்க:  

http://tamil.jillmore.com/lingaa-movie-review/




.....................................................................................



Friday, November 28, 2014

காவியத்தலைவன்





சினிமாவின் தாயென்று சொல்லப்படும் மேடை நாடகத்தை தமிழக மக்கள் கிட்டத்தட்ட மறந்தே போயிருக்கும் இக்காலத்தில் அம்மூதாட்டியை கரம் பிடித்து அழைத்து வந்து சபையில் அமர வைக்கும் முயற்சியை மேற்கொண்டுள்ளார் வசந்தபாலன். இப்படி ஒரு சப்ஜெக்டை தொடுவதற்கே ஒரு அசாத்திய தைரியம் வேண்டும். அவ்வகையில் சபாவின் திரைக்கு பின்னே ஓடிப்போய் வசந்த பாலனிடம் கை குலுக்கி விட்டு இருக்கையில் வந்து அமர்ந்து கொள்ளலாம். அதற்கடுத்ததாக  நாடகம் எப்படி இருக்கிறது என்பதுதானே அதிமுக்கியமான விஷயம்? பார்க்கலாம் இனி.

மதுரை ஸ்ரீலஸ்ரீ பாலசண்முகானந்த நாடக சபாவை நடத்தி வருபவர் சிவதாஸ் ஸ்வாமிகள். நெடுங்காலம் ராஜபார்ட் வேடம் போடும் நபர்  கருத்து மோதலால் அங்கிருந்து கிளம்பிவிட, அடுத்து அந்த பிரதான வேடத்திற்கு தகுதியானவர் யார் என யோசித்து காளியப்பனை தேர்வு செய்கிறார் சிவதாஸ். குருவினால் தொடர்ந்து தான் புறக்கணிப்படுவதை கண்டு விரக்தி அடையும் கோமதி நாயகம் இம்முறை உடைந்தே போகிறான். தம்பி போல பழகி வந்த காளியை இந்த ஒரு காரணத்திற்காக பழிவாங்கி, நாளடைவில் பிரபல ராஜபார்ட்டாக புகழை அடைகிறான் கோமதி. இதனிடையே காதலெனும் பேரலையும் இவர்களின் கால்களை பிடித்து இழுக்க கரை சேர்ந்தார்களா என்பதுதான் கதை.

நாடக்குழுவின் குருநாதராக நாசர். கொஞ்ச காலமாக நாசரின் பசிக்கு சோளப்பொறி மட்டுமே கிடைத்து வந்தது. இம்முறை வாக்காக ஒரு வாய்ப்பு கிட்டியதால் வாகை சூடியுள்ளார். சித்தார்த் எனும் இளவரசன் தலையில் ஒன்றரை டன் கிரீடம். கிரீடத்தை நழுவவிடாமல் ஆற்றை கடக்க என்ன பாடு படவேண்டி இருக்கிறது? 'டேய் ஒண்டிப்புலி.. இந்த ஆத்துல முதலை ஒண்ணு வலம் வருதாம்' என்று யாரேனும் தியேட்டரில் கத்தாத வரைக்கும்....'அப்பாடா'.  இவரது முந்தைய படங்களை வைத்து பார்க்கையில் இம்முறை சற்று மெருகேறி இருக்கிறது நடிப்பு.

சித்தார்த்தை விட பிரகாசித்து இருப்பது ப்ரித்விராஜ் தான். ஓரங்கட்டப்படும்போது ஏற்படும் வலியை விழிவழியே வெளிப்படுத்தி இருப்பது சிறப்பு. வசனம் பேசும்போது ஆங்கங்கே மலையாள வாடை அடிப்பதால் உள்ளூர் ராஜபார்ட்டாக ஏற்றுக்கொள்ள சற்று கடினமாக இருக்கிறது. நாடகம் முடிந்ததும் 'இன்னைக்கி நடிச்சேனா?' என இரண்டு மூன்று இடங்களில் சித்தார்த்தை கேட்கிறார் வேதிகா. 'அழகா இருக்க. ஆனா அப்படி என்ன நடிச்சி கிழிச்ச?' என்று நாம் பேச வேண்டிய வசனத்தை சித்தார்த்தே படத்தில் பேசி இருப்பது தொலைநோக்கு பார்வையின் உச்சம்.

கௌரவ நடிகராக வந்து கம்பீரமாக பெயரை தக்கவைத்துக்கொள்கிறார் பொன்வண்ணன். நாடக வருமானம் போய் விட்டதே எனும் கோபத்தில்  மன்சூர் அலிகான் குடித்து விட்டு கலாட்டா செய்வதாக ஒரு காட்சி வருகிறது.  கிருஷ்ணர் வேடத்தில் இருக்கும் ப்ரித்விராஜிடம் 'உன்னை அடிச்சிருவேன். ஆனா என் கண்ணுக்கு நீ கிருஷ்ணனா தெரியறியே' என அவர் சொல்லுமிடம் அட்டகாசம். 'கோவப்படாதீங்க தம்பி' என்று ஒவ்வொருவரையும் விலக்கி விடுவதிலேயே தம்பி ராமையாவிற்கு நேரம் போய் விடுகிறது. சிங்கம்புலியின் 'அம்மா...அம்மா ஆயிடுவாங்க' வசனம் சிரிக்க வைக்கிறது.


 ரஹ்மானின் இசையில் 'வாங்க மக்கா வாங்க' துள்ளல். 'ஏய் மிஸ்டர் மைனரில்' மணிரத்னத்தின் 'ஹலோ மிஸ்டர் எதிர்க்கட்சி' எட்டிப்பார்க்கிறது. இதர பாடல்கள் பெரிதாக மனதில் ரீங்காரமிடவில்லை. நீரவ் ஷாவின் ஒளிப்பதிவு சிறப்பு. சந்தானத்தின் கலை இயக்கம் பாராட்டுக்குரியது. ஆடை வடிவமைப்பு, ஒப்பனை ஆகியவற்றில் நல்ல கவனம் செலுத்தி இருக்கிறார்கள். முக்கிய குறிப்பு: சித்தார்த் காதலியாக வரும் இளவரசியின் உதட்டில் மட்டும் சாயம் அதிகம்.

காவியத்தலைவன் மூலம் வசந்த பாலன் அடிப்படையில் சொல்ல வருவதென்ன? மறந்து போன நாடக உலகை மீண்டும் நம் கண்முன் வண்ணமயமாக நிறுத்துவது மட்டும்தானா? கர்ண மோட்சம், நாடக சபா, சங்கரதாஸ் சுவாமிகள், ராஜபார்ட் போன்ற பலகைகளும், உச்சரிப்புகளும் மட்டுமே காவியத்தலைவனை வெற்றி பெற வைக்க போதுமான அஸ்திரங்களா? சுதந்திர வேட்கைக்கும், கலை அர்ப்பணிப்பிற்கும் பெருந்தொண்டும், தியாகமும் செய்த தமிழ் நாடக கலைஞர்கள் பற்றிய ஒரு முக்கியமான பதிவை எடுக்கும்போது பிரதான பாத்திரங்களை தேர்வு செய்வது எத்தனை முக்கியமானது? சுமாரான நடிப்பும், செயற்கை பூச்சும் கொண்ட சித்தார்த், வேதிகாவை தேர்வு செய்து அவர்களிடம் நடிப்பை வாங்க இவ்வளவு மூச்சு வாங்க வேண்டுமா என்ன?

ப்ரிதிவிராஜ், சித்தார்த் இடையேயான உடன்பிறவா சகோதர பாசம், சித்தார்த் வேதிகா காதல் இரண்டிலும் போதுமான ஈர்ப்பே இல்லை. இளவரசியின் இல்லத்திற்கு ஏதோ கடலை பர்பி வாங்க போவது போல சர்வ சாதாரணமாக சென்று செல்வது, முதுகில் தோட்டா துளைத்த பிறகும் நெடிய வசனம் பேசுவது என சித்தார்த்தின் கதாபாத்திரம் சித்திர குள்ளனாய் மாறுவது நகைச்சுவை.

க்ளைமாக்ஸ் விறுவிறுப்பாக இருக்க வேண்டுமெனும் குல வழக்கத்தின்படி 'ராஜபார்ட் ரங்கதுரை' போல சுதேசி ஃபார்முலா இறக்கப்பட்டு உள்ளது. வந்தே மாதரம் என்று சித்தார்த் நம்மை பார்த்து முழங்கும்போது 'சொல்லுங்களடா வெற்றி வேல் வீர வேல் என்று' என சிப்பாய்களிடம் இம்சை அரசன் கெஞ்சும் காட்சி கண்முன் வந்து செல்கிறது. எழுத்துலக ஆளுமைகள் வசனம் எழுதும் தமிழ்ப்படங்கள் பெரும்பாலும் வசூல் ரீதியாக வெற்றி பெறாமலே இருப்பதன் 'ரகசியம்' என்னவென்று தெரியவில்லை. ஜெயமோகன் வசனம் எழுதி இருக்கும் இந்த காவியத்தலைவனிலும் அந்த ரகசியம் தெரிய வாய்ப்பே இல்லை.

'வாங்க மக்கா வாங்க. எங்க நாடகம் பாக்க வாங்க' என ட்ரைலரில் தெளிவாக சொன்ன பிறகும் 'சினிமாவை' எதிர்பார்த்து வருவது அபத்தம். ஆனால் நாடகத்தை கூட காட்டாமல் நாடக ஒத்திகையை மட்டும் இயக்குனர் காட்டியிருப்பது சங்கரதாஸ் ஸ்வாமிகளுக்கே பொறுக்காது மக்கா.

Written for tamil.jillmore.com

.....................................................................



Wednesday, November 26, 2014

மிஷ்கினின் காட்டமான பேச்சும், அதற்கான ஸ்பூஃபும்







வணக்கம் நண்பர்களே,
கடந்த ஞாயிறு அன்று திரைப்பட நிகழ்ச்சி ஒன்றில் இயக்குனர் மிஷ்கின் பேசிய பேச்சுதான் கோலிவுட்டின் தற்போதைய Hot talk. இணையத்தில் விமர்சிப்பவர்களை சகட்டு மேனிக்கு விளாசி இருந்தார் அவர். அந்த காணொளி:

https://www.youtube.com/watch?v=5dyvjaO1lQg 

காட்டமான இந்த பேச்சு குறித்து ஜில்மோர் தளத்தில் வெளியான கட்டுரை:

http://tamil.jillmore.com/mysskin-shows-his-anger-against-social-media-critics/ 

ஜில்மோர் யூட்யூப் சேனலில் மிஷ்கின் பேச்சை ஸ்பூஃப் செய்து ஒரு காணொளியை பகிர்ந்து இருக்கிறோம். மிஷ்கின் ரசிகன் ஃபேர் ஸ்கின்னாக நான் நடிக்க(!) கே.ஆர்.பி.செந்தில் ஒளிப்பதிவு செய்திருக்கிறார். அதனைக்காண:



பிடித்திருந்தால் தங்கள் Facebook/Twitter தளங்களில் பகிரவும். நன்றி. 

 

Related Posts Plugin for WordPress, Blogger...