CINEMA SHOULD MAKE YOU FORGET YOU ARE SITTING IN A THEATER – ROMAN POLANSKI

Saturday, November 30, 2013

விடியும் முன்




                                                                         

விடியும் முன்? கண்டிப்பா பேய்ப்படமாத்தான் இருக்கும் எனும் அனுமானம் ஒருபுறம். பூஜாவைத்தவிர பெரிய ஆர்டிஸ்ட் யாரும் இல்லாததால் நவீன சரஸ்வதி சபதம், ஜன்னல் ஓரம் ஏசிக்காற்று வாங்க பலர் சென்றது மறுபுறம். வழக்கம் போல லோ பட்ஜெட் படங்களின் ஊக்க சக்தியான உண்மைத்தமிழன் அண்ணாச்சி 'கண்ட மசாலாவை எல்லாம் பாக்கறீங்க. இத பாருங்கலேய்' என்று கெனாவில் வந்து ஆக்ஸா 'ப்ளேடை' சுழற்ற விடிந்தவுடன் விடியும் முன் பார்க்க கிளம்பியாயிற்று. சரியாக வெட்டப்பட்ட ட்ரெயிலரும் வி.மு. பார்க்கும் எண்ணம் வந்ததற்கான மறு காரணம்.

விலைமாது ஒருத்திக்கு பழக்கமான ப்ரோ 'செல்வாக்கு மிக்க வாடிக்கையாளர் ஒருவருக்கு சிறுமி வேண்டும். பார்த்து செய்' என பணத்தாசை காட்ட ஆவன செய்கிறாள் அவள். ஆனால் அச்சிறுமியை வேறொரு காரணத்திற்காக பயன்படுத்த நினைக்கிறான் அந்த பெரிய மனிதன். மானும், மான் குட்டியும் அங்கிருந்து தப்ப ஓநாய்கள் துரத்துகின்றன. மறுநாள் விடியும் முன் நடக்கும் சம்பவங்களை கோர்த்து சஸ்பென்ஸ் த்ரில்லராக தந்திருக்கிறார்கள்.

வி.மு.வின் மைய பாத்திரம் (சற்றே பழமையான) பூஜா. வழமையாக நாயகிகள் தேர்ந்தெடுக்கும் இக்கிலி பிக்கிலி கேரக்டர்களை உதறிவிட்டு ரேகா எனும் விலைமாதாக நடித்திருப்பது நல்ல மாற்றம். 'வயசாயிடுச்சில்ல' என வெளிப்படையாக ஒப்புக்கொள்ளும் வசனம் பேசி இருப்பது ஒப்பனை கலை ப்பு. சிறுமி நந்தினியாக மாளவிகா. மென்மையும், பிடிவாதமும் கலந்த கேரக்டரில் சிறப்பாய் நடித்திருக்கிறாள். இருவருக்குமிடையேயான உரையாடல்களில் செயற்கைத்தனம் இல்லாதது அவர்களுடன் ஒன்ற வைத்து விடுகிறது.

வித்யாசமான சிறு பட்ஜெட் படங்களில் அவ்வப்போது தென்படும் ஜான் விஜய் இங்கும். தான் தேர்ந்தெடுக்கும் படங்கள் ஒவ்வொன்றும் தனித்தன்மையுடன் இருக்க வேண்டும், தனது கேரக்டரும் மாறுபட்டிருத்தல் அவசியம் என்பதில் ஜான் கவனம் செலுத்துகிறார் என்பது உண்மைதான். ஆனால் முந்தைய வேடங்களின் சாயல் அப்பிக்கொள்வதை தவிர்க்க இயலவில்லை. எனினும் இம்முறையும் அசால்ட் வில்லத்தனம் மூலம் பெயர் வாங்கி விடுகிறார். ஸ்ரீரங்கத்து மத்யம தேவதையாக லட்சுமி ராமகிருஷ்ணன் சற்றே வந்தாலும் ஆள்/ல் இஸ் வெல். தாடி வைத்த கோவக்கார சின்னையாவாக வினோத் கிஷன்('நந்தா'வில் குட்டி சூர்யா இவர்தேன்). பஸ் டிக்கட் பின்புறம் எழுதும் அளவிற்குதான் தம்பிக்கு வசனமே. 'வில்லனுங்க எல்லாமே இவ்வளவு வெறப்பாத்தான் இருக்கனுமா?' என வினவியது தத்துவ பதிவர். ஒப்புதல் புன்முறுவல் பூத்தது பயமில்லா சிங்கம். அதுவும் ரைட்டுதான். 
                                                                     

ஒரு நாளில் நடக்கும் சம்பவங்கள் என்றாலும் திரை ஓரத்தில் அவ்வப்போது நேரத்தை காட்டாமல் விட்டது இயக்குனரின் சாமர்த்தியமாகக்கூட இருக்கலாம். கருநாகத்தை சுற்றி அடியாட்கள் விளையாடும் காட்சி சில நொடிகளே வந்தாலும் நல்ல விஷுவல். அதை க்ராபிக்ஸ் படுத்திய அணிக்கு தம்ஸ் அப். இளம் வரவு கிரீஷ்ஷின் இசை சிறப்பு. சஸ்பென்ஸ் சினிமா என்பதற்காக அடிக்கடி தடதடக்காமல் அளவோடு வார்த்திருக்கிறார். நல்லா வருவீக தம்பி. குறுகிய பட்ஜெட் படங்கள் என்னதான் நன்றாக இருந்தாலும் பொதுவாக சொதப்புவது ஒளிப்பதிவு. ஆனால் அக்குறை ஏற்படா வண்ணம் நிறைவாக வேலை பார்த்திருக்கிறார் சிவகுமார். 

திணிக்கப்படும் திடுக் திருப்பங்கள், தேவையின்றி பயமுறுத்தும் வசனங்கள் ஆகியவற்றை களைந்து மித வேகத்தில் களமாடியிருக்கிறார் இயக்குனர் பாலாஜி. ஸ்ரீரங்கத்தில் ஜான் விஜய் முகவரி விசாரிக்கும் பொழுது சைக்கிள் ஓட்டிக்கொண்டே ஒரு மாமி செல்வது பின்னணியில் அதிகபட்சம் இரண்டு நொடிகளே வரும். இந்த பெர்பக்சனுக்காக மெனக்கெட்டு அக்மார்க் ஸ்ரீரங்கத்து மாமியை தேடி சைக்கிளோட்ட வைத்திருக்கும் இயக்குனருக்கு ஸ்பெஷல் சபாஷ்.
  
முதல் மூன்று குவார்ட்டர்கள் வரை  'நல்லாத்தான போயிட்டு இருக்கு?' என என்னும்போது கடைசி ரவுண்டில் சினிமாத்தனம் எட்டிப்பார்க்கிறது. சிறுமி மீது இரக்கப்படும் சின்னவரே அவள் முன் ரத்தக்காவு வாங்குவது முரண். ஓரளவு யூகிக்க முடிந்த க்ளைமாக்ஸ். மற்றபடி மெச்சத்தக்க டீம் வொர்க். வாழ்த்துகள் பாலாஜி & கோ.
 .................................................................  
  




Thursday, November 28, 2013

மாதவ பூவராக மூர்த்தியின் - நாற்காலிக்கு இடமில்லை




சில நாட்களுக்கு முன்பு தி.நகர் ராமகிருஷ்ணா பள்ளி இன்போசிஸ் ஹாலில் குருகுலத்தின் 'நாற்காலிக்கு இடமில்லை' அரங்கேறியது. புகழ்பெற்ற கார்த்திக் பைன் ஆர்ட்ஸின் 2011 கோடை நாடக விழாவில் சிறந்த நாடகத்திற்கான விருதை வென்றதோடு மாதவ பூவராக மூர்த்திக்கு சிறந்த நடிகர், வசனகர்த்தா மற்றும் மாலதி சம்பத்திற்கு சிறந்த நடிகை ஆகிய கிரீடங்களை வென்று தந்தது இந்நாடகம் என்பது குறிப்பிடத்தக்கது.  

துரித கதியில் வாழ்வை நகர்த்திக்கொண்டிருக்கும் குடும்பம். பணி ஓய்வு பெற்றதால் ஹாலின் நடுவே அமர்ந்தவாறு அமைதி காக்கும் பெரியவர். அவரிடம் பேசக்கூட நேரமின்றி கடந்து செல்லும் நபர்கள். 'வெளியே செல்கிறோம். வீட்டை பார்த்துக்கொள்ளுங்கள்' என மனைவி உட்பட அனைவரும் கிளம்பி விட தனிமையின் துயரை நாடகம் பார்க்கும் மக்களிடம் பகிர்ந்து கொள்ள ஆரம்பிக்கிறார் கதை நாயகன் ஸ்ரீனிவாசன்/சீனு(மாதவ பூவராக மூர்த்தி). இளம்பிராயத்தில் தன் பெற்றோரிடம் வளர்ந்த முறை, கற்றுக்கொண்ட சங்கீதம், அவர்கள் நினைவாக வைத்திருக்கும் பொருட்கள் என நினைவலையில் மூழ்குகிறார். தந்தையின் காலம் முதல் குடும்பத்தின் அங்கமென தான் கருதி இருக்கும் நாற்காலியை தன் மகன் அகற்ற சொன்னதை எண்ணி கண் கலங்குகிறார். இறுதியில் என்ன கதிக்கு ஆளானது அந்நாற்காலி? உங்களுக்கான அமர்வு வாய்த்தால் கண்டு நெகிழ்க.

இவ்வாண்டு நான் பார்த்த நாடகங்களில் பிரமாதமான நடிப்பை வெளிப்படுத்தி இருந்தது மா.பூ.மூர்த்திதான். 70 வயதை தாண்டிய நடிகர் ஒருவர் பல பக்க வசனங்களை தடையின்றி உச்சரித்து நம்மை அக்கதாபாத்திரத்துடன் ஒன்ற வைத்திருப்பது அபாரம். ஒரு மணி நேரத்திற்கும் மேலாக ரசிகர்களை பார்த்த வண்ணம் யதார்த்தமாக மூர்த்தி கூறும் மலரும் நினைவுகள் சில வாரங்களுக்கேனும் மனதை விட்டு அகலாது. இக்கால இளைஞர்களின் உழைப்பு மற்றும் நவீன சாதனங்களின் அத்யாவசியத்தை தந்தைக்கு உணர்த்தும் பரத் ஆக வெங்கட். வெங்கட்டின் கெரியரில் மிக முக்கியமான கேரக்டர் இது. இரு தலைமுறைக்கான இடைவெளியை ஆரோக்யமான வாதங்கள் மூலம் பேலன்ஸ் செய்கிறது இந்த இறுதிக்காட்சி.




சீனுவின் மனைவியாக மாலதி சம்பத் சில நிமிடங்களே வந்தாலும் தமது முத்திரையை படித்து செல்கிறார். 'மணமான புதிதில் அசதியான நேரமொன்றில் அந்நாற்காலியில் அமர்ந்து விட்டேன். என் அப்பா உட்கார்ந்த நாற்காலியில் ஏன் அமர்ந்தாய் என நீங்கள் வலுவாக கடிந்து கொண்டீர்கள். அந்நாள் முதல் இன்றுவரை அதில் அமர்ந்ததில்லை. எனவே அதன் மீது எனக்கு எந்தப்பற்றும் இல்லை' என்று மாலதி பேசும் வார்த்தைகள் சாந்த சொரூபிகளாக மன அழுத்தங்களுடன் காலத்தை நகர்த்தும் பெண்களின் வலி.

 'புத்தகத்தில் இருக்கும் மயிலிறகு குட்டி போடாது. ஏமாறாதே' என மகனுக்கு சீனு அறிவியல் பூர்வமாக பாடமெடுக்க அவர் சென்றபின் 'அப்பா அப்படித்தான் சொல்வார். எல்லாரும் பாக்கறாப்ல புக்கை திறந்து மயிலிறகை பாக்காதே. புத்தகத்த கண்ணுக்கு கிட்ட வச்சிட்டு கைகளை கூப்பி வச்சி மெல்ல திறந்து பாருடா. கண்டிப்பா குட்டி போடும்' என்று மாலதி சொல்லுமிடம் அன்பின் ஆராதனை. என்னை மிகவும் ரசிக்க வைத்த காட்சியிது.

பரத் நண்பன் மகேஷாக கார்த்திக், சீனுவின் இளம்பிராய பக்கத்து வீட்டு பெரியவர் சிவாவாக ரமேஷ் ஓரிரு முறை கண்ணில் பட்டு மறைந்தாலும் நடிப்பில் குறையில்லை. சீனுவின் பேரனாக மாஸ்டர் புவனேஷ். ஒத்திகை செய்ததை வஞ்சனை இல்லாமல் வெளிப்படுத்தி இருக்கிறான். எளிய அரங்கை அமைத்திருப்பது குமார். சீரியசான கதையின் தன்மை புரிந்து அளவாக பின்னணியை ஒலிக்க விட்டிருப்பது இசையமைப்பாளர் கிச்சா.     
 
'இப்போது வீட்டில் என்னிடம் பேச யாருமில்லை. உத்தரத்தில் எத்தனை பல்லிகள் ஓடுகின்றன என எண்ணிக்கொண்டு இருக்கிறேன்', 'என்னது பேங்க் லோனா? எனக்கு இப்ப தேவை நல்ல ஆஸ்பத்திரி, ஆம்புலன்ஸ், சுடுகாடு விவரங்கள்தான். அது இருந்தா சொல்லு' போன்ற இயல்பான நகைச்சுவை வசனங்கள் மாதவ பூவராகமூர்த்தியின் எழுதுகோல் வாயிலாக மிளிர்கிறது. இப்படைப்பின் பெரும்பலம் இவரது சிறந்த நடிப்பும், வசனங்களும்தான். நாடகம் முடிந்ததும் ரசிகர்கள் மேடையேறி விமர்சிக்குமாறு அழைப்பு விடுத்தார் ஒருங்கிணைப்பாளர் முத்ரா பாஸ்கர். முதன் முறை மேடையேறி பேசும் வாய்ப்பு கிட்ட எனது விமர்சனத்தை சில நிமிடங்கள் அங்கே வைத்துவிட்டு சுபம் போட்டேன். மாதவ பூவராக மூர்த்தி எனும் அற்புதமான கலைஞரின் ஆக்கம் மற்றும் நடிப்பில் வைரம் தீட்டப்பட்டிருக்கும் இந்நாடகம் மறுமுறை அரங்கேறினால் தவற விட வேண்டாம் என்பதை நாடக விரும்பிகளுக்கு கூறிக்கொள்கிறேன். 

Images: madrasbhavan.com
 ...........................................................
  
சமீபத்தில் எழுதியது:


  

Monday, November 25, 2013

திரா


                                                                          


சென்ற ஆண்டு 'தட்டத்தின் மறயத்து' மூலம் யுவன் யுவதிகளை காதல் ரசத்தில் மூழ்கடித்த வினீத் ஸ்ரீனிவாசன் இம்முறை கையிலெடுத்து இருக்கும் சப்ஜக்ட் மனிதக்கடத்தல். கேரளாவில் முந்தைய வாரமே ரிலீஸ். ஆனால் அதே நாளில் லால் ஏட்டனின் 'கீதாஞ்சலி'யும் வெளியாக சென்னையில் திரா ஒரு வாரம் தள்ளியே திரை கண்டது. கிட்டத்தட்ட 10 ஆண்டுகளுக்கு பிறகு ஷோபனா நடிக்க வந்திருப்பதால் எதிர்பார்ப்புகள் அதிகமானது. 

கோவாவின் புகழ் பெற்ற இருதய அறுவை சிகிச்சை மருத்துவரான ரோஹினி கைவிடப்பட்ட சிறுமிகளுக்கான ஆதரவு இல்லமொன்றை நடத்தி வருகிறார். மனிதக்கடத்தல் நெட்வொர்க்கை  துப்பறிவதால் ரோஹினியின் கணவர் கொல்லப்பட, அங்கிருக்கும் சிறுமிகளும் கடத்தப்படுகிறார்கள். மறுபுறம் நவீனின் தங்கையும் அவன் கண்ணெதிரே கடத்தப்பட இரு தரப்பில் இருந்தும் தேடுதல் படலம் துவங்குகிறது. அம்முயற்சி வெற்றியடைந்ததா என்பதுதான் மிச்சக்கதை.

படம் துவங்கிய சில நிமிடங்களிலேயே 'டெம்போ'வை செட் செய்து விடுகிறார் வினீத். முன்பே இதுபோன்ற கடத்தல்களை முறியடித்து சிறுமிகளை மீட்டவர் என்பதால் சட்டென செயலில் இறங்குகிறார் ரோஹினி(ஷோபனா). 'இயக்கம் வினீத்' டைட்டிலுக்கு விழும் அதே கைத்தட்டல் ஷோபனா திரையில் தோன்றியதும் விழுகிறது. சிகப்பு நிறப்புடவை...ஒரே காஸ்ட்யூம்தான் 99% இவர் பரபரக்கும் காட்சிகளில். ராக் சாலிட் பெர்பாமன்ஸ். ஆறு மெழுகுவர்த்திகள் எனும் தமிழ்ப்படத்தில் ஷாமின் கேரக்டரும் இதே போலத்தான் வடிவமைக்கப்பட்டிருக்கும். வித விதமான வில்லன்களை துவம்சம் செய்து தன் மகனை மீட்க போராடுவார். ஆனால் குழந்தை கடத்தல் எம்மாதிரி நடக்கிறது என்பதற்கான விளக்கம் இல்லாமல் இருக்கும். அதற்கு நேரெதிராக அவ்விவரங்களை இங்கே அள்ளித்தந்திருக்கிறார் வினீத். ரட்சகியாக முன்னிருந்து தன் அணியை வழிநடத்தும் பாங்கில் ஷோபனாவின் நடிப்பு அபாரம். 

வினீத்தின் சகோதரன் த்யான் திராவின் அடுத்த முக்கிய கேரக்டர். பயம், குழப்பம் பொதிந்த முகத்தை கொண்ட நடிகனைத்தேட இயக்குனர் பெரிதாக மெனக்கெட தேவை இருந்திருக்காது. ஷோபனா எது சொன்னாலும் தலையை ஆட்டிவிட்டு செயலில் இறங்கும் த்யான் பொருத்தமான தேர்வுதான். பூவிலங்கு மோகன், தர்மம் குறும்படத்தில் உயர் போக்குவரத்து துறை அதிகாரியாக தோன்றியவர் என சின்ன சின்ன கேரக்டரில் சரியான ஆட்களை தேர்வு செய்திருக்கிறார் இயக்குனர். 

கன்னடம் தெரியாமல் பேருந்தில் விழிக்கும் த்யானிடம் ஓட்டுனர் பேசும் வசனம், 'சார் கிரிமினல் வெளிய நிக்கறாங்க' எனும் கான்ஸ்டபிளிடம் 'யோவ்..அது விக்டிம்யா' எனப்புலம்பும் அதிகாரி, 'அந்த வண்டிய எப்படி எரி ச்சீங்க?' என்று வினவும் த்யானுக்கு ஷோபனா தரும் பதில் 'கேரளாவில் எத்தனை ஹர்தால்களை பார்த்திருப்பேன்'. இப்படி திரைக்கதைக்கு குந்தகம் விளைவிக்காமல் தூவப்பட்டிருகின்றன நகைச்சுவை காட்சிகள்.                    


ஹேஷம், நேஹா குரலில் 'தாழ்வாரம்', வினீத் ஸ்ரீனிவாசன் பாடிய 'தீராதே' இரண்டும் ஒன்ஸ்மோர். ஜோமோனின் ஒளிப்பதிவும், ஷானின் பின்னணி இசையும் ஆன் டார்கெட். இறுதிவரை விறுவிறுப்பிற்கு பஞ்சமின்றி திரைக்கதை திகுதிகுத்தாலும் கடத்தல்காரர்கள் கண்களில் பொடிகளைத்தூவி ஷோபனாவும், த்யானும் தொடர்ந்து தப்பிப்பது அக்மார்க் இந்திய சினிமாத்தனம். கடத்தலில் ஈடுபடும்போது சிக்கியவர்களின் கண்களை கட்டி விடுவது வழக்கம் என்று சொல்லும் அதே வேளையில் ஷோபனாவை கடத்தும்போது வாயை மட்டும் கட்டி இருப்பதேன் என்று தெரியவில்லை.

சோமாலி மாம் எழுதிய 'The road of Lost Innocence' சுயசரிதையின் தாக்கத்தால்தான் இப்படத்தை எடுத்தேன் என திரா ரிலீஸ் ஆன பிறகு வினீத் ஒப்புதல் வாக்குமூலம் தந்திருப்பினும், 'The Whistleblower' எனும் ஆங்கில படத்தின் மறுபதிப்புதான் என தெரிகிறது.  அப்படத்தில் நாயகி ஒரு போலீஸ் அதிகாரி. ஆனால் அப்படியே எடுத்தால் காப்பி என சொல்லிவிடுவார்கள் என்பதாலும், 'பெண் மருத்துவர் இந்த அளவிற்கு துப்பு துலக்கி சாகசங்கள் புரிய வாய்ப்புள்ளதா?' என்று ரசிகர்கள் துளைத்தெடுக்க மாட்டார்கள் எனும் அசாத்திய நம்பிக்கை இருந்ததாலும் வினீத் நினைத்ததை முடித்திருக்கிறார். 'அமர்?' என ஷோபனா ஒரு நபரை பார்த்து விளிக்கும்போது இரண்டாம் பாகம் உறுதியாகிறது.

Protagonist ஆக நாயகர்களையே கண்டு பழகிய இந்திய சினிமா ரசிகர்கள் ஒரு மாறுதலுக்காக ஷோபனாவின் அற்புதமான நடிப்பை திரா மூலம் பார்க்கலாம். மொத்தம் 112 நிமிடங்களுக்கு கொஞ்சமும் போரடிக்காத படைப்பை தந்திருக்கிறார்கள். தவற விட வேண்டாம். ஷோபனா உம்மை ரட்சிப்பார்.
................................................................. 


சமீபத்தில் எழுதியது:

எதுவும் நடக்கும் - நாடக விமர்சனம்

Saturday, November 23, 2013

பாம்பே ஞானத்தின் - எதுவும் நடக்கும்





தமிழ் மேடை நாடக ஆக்கத்தில் பெண்கள் இயக்குனர்களாக தடம் பதிக்க முடியாமல் போவதற்கான காரணம் என்ன எனும் கேள்விக்கு முன்பொரு காலத்தில் நாடக உலக ஜாம்பவான்களான ஆர். எஸ்.மனோகர் மற்றும் கோமல் ஸ்வாமிநாதனிடமிருந்து வந்த பதில்: 'அதற்கு சாத்தியமே இல்லை'.  அக்கூற்றை பொய்யாக்க பாம்பே ஞானம் 1989 ஆம் ஆண்டு துவக்கியதான் மகாலட்சுமி பெண்கள் நாடகக்குழு. இதுவரை 18 நாடகங்களை அரங்கேற்றி இருக்கும் இக்குழுவின் அனைத்து நாடகங்களுக்கும் கதை, வசனம், இயக்கம் பாம்பே ஞானம்தான். தற்போது டி.வி.சீரியல்களில் முன்னணி நடிகைகளுள் ஒருவராக இருக்கும் இவரது 'எதுவும் நடக்கும்' நாடகம் 26/10/13 அன்று மைலாப்பூர் பைன் ஆர்ட்ஸில் நடந்தது. 

சென்னையின் பழம்பெரும் சபாக்களுள் ஒன்றான மயிலை பைன் ஆர்ட்ஸில் நான் நாடகம் பார்ப்பது இதுதான் முதன் முறை. பெரிய அரங்கம். ஏசி கிடையாது. போதுமான அளவு மின்விசிறிகள் உண்டு. ஒரு மணி நேரத்திற்கு மேல் அமர்ந்தால் முதுகு/டிக்கியை சற்றே பதம் பார்க்கும் ப்ளாஸ்டிக் சேர்கள். நகரின் பெரும்பாலான சபாக்கள் சொகுசு இருக்கை, ஏசி, நவீன ஒலி/ஒளி அமைப்புகளுடன் தன்னை அப்க்ரேட் செய்து கொண்டாகிவிட்டன. செல்வாக்கு பெற்ற பள்ளிகளில் இருக்கும் உயர் ரக ஆடிட்டோரியங்களில் கூட நாடகங்கள் நடந்தேறி வரும் இக்காலத்தில் இன்னும் பழமையை தன்னுள் அடக்கி வைத்திருக்கும் மயிலை பைன் ஆர்ட்ஸ் அரங்கம் சம்திங் ஸ்பெஷல்தான்.

நாடகம் துவங்குவதற்கு முன்பு மினி ப்ரொஜெக்டரில் மகாலட்சுமி பெண்கள் நாடகக்குழு பற்றி ஞானம் பேசியதை ஒருநிமிடம் கூட தொடர்ச்சியாக கேட்கவிடாமல் இடையிடையே ஆச்சி மசாலா விளம்பரம் போட்டு தாளித்துக்கொண்டு இருந்தது.... இதுவும் நடக்கும் என்பதை அப்பாவி ரசிகர்களுக்கு நெடி தெறிக்க உணர்த்தியது. புகழ்பெற்ற நீதிபதி ஒருவர் தரும் தீர்ப்பை எதிர்த்து அவருடைய மகளே போர்க்கொடி தூக்குகிறார். இருவருக்குமான வாதத்தில் நீதிபதியின் முன்னாள் வாழ்க்கை நினைவு கூறப்படுகிறது. அது வழக்கின் தீர்ப்புடன் எப்படி ஒத்துப்போகிறது என்பதை சஸ்பென்ஸ் நிறைத்து சொல்லி இருக்கிறார்கள்.
                                                                         


நீதிபதியாக பாம்பே ஞானம்(இயக்குனரும் இவர்தான்). நாடகத்தின் பெரும்பகுதி ப்ளாஷ்பேக்கை வைத்தே நடைபோடுவதால் துவக்கம் மற்றும் இறுதியில் மட்டுமே வந்து செல்கிறார். இருப்பினும் தனக்கேயுரிய Cakewalk பெர்பாமன்சை வெளிப்படுத்தி இருப்பது நிறைவு. தாயின் கடந்த காலத்தை ஆய்வு செய்து வாதிடும் மகளாக அர்ச்சனாவின் துறு துறு நடிப்பும், தகிடுதத்தம் செய்யும் ரங்கா எனும் கதாபாத்திரத்தின் காதலி ரத்னமாக வரும் லலிதா விஸ்வநாதனின் அப்பாவித்தனமான முகபாவமும் சிறப்பு. தந்தை எழுதிவைத்த எடக்குமடக்கான உயிலின் நிர்பந்தத்தால் ரங்காவை மணக்கும் சுஷ்மிதா(சுசித்ரா ரவிச்சந்திரன்) மற்றும் இவரது தாயாராக மாலதி நாராயணன் என எவரது நடிப்பிலும் குறையில்லை. 

ஆனால் இவர்கள் அனைவரையும் விட ஸ்கோர் செய்திருப்பது ரங்காதான். நாடகம் முடிந்த பிறகு தனது குழுவினரை ஞானம் அறிமுகம் செய்யும்போதுதான்  க்ளைமாக்ஸை விட மேலான ஆச்சர்யம் காத்திருந்தது. அக்மார்க் பெங்காலி ரங்காவாக  அருமையாக நடித்திருந்ததும் ஒரு பெண்மணி என்பதுதான் அது. இவர் பேசிய ஏகப்பட்ட வசனங்கள் அனைத்தும் ஆணின் குரலில் ஒலிப்பதிவு செய்யப்பட மேடையில் அதற்கேற்றாற்போல் வாயசைத்திருக்கிறார். இப்புகழ்ச்சிக்கு சொந்தக்காரர் நடிகை லலிதா விஸ்வநாதன். ஒற்றை வார்த்தையில் சொல்லவேண்டுமெனில் 'அவுட்ஸ் டாண்டிங்' மேடம்!!  ஒப்பனை செய்த கண்ணன் மற்றும் சேகருக்கு வந்தனங்கள்.
                                                   
கல்கத்தாவாழ் மக்களுக்கே உரித்தான பெங்காலி உடைகள் (நல்லி சில்க்ஸ் உபயம்), பிரத்யேக வீட்டு உபயோக பொருட்கள் மற்றும் அரங்க அமைப்பு(மோகன்பாபு)  என அந்நகரின் அம்சங்களை கண்முன் நிறுத்தியதற்கு பாராட்டுகள் அநேகம். குகபிரசாத்தின் பின்னணி இசையும் நன்று. வசனங்கள் தெளிவாக நமது காதில் விழ ஸ்டேஜின் மேலிருந்து மைக்கை தொங்கவிட்டிருந்தது குறிப்புணர்வு. முற்றிலும் பெண்களால் நடத்தப்படும் இவர்களது  படைப்புகளை பார்ப்பதற்கு முன்பு 'என்னத்த பெருசா..ஏதாவது பேமிலி டிராமாவா இருக்கும். அட்வைஸ் மழை பொழியும்' என எண்ணினால் அக்கூற்று தவிடி பொடியாகும். அடுத்தடுத்த நிமிடம் விறுவிறுப்பை அதிகரித்து உருப்படியான சஸ்பென்ஸ் த்ரில்லரை தந்திருக்கும் இம்மகளிர் அணிக்கு ஜெய் ஹோ!! 

குறிப்பு: மகாலட்சுமி பெண்கள் நாடகக்குழுவின் 25 ஆம் ஆண்டையொட்டி அடுத்த வருடம் ஒரு பிரம்மாண்ட சரித்திர நாடகத்தை ரசிகர்களுக்கு வழங்க இருக்கிறார்கள். வாழ்த்துகள்.   
 ......................................................................



சமீபத்தில் எழுதியது:





Wednesday, November 20, 2013

ஸ்பெஷல் மீல்ஸ் (20/11/13)




ஹவுஸ்புல்:
                                                                               
                                                      Loc: Grand Mall, Velachery. Pic: madrasbhavan.com


வேளச்சேரி பேருந்து நிலையமருகே புதிதாக திறக்கப்பட்டிருக்கிறது க்ராண்ட் மால். பெயரில் இருக்கும் க்ராண்ட் உள்ளே இல்லை. குறுகலான வண்டி நிறுத்துமிடம், பெரம்பூர் வீனஸ் மாலை விட சற்றே அதிகமான பரப்பளவு என சாம்பிள் மாலாகத்தான் இருக்கிறது. அங்கே ஐந்து திரைகளுடன் துவக்க விழாவிற்கு தயாராகிக்கொண்டு இருக்கிறது பி.வி.ஆர். இதுபோக வேளச்சேரி பீனிக்ஸ் மாலில் ஓராண்டு காலமாக ரிலீசுக்கு காத்திருக்கும் சத்யம் குழுமத்தின் 11 திரைக்கதவுகள் 2014 ஜனவரியில் திறக்க உள்ளன மக்களே.
............................................................................ 


வில்லா:
பீட்சாவை மறந்துவிட்டு பார்த்தால் கூட வில்லா பெரிதாக ஈர்க்கவில்லை. என்னதான் அறிவியல், யதார்த்தம் பேசினாலும் பேய்ப்படம்/பேய்சார் படங்கள் என விளம்பரப்படுத்திவிட்டு ரசிகனுக்கு நான்கைந்து இடங்களில் கூட பயத்தை காட்டாவிட்டால்? 1408 எனும் ஆங்கில படத்தை சமீபத்தில் பார்த்தேன்.  அதை சற்றே மாற்றிப்போட்டு தோசை 'சுட்டிருக்கிறார்' இயக்குனர் தீபன். ஹில்டன் அறை எண் 1408 இல் நடக்கும் திகில் சம்பவங்களை பாண்டிச்சேரி வில்லாவில் காட்ட முயற்சித்து இருக்கின்றனர். அங்கே நாயகி இல்லை. இங்கே சூது கவ்வியிருக்கிறது. அசோக் செல்வனும், சஞ்சிதாவும் சந்திக்கும் காட்சியில் ஒரு தபா மட்டும் வந்து போகிறது பீட்சா. அது தவிர முந்தைய பீட்சாவிற்கும், இந்த பீட்சா-2விற்கும் வேறெந்த ஒற்றுமையும் இல்லை. அவர்கள் சூடாக பேசிக்கொண்டே இருக்க ஆறிப்போகிறது இப்பீட்சா. வில்லாவின் பாக்ஸ் ஆபீஸ் ரிசல்ட்டைப்போல. நேரம் கிடைத்தால் 1408 பாருங்கள். 
.......................................................................

சும்மா நச்சுனு இருக்கு:
நீள்முடி அடியாட்களின் துரத்தல், சொர்ணாக்கா, சீறும் சுமோக்கள் என கலவரம் செய்து கொண்டிருந்த தமிழ் சினிமாவின் ஜனரஞ்சக சூட்சுமங்களை அப்படியே பெயர்த்தெடுத்து மெகா சீரியல்களில் உலவ விட்டுக்கொண்டு இருக்கிறார்கள். பல் விளக்குதல், கொட்டாவி விடுதல் போன்ற காட்சிகளுக்கு கூட உலகம் அழியப்போகும் எபெக்ட் தந்து பரபரப்பாக இசை போடுவதில் ஜி த்தர்கள் சீரியல் மேஸ்ட்ரோக்கள். வெட்டு, குத்து,சேஸ்,மாஸ் என்றால் கேட்கவா வேண்டும்?  
...................................................................

எங்க சின்ன ராசா:
சென்னையில் அம்மா மினி பஸ் ஓடத்துவங்கி நாட்கள் சில ஆகிவிட்டது. சென்ற வாரம் பதிவர்கள் 'மின்னல் வரிகள்' பாலகணேஷ் மற்றும் சரவணர்(ஸ்கூல் பையர்)   ஆகியோருடன் கிண்டி ஆசார்கானா நிறுத்தத்தில் 'மினி'யேறினோம். மாநகரப்பேருந்துகளில் குறைந்தபட்ச டிக்கட் 3ரூ. இதிலோ 5 ரூ.  ஆசர்கானா டு ஆசர்கானா வினோத ட்ரிப்பை அடித்திறங்கினோம். பருமனான இருவர் சேர்ந்தாற்போல அமர்வது சிரமம்தான். வழித்தட விபரங்களை முன்னும், பின்னும் எழுதி வைத்திருப்பது நன்று. ஆனால் நிறுத்தத்தில் நிற்போருக்கு ஏதுவாக பக்க வாட்டில் எழுதினால் நலம். விடுமுறை நாட்களிலும் போதுமான இடைவெளியில் மினி பேருந்துகள் வந்து செல்வதால் ஆட்டோ & பங்கு ஆட்டோக்களுக்கு நஷ்டம்தான்.                      

                                                                        ஸ்கூல் பையரும், நானும் 
.............................................................................



தொடரும்:
தந்தியில் கன்னித்தீவு முடியலாம், மன்மோகன் கூட ராஜபக்சேவை சப்பென அப்பலாம். ஆனால் சென்னை ஆட்டோ கட்டணத்தில் ஏற்படும் கோளாறு மட்டும் முடிவுக்கு வர சாத்தியமே இல்லையென்று தோன்றுகிறது. மீட்டர் அவசியம் என சுப்ரீம் கோர்ட் கட்டளையிட்டாலும் கண்ணில் படும் பல ஆட்டோக்களில் மீட்டர் இல்லை. அப்படியே மீட்டர் இருப்பினும் பழக்க தோஷத்தில் 'எவ்ளோன்னு சொல்லுங்க?' என்று பேரம்பேசி விட்டுதான் பொதுமக்களில் பலரும் உள்ளே அமர்கிறார்கள். 'இந்த அநியாயத்தை தட்டிக்கேட்க யாருமே இல்லையா?' என்று ஒரு தரப்பு கதறி மீட்டர் கொண்டு வர போராடியதன் பலன் நீர்த்துக்கொண்டு இருப்பதாகவே தெரிகிறது. இனி எல்லாம் மாநில அரசு மற்றும் மக்கள் கையில்தான்.
.................................................................... 

முற்றுகை:
ஒருவழியாக பாண்டிபஜார் நடைபாதை வியாபாரிகளை மூட்டை கட்டி அருகில் இருக்கும் மாநில அரசு வணிக கட்டிடத்தில் அடைத்துவிட்டார்கள். தீப்பெட்டி சைஸ் அறைகளில் மூச்சு முட்ட வியாபாரம் நடந்து கொண்டிருக்கிறது. அடுத்த குறி உஸ்மான் ரோடு நடைபாதை வியாபாரிகள் மீதாம். அப்படியே மேம்பாலங்களுக்கு கீழே கொச  கொசவென கடைபோட்டு இருக்கும் நபர்களையும் பார்சல் செய்தால் புண்ணியம். இல்லாவிடில் 'மேம்பால அடிவார வியாபாரிகள் சங்கம்' சென்னையில் விஸ்வரூபம் எடுக்க வாய்ப்புகள் அதிகம்.   
......................................................................
  
இனிது இனிது:
சென்ற ஞாயிறு தினமணி கதிரில் வலைத்தள எழுத்தாளர்கள் பகுதியில் எனது மெட்ராஸ் பவன் மற்றும் தம்பி பிலாசபி பிரபாகரன் தளங்கள் பற்றி குறிப்பிடப்பட்டு இருப்பது மகிழ்ச்சி.நன்றி: தோழர் ம.பா 

                                                             


இந்தியாவின் முன்னணி வலைப்பூ திரட்டியான இன்டிப்ளாக்கர்.இன் 'டாப் 10 ப்ளாக்ஸ்' தர வரிசையை தேர்வு செய்து வெளியிட்டுள்ளது. தமிழ் வலைப்பூக்களில்  மெட்ராஸ்பவனுக்கு இந்திய அளவில் நான்காம் இடமாம். அடுத்த இடத்தில் அண்ணன் கே.ஆர்.பி.செந்தில் மற்றும் மதுமதி ஆகியோரின் தளங்கள். வாழ்த்துகள்.

                                                                         


........................................................................

கொண்டாட்டம்:
அறிவுபூர்வமான விஷயங்களை விட சினிமா சார்ந்த நிகழ்ச்சிகளை மட்டுமே அதிகம் ஒளிபரப்பி மக்களை தம் வசம் வைத்திருப்பதில் கலாநிதி உண்மையிலே ஒரு வியாபார காந்தம்தான். சன்னில் வரும் ஏதேனும் சில நிகழ்ச்சிகள் அதிகபட்ச நேயர்களை கவர்ந்து கொண்டேதான் இருக்கிறது. அதில் ஒன்று ஆதித்யாவில் 'கலக்கப்போவது யாரு' சாம்பியன்  ஆதவன் நடத்தும் கொஞ்சம் நடிங்க பாஸ்.  பொதுமக்களிடம் சினிமா வசனம் பேசச்சொல்லி அவர்களிடம் நடிப்பை வாங்க அவர் அடிக்கும் லூட்டி ரவுசு. 'ஒரே இருட்டு. தூரத்துல ஒரே ஒரு வெளக்கு மட்டும் அணஞ்சி அணஞ்சி எறிஞ்சிட்டு இருந்துச்சி. அந்தப்பக்கம் ஒரு நாய் கொலச்சிட்டு இருந்துது'.  இதற்கு மக்கள் பேசிய தமாஷான வசனங்கள்: 'அந்தப்பக்கம் ஒரு நாள் குளிச்சிட்டு இருந்துச்சி'. ஆதவன் 'நாய் குளிக்கறதை நீ ஏன் பாத்த?'. இன்னொருவர் 'ஒரே ஒரு வெளக்கு மட்டும் இருட்டா இருந்துச்சி'.

'ஆதின்னா பொட்டு வச்சி பொங்கல் சாப்புடறவன்னு நெனச்சியா?'விற்கு ஒருவர் பேசிய மாஸ் பீஸ்:' ஆதின்னா பழைய பொங்கல் வச்சி பொட்டு சாப்புடறவன்னு நெனச்சியா?'. என்னுடைய அபிமான நகைச்சுவை நிகழ்ச்சிகளில் இப்போதைக்கு இதுதான் முதலிடத்தில். நன்றி ஆதவன் & வசனம் பேசும் ரகளை சிட்டிசன்கள்.   
............................................................... 
     
பையா:
'போக்கிரி'யில் தண்ணி லாரி ட்ரைவராக வரும் கிங் காங் ஸ்டியரிங் அடியில்  இருந்து எட்டிப்பார்க்க 'டேய்...நீயெல்லாம் டிரைவரா?' என பிரமிப்பார் வடிவேலு. அதுபோல 'ராஜா ராணி'இயக்குனர் அட்லீயை பார்த்து பிரமித்தவர்கள் பலர். 2011 இல்  சிவகார்த்திகேயன், 'நான் கடவுள்' ராஜேந்திரன் ஆகியோரை வைத்து அட்லீ எடுத்த குறும்படம்தான் 'முகப்புத்தகம்'. திரைப்பட இயக்குனருக்கான ஸ்பார்க் அப்போதே ஒளிவீசி இருக்கிறது அட்லீயிடம்:

                                                                     
  ...............................................................
  

சமீபத்தில் எழுதியது:


...............................................


Monday, November 18, 2013

ராம் லீலா


                                                                     

ப்ளாக் திரைப்படம் தவிர பெரியளவில் பேசப்படாதவர் சஞ்சய் லீலா பன்சாலி. ஆனால் இவர் எடுக்கும் படங்கள் ஹிட்டோ காலியோ ஒரு பிரம்மாண்ட மேஜிக்கை திரையில் நிகழ்த்திவிடும். ரோமியோ ஜூலியட்டின் தாக்கத்தில் துக்கடா ஹீரோ ரன்வீர் மற்றும் செம ஹாட் தீபிகா படுகோனேவை நம்பி எடுத்திருக்கும் கனவுப்படம் தான் இந்த ராம் லீலா. ரிலீசுக்கு முன்பே அனைத்து பாடல்களும் அட்ரா சக்க ஹிட். 100% காதல் ரசம் பொங்கி வழியும் படைப்புகள் என்றாலே 10 ஸ்டெப் பின்னால் போய் விடுவேன். ஆனால் இந்தி சினிமா உலகமே எதிர்பார்த்து காத்திருந்த படமென நாளுக்கு நாள் பீட்ஸ் எகிறிக்கொண்டிருக்க தவிர்க்க இயலவில்லை.

கதை மிகவும் சிம்பிள். 500 ஆண்டு பகையுடன் பழிக்கு பழி வாங்குவதையே வாடிக்கையாய் கொண்டவர்கள் ரஜதா மற்றும் சனதா ஊர்க்காரர்கள். இல்லம் முழுக்க புல்லட் வாசம். ஒவ்வொரு ஆணின் தோள்களிலும் துப்பாக்கி, பெண்களின் இடுப்பில் குருங்கத்தி...ரத்த பூமி. சனதாவை ஆள்வது பா எனும் சொர்ணாக்கா டைப் பெண்மணி. அவரது மகள் தீபிகாவை காதலிக்கிறான் ரஜதாவின் மைந்தன் ராம். இவ்விருவரின் சகோதரர்களும் தோட்டாக்களுக்கு பலியாகிவிட ஊர்ப்பகை உச்சத்தை அடைகிறது. ரஜதாவின் டான் ஆகும் ராமின் காதல் என்னாகிறது? Guns & Roses தெறிக்க உதய்பூர் அரண்மையை சுற்றி அற்புதமாக படமாக்கி இருக்கிறார் சஞ்சய்.

'எப்போது பார்த்தாலும் துப்பாக்கி எதை சாதிக்க போகிறீர்கள்?' என உள்ளூர்க்காரர்களை கேட்கும் நல்ல மனசுக்காரன் ராமாக ரன்வீர். கஜ கஜா படங்களை நண்பர்களுடன் பார்ப்பதை தொழில்/பொழுதுபோக்காக வைத்திருப்பவனாகவும், கனல் கக்கும் கோபம், கண்ணீர் ததும்பும் காதல், தீபிகாவை வெகு அழுத்தமாக அணைத்து கட்டிப்பிடி வைத்தியம் செய்தலென ஆளு அட்டகாசம் செய்திருக்கிறார். 'ஐ ஹாவ் அரைவ்ட்' என 10 ரவுண்ட் விண்ணை நோக்கி சுட்டவாறே பாலிவுட் உலகிற்கு மெசேஜ் பாஸ் செய்திருக்கிறார். சிக்ஸ் பேக் உடற்கட்டு, குத்தாட்டம், நக்கல் என ஆல் ரவுண்ட் அதகளம். 
                                                                    
   
லீலா கேரக்டரில் நடிக்க கரீனா கபூர், பிரியங்கா சோப்ரா ஆகியோர் பலமுறை பன்சாலி வீட்டு கதவை தட்டினாலும் வென்றது என்னவோ தீபிகாதான். மிகச்சரியான தேர்வுதான். என்னதான் கரீனா & பிரியங்கா எல்லை மீறிய கவர்ச்சி காட்டி இருந்தாலும் சோகக்காட்சிகளில் கண்கள் பேச வாய்ப்பில்லை. அது தீபிகாவிற்கு மெகா ப்ளஸ். ரன்வீருக்கு கடும் சவால் தரும் வகையில் நடிப்பு, நடனம், வசனம் அடித்து நொறுக்கும் பெர்பாமன்சை தந்திருக்கும் தீபிகா..சியர்ஸ். 

நடிப்பு ராட்சசி ரிச்சா சட்டா இடைவேளை வரை வெறுமனே வருவதும் போவதுமாக இருந்தது ஏமாற்றம். ஆனால் அதற்கு சேர்த்து வைத்து மறுபாதியில் ஈடுகட்டி இருக்கிறார். 
                                                                  


ராம் லீலாவில் மிக முக்கியமாக குறிப்பிட வேண்டியது சுப்ரியா பதக்கின் வில்லித்தனம். பலியாடாக வரும் லண்டன் மாப்பிள்ளை இவரிடம் என்ன தொழில் செய்கிறீர்கள் என கேட்கும்போது 'ஷூட்டிங், ஸ்மக்ளிங் அன்ட் கில்லிங். வெல்கம் டு தி பேமிலி பிசினெஸ்' என அதிரடியாக துவங்கி ரஜதாவின் கடைசி வாரிசு தன்னை கட்டியணைக்கையில் பல ஆண்டுகள் கழித்து பாசத்தை உணர்வதை கண்களில் காட்டி மனதில் நிற்கிறார். இவ்வாண்டின் சிறந்த நெகடிவ் ரோலுக்கான போட்டியில் இவரை பீட் செய்ய தூம் -3 அமீர் கான் மிகக்கடுமையான உழைப்பை கொட்ட வேண்டி இருக்கும்.

ஒளிப்பதிவு நம்மூர் ரவிவர்மன். ஓவியர் ரவிவர்மனின் வண்ணத்தூரிகை இவரது கேமரா லென்சின் ஏதோ ஒரு ஓரத்தில் தீர்க்கமாக தீட்டப்பட்டிருக்க வேண்டும். வெகு பிரமாதம். சஞ்சய் லீலா பன்சாலி மற்றும் மான்டியின் குஜராத்தி பீட்களில் கிட்டத்தட்ட அனைத்து பாட்டுகளுமே ஒன்ஸ்மோர். டோல் பாஜே, இஷ்கியா, டட்டட் பாடல்களில் ரன்வீர் - தீபிகா ஆட்டம் கனஜோர்.  'ராம் சாஹே' வில் பிரியங்கா சோப்ரா க்ளாமர் கொப்பளிக்கும் நளினத்துடன் நெஞ்சை அள்ள அப்பாடலில் 'ரகுபதி ராகவ ராஜாராம்' சொருகப்பட்டிருப்பதை கண்டித்து இதுவரை எவரும் போராடாதது அதிசயம். 'லஹு முன்' மயிலிறகின் வருடல். 

'கெமிஸ்ட்ரி.. கெமிஸ்ட்ரி'  என்றொரு சப்ஜக்ட் இருக்கிறதே. அதில் பரீட்சை வைத்தால் நூற்றுக்கு நூற்று பத்து மார்க் வாங்கி பாஸாகி விடும் ரன்வீர் - தீபிகா ஜோடி. ராமும் லீலாவும் உடலாலும், மனதாலும் பின்னிப்பினையும் காதல் நவரசம், தோட்டாக்களின் பாய்ச்சல், ஒரு வாரத்திற்கு கண்களை விட்டு அகலாத வர்ண ஜாலங்கள்....காதல் கொண்டாட்டம்னா இது!!
 
ராம் லீலா - சஞ்சய் லீலா!!    
..............................................................
  

Thursday, November 7, 2013

ஷார்ட் ஓகே (07/11/13)




குறும்படத்தின் வாயிலாக  பெரும்பட வாசற்கதவை தட்ட படையெடுக்கும் இளைஞர்களின் எண்ணிக்கை நாளுக்கு நாள் அதிகரித்து வருகிறது. கலைஞர் டி.வி. 'நாளைய இயக்குனர்' வெற்றியை தொடர்ந்து பிற சேனல்களும் குறும்பட போட்டிகளை தீவிரமாக நடத்த துவங்கியுள்ளன. சென்ற பதிவில் ஷார்ட் ஓகே எனும் தலைப்பில் எனக்கு பிடித்த ஐந்து குறும்படங்களுக்கு பிறகு இப்போது மேலும் ஐந்து உங்கள் பார்வைக்காக. இரண்டாம் சுற்றில் மனதிற்கு பிடித்த ஷார்ட்களை தேர்வு செய்வதற்குள் போதுமென்றாகி விடுகிறது. ஒற்றை கேமரா, நான்கைந்து நண்பர்களை வைத்துக்கொண்டு காதல், சரக்கு என யூ ட்யூப்பில் தான்தோன்றித்தனமாக குப்பைகளை கொட்டி வைத்திருக்கிறது பெரும்பாலான இளைய பட்டாளம். சூது கவ்வும் படத்தில் 'கிளி ஜோசியம் விக்கிறவன் முதற்கொண்டு ரியல் எஸ்டேட் பண்றானுங்க' என சலித்துக்கொள்வார் ரவுடி டாக்டர். அதுபோல குறும்படம் எடுப்பதற்கான அடிப்படை அறிவு கூட இன்றி மனதில் பட்டதையெல்லாம் எடுத்தால் பார்ப்பவன் கதி? 

இவ்வாண்டு நாளைய இயக்குனரில் போட்டியிட்டவர்களை பார்த்து இயக்குனர் பாண்டிராஜ் சொன்னது: "இது செமி பைனலுங்க. அந்த பயம் கூட இல்லாம எல்லாரும் ரொம்ப சுமாரா படம் பண்ணி இருக்கீங்களே..".  அடுத்தடுத்த சீசன்களில் தமிழ்க்குறும்படங்களின் தரம் தேய்ந்து வருவதற்கு இதுவும் ஒரு சாட்சி. 'ஒரே குறும்படம். மறுநாள் டைரக்டர்' பேராசையில் சினிமா பாணியில் குறும்பட காட்சிகளை எடுக்க முயன்று அதை சரியாக பிரதிபலிக்க முடியாமல் தோற்கிறார்கள் பலரும். 'உங்கள் போதைக்கு நாங்கள் ஊறுகாயா?' என்பது போல இந்த 'நாளைய' இயக்குனர்கள் சுட்டுத்தள்ளும் வேகாத உணவுகளை உட்தள்ளி சிரமப்படுவது ரசிகர்கள்தான். நாங்கள் விரும்புவது 'குறும்படங்களை' மட்டுமே நண்பர்களே.  ஏதேனும் ஓரிடத்தில் மனதை கிள்ளும் பதிவு அல்லது எதிர்பாராத சிற்சில சுவாரஸ்யங்கள். அவ்வளவுதானே? இதை எடுக்கவா இந்த அக்கப்போரு? முதல் இரண்டல்லது மூன்று நிமிடங்களிலேயே கொட்டாவி விட வைத்தால் இரண்டிற்கும் அதிகமான மணிநேரத்தை விழுங்கும் திரைச்சித்திரத்தை எப்படி தீட்டுவீர்கள் என்பதே பெருங்கேள்வி.  


பல்வேறு குறும்படங்களை பார்த்ததில் மனதினுள் சிக்கிய ஐந்தினை இப்போது பார்க்கலாம். 'தமிழை விட மலையாளத்தில் சிறந்த குறும்படங்கள் இருக்கின்றன. பாருங்கள்' என பதிவுலக நண்பர் வீடு சுரேஷ் பரிந்துரைத்ததன் பேரில் அவற்றையும் பார்த்தேன். அவர் சொன்னது உண்மைதான். மனதில் நின்ற மூன்று மலையாள ஷார்ட்களும் இங்கு பகிரப்பட்டுள்ளன. குறும்படங்களை திரைப்பட யுக்தி/தொழில்நுட்பம்/நடிப்புத்திறனுடன் ஒப்பீடு செய்து பார்ப்பதை விட குறும்படங்களாக மட்டுமே மக்கள் பார்த்தால் நலம். 


ஏ படம்:
சராசரி இளைஞர்களின் வாழ்வில் இத்தகு நிகழ்வு ஒரு முறையேனும் தொட்டுச்சென்று இருக்கலாம்..

 
            
                                                         

ஈ காலத்:
இயக்குனர் ஜெனித்தின் படைப்பு. 

                                                                      
                                                                     


நெஞ்சுக்கு நீதி:
'சூது கவ்வும்' இயக்குனர் நலன் குமாரசாமி & டீமின் ட்ரேட்மார்க் குறும்படம்.. 


                                                                        


2 இட்லி 2 வடை:
நகைச்சுவை நடிகராக மட்டுமே திரையில் தோன்றிய முருகன் குணச்சித்திர நடிகராகவும் பளிச்சிட்ட படைப்பு.


                                                                         

மீல்ஸ் ரெடி:
இறுதியாக இயக்குனர் நிதுனாவின் நெகிழ வைக்கும் குறும்படம். முக்கிய கதாபாத்திரம் ஏற்று நடித்திருக்கும் பெரியவரின் பெயர் தெரியவில்லை. நடிப்பு வெகு இயல்பு.

     
                        
பகிர்வுகள் தொடரும்... 
.....................................................



சமீபத்தில் எழுதியது:

அழகுராஜா - விமர்சனம்

ஆரம்பம் - விமர்சனம்
                                   

Saturday, November 2, 2013

அழகுராஜா


                                                                          
   
ராஜேஷின் ஹாட்ரிக்கில் எனக்கு பிடித்த ஆர்டர்: பாஸ் என்கிற பாஸ்கரன், ஓகே.ஓகே, சி.ம.ச. நடிப்பு எத்தனை லிட்டர் என பால் வடியும் முகத்துடன் இருந்த உதயநிதி, ஹன்சிகாவை வைத்துக்கொண்டு தனது தளபதி சந்தானத்தின் துணையுடன் பம்பர் ஹிட் அடித்த இயக்குனர். தியேட்டரில் பார்க்கும் போது ஆவரேஜ் படமாக பட்ட ஓகே ஓகே காமடிகள் அதன் பின் டி.வி.யில் பார்க்கும்போது ஒன்ஸ்மோர் பார்க்கத்தூண்டுகிறது இன்றுவரை. ஆக...அழகுராஜா பார்க்கும் ஆவல் ஏற்பட்டதற்கு ஆல் இன் ஆல் காரணம் ராஜேஷ் மட்டுமே. சகுனி, அலெக்ஸ்பாண்டியன் ஆகிய மெடிக்கல்-ஹிஸ்டாரிக்கல் சித்திரங்களில் காமடி செய்கிறேன் என்று எப்பாவமும் அறியா ரசிகர்களை ரத்த வாந்தி எடுக்க வைத்த கார்த்தி இம்முறை ரத்த வங்கியில் வற்றா ஆறாக ஓடுமளவிற்கு நம்மிடமிருந்து 'கடைசி சொட்டு ரத்தத்தையும் உள்நாக்கால் உறிஞ்சி எடுத்து தானம் செய்திருக்கிறார்!! கர்ண (கொடூர) 'பிரபுவே' நீ வாழி!! 

என்னது ராஜேஷ் படத்துல என்ன கதையா? முதல் நிமிடத்தில் இருந்து கடைசி வரை ஆளாளுக்கு கதைத்துக்கொண்டு இருப்பதுதான் தி சோ கால்ட் கதை. AAA எனும் லோக்கல் டி.வி.யின் ஓனர் அழகுராஜா. அவரிடம் பார்ட் டைமாக வேலை பார்ப்பது பேக்கரி ஓனர் கல்யாணம். தியேட்டர், கல்யாண மண்டபம் என பல சொத்துக்களுடன் சொகுசாக வாழும் தேவிப்ரியாவை காதலிக்கிறார் அ.ராசா. அப்பெண்ணின் குடும்ப பின்னணி கேட்டு கொந்தளிக்கும் அ.ராசாவின் தந்தை காதலுக்கு தடை போட...உங்களுக்கு தெரியாத சட்டம் ஒன்றுமில்லை. எனவே நீங்களே மீதிக்கதையை யூகிக்குமாறு கேட்டுக்கொள்கிறேன் யுவர் ஆனர். 

கார்த்தி சமீபத்தில் விகடனுக்கு அளித்த பேட்டியில் பருத்தி வீரன் போன்ற க்ளாஸ் படங்களை விட இம்மாதிரி ஸ்டான்ட் அப் காமடி படங்களை தூக்கி வைத்து பேசினார். அதெல்லாம் சரிதான். அதற்கு குறைந்த பட்சம் கஞ்சா கருப்பு, சிங்கம்புலி....அட அட்லீஸ்ட் போண்டா மணி செய்யும் காமடியில் 5% கூட பெர்பாம் செய்யாமல் ராஜேஷின் ஜானவாச காரில் சந்தானத்துடன் தொத்திக்கொண்டு வந்தால்? 'யாருடா நீ கோமாளி. உன்னையெல்லாம் ஏத்த முடியாது' என துரத்தி இருக்கலாம். காஜலை கிண்டல் செய்கிறேன் என்று முதல் பாதியில் கோழி கோரஸாக கொக்கரிப்பது போல கத்துவதும், பிரபுவை இமிடேட் செய்வதாக எண்ணிக்கொண்டு மறுபாதியில் சூர மொக்கை போடுவதும்... 'ஓவர் வாயால் எங்கள் காதுகளை பிடித்து பசுமாடு புல்லை தின்பது போல் கருக்கு கருக்கு என்று கடித்து துப்பி இருக்கிறார் மை லார்ட். இப்படி ஒரு கன்றாவியான  காமடியை யா யா, தேசிங்கு ராஜாவில் கூட நாங்கள் பார்த்ததில்லை யுவர் ஆனர். அம்மிக்கல்லை கொத்தத்தெரியாதவன் கொத்தியது போல இருக்கிறது படம் பார்த்தவர்களின் கபாலம்.     
                                                                       

மிகச்சுமாரான படத்தில் கூட ஓரிருமுறையாவது சிரிக்க வைக்கும் சந்தானம் இங்கே புஸ்வானம். முதல் சீனில் இருக்கும் வெகு சாதாரண சிரிப்பு(!!) அடுத்தடுத்து அதள பாதாள வீழ்ச்சி. இரண்டாம் பாதியில் வெற்றிலையை குதப்பிக்கொண்டு வரும் கேரக்டர் உலக மகா இம்சை. 'வாரே வாட் அ வடா பாவ்' அழகு காஜல். அவரையும் தமாசு தண்டவாளத்தில் ஏற்றி நம்மை கொல் கிறார்கள். சரண்யா, எம்.எஸ்.பாஸ்கர்....அந்தோ பரிதாபம். நல்லவேளை பிரபு வேறு தமாசு செய்வாரோ என அஞ்சி நடுங்கினேன். கர்த்தருக்கு (ஸ்)தோத்திரம். ஆங்..மறந்துட்டேன். நாசரும் படத்தில் இருந்தார். ஏதோ பேசினார். கொஞ்சம் நடந்தார். 

ராமராஜன், சுதாகர், வி.எஸ்.ராகவன் போன்றோரை நக்கல் விடுவதாக நினைத்துக்கொண்டு கார்த்தி-சந்தானம் ஜோக்கடிப்பது.....பூமரங். 'உன்ன பாத்த நேரம்' பாடல் மட்டும் தேறுகிறது.  இந்த அபார கதை, திரைக்கதை, வசனம் மற்றும் இயக்கத்திற்கு ஏன் 3 மணிநேரம் தேவைப்பட்டதோ?? தேவுடா!!
                                                                       
                                              இயக்குனர் கேபிள் சங்கர் மற்றும் நண்பன் வினோத்துடன்... 

சத்யம் தியேட்டரில் 'தல' கேபிள் சங்கருடன் இந்த அசுர குல காவியத்தை  இன்று காலை பார்த்தேன். படம் துவங்குவதற்கு முன்பு கேபிள் சொன்னது: 'வெளிநாட்ல அ.ராசா பாத்த ஒருத்தர் 'மூவி ஜாலியா இருக்குன்னு சொன்னாரு. ஆனா 'அந்த' நாட்ல படம் பாக்குறவங்க டேஸ்ட்டை நம்ப முடியாது' என கணித்தார். அக்கூற்று மெய்யாகிப்போனது. க்ளைமாக்ஸிற்கு 1 மணிநேரம் இருக்கும் முன்பே பாதி பேர் தியேட்டரை விட்டு ஓடிவிட்டார்கள். எப்பேர்ப்பட்ட ரம்பத்தையும் தாங்கும் சக்தி கொண்ட கேபிளார் மூன்று மணிநேரம் 'ஐயோ..அம்மா' என சீட்டில் அமர முடியாமல் கதறிக்கொண்டு இருந்தார். 'வீட்டுக்கு ஓடறேன்' என்று அவர் சொன்னபோது நான்கைந்து பேய்கள் அறைந்தது போல் பரிதாபமாக காட்சியளித்தார்...என்ன ஆனாரோ? 

கடந்த சில காலமாக தொடர்ந்து வந்து கொண்டிருக்கும் தமாசு படங்களில் அழகுராஜாதான் நம்பர் ஒன் மொக்கை. மாற்றுக்கருத்தே இல்லை ஓய். பொட்டு வெடி வெடிச்சமா.போத்தீஸ் துணிய கட்னமா. போத்திக்கிட்டு படுத்தமான்னு ஆத்துலயே இருங்கோ. அழகுராஜா பக்கம் மட்டும் போயிராதேல்...சொல்லிட்டனாக்கும்!! 
 
அழகுராஜாராஜேஷ், சந்தானம் காம்போவின் முதல் டக் அவுட்.
.......................................................................

சமீபத்தில் எழுதியது:

பாண்டிய நாடு - விமர்சனம்

ஆரம்பம் - விமர்சனம்

    

Related Posts Plugin for WordPress, Blogger...