CINEMA SHOULD MAKE YOU FORGET YOU ARE SITTING IN A THEATER – ROMAN POLANSKI

Saturday, September 28, 2013

ஓநாயும் ஆட்டுக்குட்டியும்




நகைச்சுவைக்கு பெயர் போன ஜாம்பவான்கள் வீற்றிருந்த தமிழ் சினிமா தற்போது பொன் முட்டையிடும் வாத்தைப்போல ஒருபக்கம் அறுபட்டுக்கொண்டிருக்கிறது என்றால் மறுபக்கம் ‘வெறும் சிரிப்புதானா? சீரியஸ் படமே வரக்கூடாதா? ச்சே’ என்று கோடம்பாக்க பிரம்மாக்கள் சிலர் அந்து நொந்து சினிமா என்கிற பெயரில் மெகா சீரியல்/குறும்பட/ஆவணப்பட/பிரச்சார நெடி கலந்த சீரியஸ் படங்களை தந்து ரசிகனை திக்கெட்டும் முக்காட வைத்துக்கொண்டிருக்கும் பொற்காலமிது. எப்போதேனும் அங்காடித்தெரு, ஹரிதாஸ், பீட்சா போன்ற படங்கள் ஒளியை பாய்ச்சி விட்டு செல்லும். அப்படி நீண்ட இடைவெளிக்கு பிறகு இதோ வந்திருக்கிறது ஓநாயும், ஆட்டுக்குட்டியும்.  

'கொரிய/ஜப்பானிய படங்களை சுட்டெடுக்கும் சும்பன் மிஷ்கின் படத்திற்கு ஏன் போக வேண்டும்?' எனும் வைராக்யத்துடன் தவிர்த்தவை யுத்தம் செய், நந்தலாலா மற்றும் முகமூடி. அதையும் மீறி இப்படத்திற்கு செல்ல ஒரே காரணம் இளையராஜா. மொத்தம் ஆறே பக்க அளவிற்குதான் வசனம். மற்றபடி இதன் ஜீவநாடி மேஸ்ட்ரோவின் முன்னணி இசைதான் எனும் தகவல் காதில் விழ மறுகணம் ரிசர்வ் செய்த டிக்கட் தகவல் அலைபேசியில் விழுந்தது.
 
யார் ஓநாய், யார் ஆட்டுக்குட்டி என படம் பார்த்தவர்கள் சொல்வதை விட சிறுமி ஒருத்திக்கு மிஷ்கின் கதை சொல்வதை கேட்டுப்பாருங்கள். மனதை கூரிய நகங்களால் அழுத்தமாக வருடிச்செல்லும். வழக்கு எண் 18/9 ஸ்ரீக்கு இது சிறுத்தை பாய்ச்சல். மிரட்சியான கண்கள், குழம்பித்தவிக்கும் மனம் என சாமுராய் வாளாக இயக்குனரால் பட்டை தீட்டப்பட்டு ஜொலித்திருக்கிறார். நார்காடிக் கேஸ்ல தள்ளிடுவோம்என சி.பி.சி.ஐ.டி. அதிகாரி மிரட்டும்போது ஸ்ரீ தரும் டிபிக்கல் மாடர்ன் யூத் எக்ஸ்ப்ரஷன் பிரமாதம்.மிகச்சொற்பமான வசனத்துடன் அருமையான அன்டர்ப்ளே மற்றும் ஹீரோயிசம் கலந்த மிஷ்கினின் நடிப்பு சிம்ப்ளி ஆவ்சம். சூழ்நிலையின் கட்டாயத்தால் ஓநாய் ஆட்டுக்குட்டியாகவும், ஆட்டுக்குட்டி ஓநாயாகவும் மாறும் தருணங்கள் ஒவ்வொன்றும் மாற்றுசினிமாவுக்கான அடுத்த படிகள். புலனாய்வு அதிகாரியாக பிரபல இசை விமர்சகர் ஷாஜி. ‘நடிச்சுருவமா’ எனும் அகத்தின் அழகு முகத்தில் எட்டிப்பார்ப்பினும் அது கேரக்டரின் தேடலுடன் ஒத்துப்போவது sheer coincidence.  ‘டாக்டரை எந்த சட்டப்பிரிவில் உள்ளே போடலாம்’ வசனத்தின் மூலம் எப்படியோ பிரமோட் ஆகிறார்.        




ஓநாய் மற்றும் ஆட்டுக்குட்டிகளை அடையாளம் தேடி கரடி, புலிகள் மற்றும் நரிகள் பின்தொடர இருள் சூழ்ந்த சென்னையை உள்ளூர் ஆட்களுக்கு அணு அணுவாக அடையாளம் காட்டிக்கொண்டே பதுங்கிப்பாய்கிறது பாலாஜி ரங்காவின் கேமரா. ‘எந்த இடத்தில் தேவையற்ற இரைச்சலை தருகிறது’ என வீம்பாக காதுகளை கூர்தீட்டி வைத்திருக்கும்போதெல்லாம் ‘ராஜா கைய வச்சா அது ராங்கா போகுமாடா’ என புடரியில் அறைகிறது முன்னணி இசை கோர்ப்பு. ஓரிரு இடங்களில் மட்டும்(நிசப்த காட்சிகளுக்கு முன்பாக) பின்னணி இசை சட்டென நிறுத்தப்பட்டது போன்ற உணர்வைத் தந்தது. எத்தனை ஆண்டுகள் ஆனாலும்...ஒரு ஊர்ல ஒரே ராஜாதான். ‘என்ன ஆனாலும் நீங்கதான் என் படத்துக்கு ம்யூசிக் போடனும். எத்தனை நாளானாலும் காத்துட்டு இருப்பேன்’ என்று முதற்பட இயக்குனர் முதல் பிரசித்தி பெற்ற பிரம்மாக்கள் வரை இன்றும் ராஜாவை நச்சரித்து வருகிறார்கள். ஆனால் சிங்கத்திற்கு தேவை கறியே அன்றி தயிர் சாதமில்லை என்பதை அவர்கள் உணர்ந்ததில்லை. கவுதம் உட்பட. இங்கு மிஷ்கின் ராஜாவிற்கு படைத்திருப்பதோ கொழுத்த ஆட்டுக்கறி. இதைத்தான் ராஜாவும், அவரது ரசிகர்களும் எதிர்பார்க்கிறார்கள் என்பதை இனியாவது மற்ற படைப்பாளிகள் உணர்ந்தால் நலம்.

சிப்ஸ் சாப்பிட்டுக்கொண்டே இருப்பவன், சாமுராய் பாணியில் சண்டை போடும் இருவர், தம்பா நோயாளியாக இருக்கும் வார்டில் ஷுவுடன் இருக்கும் நபர்கள், வுல்ஃபை தேடும் படலத்தில் க்ளைமாக்ஸ் வரை அலையும் மங்குனி காவல்படை போன்ற திணிப்பு/குறைகளை மிஷ்கின் தவிர்த்து இருக்கலாம்.

மற்றபடி எந்த கூட்டத்திலும் சேராமல் தமிழ் சினிமா எனும் காட்டில் Loan Wolf ஆக வலம் வந்திருக்கும் மிஷ்கினை வெகுவாக பாராட்டலாம். இறுதியில் வித்யாசமான முறையில் போடப்பட்ட படக்குழுவினர் விவரங்கள் கூட மக்களை கட்டிப்போட்டது சுவாரஸ்யம். உருப்படியான சினிமாவை எதிர்பார்த்து காத்துக்கொண்டிருந்த ரசிகர்கள் சிறந்த ஒலி/ஒளி அமைப்புள்ள தியேட்டரில் மட்டுமே இப்படைப்பை பார்க்குமாறு வலுக்கட்டாயமாக பரிந்துரைக்கிறேன்.  


ஓநாயும் ஆட்டுக்குட்டியும் - மிஷ்கினின் ப்ளாக் மேஜிக்   

.................................................................





Sunday, September 22, 2013

The Lunch Box




ஆஸ்கர்...கமலுக்கு பிறகு  அவ்விருது வாங்க திராட்சை தோட்டத்தில் அதிகமுறை எம்பியது அமீர்கான். இந்திய அரசும் அவருக்கு கூடுமானவரை தோள் கொடுத்தது. லகான், தாரே ஜமீன் பர், பீப்ளி லைவ் என அண்ணனின் படைப்புகள் ஆஸ்கருக்கு இந்தியா சார்பில் பரிந்துரைக்கப்பட்டன. ஒன்றும் நடக்கவில்லை. ஆனால் ஒரே நேரத்தில் ரெட்டை ஆஸ்கரை அள்ளி வந்தார் தமிழ்மகன் ரஹ்மான். தற்போது அத்திராட்சைக்கு குறி வைக்கும் பாலிவுட் நபர்களில் முக்கியமானவர் நடிகர் இர்பான் கான். இந்தியா - ப்ரான்ஸ் - ஜெர்மனியுடன் கரன் ஜோஹர், அனுராக் காஷ்யப் மற்றும் இர்பான் இணைந்து தயாரித்திருப்பதுதான் இந்த லஞ்ச் பாக்ஸ். 'ஆஸ்கர் தந்தே தீரனும்' பிரச்சாரத்தை முழுவீச்சில் மேற்கொண்டிருக்கிறார் இர்பான். அந்த அளவிற்கு ஒர்த்தா இப்படம்? பார்க்கலாம்.

மும்பை மாநகரின் பிரசித்தி பெற்ற டப்பாவாலாக்கள் பற்றி பலருக்கு தெரியும். வீட்டில் இருந்து சமைத்து தரப்படும் உணவுகளை சரியான இடத்தில்/அலுவலகத்தில் டெலிவெரி செய்வதில் பல்லாண்டுகளாக பெயர் பெற்றவர்கள். சர்வதேச சான்றிதழும் அவர்களுக்கு வழங்கப்பட்டு இருக்கிறது. மிக அரிதாக மட்டுமே டப்பாக்கள் இடம் மாறும். அப்படி மாறும் ஒரு டப்பா மத்திய வயதுடைய இருவரின் வாழ்வில் நிகழ்த்தும் மாற்றங்களை சொல்கிறது கதை.

அரசு அலுவலகம் ஒன்றில் அக்கவுன்டன்ட் ஆக வேலை பார்ப்பவர் சாஜன் பெர்னான்டஸ்(இர்பான்). இன்னும் ஒரு மாதத்தில் ஓய்வு பெறப்போகும் நபர். அவருடைய மனைவி இறந்து ஆண்டுகள் 30 ஆகி விடுகிறது. வீட்டருகே இருக்கும் உணவகத்தில் இருந்து இவருக்காக உணவு தயாரிக்கப்பட்டு டப்பாவாலாக்கள் மூலம் அலுவலகம் வந்து சேர்கிறது. ஆனால் ஏதோ ஒரு தவறினால் இலா(நிம்ரத்)  எனும் குடும்பத்தலைவி தன் கணவருக்கு அனுப்பும் டிபன் பாக்ஸ் இர்பானுக்கு டெலிவரி செய்யப்படுகிறது. அந்நிகழ்வு தொடரவும் செய்கிறது. டிபன் பாக்ஸ் மூலம் இருவரும் 'காதல் கோட்டை' டைப்பில்  கடிதப்பரிமாற்றம் செய்து கொள்கிறார்கள். அதன்பின் நடந்ததென்ன? திரையில் காண்க.
                                                            


முதலைந்து நிமிடங்களுக்கு டப்பாவாலாக்கள் எப்படி குறிப்பிட்ட இடத்திற்கு உணவினை கொண்டு செல்கிறார்கள் என்பதை காட்டி விட்டு அத்தோடு க்ளைமாக்சில் மட்டும் ரயிலில் பாட்டு பாடுவதாக காட்டி இருக்கிறார்கள். அரசாங்க ஊழியராக இர்பான். பெரும்பாலும் நடிப்பில் ஏமாற்றாதவர் இம்முறை யதார்த்தத்தை பேணிக்காக்க அநியாயத்திற்கு அண்டர்ப்ளே செய்திருக்கிறார். கேங்க்ஸ் ஆப் வாசேபூர் மூலம் இந்திய சினிமா ரசிகர்களை திரும்பிப்பார்க்க வைத்த நவாசுதீன் சித்திக்கி ஸ்டார் வேல்யூவை கூட்ட மட்டுமே பயன்பட்டிருக்கிறார். இர்பானின் பணியை தொடர வரும் இவர் முதல் சில காட்சிகளில் பம்மி பேசுவது படு செயற்கை. பெரிய ஸ்கோப் இல்லாததால் சட்டியில் இருப்பதை விட மிகக்குறைவாகவே அகப்பையில் கொண்டு வந்திருக்கிறார்.

இவ்விருவரை விட நடிப்பில் முந்தி நிற்பது 'கேட்பரி டேரி மில்க்' புகழ் நிர்மத் கவுர்தான். அழகிலும், நடிப்பிலும்...ஹாட் ஹாட்டர். இர்பானுக்கு கடிதம் போட உசுப்பேற்றுவது மேல் வீட்டு ஆன்ட்டி. கே.பாலச்சந்தர் பட ஸ்பெஷல் பெண் கேரக்டர் போல கடைசி வரை முகத்தை காட்டாமலே போய் விடுகிறார். 
                                                               

  
முன்னணி ஊடகங்கள் மூலம் பெரும் ஆதரவு பெற்றிருக்கிறது இந்த லஞ்ச் பாக்ஸ். அதேசமயம் எதிர்க்கேள்விகள் எழுப்பப்படாமலும் இல்லை. மிக அரிதான சந்தர்ப்பத்தில் டப்பாவாலாக்கள் டிபன் கேரியரை இடம் மாற்றுவது நடந்திருக்கிறது என்றாலும் 15 நாட்கள் தொடர்ந்து ஒரே டிபன் கேரியரை தவறான நபருக்கு டெலிவரி செய்ததாக வரலாறு இல்லை. ஆனால் ஹிந்தியில் காதல் கோட்டை கட்ட டப்பவாலக்களின் தொழில் சிரத்தையை இயக்குனர் காவு வாங்கி இருப்பது ஏன் என்பதுதான் முக்கியமான கேள்வி. சாதாரண திரைப்படங்கள் என்றால் பரவாயில்லை. மூன்று தேசம் மற்றும் தி க்ரேட் படைப்பாளிகளின் கூட்டு தயாரிப்பில் இப்படி ஒரு லாஜிக் ஓட்டை இருப்பதை எப்படி நியாயப்படுத்த முடியும்? 'ஆஸ்கர் தந்தால்தான் ஆச்சு' என்று குதிக்கும் இர்பான்தான் பதில் சொல்ல வேண்டும்.

15 நாட்கள் தனக்கு இர்பான் வீட்டருகே இருக்கும் உணவகத்தில் இருந்து உணவு வந்தாலும் அம்மாறுபட்ட சுவை குறித்து சின்ன கேள்வி கூட எழுப்பாமல் இருக்கிறார் இலாவின் கணவர். பிரமாதம். அதிகபட்சம் 3 ஸ்டார் அளவிற்கு தகுதியான படத்தை 4 அல்லது அதற்கு மேற்பட்ட ஸ்டார்கள் தந்து உச்சத்தில் ஏற்றிவிட்டிருக்கிறார்கள் விமர்சகர்கள். என்னைப்பொருத்தவரை சிறந்த food based movie வரிசையில் ஸ்டான்லி கா டப்பா(ஹிந்தி) மற்றும் உஸ்தாத் ஹோட்டல்(மலையாளம்) படங்களுக்கு அடுத்ததாக வெண்கலக்கிண்ணம் மட்டுமே பெற தகுதியுடையது இந்த எவர் சில்வர் லஞ்ச் பாக்ஸ்.
.................................................

சமீபத்தில் கிடைத்த தகவலின்படி தி குட் ரோட் எனும் குஜராத்தி திரைப்படம் இந்தியா சார்பாக ஆஸ்கருக்கு பரிந்துரை செய்யப்பட்டுள்ளது. பாக் மில்கா பாக், காய் போ சே, இங்க்லீஷ் விங்க்லீஷ், விஸ்வரூபம்(தமிழ்), செல்லுலாய்ட்(மலையாளம்), ஷப்தோ(பெங்காலி) மற்றும் லஞ்ச் பாக்ஸ் ஆகிய படங்கள் இறுதிக்கட்டம் வரை சென்று ஆஸ்கர் கனவு நிறைவேறாமல் திரும்பியுள்ளன.
................................................


சமீபத்தில் எழுதியது:

யா யா


  

Saturday, September 21, 2013

North 24 Kaatham



                                                                      


ஓணம் பண்டிகையையொட்டி கணிசமான படங்கள் கேரளத்தில் ரிலீசாகி இருப்பினும் சென்னையில் வெளியானவை மூன்று மட்டுமே. மம்முட்டியின் தெய்வதிந்தே ஸ்வந்தம் கிளீடஸ், வினீத்தின் ஏழாமதே வரவு மற்றும் அறிமுக இயக்குனர் அனில் ராதாகிருஷ்ண மேனனின் நார்த் 24 காதம். முதலிரண்டின் ட்ரெயிலர்களும் படம் பார்க்கும் ஆவலை தூண்டவில்லை. நார்த் 24 காதம் பார்க்கும் ஆவல் ஏற்பட்டதற்கான ஒரே காரணம் ஃபஹத் மட்டுமே. என்னுடைய அபிமான நடிகர்கள் பட்டியலில் இருந்த நானா படேகர் மற்றும் நஸ்ருதீன் ஷா ஆகியோர் முன்பு போல தொடர்ந்து நடிப்பதை குறைத்துக்கொண்டு விட்டதால் எஞ்சி இருப்பது இர்பான் கான், மனோஜ் பாஜ்பாய் மற்றும் ஃபகத் மட்டும்தான். இம்முறையும் அவர் மீது வைத்திருந்த நம்பிக்கை நிச்சயம் வீண் போகவில்லை.

கதை: ஐ.டி.துறையில் வல்லுனராக இருக்கும் ஹரி பிறருடன் சகஜமாக பழகுவதில் உடன்பாடற்றவன். மிகவும் சுத்தமான சூழலை கடைப்பிடிக்க எண்ணுபவன். எர்ணாகுளத்தில் இருக்கும் அலுவலகத்தில் இருந்து திருவனந்தபுரம் சென்று தான் ப்ரோக்ராம் செய்த மென்பொருள் பற்றி ப்ரசென்டேசன் செய்ய ரயிலில் பயணிக்கிறான். பந்த்திற்கு பெயர் போன கேரளத்தில் துவங்குகிறது மீண்டும் ஒரு ஹர்தால். முன்னாள் மார்க்சிஸ்ட் தோழர் கோபாலன் (நெடுமுடி வேணு) NGO வில் பணி புரியும் நாராயணி(ஸ்வாதி) ஆகியோருடன் ஒரு காத தூர பயணத்தை அரசுப்போக்குவரத்தின் துணையின்றி எப்படி மேற்கொள்கிறான் ஹரி? இடையில் சந்திக்கும் இன்னல்கள், பாடங்கள் என்னவென்பதை பசுமை போர்த்திய கடவுளின் தேசத்தில் உலவியவாறே முன்னோக்கி நகர்கிறது நார்த் 24 காதம்.

உடல்நிலை சரியின்றி கிடக்கும் மனைவியை காண கோழிக்கோடு செல்லும் நெடுமுடி வேணுவிற்கு துணையாக தமது பயணத்தை ஒத்திப்போட்டு உடன் செல்கிறார்கள் ஃபஹத்தும், ஸ்வாதியும். ஆட்டோ, ஆம்புலன்ஸ், போலீஸ் ஜீப் என வெவ்வேறு வாகனங்களில் சின்ன சின்ன தூரத்தை கடக்கிறார்கள் மூவரும். கண்களை கொள்ளை கொள்ளும் கேரளத்தின் இயற்கை அழகை அதிகாலை முதல் நள்ளிரவு வரை பல்வேறு ஒளி அமைப்புகளுடன் உள்வாங்கி இருக்கும் ஜெயேஷ் நாயரின் கேமராவிற்கு முத்தங்கள் கோடி. இவ்வாண்டு வெளியான இந்தியப்படங்களில் சிறப்பாக ஒளிப்பதிவு செய்யப்பட படைப்புகளில் நார்த் 24 காதம் நிச்சயம் இடம்பெறும். கோவிந்த் மேனனின் அருமையான பின்னணி இசையும் பேசப்படும்.

'ஐ.டி.க்காரன், போலீசுக்கு மட்டும் பந்த் இருந்தாலும் வேலை இருக்கும்' உள்ளிட்ட வசனங்கள் ஆங்காங்கே மிளிர்கின்றன.  
      

இயல்பிலேயே பயந்த சுபாவம் கொண்ட கேரக்டரில் ஃபஹத் பட்டையை கிளப்பி இருக்கிறார். குறிப்பாக அசுத்தமான இடங்கள் மற்றும் மனிதர்களை கண்டு பதறும்போது...நடிப்பு ராட்சயன்யா நீ. கக்கத்தை துடைத்துக்கொண்டு வரும் நபர், வேறொருவனை துரத்தும் போலீஸ், பொது கழிப்பிடத்தில் தரப்படும் சில்லறை உள்ளிட்ட ஒவ்வொன்றிக்கும் இவர் தரும் ரியாக்சன்கள்..சிம்ப்ளி அவுட் ஸ்டாண்டிங். அற்புதமான துணை நடிகராக வந்து செல்கிறார் மூத்த நடிகர் நெடுமுடி வேணு. இறுதியில் தனது வீட்டை நோக்கி நடந்து செல்லும் காட்சியில் மனதை நெகிழ்த்தி விடுகிறார் மனிதர். சல்யூட் சாரே!!

சுட்டித்தனம் செய்யாமல் தெத்துப்பல் சிரிப்புடன் ஸ்வாதியும் படம் முழுக்க அழகாக பயணிக்கிறார். ஃபஹத்தின் தாயாக புதுப்புது அர்த்தங்கள் கீதா மற்றும் தலைவாசல் விஜய். வந்தார்கள். சென்றார்கள். மகாநதி உள்ளிட்ட பல்வேறு படங்களில் தனி முத்திரை பதித்த தலைவாசல் விஜய்யை கோடம்பாக்கம் மறந்து போனதா? யானைப்பசிக்கு சோளப்பொறி என்றாலும் பரவாயில்லை. சாம்பிள் பொறி மட்டும் கொறித்து விட்டு சென்றிருக்கிறார் விஜய். இனிவரும் மலையாள படங்களில் நல்ல கேரக்டர்கள் அமையும் என எதிர்பார்க்கலாம்.  

மூன்று முக்கிய கேரக்டர்களுக்கும் உதவும் கௌரவ வேடத்தில் வந்து செல்வது நம்மூர் பிரேம்ஜி அமரன். சில நிமிடங்களே வந்தாலும் மனதில் நிற்கிறார். வண்டியோட்டும் வடக்கத்தி பெண்ணை காதல் மணம் புரிந்த தமிழரான பிரேம்ஜி தம்பதியருக்கு இன்னொருவரின் மொழி புரியாது. 'பாஷை தெரியாமல் எப்படி குழந்தை?' என வினாவொன்று எழ அதற்கு பிரேம்ஜி அடிக்கும் சிக்ஸர் 'காதலுக்கு மொழி ஏன் சார்? எவ்வளவோ பண்ணிட்டோம். 'இத' பண்ண மாட்டமா?'. கெக்கே பிக்கே கேரக்டரில் தம்பியை அழகு பார்க்கும் வெங்கட் பிரபு...அவரது திறமையை விரைவில் வெளிக்கொண்டு வாருங்கள் சாமி.

பல்வேறு சிறப்பம்சங்கள் இப்படத்தில் இருப்பினும் சில கேள்விகள் எழாமல் இல்லை. கள்ளுக்கடைக்கு வரும் இளைஞர்களின் பைக்கில் பயணிக்கும் ஸ்வாதி சட்டென தனித்து விடப்படுகிறார். ஏனென்று விளங்கவில்லை. அடுத்து இதுதான் என நாம் எண்ணும் இடங்களில் யதார்த்தமாக வேறொரு காட்சி வைத்திருக்கிறார் இயக்குனர். சிறப்பு. ஆனால் ஹர்தால் பாதிப்பு குறித்து இன்னும் சில கோணங்களில் அழுத்தமாக திரைக்கதை அமைத் திருக்கலாம். மற்றபடி நார்த் 24 காதம் ஒரு இனிமையான நடைப்பயண அனுபவம். 

சமீபத்தில் வெளியான மலையாள ரோட் மூவிக்களில் குறிப்பிட்டு சொல்ல வேண்டியவை துல்கர் நடித்த நீலாகாசம் மற்றும் ஃபஹத் நடித்த அஞ்சு சுந்தரிகள். இவ்விரண்டையும் விஞ்சி நிற்கிறது நார்த் 24 காதம்.  
 
ஃபஹத் எனும் மிகச்சிறந்த நடிகனின் கிரீடத்தில் மற்றுமோர் வைரக்கல்.

 நார்த் 24 காதம் - டோன்ட் மிஸ். 
...............................................................


சமீபத்தில் எழுதியது:




Related Posts Plugin for WordPress, Blogger...