CINEMA SHOULD MAKE YOU FORGET YOU ARE SITTING IN A THEATER – ROMAN POLANSKI

Monday, April 29, 2013

Emmanuel, Ladies & Gentleman


Emmanuel:
                                                               


சில காலமாக பீல்ட் அவுட் ஆகி இருந்த மம்முட்டி புதிய ரவுண்டில் வெற்றிகரமாக வலம் வர துவங்கிவிட்டார். அதற்கு இன்னொரு ஆதாரம்தான் இம்மானுவேல். சொற்ப சம்பளத்திற்கு ஒரு பழங்கால பத்திரிகை ஆபீசில் வேலைபார்க்கும் மம்முட்டிக்கு முற்றிலும் நவீன சூழலில் இருக்கும் தனியார் இன்சூரன்ஸ் நிறுவனத்தில் வேலை கிடைக்கிறது. நேர்மையான ஹீரோவான (!) இம்மானுவேலுக்கும்,தில்லுமுல்லு மேனேஜருக்கும் இடையே நடக்கும் யுத்தம்தான் களம். 'என்னடா இந்தப்படம் சத்யம்ல ரிலீஸ் ஆகல?' என்று புலம்பும் சேட்டன்களுக்கு  பி.வி.ஆர்.தான் ஒரே நிவாரணி. நான் இம்மானுவேலை தரிசித்ததும் பி.வி.ஆர் நைட் ஷோவில் தான்.  

இன்சூரன்ஸ் வேலையில் சேர 25 வயதிற்கு மேல் இருக்கக்கூடாது என்பது கம்பனி பாலிசி. ஆனால் பலத்த சிபாரிசுடன் அந்த தடையை தகர்த்து இளைஞர்களுடன் நேர்முகத்தேர்வில் கலந்து கொள்கிறார் மம்முட்டி. ஐந்து பேர் சேர்ந்து கேள்விக்கணைகளை தொடுக்க நிலைகுலைகிறார் இவர். 'சரி பரவாயில்லை. ஏதேனும் ஒரு பொருளை எம்மில் ஒருவருக்கு விற்றுக்காமியுங்கள்' என டெஸ்ட் வைக்கின்றனர். 

தனது பழைய செல்போன் கவரை  ஃபஹத்திடம் நீட்டி 'இதன் விலை 60 ரூபாயென ரோட்டோர வியாபாரி சொன்னான். என் மனைவி பேரம் பேசி 50 ரூபாய்க்கு வாங்கினாள். நீங்கள் 100 ரூபாய் தந்து இதை வாங்கினால் 2 00 ரூபாய்க்கு விற்பது எப்படி என செய்து காட்டுகிறேன்' என்கிறார் மம்முட்டி. 'பிடி 100 ரூபாயை' எனக்கூறி செல்போன் கவரை வாங்கிவிட்டு 'எங்கே உனது சாமர்த்தியத்தால் இதை 200 ரூபாய்க்கு விற்றுக்காட்டு பார்க்கலாம்' என  ஃபஹத் செல்போன் கவரை அவரிடம் மீண்டும் நீட்ட அதற்கு மம்முட்டியின் பதில் '50 ரூபாய் பொருளை 100 ரூபாய் தந்து வாங்கிவிட்டீர்கள். அதை மீண்டும் வாங்க நான் என்ன முட்டாளா?'. இதன் மூலம் வேலைக்கு செலக்ட் ஆகிவிடும் மம்முட்டி மீது அவ்வப்போது 'உர்ர்' முகம் காட்ட ஆரம்பிக்கிறார்  ஃபஹத். 
                                                               

மம்முட்டியை விட நடிப்பில் மிளிர்வது  ஃபஹத் தான். கார்ப்பரேட் சூழலுக்கு பாந்தமாக பொருந்தும் முகவெட்டு, நுனிநாக்கு ஆங்கிலம் கலந்த அதிகார தோரணை..அருமை. ஒத்துப்போகாத மேனேஜர்-தொழிலாளி  கெமிஸ்ட்ரி இவருக்கும், மம்முட்டிக்கும் இடையே பக்காவாக ஒத்துப்போகிறது. ஆபீஸ் ப்யூனாக சலீம். நடிப்பதற்கு பெரிய ஸ்கோப் இல்லாமல் போய்விட்டது இவருக்கு.  கேன்சர் நோயாளியாக தாமிரபரணி பானு. தலைமுடி உதிர்ந்து, உடலிளைத்த பெண்ணாக வரும் ஓரிரு காட்சிகளில் மேக்கப் தத்ரூபம். மேக்கப் மேனுக்கு ஸ்பெஷல் வாழ்த்துகள். சமீபத்தில் மறைந்த மூத்த நடிகை சுகுமாரி இன்சுரன்ஸ் பணத்திற்காக அலைச்சலுக்கு உள்ளாகும் சோகம் ததும்பும் கேரக்டரில் வந்து செல்ல, குட்டிக்கவியாக ஃபக்ரு  சில நிமிடங்கள் சிரிக்க வைத்துவிட்டு காணாமல் போகிறார். 

கோடீஸ்வர பெண் தொழிலதிபர் ஒருவரிடம் இன்சுரன்ஸ் கேன்வாஸ் செய்ய மம்முட்டிக்கு வாய்ப்பு கிடைக்கிறது. 'எனது காரை பாலோ செய்து வாருங்கள்' என அப்பெண் சொல்ல தனது டூவீலரில் பின்தொடர்கிறார் மம்முட்டி. சிக்னல் ஒன்றில் வண்டி நொண்டியடிக்க அதை அப்படியே விட்டுவிட்டு சில கிலோ மீட்டர் தூரம் காருக்கு பின்னாலேயே ஓடுகிறார் தலைவர். அதுவும் சாதாரண கார் அல்ல. 'ஆடி' காராம். எந்த சேட்டா இது?? 

மம்முட்டி மனைவியாக வரும் ரீனு சிம்ப்ளி & ஹோம்லி. குட்டிப்பையன் கவுரி சங்கர் பேசும் செல்லமான வசனங்கள் அனைத்தும் செவிக்கினிமை. தனியார் இன்சுரன்ஸ் நிறுவனத்தில் நடக்கும் தகிடுதத்தங்களை வெளிச்சம் போட்டி காட்டியிருக்கும் இயக்குனர் லால் ஜோஷிற்கு சபாஷ் போடலாம். படத்தில் பெரும்பாலான காட்சிகளில் வரும் நவீன ஆபீஸ் சூழல் முழுக்க செட் என்பதை நண்பர் சொல்லித்தான் கேள்விப்பட்டேன். எனவே கலை இயக்குனருக்கும் ஒரு சபாஷை மிச்சம் வைக்கலாம். 

அ ஃப்சல் இசையில் 'மனதுதிச்சது' பாடல் பலமுறை நம்மை கேட்கத்தூண்டும் க்யூட் க்ளாச்சிக். மொத்தத்தில் ஒருதரம் பார்க்கக்கூடிய  ஃபீல் குட் பேமிலி சினிமா இந்த இம்மானுவேல். 
............................................................

Ladies & Gentleman:
                                                           

இப்படத்திற்கு என்ன விமர்சனம் எழுதுவது என்று மண்டை காய்கிறது. லால் ரசிகர்கள் பெருத்த ஆவலுடன் எதிர்ப்பார்க்கும் படமென பில்ட் அப்பை ஏற்றி டிக்கட் ரிசர்வ் செய்தார் கேரள நண்பர். நம்பிப்போய் வெம்பி திரும்பியதுதான் மிச்சம். இம்மானுவேல் போல யூத்/மாடர்ன் சூழல் நிறைந்த கதைக்களத்தில் அரிதாரம் பூசி இருக்கிறார் மோகன் லால். 

தனது லட்சியம் நிறைவேறாமல் தற்கொலை செய்ய முயலும் இளைஞன் சரத்தை காப்பாற்றி அவனுக்கு ஐ.டி. நிறுவனம் ஒன்றை அமைத்து தருகிறார் ஜென்டில்மேன் சந்திரபோஸ். எந்நேரமும் போதையில் மிதக்கும் போஸ் இயற்கையில் ரொம்ப நல்லவர்/புத்திசாலி. மிகப்பெரிய ஐ.டி.நிறுவன அதிபரான தனது தந்தையை வெறுத்து சரத் மற்றும் அவனது தோழர்களின் புதிய முயற்சிக்கு தோள் கொடுக்கிறார் அனு(மம்தா மோகன்தாஸ்). குறுகிய காலத்தில் பெரும் பணம் ஈட்ட துவங்கியதும் தன்னிச்சையாக முடிவெடுக்க ஆரம்பிக்கிறான் சரத். நட்பில் விரிசல் விழ இறுதியில் என்ன ஆகிறது என்பதே கதை.

குடிபோதையில் முதல் அரைமணிநேரம் மோகன்லால் கலாபாவன் சஜோனுடன் சேர்ந்து அடிக்கும் லூட்டியில் தியேட்டரில் குழந்தைகள் உட்பட அனைவரும் சிரித்து மகிழ்கிறார்கள். படத்தில் ஏகப்பட்ட ஸ்டார்கள் அணிவகுக்க 'சம்திங் ஸ்பெஷல்' என்று நம்பினால் போகப்போக இழுவையின் உச்சத்திற்கு செல்கிறது கதை, திரைக்கதை, வசனம் மற்றும் இயக்கம் உள்ளிட்ட அனைத்தும்.

ஏர் ஹோஸ்டஸ் என்கிற பெயரில் பத்மப்ரியாவின் ஹேர் ஸ்டைல், டூயட் பாடலில் மீரா ஜாஸ்மின் ஆன்ட்டியின் முகத்தில் அப்பப்பட்டு இருக்கும் அப்பப்பா மேக்கப்...கெரகமடா தேவுடா. சென்ற ஆண்டு மம்முட்டி நடித்த கோப்ரா எனும் சொத்தையான படத்திற்கு போட்டியாக மோகன்லால் தரப்பில் இருந்து வந்திருக்கிறது இந்த சித்திரம்.

பலத்த தலைவலியுடன் படம் முடிந்து வெளியே வந்து டிக்கட் எடுத்த நண்பரை முறைத்து பார்க்க 'சேம் ப்ளட். சாரி' என்றார் பரிதாபமாக. இந்த ரம்பத்திற்கு எதற்கு இரண்டரை மணி நேரத்திற்கும் மேலாக காட்சிகள் அமைத்தார்களோ? இயக்குனர் சித்திக்...ஆனாலும் ஒமக்கு ஓவர் ரவுசு ஓய். நேரில் கண்டால் சவட்டி களையும்.
..........................................................



   

Sunday, April 21, 2013

திருமதி தமிழ் - SYRUP மலர்


                                                                   
                                                                   நானும், என்னுயிர் தலைவனும் 

அஞ்சாசிங்கத்தின் பொன்மொழிகளில் என் ஃபேவரிட்: "கோழியே மசாலாவ தடவிக்கிட்டு கொழம்பு சட்டிக்குள்ள குதிச்சா நாம என்ன பண்ண முடியும்?". பதிவர்கள் பாலகணேஷ், ஆரூர் முனா, அஞ்சாசிங்கம், சீனு, அரசன் ஆகியோருடன் லேட்டஸ்ட் கோழியாக ஸ்கூல் பையனும் இணைய கோரஸாக 'திருமதி தமிழ்' சட்டிக்குள் சனியன்று குதித்தோம். உட்லண்ட்ஸ் சிம்பொனியில் ஒரு மகோன்னத மசாலாவை மாங்கு மாங்கென்று மனம் தளராமல்  பார்த்த பொன்னாள் அது. 

சட்டக்கல்லூரி மாணவரான தமிழரசன்(ராஜகுமாரன்) மாமன்/அத்தை மகள் ஜோதியை(தேவயானி) காதலிக்கிறார். ஒரு திடீர் சம்பவத்தால் சென்னைக்கு வந்து தோழன் மனோகருடன்(ரமேஷ் கண்ணா) தங்க நேரிடுகிறது.  ஆனால் தங்கள் மகள் சாருமதியை (கீர்த்தி சாவ்லா) பெண்பார்க்க வந்திருப்பது இவர்தான் என்று தவறாக புரிந்து கொள்கிறது  ஒரு டொட்டடொய் குடும்பம். கீர்த்தியும் தலைவரின் லிப்ஸ்டிக் உதட்டழகில் சொக்கி மன்மத பானம் வீச...ஒரே லவ்சுதான். ஆனால் சாருவை கட்டாய திருமணம் செய்ய அசல் மாப்பிள்ளை வீட்டார் சதி செய்ய  கதை (நமது சீட்டுக்கு அடியில்) ஏகத்துக்கும் சூடு பிடிக்கிறது.  வக்கீல் பத்மினி (இன்னொரு தேவயானி) சட்டத்தின் துணையுடனும், நம்ம தல சட்டத்தை கையில் எடுத்துக்கொண்டும் இந்த பிரச்னையை எப்படி தீர்க்கிறார்கள் என்பதுதான் கதை.
                                                                         
அஞ்சா.ஆரூர், ஸ்கூல் பையன், அரசன், பாலகணேஷ், சீனு 

முதல் சீனிலேயே நம்ம ரா(ஜ)கு(மாறன்) சாக்கடையில் இருந்து எழுந்து வருவதை பார்த்து பின் சீட்டில் இருந்த இருவர் சிதறி ஓட, இடைவேளைக்கு முன்பு ஆரூர் முனாவுடன் வந்தோர் பதறி ஓட, இடைவேளையில் அஞ்சாசிங்கமும், ஆரூர் முனாவும் கதறி ஓட அவர்களோடு அரசனும், பால கணேஷும் உதறி ஓட முயற்சித்தனர். மனோகரா சிவாஜியை போல அவர்கள் இருவரையும் தர தரவென்று இழுத்து வந்து மீண்டும் சீட்டில் அமர வைக்க நான் பட்ட பாடு தனிக்கதை. 

பால்கனியில் இருந்து தேவயானி சரமாரியாக தலைவருக்கு ஃப்ளையிங் கிஸ் தரும் காட்சி இருக்கே....போங்க எனக்கு வெக்க வெக்கமா வருது. எதிர்வீட்டு பால்கனியில் பசியோடு வாடியிருக்கும் கீர்த்திக்கு சாப்பாடு தர இடையே ஒரு கம்பை போட்டு கொட்டும் மழையில் ராகு நடந்து செல்லும்போது கம்பன், ஷெல்லி ஆகியோரின் கல்லறை தோட்டங்கள் கலைக்கப்பட்டிருக்கும் என்பதில் ஐயமென்ன? 

''என் காதலி உங்க மனைவியா வரலாம். பட்சே உங்க மனைவி என் காதலி ஆயிட்டு வராது சாரே''வை புரட்டிப்போட்டு அடித்திருக்கிறார் ரா.கு. அந்த வசனம் "ஆயிரம் தரம் தாலி கட்டுனாலும் காதலன்தான் உண்மையான புருஷன்". எப்டி?       


'விதி' சுஜாதாவை ஓரங்கட்டி தலைவி(தி) தேவயானி வாதாடும் இடங்கள் யம்ம யம்மா. சாம்பிள் வேணுமா? டேக் இட்: "யுவர் ஆனர்.  ஏப்ரல் மாச வெயில்ல நம்ம மக்கள் புழுங்கறாங்க. ஆனா இந்தியால புகுந்த வீட்டு கொடுமையால பெண்கள் புழுங்குறது யாருக்கு தெரியும்? நித்தம் நித்தம் நம்ம வேர்வைல குளிச்சா அவங்க மண்ணெண்னைல குளிக்கறாங்க. வேர்வை போக நம்ம சோப் போடறோம். ஆனா அப்பாவி பொண்ணுங்க தீக்குச்சிய கொளுத்தி ஒடம்புல போட்டுக்கறாங்க". 

என்ன அண்ணன் பெர்ஃபாமன்ஸ் எப்படியா?? விஸ்வரூபத்ல பெண்மை கலந்த நடிப்புல கமல் அசத்திட்டார்னு நெனச்சிட்டு இருந்தா, ரா.கு அந்த கேரக்டராவே வாழ்ந்து கோடம்பாக்க புகழை கோல்டன் க்ளோப் ரேஞ்சுக்கு ஒசத்திட்டார்னே சொல்லலாம். இந்த இரண்டரை மணிநேர படம் மூலம் 'பவர் ஸ்டாரை பந்தாட வந்திருக்கும் யுவர் ஸ்டார் நாந்தான்' என்று ரசிகர்கள் மனதில் இரண்டடி நீள செவன் ஓ க்ளாக் ப்ளேடால் அழுத்தமாக கீறி பதிவு செய்திருக்கிறார்.       


இப்படத்தை மீடியா நண்பர்களுக்காக ஸ்பெஷல் ஷோ போட்டாராம் ராஜகுமாரன். படத்தின் முடிவில் "இந்த படத்த விமர்சிக்க 10 படத்துலயாவது அசிஸ்டண்டா வேலை செஞ்சவனுக்குதான் தகுதி இருக்கு" என்று வேறு உறுமி இருக்கிறார். 'தம்பி. ரசத்துல கரப்பாம் பூச்சி(திருமதி தமிழ்) கெடக்கு'ன்னு கல்யாண வீட்ல சொன்னவங்கள பாத்து 'அத விடுங்க....சாம்பார்ல(மேதை, லத்திகா) பூனை செத்து கெடந்துச்சி. அதையே தூரு வாரி சாப்டுட்டு இருக்கேன்' அப்படின்னு சொல்லுற விமர்சகர்கள் நாங்க. ஒரு படத்துக்கே இந்த ஆட்டமா? எமோஷன கொறைங்கண்ணே.       

கர்ணனின் மடியில் பரசுராமர் தூங்கும்போது பெரிய சைஸ் வண்டு ஒன்று அவனது தொடையை குடைந்து மறுபக்கம் சென்றதாம். அதனால் ரத்தம் பெருக்கெடுத்து ஓடி பரசுவின் உடலை நனைத்து அவரை எழுப்பியதாம். வசமாக சிக்கிய கர்ணனை பார்த்து "நீ பிராமணன் அல்ல. சத்ரியன் தானே..சொல்லுடா படுவா" எனக்கடிந்து கொண்டாராம். நம்ம கிட்ட நடக்குமா? பரசு ட்வின்ஸா பொறந்து என்னோட ரெண்டு மடிலயும் படுத்துக்கிட்டு திருமதி தமிழை 100 தரம் போட்டாலும் ஒரு சொட்டு ரத்தம் சிந்தாம பாப்போம்ல!!
.........................................................................      

சமீபத்தில் எழுதியது:

..................................................



Friday, April 19, 2013

ஜெயா ந்யூஸ்


                                                             

நடிப்பிற்கு சாவித்ரி, நடனத்திற்கு பத்மினி, ஆளுமைக்கு பானுமதி.ஆனால் இவையனைத்தையும் உள்ளடக்கி அழகிலும் அடித்துக்கொள்ள ஆளின்றி தமிழ் சினிமாவின் முழுநிலவாக திகழ்ந்தவர் மேடம் ஜெ. கே.ஆர்.விஜயா போன்றவர்கள் மாடர்ன் உடைகளணிந்தும், சரோஜா தேவிகள் 'நானும் நடனம் ஆடுகிறேன். பாருங்க கோப்பால்' என்று  ரசிகர்களின்  உயிரெடுத்த பதட்டமான கால கட்டங்களையும் தாண்டி வந்திருக்கிறோம். எந்த உடை அணிந்தாலும் பாந்தமாக பொருந்திக்கொள்ளவும், நேர்த்தியாக  நடனக்கலையை வெளிப்படுத்தவும் அருள் வேண்டும். அது இவருக்கு போதுமென்ற அளவிற்கு இருந்ததென்பதில் ஐயமில்லை. தட் இஸ் ஜெ!!

எம்.ஜி.ஆர். ஸ்தோத்திரம் பாடும் நாயகிகள், 'ஏன் ராமு இப்படி எளச்சிட்ட' என்றுருகும் (சினிமா) அம்மாக்கள், 'முதல் சம்பளம் வாங்கினதும் எனக்கு ஒரு டசன் குருவி ரொட்டிண்ணே' எனக்குழையும் தொங்கச்சி கேரக்டர்கள் வாழ்ந்த காலத்தில் 'ஏய் ஸ்டுபிட்..ஆளப்பாரு' என்று தலைவரை எதிர்த்து போல்ட் & பியூட்டிபுல் வசனங்களை பேசியது இவரைத்தவிர எவருமில்லை.  அரசியலாற்றில் கலந்த பின்பு உடன்பிறந்த துணிச்சலும், எதிர்பாராத முடிவெடுக்கும் பாங்கும் கூடவே பிரயாணப்பட்டன. புரட்சித்தலைவி மூன்றாம் முறை முதல்வரான பின்பு எப்படி நகர்கிறது ஆட்சித்தேர்?

இலவசங்களை அள்ளி இறைத்து தமிழ் மக்கள் நெஞ்சில் லீசுக்கு குடியிருக்கும் கலைஞர் டெக்னிக்கில் நம்பிக்கை இல்லாதவர். ஆனால் கலர் டி.வி.க்கு கலர் மாறிய  மக்களைக்கண்டு சுதாரித்துக்கொண்டார். தலைமைச்செயலகம் மருத்துவமனையாக மாற்றம், மலிவு விலை உணவகம் என சென்டிமென்ட் ரசத்தை அண்டா கணக்கில் பிழிந்து கலைஞரையே திக்கு முக்காட செய்திருப்பது... யாஹூ. காவிரிக்கான சட்டபூர்வ போராட்டம் போன்ற சொல்லிக்கொள்ளும் சில சாதனைகளும் இல்லாமலில்லை. அதற்காக 'மேடம் ஆட்சியில் குறை ஒன்றும் இல்லை. மறைமூர்த்தி கண்ணா' என்று திண்ணையில் அமர்ந்து தொண்ணை போல காலாட்டிக்கொண்டு பாடிவிடவும் முடியாது.
                                                            
                                   'யாருய்யா அந்த மினிஸ்டர்..ஒரு கைல மட்டும் வணக்கம் போடுறது' 

வெனிசுலா ஜனாதிபதி, கராச்சி கமிஷனர் பேரைக்கூட பொது அறிவுத்தேர்வில் பளிச்சென பதிலாக அளிக்கும் பாரத பட்டதாரிகளுக்கு 'உங்க ஸ்டேட் கவர்னர் யார்?' என்று கேட்டால் மட்டும் அடிவயிறு கலங்கும். எக்சப்சன் தமிழர்கள். பின்னே!! அடிக்கடி அமைச்சரவையை மாற்றி பதவிப்பிரமாணம் செய்து கொண்டே இருப்பதால் 'ரோசய்யா' எனும் பெயர் பேப்பர், டி.வி. வாயிலாக ப்ளாஷ் அடிக்க அம்மாதானே முக்கிய காரணம். காவிரியை மீட்டெடுத்த பொன்னியின் செல்வி விவசாயிகள் மத்தியில் செஞ்சுரி அடித்த அதே தருணத்தில் அமைச்சர் வைத்திலிங்கம் தஞ்சையில் நடந்த கூட்டமொன்றில் விவசாயிகளை பார்த்து ''முதல்வரின் சாதனையை பாராட்டி பேசுகிறேன். கை தட்டாமல் உணர்ச்சியற்ற பிண்டங்களாக இருக்கிறீர்களே'' என வசவு பாடினாரே? அவர் மட்டும் எப்படி மேடமின் கத்தியால் 'சதக்' ஆகாமல் பதவில் நீடித்துக்கொண்டு இருக்கிறார்? 
               
ஸ்டாலின், மா.சுப்பிரமணியம் சென்னை மேயர்களாக இருந்த பொழுது பல்வேறு மேம்பால கட்டுமானங்களும்,மக்களை நேரில் சந்திக்கும் படலங்களும் நடந்தேறியது. ஆனால் ஜெ அரசு இதுவரை மும்முறை ஆண்ட காலத்தில் கலைஞர் ஆட்சி அளவிற்கு வளர்ச்சிப்பணிகள் நடந்ததாகவோ/நடப்பதாகவோ பாமரனுக்கு தெரியாமல் இருப்பது உண்மையே. 

ஆளுங்கட்சிக்கு தெரிந்தவன் என்பதற்காக கலெக்டரை மிரட்டி காரியம் சாதிக்க முயன்றாராம் ஒரு செல்வந்தர். ஆனால் எடுபடவில்லை. செய்தியறிந்த காமராஜர் காரேறி கலெக்டர் இல்லம் அடைகிறார். 'பதவிக்கு ஆபத்தோ' எனும் பதற்றத்தில் கலெக்டரும், அவர்தம் துணைவியும். நலம் விசாரித்து விட்டு 'என் பெயர் சொன்னாலும் பயமின்றி அவரிடம் பேசியதற்கு பாராட்டுகள். இப்படியே தொடர்க' என தோள்தட்டி விட்டு செல்கிறார் கர்மவீரர். இன்றோ தனியார் மருத்துவமனையின் குறிப்பிட்ட அறைக்கு காலணி அணிந்து செல்லும் முதல்வரை பார்த்து பவ்யமாக 'மேடம்..ஷூவை வெளியே கழற்றி விட்டு வரவும்' என்று சொல்லி இருக்கிறார் பாவம். தனது கடமையை ஆற்றியதற்காக  அந்த மருத்துவரை சூடாக 'ஆத்தி' அனுப்பினராம். அடி ஆத்தி!!   
                                                              
                                                                                காதுல அன்'பூ'  

ஜெ பேசும் பெரும்பாலான சமயங்களில் 'எனது ஆட்சி' என்று பெருமைப்பட சொல்லிக்கொள்வது புல்லரிக்கத்தான் செய்கிறது. இதை நான் சொல்லவில்லை. ''நமது ஜெயா டி.வி.ன்னு சொல்ற மாதிரி நமது ஆட்சின்னு சொன்னா என்னவாம்?" என்று நமது மக்கள் புலம்பியது எனது செவியில் விழுந்தது. 

பார்லிமென்ட்ல தான் குத்தால கொரங்கு கணக்கா அங்கயும்,இங்கயும் தவ்விக்கிட்டு 'இஸ் சமோசா மே உருளைக்கிழங்கி நஹி ஹை. காங்க்ரஸ் வாலோ ஜவாப் தீஜியே'என்று சட்டையை கிழித்துகொள்கிறார்கள் என்று நொந்து சட்டசபை நிகழ்வுகளை பார்க்க ஜெயா ந்யூஸ் பக்கம் குடியமர்ந்தால்..அடங்கப்பா. 'மாண்புமிகு இதய தெய்வம் புரட்சித்தலைவி அம்மா' என்று லட்சார்ச்சனை ஒரு பக்கமென்றால், 'தொம், தொம்' என மேசைகளின் முதுகை சாத்தியெடுக்கும் செல்லப்பிள்ளைகள் மறுபக்கம். சில்லி உஸ்கூல் கைஸ்!! 

'ப்ளெக்ஸ் பேனர்களில் எனது படம் மட்டுமே இருக்க வேண்டும்'ன்னு  நீங்க போட்ட ஆர்டர் சிட்டி மெயின் ரோடுகள்ல மட்டுமே பின்பற்றப்படுது. சிட்டி அவுட்டர்ல உங்க படத்துக்கு கீழ  பட்டை தங்க செயின் பளபளக்க செல்போன் பேசுறாப்ல போஸ் தர்ற ரத்தத்தின் ரத்தங்களோட ஸ்டில்லு அங்கங்க தென்படுது. என்னான்னு விசாரிங்க.

'இப்போதுதான் ஆட்சிக்கு வந்தோம். முந்தைய அரசின் முட்டாள் தனங்களே இதற்கு காரணம்' என்று காரணம் சொல்லும் காலம் கடந்து விட்டது. மக்களுக்கு நிறைய செய்வதற்கான 'யுவர் டைம் ஸ்டார்ட்ஸ் நவ்'. 
..............................................................



Wednesday, April 17, 2013

குறுக்கு வழியில் ட்ராஃபிக் ஜாம்


                                                               
                                                             
பொதுவாக நகைச்சுவை நாடங்கள் என்றால் அதில் எஸ்.வி.சேகர், கிரேசி மோகன்-மாது பாலாஜி,ஒய்.ஜி.மகேந்திரா போன்றவர்கள் மட்டுமே அதிகப்படியான ஜோக்குகளை பேசி பெயர் பெறுவர். கூட நடிப்பவர்கள் அதிக வசனங்கள் பேச வாய்ப்பு கிடைப்பது என்பது அரிதான சந்தர்ப்பங்களில் மட்டுமே. பெயருக்கு ஓரிரு இளைய வயதினர் முக்கிய கேரக்டரின் மகன் அல்லது மகளாக வந்து செல்வதுதான் பெரும்பாலும் நடக்கும். எப்போதுதான் முற்றிலும் இளைஞர்களை உள்ளடக்கி ஓர் சிறந்த காமடி கலாட்டா நாடகத்தை பார்க்க போகிறோம் என்று காத்துக்கிடந்ததுண்டு. அதற்கு சரியான பதிலை தந்துள்ளது சென்னை டிராமா ஹவுஸின் 'குறுக்கு வழியில் ட்ராஃபிக் ஜாம்'.

மயிலை சிவகாமி பெத்தாச்சி ஆடிட்டோரியத்தில் ஞாயிறு மாலை 7 மணிக்கு நாடகம் என அறிவிக்கப்பட்டு இருந்தது. பெரிதாக தாமதமின்றி சட்டென ஆரம்பமானது கு.வ.ட்.ஜா. கூட்டம் எப்படி இருக்கிறது என்று சுற்றும் முற்றும் பார்த்தால்..ஹவுஸ்ஃபுல். ரசிகர்களில் பெரும்பாலானவர்கள் இளையவர்கள். நான் இதுவரை பார்த்த நாடகங்களில் இத்தனை யூத் ஆடியன்ஸ் இருந்தது இதற்குத்தான். டாப் காமடி நடிகர்களின் குறைந்தபட்ச டிராமா டிக்கெட்டே ரூ. 200 என்று ஆகிப்போன காலத்தில் நியாயமான ரேட்டை இவர்கள் ஃபிக்ஸ் செய்து இருப்பது குறிப்பிடத்தக்கது. பதிவர் சீனுவும் என்னுடன் அரங்கினுள் ஐக்கியமானார். 
                                                                   

சைகாட்ரிஸ்ட் அரவிந்திடம்(விக்ரம்) தனது கோபம்/ஈகோ பிரச்னையை சரி செய்ய சிகிச்சைக்கு வருகிறார் 'ஷூட்டிங் ஸ்டார்' வேதன்(தேவராஜ்).  ஓர் நாளிரவு அரவிந்த் வீட்டு மாடியில் குடியிருக்கும் சுந்தரை(ஸ்ரீவத்சன்) காரில் இடித்து கொன்று விடுகிறார் வேதன். தற்செயலாக அரவிந்திடம் அவர் இதை உளறிவிட பிரச்னை வலுக்கிறது. உண்மையை மறைக்க வேதனால் இக்கட்டான நிலைக்கு தள்ளப்பட்டு க்ரிமினலாக சித்தரிக்கப்படுகிறார் அரவிந்த். 'உலகமே உங்களை எதிர்த்தாலும் நான் இருக்கிறேன்' என்று அவரை காப்பாற்ற கரம் நீட்டுகிறார் வக்கீல் சரவணவேல்(விவேக் ராஜகோபால்). அவருக்கு உதவியாளராக ரங்கபாஸ்கர்  (கௌசிக்). சிம்மசொப்பனமாக இருக்கும் சீனியர் வக்கீல் ராமசாமியை(கார்த்திக்) எப்படி எதிர்கொண்டு வழக்கை முடிக்கிறார்கள் என்பதுதான் கதை.    

தேவராஜ் அறிமுக சீனில் விக்ரமிடம் பேசும் நீண்ட பஞ்ச் வசனம் சிறப்பு.  விவேக் & கௌசிக் கூட்டணி விக்ரமை கலாட்டா செய்து வெறுப்பேற்றும் காட்சிகள் பல இடங்களில் கைத்தட்டல்களை அள்ளுகிறது. மாடர்ன் ஏஜ் கவுண்டமணி செந்திலாக இருவரும் பின்னி எடுக்கிறார்கள். அதே நேரத்தில் கதையையும் நகர்த்த தவறாதது ப்ளஸ். இதற்கு முன்பு பார்த்த சீனியர்களின் ட்ராமாக்களில் ஒரு சில கேரக்டராவது மேடையில் பதற்றத்துடன் நடித்து காட்சியுடன் ஒன்றாமல் இருப்பது வழக்கம். ஆனால் வசன உச்சரிப்பு, எனர்ஜி, இயல்பான நடிப்பு என அனைத்திலும் ஸ்கோர் செய்துள்ளது இந்த குழு.  

2 மணிநேரம் நான் ஸ்டாப் காமடி, குபீர் காமடி என்று நாடக விளம்பரங்களை நம்பி உள்ளே சென்று குறைந்தது ஒரு மணி நேரமாவது கொட்டாவி விட்ட அனுபவங்களும் உண்டெனக்கு. ஆனால் ஆரம்பம் முதல் இறுதிவரை  100% சுறுசுறுப்பான நடிப்புடன் சரவெடி காமடிகளை ரசிகர்களுக்கு அளித்த இந்த 7 பேர் கொண்ட குழுவை வெகுவாக பாராட்டலாம். வசனம் எழுதி இருக்கும் விவேக் ராஜகோபாலுக்கு டபுள் சியர்ஸ். 'இதெல்லாம் ஏற்கனவே கேட்ட/பாத்தா ஜோக்குதான. எத்தனை தரம்தான்..'என்று நம்மை சலிப்படைய செய்யாமல் இக்கால இளையோரின் ரசனைக்கேற்ப ஃப்ரெஸ்ஸான வசனங்களை எழுதி சிரிப்பில் ஆழ்த்தி இருக்கிறார் விவேக். எனக்கு பிடித்ததில் சில...

'வீண் வம்புக்கு போகாம தேவையான விஷயத்துக்குதான் எங்க வக்கீல் எதிர்க்கட்சி வக்கீலோட வாதாடுவார். நாத்தமா இருக்குற எருமை மாடை க்ராஸ் செஞ்ச கோவத்துல நாம இன்னும் நாத்தமா போயி அது கிட்ட நின்னு வெறுப்பேத்த கூடாது' 

சரவணவேல்: 'மேட்ச் ஃபிக்சிங் கேஸ்ல மேரேஜ் ப்ரோக்கரையே உள்ள தள்ளி இருக்கேன் சார்'. 

ரங்கபாஸ்கர்: 'ஜீப்ரா மாதிரி கம்பீரமா இருக்கணும் சார். மத்த மிருகங்க மாதிரி கலர் மாறக்கூடாது'. 'கலர் மாறும் மிருகங்களா?' என்று டாக்டர் அரவிந்த் வியக்க ரங்கா: 'ஆமா சார். மொதல்ல எல்லா மிருகமும் ப்ளாக் & ஒயிட்டாதான இருந்தது'. அரவிந்த் மீண்டும் குழம்புகிறார். அதற்கு ரங்காவின் பதில்: 20 வருஷத்துக்கு முன்ன டி.வி.ல பாத்துருக்கனே..அப்ப எல்லா மிருகங்களும் ப்ளாக் & ஒயிட்தான். இப்ப கலருக்கு மாறிடுச்சி. ஜீப்ராவை தவிர'.

குறையென்று பெரிதாக சொல்ல ஏதுமில்லை. பழைய கால ட்ராமா/சினிமா போல் வெறும் டம்ளரை கையில் வைத்துக்கொண்டு காபி குடிப்பது போன்ற படு செயற்கைத்தனங்களை அடுத்த முறை  தவிர்க்கலாம். காபி இல்லாவிடினும் தண்ணீர் ஊற்றியாவது குடித்தால் யதார்த்தமாக இருக்கும். பெண்களுக்கு நகைச்சுவை ட்ராமாக்களில் பெரிய ஸ்கோப் இருப்பது அரிதுதான். இங்கும் அப்படியே. ஒரு சில காட்சிகளில் மட்டுமே வந்து செல்கிறார் டாக்டரின் மனைவி நித்யாவாக நடித்த ஸ்ம்ரிதி. பெண்கள் முக்கிய காமடி கேரக்டராக நடிக்கும் ப்ளே ஒன்று சென்னை ட்ராமா ஹவுஸ் மூலம் வருமென எதிர்பார்க்கிறேன். குற்றவாளி தன்னை மறந்து கோர்ட்டில் உண்மையை ஒத்துக்கொள்ளும் பழைய பாணியையும் மாற்றி இருக்கலாம். Because we expect innovation from all angles from this youthful team!! :))

 விக்ரம், விவேக் ராஜகோபால், கௌசிக், ஸ்ரீவத்சன், தேவராஜ், ஸ்ம்ரிதி, கார்த்திக் பட்.

100% புதிய தலைமுறையினரால் நடத்தப்பட்டு வரும் சென்னை ட்ராமா ஹவுஸ் குழு மேடையில் போடப்படும் செட்களிலும் புதுமை செய்தால் இன்னும் சிறப்பாக இருக்கும் என்பது எனது கருத்து. அதற்கான செலவு அதிகமாகும் என்பது நிதர்சனம் என்றாலும், இவர்கள் போன்ற இளம் படைப்பாளிகளிடம் புதுமைகளை எதிர்பார்ப்பதும் என் போன்ற நாடக ரசிகர்களின் இயல்புதானே.  ஆர்.எஸ்.மனோகர் போன்ற ஜாம்பவான் அளவிற்கு பிரம்மாண்ட/ஜகஜ்ஜால செட்களை போட முடியாவிட்டாலும், கதைக்கு தேவைப்படும்போது வழக்கமான அரங்க அமைப்புகளில் இருந்து சற்று விலகி வித்யாசமான அரங்க அமைப்பினை விவேக் & கோ செய்தால் மேலும் பல தரப்பு ரசிகர்களை ஈர்க்கலாம். 

நகைச்சுவை நாடகங்கள் என்றாலும் கூட மக்களிடம் வரவேற்பு வெகுவாக குறைந்து வரும் இக்காலத்தில் அவர்களை மீண்டும் சபாக்களுக்கு கொண்டு வருவதில் சென்னை ட்ராமா ஹவுஸின் பங்கு கணிசமாக இருக்கும் என்பதில் ஐயமில்லை. 

Images copyright: madrasbhavan.com
.........................................................................





Thursday, April 11, 2013

தண்ணீர் தண்ணீர்


                                                             
   
தமிழகத்தில் ஒடுக்கப்பட்ட/கண்டுகொள்ளாமல் விடப்பட்ட கிராம மக்களின் வாழ்வை வெகு யதார்த்தமாக பிரதிபலிப்பதில் 'பரதேசி'க்கெல்லாம் காட் ஃபாதர் சினிமாதான் பாலச்சந்தரின் தண்ணீர் தண்ணீர். சிறந்த தமிழ்ப்படம் மற்றும் திரைக்கதைக்கு(கே.பி) தேசிய விருதை வென்றுள்ள திரைப்படமிது. 'அச்சமில்லை, அச்சமில்லை' பார்த்த பின்பு இப்படத்தையும் தவற விட வேண்டாம் என அம்மா பரிந்துரை செய்ய பல மாதங்களாக குறுந்தகடு கிடைக்காமல் அலைந்தேன். மிக அரிதாக விஜய் டி.வி.யில் போட்டபோதும் காண இயலவில்லை. இரண்டு வாரங்களுக்கு முன்பு நாரத கான சபாவில் இந்நாடகம் அரங்கேறும் செய்தி கண்டு அரங்கிற்கு சிட்டாய் பறந்தேன். அடுத்த சில நாட்களில் திரைப்பட குறுந்தகடும் கிடைத்தாகிவிட்டது. இனி தண்ணீர் தண்ணீர் நாடக - சினிமா விமர்சனம்.... 

கோமல் ஸ்வாமிநாதனின் ஸ்டேஜ் ஃப்ரெண்ட்ஸ் குழுவால் 1981 முதல் 250 முறை மேடையேறி உள்ளது இப்படைப்பு. 18 வருடங்களுக்கு பிறகு கோமலின் புதல்வியால் அவரது நாடகங்கள் மீண்டும் உயிர்ப்பிக்கப்பட்டு வருகின்றன.அதன் முதல் முயற்சிதான் தண்ணீர் தண்ணீர். 33 வருடங்களுக்கு முன்பு  எழுதப்பட்ட வசனத்தில் ஒரு வரியைக்கூட மாற்றாமல் அப்படியே நாடகமாக்கி உள்ளது சிறப்பு.  

கதை: நெல்லை அத்திப்பட்டி எனும் சிறு கிராமத்தில் வசிக்கும் மக்கள் கடும் தண்ணீர் பஞ்சத்தில் தவிக்கின்றனர். நாடோடியாக வரும் வெள்ளைச்சாமி அவர்களின் பிரச்னைக்கு தீர்வு காண சில யோசனைகள் சொல்கிறான். அதற்கு சிலர் கடும் எதிர்ப்பு தெரிவிக்க இறுதியில் வேறு வழி இன்றி சம்மதிக்கின்றனர். ஆனால் சில காலம் கழித்து வெள்ளைச்சாமி ஒரு கொலையாளி என்று ஊராருக்கு தெரிய வர மீண்டும் சர்ச்சை கிளம்புகிறது. போலீஸ் அவனை தீவிரமாக தேட ஊர் மக்கள் என்ன முடிவு எடுக்கிறார்கள்? தண்ணீர் பஞ்சம் தீர்ந்ததா? என்பதை மேடையில் காண்க.
                                                                   

தொடர்ச்சியாக ஐயராத்து நாடகங்களை பார்த்து சற்று அயர்ச்சி ஆன எனக்கு இது முற்றிலும் மாறுபட்ட களம். படத்தில் கோவக்கார இளைஞன் கோபாலாக நடித்த ராஜ் மதன் நாடகத்தில் வெள்ளைச்சாமியாக ப்ரமோட் ஆகியுள்ளார். மொத்த கதாபாத்திரங்களுக்கும் நெல்லை பேச்சு வழக்காட பயிற்சி தந்திருப்பதும் இவர்தான். பிசிறின்றி அனைவரும் உச்சரித்த பெருமை இவரையே சாரும். 'சாமி எனக்கொரு உண்ம தெரிஞ்சாகனும்' வீராசாமியின் அடைக்கப்பன் கேரக்டரில் ரவி. 'செவ்வந்தி' சரிதா இங்கே 'லொள்ளு சபா புகழ்' ஸ்வேதா. படத்தில் இஞ்சினியர், நிருபராக நடித்த ராஜன் மற்றும் தாம்பரம் ஸ்ரீனிவாசன் ஆகியோர் அதே பாத்திரங்களில் இந்நாடகத்தில் நடித்துள்ளது குறிப்பிடத்தக்கது.

ராஜ் மதன், ரவி ஆகியோரின் யதார்த்த நடிப்பு சிறப்பென்றால் அவர்களை விட அதிகம் பெயரை வாங்கிச்சென்றது வாத்தியாராக நடித்த தம்பி பார்த்தசாரதி அவர்கள்தான். படத்தில் 'வாத்யார்' ராமன் தனக்கே உருவான ரோலில் பொருந்தி இருப்பினும் அவரை விட கச்சிதமாக நடித்துள்ளார் பார்த்தசாரதி. கான்ஸ்டபில் அழகிரியாக  ராதாராவி காட்டும் கடுகடு முகபாவம் இங்கே பால்ராஜிடம் இல்லாதது குறைதான்.
                                                               

கோமல் ஸ்வாமிநாதனின் நாடக காட்சி அமைப்புகள்/வசனங்கள் ஆகியவற்றை பெரிதும் சிதைக்காமல் படமாக்கி இருக்கும் கே.பாலச்சந்தரை பாராட்டலாம். சிறுவன் ஒருவன் நிலத்தில் கிடக்கும் ரஜினியின் புகைப்படத்தை கையிலெடுக்கும் ஆர்வத்தில் தண்ணீர் பானையை தவற விடும் முதல் ஷாட்டிலேயே 'இயக்குனர் சிகரம்' முத்திரையை பதித்து உள்ளார். என்ன நம்மூர் சினிமாக்காரர்களுக்கே உரித்தான காதலை படத்திலும் சொருகி தலையை சொரிய வைத்து இருப்பது தடுமாற்றம். 

 கோமலின் கிளாசிக் வசனங்களில் சில:

'எங்க ஊரு அம்மனே மாசம் ஒரு முறைதான் குளிக்கரா.'

'குடிக்க மட்டும்தான் தண்ணி. மூஞ்சி கழுவரதெல்லாம் இங்க ஆடம்பரம்'  

'எங்க ஊரை ஆராய்ச்சி பண்ணி நீ டாக்டர் பட்டம் வாங்கிட்டு போய்டுவ. நாங்க மட்டும் அப்படியே கெடக்கனுமா? இந்தா மம்முட்டிய புடி'.

மொத்த படைப்பில் மாஸ்டர் பீஸ் வசனம் இதுதான்: தண்ணீர் பிரச்னை தீர மந்திரியிடம் ஊர்மக்கள் மனு தர அது பி.ஏ, கலெக்டர், தாசில்தார் என பலரது கை மாறுகிறது. மனு என்னவானது என்று ஊர்மக்கள் கேட்க அதற்கு வாத்தியார் ''மந்திரி பி.ஏ. கிட்ட மனுவ தந்து 'இது என்னன்னு பாரு' அப்படின்னார். அது ஒவ்வொருத்தர் கிட்டயா போச்சி. 'ஆமாங்க அத்திப்பட்டில தண்ணி இல்ல'ன்னு அதிகாரி சொன்னாராம். அந்த செய்தி அப்படியே ரிவர்ஸ் ஆர்டர்ல உயர் ஆட்கள் கிட்ட வந்தது. கடைசில மந்திரி சட்டசபைல 'ஆமாம். அத்திபட்டில தண்ணி இல்லை'ன்னு ஒத்துக்கிட்டார். அவ்ளோதான்''  

நாயகி சரிதா தண்ணீருக்கு தவிக்கும் அத்திப்பட்டியாளாக கோபக்கனலை வீசி வழக்கம்போல் அருமையாக நடித்து இருக்கிறார். எப்படியும் ஊருக்கு விமோச்சனம் கிடைக்குமென வெள்ளந்தியாக நம்பும்போதும், அது கிடைக்காத ஏமாற்றத்தில் வெம்பும்போதும்... 'செவ்வந்தி'யாக வெளுத்துக்கட்ட இவரை விட்டால் வேறு யார்? 
                                                              

எம்.எஸ்.வி.யின் இசையில் அனைத்து பாடல்களும் பொட்டல் காட்டு அனற்காற்று.  

நாடக-சினிமா நாயகர்களை ஒப்பிட மறந்தே போனேனே? மன்னிக்க. ராஜ் மதன் (நாடகம்) செம்மையாக தனது உழைப்பை கொட்டி இருப்பினும் அவரை விட இயல்பாக நடித்தது திரைப்பட நாயகன் சண்முகம்தான் என்பது எனது கருத்து. படத்தில் கோபால்(ராஜ் மதன்) காதலி செல்லியாக வரும் தேவதை பெயர் அருந்ததி என நினைக்கிறேன். சொக்க வைக்கும் நடிப்பும், தொண்டைக்குழி விக்க வைக்கும் அழகும்...யப்பா!! பார்த்த விழி பார்த்தபடி பூத்துக்கிடந்தேன்.  தேவதையின் படம் கீழே :) 
                                                             

நாடகம் பார்த்த அனுபத்தை அம்மாவிடம் கூறியபோது "ஊருக்காக தண்ணி வண்டி கட்டி வெள்ளைச்சாமி போற காட்சிய எப்படி ட்ராமால எடுத்தாங்க?" எனும் வினாவை முன்வைத்தார். என் பதில்: "அந்த சீன்  மேடைல  வரல". அதற்கு அவர் சலித்தவாறு சொன்னது: "இதே ஆர்.எஸ். மனோகர் ட்ராமாவா இருந்திருந்தா அந்த தண்ணி வண்டியை மேடைக்கு கொண்டு வந்துருப்பாரே...".  நாடகங்களில் எதிர்பாராத பிரம்மாண்டம் மற்றும் தந்திர காட்சிகளை ரசிகர்களுக்கு விருந்தாக படைப்பதில் மனோகரை மிஞ்ச ஆளில்லை என்பதை மறுப்பார் யார்? 

இதிகாசம், அறிவுரை, கேளிக்கை, சுதந்திர போராட்டம் என்று ஒரு வட்டத்திற்குள் கிடந்த/கிடக்கும் நாடகங்களுக்கு மத்தியில், இன்னும் சில ஆண்டுகளில் தமிழகத்தில் கோர தாண்டவம் ஆடவுள்ள நீர்ப்பிரச்சனையை தீர்க்கதரிசனமாக எடுத்துரைத்துள்ள தண்ணீர் தண்ணீர் காலத்தால் அழிக்க முடியாத கங்கைதான்!!

Drama Photos copyright: madrasbhavan.com  
................................................................

முந்தைய பதிவு:


................................................................

                                                                

Wednesday, April 10, 2013

காத்தாடி ராமமூர்த்தியின் - பிள்ளையார் பிடிக்க

                                                           
                                                                   

தி.நகர் கிருஷ்ணா கான சபாவில்  சித்திர நாடக விழா ஏப்ரல் ஆறாம் தேதி கோலாகலமாக தொடங்கியது. நித்தம் ஒரு நாடகமென வரும் ஞாயிறு வரை நிகழ்ச்சி நிரலை வெளியிட்டு இருந்தனர். சென்னையில் சிறந்த கலைநயத்துடன் கட்டப்பட்டிருக்கும் சபா என்றால் அது கிருஷ்ணா கான சபா தான் என்று அடித்து சொல்லலாம். விழாவின் துவக்கமாக வியட்நாம் வீடு சுந்தரத்திற்கு 'நாடக சூடாமணி' விருது வழங்கும் நிகழ்ச்சி.

நீண்ட நாட்களாக 'ட்ராமா பார்க்க இதோ வரேன். அதோ வரேன்' என்று போக்கு காட்டி வந்த பதிவர் 'மின்னல் வரிகள்' பாலகணேஷ் அவர்களை 'பிள்ளையார் பிடிக்க' படாத பாடு பட்டு ஒருவழியாக சபா வாசலில் நிறுத்தினேன். பத்தடி தூரத்தில் சிகரெட் பிடித்த சிலரை திட்டியவாறு 'ஏன்டா இப்படி தம் அடிச்சி கேட்டு போறாங்க. இந்த லோகத்துல யாருக்கும் பொறுப்பில்ல. அக்கறை இல்ல' என பாலகணேஷ் தலையில் அடித்துக்கொண்டபோது அவரின் சமுதாய அக்கறை கண்டு கண்ணோரம் நீர்த்துளிகள் தாறுமாறாக பெருக்கெடுத்து ஓடியது எனக்கு. 
                                                            

சரியாக 5 மணிக்கு டாண் என சபா வாசலில் வந்து  காத்திருந்த வியட்நாம் வீடு சுந்தரத்திடம் ஒரு சில வார்த்தைகள் பேசினேன். அவரிடம் நீண்ட நாட்களாக கேட்க எண்ணி இருந்த கேள்வியை முன்வைத்தேன்: 'சிவாஜி ப்ரெஸ்டீஜ் பத்மநாபனாக நடிக்க இன்ஸ்பிரேஷனாக இருந்தவா பெயர் என்ன?' அதற்கு சுந்தரம் தந்த பதில்: 'இந்தியா சிமென்ட்ஸ் நாராயணசாமி எனும் ஹை கிளாஸ் ஐயர் தான் அவர்'. கௌரவம், ஞான ஒளி போன்ற படங்களில் காலத்தால் அழியாத வசனங்களை  படைத்ததும்   வி.வீ.சுதான்  என்று அப்போதுதான் அறிந்து கொண்டேன். நிகழ்ச்சியின் முக்கிய விருந்தினர்களாக கே.பாலச்சந்தர், நல்லி குப்பு, ஒய்.ஜி. மகேந்திரா & குடும்பம், தமிழக இயலிசை நாடக மன்ற செயலாளர் நடிகை சச்சு. 20 வயதில் வியட்நாம் வீடு நாடகத்திற்கு வசனம் எழுதிய சுந்தரத்தை பற்றி சுவையான தகவல்களை பரிமாறினர். இவருடன் சேர்த்து நாடக உலகின் பிதாமர்களில் ஒருவரான மாலி அவர்களுக்கு பூர்ணம் விருதும் வழங்கப்பட்டது. 
                                                               

ஏழு மணிக்கு காத்தாடியாரின் நாடகம் துவங்குமென அறிவித்து இருந்தனர். எனக்கு தெரிந்து சமீபத்தில் ஒரு நிமிடம் கூட தாமதிக்காமல் ஆரம்பிக்கப்பட்ட முதல் நாடகம் இதுவாகத்தான் இருக்கக்கூடும். சத்யம் தியேட்டருக்கு இணையான விஸ்தாரம் கொண்ட அரங்கு கணிசமாக நிரம்பித்தான் இருந்தது. கதை, திரைக்கதை, இயக்கம் நானு. செல்லப்பாவாக நடித்து இருப்பதும் இவர்தான். 

கதை என்னவெனில்...சிவராமன்(காத்தாடி), லலிதா தம்பதியரின் ஒரே மகன் சுரேஷ். பழங்கால ஸ்டைலில் பெண் தேடும் பெற்றோர் இறுதியாக மேட்ச் பிக்சிங் .காம் எனும் இணையத்தின் வாயிலாக படலத்தை தொடர்கின்றனர். தான் நேர்முகத்தேர்வு நடத்திய நந்தினி எனும் பெண் மீது ஆசை கொண்டு அவளையே மணமுடித்து தருமாறு கோரிக்கை வைக்கிறான் மகன். சொந்த பந்தம் எவருமின்றி தந்தையுடன் வாழும் நந்தினி ஒரு அல்ட்ரா மாடர்ன் ஐ.டி. கேர்ள். அவள் போடும் நிபந்தனைகளை கண்டு நொந்து போகின்றனர் சுரேஷின் பெற்றோர்கள். நந்தினியை சமாளிக்க லலிதாவின் சகோதரன் செல்லப்பா செய்யும் சின்ன தில்லுமுல்லு மேலும் பிரச்னையை உருவாக்க அதை எப்படி சரி செய்கின்றனர் என்பதை கூடுமானவரை நகைச்சுவை ததும்ப சொல்லி/நடித்து உள்ளனர். 


காத்தாடியாரின் மேஜர் ப்ளஸ்ஸே  அவருடைய தனித்துவமான குரல்தான். எவராலும் மிமிக்ரி செய்ய முடியாத வாய்ஸ். தூர்தர்ஷன் ஸ்டுடியோ ட்ராமா காலத்தில் இருந்த குரலின் வசீகரம் இன்றும் அதே வளத்துடன் இருந்தது அபாரம். எத்தனை நாட்கள் ஆயிற்று இக்குரலை தொடர்ச்சியாக இவ்வளவு நேரம் கேட்டு..!! 'டேய் சுரேஷ். என்னடா சட்டுன்னு பொண்ணு பிடிச்சிருக்குனு சொல்லிட்ட? நான் முதல்ல ஹை பிட்ச்ல கோவமா கத்திட்டு அப்பறம் சமாதானம் ஆன மாதிரி இறங்கி வந்து குணசித்திர நடிகனாட்டம் சீன் க்ரியேட் செய்யலாம்னு பாத்தேன்....' என்று  காத்தாடி பேசுமிடம் பட்டாசு. பல்லாண்டுகள் ஆகியும் சற்றும் எனர்ஜி குறையாமல் வெளுத்து வாங்குகிறார் தலைவர். 

கருப்பூர் வைத்தியாக ஸ்ரீதர். 'என் பெண்ணை சுரேஷிற்கு திருமணம் செய்ய சில பொய்களை சொல்லி விட்டேன். மன்னிக்கவும்' என நெகிழ்வாக நடித்த அவருக்கு அப்ளாஸை அள்ளி வழங்கினர் ரசிகர்கள். நந்தினியாக நடித்த பெண் சற்றே ஆன்ட்டி தோற்றத்தில் இருந்தாலும் நடிப்பில் பாஸ் செய்கிறார். ஏகப்பட்ட காஸ்ட்யூம்களில் வந்து செல்லும் நந்தினிக்கு கருப்பு நிற   லெக்கின்ஸ் கனப்பொருத்தம். சில நாட்களுக்கு முன்பு அலுவலக நண்பன் ஒருவன் 'லெக்கின்ஸ் எல்லாம் சிலருக்குதான் பொருந்தும். உருண்டை, குட்டையான, ஓவர் ஒசரம் இருக்குற பொண்ணுங்க எல்லாம் ஏண்டா இதை போட்டு உசுரை வாங்கறாங்க' என்று அங்கலாய்த்து கொண்டான். அவன் நாடகம் பார்க்க வந்திருந்தால் நந்தினிக்கு 100/100 மார்க் போட்டிருப்பான் என்பது உறுதி.   

அமெரிக்கா, ஐ.டி மோகத்தில் இருக்கும் இளைய சமூகத்தை நல்வழிப்படுத்தும் பழைய ட்ரென்டை நாடமாக்கி உள்ளனர். இளைஞர்களை விட   பெற்றோர்களை அதிகமாகவே குஷிப்படுத்தலாம் 'பிள்ளையார் பிடிக்க' வசனங்கள். 

Drama stage images copyright: madrasbhavan.com
.................................................................

என்னுடன் சேர்ந்த (சந்)தோஷத்தில் 'பிள்ளையார் பிடிக்க' சென்ற அனுபவத்தை பால பிள்ளையார் எழுதிய பதிவு:

...................................................................


முந்தைய பதிவு: 




Tuesday, April 9, 2013

ஸ்பெஷல் மீல்ஸ் (9/4/13)



அமர்க்களம்: 
                                                               
                                                                      ரவா உப்மா @ மியூசிக் அகாடமி

சில நாட்களுக்கு முன்பு ஆழ்வார்பேட்டை மியூசிக் அகாடமிக்கு விசிட். வளாகத்தில் இருக்கும் உட்லண்ட்ஸ் சிற்றுண்டியகம் கண்ணில் தென்பட்டது. வெட்டவெளி. சிலு சிலு மாலைக்காற்றுடன் கூடிய சூழல். பஞ்சு போல மென்மையான பூரி-கம்-உயர்தர பூரிக்கிழங்கை ஆர்டர் செய்து லபக்கிக்கொண்டு இருந்தேன். சிறப்பு உணவு என்னவாக இருக்கக்கூடும் என சுற்றும் முற்றும் பார்க்க, பொங்கல் போன்ற ஒரு வஸ்துவை தூரத்தில் இருந்த  டேபிள்களுக்கு பரிமாறிக்கொண்டு இருந்தனர். 'ஒரு பொங்கல்' என்றதும் 'அது ரவா உப்மாங்க' என்றார் சர்வரண்ணா. 'அதுதான்..கொண்டு வாங்க' என சைகை காட்டிய 10 நிமிடங்கள் கழித்து ரவா உப்மா டேபிளேறியது.

உப்மா என்றாலே உசைன் போல்ட் வேகத்தில் உதறிக்கொண்டு ஓடும் நபர்களைக்கூட உமிழ்நீர் சொட்ட ரெண்டு ப்ளேட் சாப்பிட வைக்கும் அளவிற்கு அற்புதமான சுவை. பொதுவாக ரவா உப்மாக்கள் என்றாலே திரி திரியான  ரவைத்தீவுகளால் தொண்டைக்குள் செல்ல அடம் பிடிக்கும். ஆனால் இங்கோ அதன் மகோன்னத ருசி கோவில் பிரசாதத்திற்கு சப்ஸ்டிட்யூட் போல ஜகஜோராக இருந்தது. 'எதுக்குடா ஸ்பூன். நானே நேரா தட்ல போயி நக்கிக்கறேன்' என நாக்கு போக்கு காட்டியது மிகையில்லை. விலை ரூ.40 மட்டுமே. 

சரவண பவனில் தரும் 'உள்ளங்கை நெல்லிக்கனி' பொங்கல் போல தம்மாதூண்டு இல்லாமல் ஆரூர் முனா செந்திலின் இரண்டு உள்ளங்கை கொள்ளளவிற்கு நிறையவே பரிமாறியது சிறப்பு.    
......................................................................... 

ஆளுக்கொரு ஆசை: 
'தமிழ்நாட்டில் ஏழரை கோடி சினிமா விமர்சகர்கள் உள்ளனர்' என இணையத்தில் நண்பர் ஒருவர் அடித்த கமண்ட் சமீபத்தில் மிக பிரபலம் ஆனது. அதே நேரத்தில் நான்கு நண்பர்கள், ஒரு காஸ்ட்லி செல்போன் வைத்துக்கொண்டு கல்லூரி மாணவர்களும், நிறைய சினிமா பார்ப்பதாலேயே சினிமா எடுப்பதற்கான தகுதி தனக்குள்ளது என நினைத்து குறும்படம் எடுக்க கிளம்பி விடும் அங்கிள்களும்  கணிசமாக இருக்கத்தான் செய்கின்றனர். இன்னொரு நபர் முதலீடு செய்யும் பணத்தில்  ஆளாளுக்கு படம் எடுத்து தள்ளும்போது சொந்தக்காசை போட்டு படம் பார்ப்போர் விமர்சனம் செய்வது எவ்வகையில் தவறு?
.............................................................

தலைநகரம்: 
தலைநகரின் பேருந்து நிறுத்தங்கள் அனைத்தும் விளம்பரதாரர்களின் ஆளுகைக்கு உட்பட்டு வண்ணமயமாக காட்சி அளிக்கின்றன. பல்வேறு நிழற்குடைகளில் பேருந்து எண்கள் காணக்கிடைப்பதில்லை. எந்தப்பேருந்து இங்கு நிற்கும் என்பதை கண்டறிய நிழற்குடை(?)யின் பக்கவாட்டில் சென்று பார்க்க வேண்டி உள்ளது. முன்பக்கத்தில் 'காஜலுக்கு மிஸ்ட் கால் குடுங்க' போன்ற வகை வகையான விளம்பரங்கள். அங்கே 70% இடத்தை மட்டும் விளம்பரத்திற்கு ஒதுக்கி விட்டு மீதி இடத்தில் பேருந்து எண்களை போட வேண்டும் என அரசாங்கம் கட்டளை போட்டால் புண்ணியமாய் போகும். 
............................................................

பீஷ்மர்:
இவ்வாரம் படித்த அருமையான பதிவு அபி அப்பா எழுதிய 'என்றும் இந்த ஆனந்தம் நிலைக்கட்டும்'. கிட்டத்தட்ட 33 ஆண்டுகளுக்கு பிறகு கஸ்தூரி, ஆனந்தவல்லி டீச்சர்களை சமீபத்தில்  இவர் கண்டபோது நடந்த அனுபவங்களை எழுதி இருக்கிறார். சாலையோரம் இவரருகே நின்று கொண்டு மாணவன் மற்றும் டீச்சர்களுக்கு இடையே நடக்கும் மலரும் நினைவுகளை நாமும் கேட்டு வருவது போன்ற உணர்வை தந்த சிறந்த பதிவு அது. 


'நீயெல்லாம் என்னத்தடா எழுதற?' என்று மனசாட்சி பொளேரென அறைய வேதம் புதிது பாலுத்தேவர் போல மூன்று முறை முகத்தை திருப்பித்தொலைந்தேன்.
.............................................................

ஜெயம் கொண்டான்: 
தேசிய திரைப்பட விருதுகள் வழங்கும் விழா வரும் மே மூன்றாம் தேதி நடைபெற உள்ளதாம். வெற்றி பெற்றோரின் பட்டியல் முன்பே வந்திருப்பினும் அது குறித்து சிறுகுறிப்பு வரைவதற்கான சந்தர்ப்பம் இப்போதுதான் வாய்த்துள்ளது. சிறந்த நடிகர், படத்திற்கான விருதை பான் சிங் தொமர் வென்றிருப்பது மகிழ்ச்சி. சென்ற ஆண்டு என்னை மிகவும் கவர்ந்த ஹிந்தி திரைப்படமாக விக்கி டோனரை குறிப்பிட்டு இருந்தேன். சிறந்த ஜனரஞ்சக சினிமாவாக உஸ்தாத் ஹோட்டலுடன் அப்படம் தேர்வு செய்யப்பட்டு உள்ளது. சிறந்த துணை நடிகராக அன்னுகபூர்(விக்கி டோனர்) வாகை சூடி இருப்பதும் பொருத்தமே. கேங்ஸ் ஆப் வாசேபூருக்கு பிரதான விருதுகள் கிடைக்கும் என்று பார்த்தால் ஏமாற்றமே மிஞ்சியுள்ளது.

தொடர்புடைய பதிவுகள்:

பான் சிங் தொமர்  உஸ்தாத் ஹோட்டல் ஹிந்தி சினிமா 2012

....................................................................

இருவர் உள்ளம்: 
சென்ற வாரம் எக்ஸ்பிரஸ் அவின்யூ சென்றபோது எடுத்த க்ளிக். பொம்மை போல இருக்கும் சீன, கொரிய, ஜப்பான் குழந்தைகளை கண்டாலே மனம் துள்ளியாடும். இம்முறை கொரிய பெண் பிள்ளைகள் இருவர் கண்ணில்பட ஒரு க்ளிக் எடுக்கும் முயற்சியை மேற்கொண்டேன். அச்சத்தில் தங்கை தாயின் பின்னே ஒளிந்து கொள்ள,  மூத்தவளோ வெட்கத்தில்நிலம் டைல்ஸ் பார்த்தாள். யாதும் ஊரே....  
                                                             

................................................................

யார்: 
கடந்த சில மாதங்களாக அயல்நாட்டு தொலைபேசி எண்களில் இருந்து  சிற்சில  அழைப்புகள் வந்த வண்ணம் உள்ளன. பெரும்பாலும் அலுவலக நேரம் பார்த்து கால்கள் வருவதால் பேச இயலவில்லை. அழைத்த நண்பர் தயை கூர்ந்து ஒரு மின்னஞ்சல்(madrasminnal@gmail.com) அனுப்பினால் பேசுவதற்கு உகந்த நேரத்தை குறிப்பிட ஏதுவாக இருக்கும். இதுவரை உரையாட சந்தர்ப்பம் கிடைக்காதற்கு எனது வருத்தங்களை தெரிவித்து கொள்கிறேன்.
............................................................

மை: 
சமீபத்திய ஆனந்த விகடனில் ஜெ அரசை ஏகத்துக்கும் போற்றி திருமாவேலன் எழுதிய கட்டுரை  தீவிர தி.மு.க. எதிர்ப்பாளர்கள் மற்றும் அ.தி.மு.க. ஆதரவாளர்களை கூட வாய் விட்டு சிரிக்க வைக்கும். ஜெ ஆட்சியில் ஒரு குறை கூட இல்லை என்பது போன்ற தோற்றத்தை உருவாக்கி இருந்தது அந்த ஜெயா ஹோ' புகழாரம். சும்மா சொல்லப்படாது. டக்கர் டமாசுங்கோ. இன்று காலை குமுதம் ரிப்போர்ட்டரின் அட்டைப்பட டைட்டில் 'சிதைந்ததா மாணவர் ஒற்றுமை? -  கொண்டாட்டத்தில் தி.மு.க'. அடேங்கப்பா. 

தி.மு.க. மீது வெறுப்பை உமிழும் அளவிற்கு கோபங்கள் பலருக்கு இருக்கத்தான் செய்கின்றன. ஆனால் தொடர்ச்சியாக இம்மாதிரி சார்புநிலை உடைய கவர் ஸ்டோரி   கட்டுரைகள்  எழுதி வருவது முன்னணி இதழ்கள் என்று கருதப்படும்(!)  விகடன், குமுதம் மீதான மரியாதையை குறைத்தே வருகின்றன என்பது எனது தனிப்பட்ட கருத்து. 

அருகில் இருந்து பார்த்தது போல கட்டுரைகளின் கடைசி வரிகளில் இவர்கள் எடுக்கும் அஸ்திரம் 'நம்மிடம் பேசிய கட்சியின் பிரமுகர் ஒருவர் இக்கருத்தை முன்வைத்தார்'. அது அந்த பத்திரிக்கைகளின் கருத்தா அல்லது நிஜமாகவே அப்படி ஒருவர் பேசினாரா என்பது மயிலை கபாலிக்கே வெளிச்சம்!!
............................................................... 


.......................................
சமீபத்தில் எழுதியது:


....................................

Sunday, April 7, 2013

வரதராஜனின் - ஆசைக்கும் ஆஸ்திக்கும்


                                                           

சென்ற வார இறுதியில் தி.நகர் வாணி மஹால் களை கட்டி இருந்தது. எஸ்.வி.சேகர், கிரேஸி மோகன், ஒய்.ஜி. மகேந்திரா ஆகியோரின் நாடகங்கள் அரங்கேற, மறுபக்கம் வரதராஜனின் 'ஆசைக்கும், ஆஸ்திக்கும்' நாடகமும் ரசிகர்களை ஈர்த்தது. 'என்று தணியும் இந்த சுதந்திர தாகத்தில்' வரதராஜனை நாரதராக பார்த்ததால் இம்முறை சமூக கதாபாத்திரம் ஒன்றில் எப்படி பெர்ஃபாம் செய்துள்ளார் என்பதை காணும் ஆவலில் ஓபுல் ரெட்டி மினி ஹாலுக்குல் நுழைந்தேன். முதலில் குறிப்பிட்ட மூவரை போலன்றி வரது சரியாக மாலை 7 மணிக்கு டிராமாவை துவங்கி விடுவார் என ஒரு நப்பாசை இருந்தது. ஆனால்  7.16 க்குத்தான் திரை மேலே இழுக்கப்பட்டது.  

ஆசைக்கும், ஆஸ்திக்கும்..கதை, வசனம், இயக்கம் 'வேதம், புதிது' கண்ணன். பேமிலி ஃட்ராமா என்றாலும் கண்ணன் வசனம் என்பதால் கண்டிப்பாக போரடிக்காது என நம்பினேன். நம்பிக்கை வீண் போகவில்லை. கதை இதுதான். மயிலாப்பூர் வாழ் சட்டநாதன்(வரது), தையல் நாயகி(லக்ஷ்மி) தம்பதியருக்கு ஸ்ரீமதி மற்றும் நடராஜன் என இரு வாரிசுகள். நல்ல குடும்பத்தில் மகளை மணம் முடித்து விட்ட சந்தோஷத்தில் நிம்மதி பெருமூச்சு விடுகின்றனர் பெற்றோர்கள். ஆனால் சில நாட்களே நீடிக்கிறது அந்த சந்தோஷம். மாமியார் வீட்டில் நகை, பணம் கேட்கிறார்கள் என்று அடிக்கடி ஸ்ரீமதி வீட்டில் வந்து நிற்க செய்வதறியாமல் திகைக்கின்றனர் இருவரும். அதற்கான அசல் காரணம் என்ன என்பது சஸ்பென்ஸ். 

தோழன் ஜி.வி.எஸ். மகன் அர்த்தனாரி டாலர் கணக்கில் பெரும்பணம் ஈட்டுவதைக்கண்டு    தங்கள் மகன் நடராஜனும்  அமெரிக்கா சென்று கை நிறைய சம்பாதிக்க வைக்க வேண்டும் என வரதுவும் அவர் மனைவியும் முடிவு செய்கின்றனர். அந்நேரம் பார்த்து கச்சேரியில் பாட ஒரு வாய்ப்பு வருகிறது நடராஜனுக்கு. அமெரிக்காவா? கச்சேரியா? எனும் நிலையில் கச்சேரியே என்று தீர்மானித்து பெற்றோரிடம் வாக்குவாதம் செய்கிறான் மகன். ஆனால் அவனை நிர்பந்தித்து அமெரிக்கா அனுப்பி வைக்கின்றனர். மகளைப்போல மகன் வாழ்விலும் ஒரு திருப்பம் நேர்கிறது. அது என்ன என்பதை மேடையில் காண்க.
                                                             

சட்ட நாதனாக வரதுவின் நடிப்பு க்ளாஸ். தேர்ந்த நாடக நடிகர் என்பதால் தந்தை கேரக்டரில் சிறப்பாக நடித்து கவனத்தை ஈர்க்கிறார். எதிரில் இருக்கும் கேரக்டர் ஜெர்க் அடிக்கும் வசனம் பேசும்போது சட்டென உடலை சிலமுறை சுழற்றி நிற்கும் காட்சிகளில் பாடி லாங்குவேஜ் பிரமாதம். எங்கே ஸ்லிப் ஆகி விடுவாரோ எனும் பதற்றம் நமக்குத்தான். அவருக்கில்லை. குரல் மற்றும் உருவ அமைப்பில் டி.டி. சேனலில் செய்தி வாசிக்கும்போது பார்த்தது போல் கிட்டத்தட்ட அப்படியே இருக்கிறார் மனிதர். 'நாடக மார்க்கண்டேயன்' பட்டம் ஏதேனும் வாங்கியுள்ளாரா என்று தெரியவில்லை. 

தையல் நாயகியாக லக்ஷ்மி தனது மகன் குறித்த கவலையில் நீளமான வசனம் பேசும் காட்சியில் அருமையாக ஸ்கோர் செய்துள்ளார். சென்ற ஆண்டு சிறந்த நாடக நடிகைக்கான விருது வென்றவர் என்றால் கேட்கவா வேண்டும். அப்பாவியாக ஆரம்பத்திலும், யு.எஸ் ரிடர்ன்  ஆக அலம்பல் செய்வதிலும் நடராஜன் கேரக்டர் வித்யாசப்படுத்தி இருப்பது நன்று. அலட்சியம் கலந்த நடிப்பில் ஸ்ரீமதி கேரக்டரும் ஓகே.       

'என் மகன் வெளிநாட்ல சம்பாதிக்காம டிசம்பர் மாசம் மத்யான கச்சேரி செய்யவா பிறந்திருக்கான்' போன்ற  கண்ணனின் வசனங்கள் பக்க பலம். நடுத்தர குடும்பங்களில் நடக்கும் பிரச்னைகளை ஏற்கனவே பலமுறை திரைப்படம் மற்றும் டி.வி. நாடகங்களில் பார்த்திருக்கும் நமக்கு, இங்கும்  கதையில் பெரிய வித்யாசம் தென்படவில்லை என்பது குறைதான். ஆனால்  நல்ல வசனம் மற்றும்  தொய்வற்ற  நடிப்புத்திறனால் பார்ப்போரை ரசிக்க வைத்திருக்கிறது 'ஆசைக்கும், ஆஸ்திக்கும்' அணி. அவ்வகையில் கண்டிப்பாக பாராட்டலாம்.

Image copyright: madrasbhavan.com   
..............................................................



Related Posts Plugin for WordPress, Blogger...