CINEMA SHOULD MAKE YOU FORGET YOU ARE SITTING IN A THEATER – ROMAN POLANSKI

Tuesday, December 31, 2013

திரை விரு(ந்)து 2013 - தமிழ் படங்கள் 2






முந்தைய பதிவு:  திரை விரு(ந்)து 2013 - தமிழ் படங்கள்


தொடர்ச்சி......



பிடித்த ஒளிப்பதிவாளர்- பாலாஜி ரங்கா: ஓநாயும் ஆட்டுக்குட்டியும்.

சென்னை மாநகரின் பின்னிரவை சொந்த ஊர் மக்களுக்கே புது வெளிச்சம் போட்டுக் காட்டிய வித்தகர்.  இருளும், இருள் சார்ந்த தெருக்களையும் மணிக்கணக்கில் தோட்டா சத்தங்களினூடே சுற்றிக்காட்டியது பாலாஜியின் ப்ளாக் மேஜிக்.

சண்டைப்பயிற்சி - ஜாய்கா டீம்(பேங்காக்​): விஸ்வரூபம்  


'யாரென்று புரிகிறதா? நாங்கள் தீயென்று தெரிகிறதா' வரிகள் இவர்களுக்கே அதிகம் பொருந்தும். க்ளைமாக்ஸ் தவிர்த்து மற்ற சண்டைக்காட்சிகளில் கமலை விஸ்வரூபம் எடுக்க வைத்த பெருமைக்கு சொந்தக்காரர்கள்.


காட்சி(வசனமின்றி) - ஓநாயும் ஆட்டுக்குட்டியும்


வார்த்தைகள்  தேவையில்லை. மேலுள்ள புகைப்படமே போதுமென்று நினைக்கிறேன். வாட் அ சீன் மிஷ்கின் (ஐயா)!!
   

காட்சி(வசனத்துடன்) - ஓநாயும் ஆட்டுக்குட்டியும்


கல்லறையில் சிறுமிக்கு மிஷ்கின் கதை சொல்லும் காட்சி. ஆயிரக்கணக்கான ப்ளாஷ்பேக்குகள் சொன்ன தமிழ் சினிமா வரலாற்றில் இது ஒரு தனி ரகம். ஒற்றை வார்த்தையில் சொல்ல வேண்டுமெனில் 'அபாரம்'. இதுபோக இன்னொரு காட்சியும் மனதில் நின்றது. ஸ்ரீக்கு வக்காலத்து வாங்க மருத்துவர் ஒருவர் போலீஸ் உயரதிகாரியின் அறையில் இருக்கும்போது ஷாஜி பேசும் எக்ஸ்ப்ரஸ் வேக வசனம். அருமை. ஹாட்ஸ் ஆஃப் மிஷ்கின்!!


ஜூனியர் நட்சத்திரம் - ப்ரித்விராஜ்: ஹரிதாஸ்.


'தங்க மீன்கள்' சாதனா, 'தலைமுறைகள்' கார்த்திக்,  'விடியும் முன்' மாளவிகா போன்ற சுட்டிகள் போட்டியில் இருந்தாலும் ஆடிஸத்தால் பாதிக்கப்பட்ட கேரக்டரில் மனதை உலுக்கிய உன்னத நடிகன் இந்த ப்ரித்விராஜ். 


நெகடிவ் கேரக்டர் - யோக் ஜபீ: சூது கவ்வும். 


'விஸ்வரூபம்' ராகுல் போஸ், 'உதயம் NH4 ' கே.கே. மேனன், 'மதயானைக்கூட்டம்' வேல ராமமூர்த்தி  என சத்தம் போடாமல் வன்மம் காட்டிய சிறந்த வில்லன்களைத்தாண்டி வாய் திறக்காமலே பேச வைத்தவர்  'சூது கவ்வும்' பிரம்மாவாக முறைத்த யோக் ஜபீ!!    


துணை நடிகை  - விஜி: மதயானைக்கூட்டம்


சென்ற வருடம் 'ஆரோகணம்' மூலம் முத்திரை பதித்த விஜிக்கு இம்முறை மீண்டும் ஒரு நல்ல கேரக்டரில் தன்னை நிரூபிப்பதற்கான வாய்ப்பு. சக்களத்தியிடம் வெறுப்பு, அண்ணன் மீதான அன்பு என மதயானைக்கூடட்டத்தில் பிரமாதப்படுத்தி இருக்கிறார்.


துணை நடிகர் - ஸ்ரீ:  ஓநாயும் ஆட்டுக்குட்டியும்



ஓநாயும்,ஆட்டுக்குட்டியும் படத்தில் கதை நாயகன் மிஷ்கின் என்றாலும் கிட்டத்தட்ட அதற்கு சமமான ஸ்கோப்பை ஸ்ரீக்கு தந்த லோன் உல்ஃபை பாராட்டியே ஆக வேண்டும். ஓநாயிடம் சிக்கிய ஆட்டுக்குட்டியாக மிரண்டு மிரட்டல் பெர்பாமன்சை தந்த இளைஞன். மதயானைக்கூட்டத்தில் மது போதையில் மிதக்கும் கேரக்டரில் அசத்திய கலையரசன் துணை நடிகருக்கான ரேஸில் க்ளோஸ் ரன்னர் அப். 


நடிகை - பார்வதி: மரியான்


விலைமாதாக பூஜா(விடியும் முன்), மென்மையான காதலியாக த்ரிஷா(என்றென்றும் புன்னகை), வஞ்சகம் செய்த காதலன் குடும்பத்தை எதிர்த்த பெண்ணாக மனிஷா(ஆதலால் காதல் செய்வீர்) ஆகியோர் சிறந்த நடிகைகளாக நங்கூரம் பாய்ச்சி நிற்க, வெற்றிக்கொடி நாட்டியதேன்னவோ பார்வதிதான். 'பூ' ஒன்று கடலோர புயலானது மரியானில். உறுதியாக காதற்கொடியை பற்றி ரசிகர்கள் மனதில் தீயாய் சுடர்விட்ட பனிமலர்.


நடிகர் - கமல் ஹாசன்: விஸ்வரூபம் 


தனுஷ்(மரியான்), கிஷோர்(வனயுத்தம், ஹரிதாஸ்), விஜய சேதுபதி(சூது கவ்வும், இதற்குத்தானே ஆசைப்பட்டாய் பாலகுமாரா) என சரியான போட்டிதான் இவ்வருடம். கூடவே 'பரதேசி' அதர்வாவும் ஆட்டத்தில் சேர்ந்து கொள்ள பிரயத்தனம் செய்தார். ஆனால்  என்ன ரூபம் எடுப்பாரென்று எவருக்கும் தெரியாமல் சொன்ன ரூபம் மாற்றி விஸ்வரூபம் எடுத்த கமல் ஹாசன்...யூ ஹாவ் டன் இட் அகைன்!!


இயக்குனர் - சுசீந்தரன்: ஆதலால் காதல் செய்வீர், பாண்டிய நாடு.



'பரதேசி' மூலம் பிரிட்டிஷ் காலத்தில் அடிமைப்பட்ட முன்னோர்களின் வலியை சொன்னார் பாலா. ஆனால் இடைவேளைக்கு சற்று முன்பு வரை மைய கதைக்குள் நுழையாமல் வேதிகாவின் சேட்டையை புகுத்தி தலை சொறிய வைத்தார். 'ஹரிதாஸ்' மூலம் உருப்படியான தமிழ் சினிமா ஒன்றை தந்தவர் குமாரவேலன். ஸ்போர்ட்ஸ் படங்களுக்கே உரித்தான 'உன்னால் முடியும்' டெம்ப்ளேட்டை கையில் எடுத்தாலும் முடிவையும் வழக்கமான ஸ்போர்ட்ஸ் சினிமா பாணியில் தந்தது சற்று உறுத்தியது. 

இவர்களை விட சுசீந்தரனை பிடிக்க சில காரணங்கள் உண்டு. ராஜபாட்டை எனும் சூர மொக்கையை எடுத்ததற்காக பகிரங்க மன்னிப்பு கேட்டது இவர் மீதான மதிப்பை கூட்டியது. நினைத்திருந்தால் அடுத்ததாக பாண்டிய நாடு போன்ற பக்கா வணிகப்படத்தை எடுத்திருக்கலாம். ஆனால் 'ஆதலால் காதல் செய்வீர்' எனும் யதார்த்த காதல் படத்தை இயக்கினார். இப்படத்திற்கு கமர்சியல் வெற்றி என்பது பெரிய அளவில் சாத்தியம் இல்லை என்பதை உணர்ந்தும் தரமான இயக்குனர்கள் பட்டியலில் தன் பெயரை நிலை நிறுத்துவதற்கான முயற்சியை மேற்கொண்டது பாராட்டப்பட வேண்டிய விஷயம். 

அதற்கடுத்து தீபாவளி பந்தயத்தில் அமைதியாக கலந்து கொண்டு அனாசயமாக வென்றது பாண்டிய நாடு. ஒவ்வொரு படத்திலும் வித்யாசமான களங்களில் பயணித்து க்ளாஸ் மற்றும் மாஸ் படங்களை எடுக்கும் வெகு சொற்பமான இயக்குனர்கள் வரிசையில் சுசீந்தரன் இப்போதைக்கு முன்னணியில்!!


பிடித்த திரைப்படம் - சூது கவ்வும்



பரதேசி, ஹரிதாஸ், ஆதலால் காதல் செய்வீர் போன்றவை 2013 ஆம் ஆண்டின் சிறந்த படங்களுக்கான தகுதியை கொண்டவை என்பது என் கருத்து. முதல் இரண்டு படங்களில் குறைகளாக கருதுவதை மேலே சுட்டிக்காட்டி உள்ளேன். ஆதலால் காதல் செய்வீர் இக்கால இளைய சமூகத்திற்கு குறிப்பாக யுவதிகளுக்கான எச்சரிக்கை மணி அடித்த சித்திரம். அதே நேரத்தில் போதுமான யதார்த்த நிகழ்வுகளை தாங்கி அனைத்து தரப்பினரும் ரசிக்கும் வண்ணம் வெளியான சூது கவ்வும்... மனதை கவ்வி விட்டது.
 

FIND OF THE YEAR - நலன் குமாரசாமி: சூது கவ்வும்


பல்வேறு துறைகளை உள்ளடக்கிய சினிமாவில் ஒவ்வொரு ஆண்டும் ஏதேனும் ஒரு நபர் தமது முதல் முயற்சி வாயிலாக நம்மை ஆச்சர்யப்படுத்த தவறுவதில்லை. சென்ற ஆண்டு 'பீட்சா' கார்த்திக் சுப்பராஜ் என்றால் இம்முறை சந்தேகமின்றி நலன் தான். பின்னணி இசைக்காக எப்படி இரண்டாம் முறை ஓநாயும், ஆட்டுக்குட்டியும் படத்தை பார்க்க தோன்றியதோ அதுபோல சுவாரஸ்யமான திரைக்கதை, செதுக்கப்பட்ட கேரக்டர்களின் நடிப்பு, ஜிகர்தண்டா பாடல்கள் போன்ற காரணங்களுக்காக மறுமுறை பார்த்த படம் சூது கவ்வும். பீட்சாவிற்கு பிறகு எகிறி அடித்தது சந்தோஷ் நாராயணனின் பின்னணி இசை. இவ்வனைத்திற்கும் பின்புலமாக இருந்த நலன்... அடுத்த படத்திற்கு வீ  ஆர் வைட்டிங்!!

..........................................................................


வேற்று மொழியையும் சேர்த்து 2013 இல் எனக்கு பிடித்த திரைப்படம் மற்றும் சில குறிப்பிடத்தக்க மாற்றுமொழி படங்கள் பற்றிய பார்வையுடன் அடுத்து சந்திக்கிறேன்.

வாசகர்கள் அனைவருக்கும் ஆங்கில புத்தாண்டு வாழ்த்துகள்!!

..........................................................................





Monday, December 30, 2013

திரை விரு(ந்)து 2013 - தமிழ் படங்கள்





1000 வாட்ஸ் பவர் ஸ்டார் பிரகாசம் தாங்கி வசூலில் (கும்மாங்)குத்து விளக்கேற்றத்துடன் அமோகமாக துவங்கியது 2013. அடுத்த  சில நாட்களில் விஸ்வரூப வசூலும் பின்தொடர்ந்தது. சூது கவ்வும், எதிர்நீச்சல் போன்ற ஓரிரு கன்டன்ட் உள்ள படங்கள் சரக்கிற்கேற்ற பலனைப்பெற, அலெக்ஸ் பாண்டியன் முதல் நையாண்டி வரையான பேரிம்சைகள் ஒதுக்கி தள்ளப்பட்டன. மணிரத்னம், பாரதிராஜா, செல்வராகவன், அமீர், மணிவண்ணன் மற்றும் பாலுமகேந்திரா போன்றோரின் அவுட் டேடட்/மண்டை காய்ச்சல் படைப்புகளும் மண்ணை கவ்வின. 

சென்ற ஆண்டை தொடர்ந்து இம்முறையும் முழு நீள தமாசு காவியங்கள் படைக்க ஒரு படையே கிளம்பியது. ஆனால் சொகுசாக கரை சேர்ந்தது வருத்தப்படாத வாலிபர் சங்கம் மட்டுமே. மேலும் ஒரு சில காமடிப்படங்கள் எப்படி ஓடின எனும் ஆச்சர்யம் நீங்குவதற்கு முன்பாவே கல்லா கட்டி விட்டன. அழகுராஜாவில் இயக்குனர் ராஜேஷுக்கு விழுந்த தர்ம அடி சகட்டு மேனிக்கு தமாசு செய்ய நினைக்கும் படைப்பாளிகளுக்கு ஊதப்பட்ட அபாய சங்கு. 'என்னடா இது இப்படி ஒரு வித்யாசமான படமா?' என மூக்கில் விரல் வைத்தால் 'அதெல்லாம் சுட்ட கதைகள் பாஸ்' என்று ஆதாரத்துடன் அலறினார்கள் இணைய தோழர்கள். உதாரணம்: 6 மெழுகுவர்த்திகள், விடியும் முன், மூடர் கூடம். இவற்றுடன் சேர்ந்து அசல் 'சுட்ட கதை'யும் ஊக்கு வாங்கி மூலையில் படுத்துக்கொண்டது. 'ராவண தேசம்' வசூல் ரீதியாக தோற்றாலும் உருப்படியான முயற்சி எனச்சொல்லலாம்.

இனி எனக்குப் பிடித்த பட்டியல் உங்கள் பார்வைக்கு:

பாடலாசிரியர் - வைரமுத்து:  பரதேசி, விஸ்வரூபம்.

'உயிரோடு வாழ்வது கூட  சிறு துன்பமே, வயிறோடு வாழ்வது தானே பெருந்துன்பமே'(செங்காடே), 'தேகத்தில் உள்ள எலும்புக்கு ஒரு வெறி நாயும், தொர நாயும் மோதுதே. வானத்தில் வாழும் நெஞ்சமோ தன் மாராப்பை தாராமல் ஓடுதே...'(செந்நீர் தானா), 'புயலை சுவாசிக்க நுரையீரல் கேட்கின்றோம். எட்டு திசைகளால் ஒரு இமயம் கேட்கின்றோம்'(துப்பாக்கி எங்கள் தோளிலே) பாடல் வரிகளில் தேசத்தின் தேநீர் அவலமும், சர்வ தேச எல்லையின் ஓலமும்...கவிஞரின் ஆறாம் விரல் வித்தை!!


பாடகர்(பெண்) - ஸ்ரேயா கோஷல்: எதிர்நீச்சல், என்றென்றும் புன்னகை.
'மின்வெட்டு நாளில்' ஒரு மின்சாரம் போல வந்து மயிலிறகு சாரீரத்தால் 'என்னை சாய்த்தாயே'!! 

பாடகர்(ஆண்) -  ஸ்ரீராம் பார்த்தசாரதி: 'ஆனந்த யாழை' தங்க மீன்கள்.
குழலினிது, யாழினிது. யாழாய் நெஞ்சில் தவழும் ஸ்ரீராமின் குரலும் இனிது. 

இசையமைப்பாளர்(பாடல்கள்​) - அனிருத்: எதிர்நீச்சல்.   
இவ்வருடம் எதிர் நீச்சலடித்து டாப் கியரில் பறந்த இளம் சென்ஷேசன். 

இசையமைப்பாளர்(பின்னணி) - இளையராஜா: ஓநாயும் ஆட்டுக்குட்டியும்.
பின்னணி இசைக்காகவே இவ்வருடம் இரண்டு முறை பார்த்த ஒரே திரைப்படம். முதன் முறை திரையரங்கில் பார்த்த பிறகு அடுத்ததாக விஜய் டி.வி.யில். மீண்டும் ஒரு முறை பார்க்கும் ஆவலைத்தூண்டும் அற்புதமான பின்னணி இசை.

நகைச்சுவை நடிகர் - சந்தானம்: தீயா வேலை செய்யணும் குமாரு, ராஜா ராணி, என்றென்றும் புன்னகை.
                                                                    

படம் பார்ப்போரின் கபாலம் கலங்கும் அளவிற்கு சரக்கு சமாச்சாரங்களை ஏகத்தும் இறக்கி நகைச்சுவை செய்ததால் சந்தானத்தின் சரக்கு குடோனே கிட்டத்தட்ட காலியாகி விட்டது என்று சொல்லலாம். ஆனால் போட்டிக்கு வந்த சூரி இவருக்கு சமமாக தாக்கு பிடிக்க முடியாமல் போனதால் இவ்வருடமும் ரேஸில் வென்றிருக்கிறார். சக நடிகர்களை கவுண்டர் பாணியில் கலாய்த்து காலம் தள்ளுவது, சரக்கு சைட் டிஷ்களை ஓவர் சப்ளை செய்வது போன்ற புளித்த மேட்டர்களை மாற்றினால் அடுத்த வருடமும் ஆளலாம். 'என்றென்றும் புன்னகை'யில் சாய்ந்து சாய்ந்து நடக்கும் காட்சி ஒன்று போதும். பார்த்தாவை நிமிர்த்தி விட்டது.


திரை விரு(ந்)து 2013 - தமிழ் படங்கள் - நாளை தொடரும்...
..............................................................


தொடர்புடைய பதிவுகள்:






          

Sunday, December 29, 2013

திரை விரு(ந்)து 2013 - ஹிந்தி படங்கள்




அக்சய் குமாரின் தில்லாலங்கடி சித்திரமான ஸ்பெஷல் 26 தான் இவ்வாண்டு பாலிவுட்டின் வெற்றிக்கணக்கை துவக்கி  வைத்தது என சொல்லலாம். அதன் பிறகு ரசனையான படங்களின் வரிசையில் சேர்ந்து கொண்டவை: காய் போ சே, பாம்பே டாக்கீஸ், பாக் மில்கா பாக், சிக்ஸ்டீன், ஷாஹித் மற்றும் லஞ்ச் பாக்ஸ். விமர்சகர்களால் பெரிதாக ரசிக்கப்படாவிட்டாலும் சினிமா ரசிகர்களால் கவனிக்கப்பட்ட படங்களென்றால் தி அட்டாக்ஸ் ஆஃப் 26/11, அங்கூர் அரோரா மர்டர் கேஸ் போன்றவற்றை கூறலாம்.

பெரிய ஸ்டார்களின் படங்கள் முந்தைய சாதனைகளை போட்டி போட்டு முறியடித்ததே பாலிவுட்டின் ஹாட் டாபிக் ஆகிப்போனதால் க்ளாஸ் சினிமாக்கள் பற்றிய விவாதங்கள் பின்னுக்கு தள்ளப்பட்டன. விதிவிலக்கு லஞ்ச் பாக்ஸ். அதற்காக வெறும் மாஸ் சினிமாக்களை மட்டுமே கொண்டாடாமல் ஷாஹித், லஞ்ச் பாக்ஸ், பாக் மில்கா பாக் ஆகியவற்றின் வசூலுக்கும் உத்திரவாதம் தந்து கை தூக்கி விட்டனர் பாலிவுட் ரசிகர்கள். குறிப்பாக படு வக்கிரமான பாலியல் வசனங்களை கொண்ட குப்பை என்று முன்னணி ஊடகங்களால் தூற்றப்பட்ட 'க்ராண்ட் மஸ்தி' பெயருக்கேற்றாற்போல் இளையவர்களை சிறப்பாக குஷிப்படுத்தி 100 கோடிக்கும் மேல் அள்ளி அதகளம் செய்தது. 

இனி எனக்குப்பிடித்த பட்டியல் உங்கள் பார்வைக்கு:

பாடகர் - மோஹித் சவுஹான்: இந்திய சினிமாவின் நூறாம் ஆண்டை கொண்டாட நான்கு முன்னணி இயக்குனர்கள் சேர்ந்து உருவாக்கிய படைப்பு பாம்பே டாக்கீஸ். அதில் மோஹித் பாடிய 'அக்கட் பக்கட்' பாடல் தேசத்தின் இந்திய சினிமா ரசிகனுக்கு செய்யப்பட சிறப்பு மரியாதை. 

பாடகி - ஸ்ரேயா கோஷல்: ராம்லீலா 'தோல் பாஜே' பாடலில் தீபிகாவின் உணர்ச்சிபூர்வமான ஆட்டம், ரவிவர்மனின் சிறந்த ஒளியமைப்பு, சஞ்சய் லீலாவின் சிலிர்ப்பூட்டும் இசை ஆகியவற்றினூடே மகாராணியாக சிம்மாசனத்தில் வீற்றிருந்தது ஸ்ரேயாவின் தீர்க்கமான குரல்.

இசையமைப்பாளர்: சஞ்சய் லீலா பன்சாலி:  குஜராத்தின் மண் மணம் சார்ந்த இசையை ஆர்ப்பரிக்க விட்டு திருவிழா சூழலை கொண்டு வந்தது சஞ்சயின் ராம் லீலா பாடல்கள் ஒவ்வொன்றும்.
 

ஒளிப்பதிவாளர் - ரவிவர்மன்: ராம்லீலாவில் உதய்பூர் அரண்மையினுள் சுடர்விட்ட ஒளிக்கதிர்களும், ரங்கோலி வண்ணங்களும் இரண்டு நாட்களுக்கு கண்களை விட்டு அகலாமல் போனதற்கு இவரது ஒளியாள்கையே காரணம்.

                                                                  

துணை நடிகர் - நானா படேகர்:  தி அட்டாக்ஸ் ஆஃப் 26/11 படத்தில் மும்பை தாக்குதலை விசாரிக்கும் காவல்துறை அதிகாரியாக நானாவின் கர்ஜனை மிரட்டல். குறிப்பாக கசாப் பாத்திரத்துடன் பேசும் தேசாபிமான வசனத்திற்கு ஸ்பெஷல் சல்யூட் தல.  
 
துணை நடிகைகள் - வமிகா, இசபெல்: பொதுவாக நாயகன்/நாயகிக்கு அடுத்து குறைந்த காட்சிகள் மற்றும் வலுவான கேரக்டரில் (நன்றாக) நடிப்பவரை (சிறந்த) துணை நடிகர் என்று சொல்லலாம். அதே நேரத்தில் கதையே நாயகன்/நாயகியாக இருக்கும் சப்ஜெக்ட்டில் ஒன்றுக்கும் மேற்பட்ட நபர்கள் நன்றாக நடித்தால்? அப்படி என்னை கவர்ந்த இருவர்தான் சிக்ஸ்டீனில் சிறகடித்த வமிகா மற்றும் இசபெல்.

வில்லன்/வில்லியம்மா - ரிஷி கபூர், சுப்ரியா பதக்:  தாவூத் இப்ராஹிமாக ரிஷி சரிப்பட்டு வருவாரா எனும் பெருத்த ஐயத்துடன்தான் D - Day பார்க்க சென்றேன். ஆனால் ஹீ மேட் இட். சிகப்பு கூலருடன் என்ன கூல் ஆக்ட் பாய் சாப். அடுத்த ஹெவிவைட் பெர்பாமன்ஸை தந்தவர் சுப்ரியா. நக்கல், மூர்க்கம், அன்பு என மேடமின் அதிரடி ஆட்டம் அமோகம்.

காட்சி(வசனமின்றி)  -  தி அட்டாக்ஸ் ஆஃப் 26/11: கசாப் மற்றும் அவனது சகாக்கள் சிவாஜி ரயில் நிலையம், தாஜ் ஹோட்டல் மற்றும் லியோபோட் கபேயில் நடத்தும் மௌனமான ரத்த வெறியாட்டம். அக்கொடூர நிகழ்வின்போது சம்பவ இடத்தில் இருந்தது போன்ற அச்சத்தை திரையில் தந்த ராம் கோபால் வர்மா...க்ரேட் அட்டாக்!!

காட்சி(வசனத்துடன்) - ஷாஹித்:  ஜோடிக்கப்பட்ட வழக்குகளில் சிக்கும் இஸ்லாமியர்களுக்காக ராஜ்குமார் வாதாடும் நீதிமன்ற காட்சிகள். இவ்வளவு யதார்த்தமாக இதற்கு முன்பு வழக்காடும் காட்சிகள் இந்திய சினிமாவில் காட்சிப்படுத்தப்பட்டு உள்ளதா என்பது சந்தேகமே.


நடிகர் - இர்ஃபான் கான்:  ஷாஹிப் பிவி அவுர் கேங்ஸ்டர் ரிடர்ன்ஸ் படத்தில் சுமாராக நடித்திருப்பினும் அதன் பின்பு D - Day வில் ஃபார்முக்கு வந்தார் இந்த ஆல்ரவுண்டர். லஞ்ச் பாக்ஸ் மூலம் ஒரு படி இன்னும் மேலே. காய் போ சே, ஷாஹித் ஆகிய இரு படைப்புகளில் நன்றாக நடித்து இவ்வருடம் இர்பானுடன் போட்டியிட்டவர் என ராஜ்குமார் யாதவை சொல்லலாம்.



நடிகை - தீபிகா படுகோன்: சென்ற ஆண்டைப்போல ரிச்சா சட்டா, வித்யா பாலன் அளவிற்கு செமத்தியான பெர்பாமர் இம்முறை கண்ணில் படவில்லை. எனினும் ராம்லீலாவில் காமமும், காதலும் ததும்பும் கண்கள். கூடவே கொஞ்சம் ரௌத்திரமும். தீபிகாதான்...செம ஹாட் மிர்ச்சி!!
 

இயக்குனர் -  ஹன்சல் மேத்தா(ஷாஹித்)
பிடித்த படம் - ஷாஹித்


                                                               


'லஞ்ச் பாக்ஸ்' பார்த்தவர்கள் கூட சாப்பிட்டமா, அடுத்த வேலைய பாத்தமா என்றிருந்தபோது 'இப்படி ஒரு அறுசுவை விருந்தை இந்தியால இந்த வருஷம் யாராவது  சமைச்சது உண்டா? ஆஸ்கருக்கு 100% தகுதியான படம்' என்று படக்குழுவும், முன்னணி ஊடகங்களும் இடைவிடாமல் விளம்பரம் செய்தது சற்று அதீதமாகவே பட்டது. நல்ல திரைப்படம் என்றாலும் மிகச்சிறந்த படமென்று சொல்லுமளவிற்கு இல்லையென்பது எனது கருத்து.

அதே நேரத்தில் சத்தமின்றி சத்தான சப்ஜெக்டுடன் களமிறங்கியது ஷாஹித். நியாயமான வழக்குகளில் வாதாடி உயிரிழந்த வழக்கறிஞர் ஷாஹித்தின் வாழ்க்கையை மையமாக வைத்து எடுக்கப்பட்ட படமிது. குறைந்த பட்ஜெட் என்பதால் சில இடங்களில் தொழில்நுட்ப குறைகள் இருப்பினும் இவ்வாண்டின் சிறந்த ஹிந்தி படமென்று சொல்வேன். இதனை படமாக்கிய இயக்குனர் ஹன்சல் மேத்தாவின் உழைப்பிற்கு பாராட்டுகள்.

அடுத்து 2013 தமிழ் சினிமா பற்றிய பார்வை மற்றும் எனக்குப்பிடித்த கலைஞர்கள் பட்டியலுடன் சந்திக்கிறேன்.
 ........................................................................


தொடர்புடைய பதிவுகள்:

திரை விரு(ந்)து 2013 - மலையாள படங்கள் - 2

2013 திரை விரு(ந்)து - தமிழ் படங்கள்


 

Saturday, December 28, 2013

திரை விரு(ந்)து 2013 - மலையாள படங்கள் 2







முந்தைய பதிவு:
திரை விரு(ந்)து 2013 - மலையாள படங்கள் - 1




பிடித்த நடிகை - ரச்சனா:



பெற்ற பிள்ளையை மகனை பணத்திற்காக சீமான் வீட்டு தம்பதிகளுக்கு தாரை வார்க்கும் தாயாக லக்கி ஸ்டாரில் ரச்சனா. குறும்பு கொப்பளிக்கும் கண்கள், சிம்ப்ளி ஹோம்லி தோற்றம். பிள்ளைய பிரியும்போது முட்டிக்கொண்டு நிற்கும் சோகம். ப்ரம்மாதமல்லோ. அறிமுகப் படமென்றாலும் ஜெயராமை ஓவர்டேக் செய்து பெயரை தட்டிச்சென்ற ஸ்வீட் ஸ்டார்.

பிடித்த நடிகர் - ப்ரித்விராஜ்:


என்னைப்பொருத்தவரை இம்முறை சிறந்த நடிகருக்கான ரேஸ் ஃபகத் ஃபாசில் மற்றும் ப்ரிதிவிராஜுக்கு இடையேயான ஃபோட்டோ ஃபினிஷ் ஆக முடிந்திருக்கிறது என்றே சொல்லலாம். மென்மை மற்றும் அழுத்தம் மிக்க காதலனாக (அன்னயும் ரசூலும், ஆமென்), கடுகடுக்கும் இன்சுரன்ஸ் நிறுவன அதிகாரியாக(இம்மானுவேல்), சுத்தத்தை போற்றும் சாப்ட்வேர் ஊழியனாக(நார்த் 24 காதம்) வெவ்வேறு அவதாரங்களை எடுத்து ஒரு இந்தியன் ப்ரணய கதாவில் 2013 ஐ நிறைவு செய்தார் ஃபகத். ஆனால் மூன்றே படங்களில் அவரை விட ஒரு படி சிறப்பாக நடித்து கேரள ரசிகர்கள் மற்றும் விமர்சகர்ளின் பார்வையை தன் பக்கம் திருப்பி விட்டார் ப்ரித்வி.

ஜே.சி. டானியலாக இளம் மற்றும் மூத்த பருவ நடிப்பை செல்லுலாய்டிலும், முன்னணி நடிகர்கள் சிந்திக்க கூட வாய்ப்பில்லாத ஓரினச்சேர்க்கையாளர் கதாபாத்திரத்தை மும்பை போலீஸிலும், நாசம் செய்யப்பட குடும்பத்து நினைவுகளை எண்ணி குடிக்கு அடிமையாகும் காவல் துறை அதிகாரியாக மெமரிஸிலும் கச்சிதமாக நடித்து மனதை தொட்டிருக்கிறது இந்த ப்ரித்வி ஏவுகணை.

பிடித்த இயக்குனர் - ஜீது ஜோசப்:

                                                           

2013 இல் இரண்டு வெற்றிப்படங்களுக்கு சொந்தக்காரர். மெமரிஸ் மற்றும் த்ரிஷ்யம். தனக்கு பிடிக்காத பெண்களை பழிவாங்க அவர்களுக்கு நெருங்கிய ஆண்களை பொது இடத்தில் இயேசுவை போல சிலுவையில் அறைந்து கொள்கிறான் ஒருவன். குறியீடாக அவன் விட்டுச்செல்வது பைபிள் வசனங்களை மட்டுமே. செய்வதறியாது திகைக்கும் காவல் துறை குடிக்கு ஆட்பட்டுப்போன அதிகாரி ப்ரித்விராஜை அணுகுகிறது. தொடர்கொலைப்புதிர் எப்படி விசாரணை செய்யப்படுகிறது என்பதை பரபரப்பாக படமாக்கி இருப்பார் ஜீது. 

அடுத்து மோகன்லாலை வைத்து எடுத்த த்ரிஷ்யம். எதிர்பாராமல் குடும்பத்தினர் செய்யும் செயலை காவல்துறை கண்ணில் இருந்து மறைக்க ஒரு நடுத்தர குடும்பத்தலைவன் எப்படி சாதுர்யமாக செயல்படுகிறான் என்பதைச்சொல்லும் சித்திரம். வருட இறுதியில் மோகன்லால் காலரை தூக்கி விட்டுக்கொள்ளும் வகையில் அமைந்த படமும் கூட. வசூல் ரீதியாகவும், விமர்சகர் வட்டத்தாலும் பேசப்பட்ட படைப்புகளை தந்த ஜீதுதான் நமது பேவரிட்.

பிடித்த திரைப்படம் - செல்லுலாய்ட்:


ஷட்டர், த்ரிஷ்யம், 5 சுந்தரிகள், நார்த் 24 காதம் போன்ற சிறந்த திரைப்படங்கள் இவ்வருடம் வெளியாகி இருப்பினும் அவற்றை விட ஒரு படி மேல் எனக்கருதுவது இந்த செல்லுலாய்டைத்தான். கேரளா சினிமாவின் பிதாமகன் ஜே.சி.டேனியலின் வாழ்க்கைச்சித்திரத்தை அருமையாக படமாக்கி இருக்கிறார் இயக்குனர் கமல். தமிழரான டேனியல் நாடார் கேரளத்தின் முதல் படத்தை எடுக்க பெரும் செல்வத்தை இழக்கிறார். ஆனால் சாதிப்பிரச்னையால் அப்படம் முடங்குவதோடு டேனியலையும் முடக்கிப்போடுகிறது. பல்வேறு ஆண்டுகளுக்கு பிறகு அவருக்கு எப்படி அங்கீகாரம் கிடைக்கிறது என்பதை இயல்பாக விளக்கும் சினிமா.  இந்த வாரம் தமிழில் டப் செய்து சென்னையில் ரிலீஸ் செய்துள்ளனர். சினிமாப்பிரியர்கள் தவற விட வேண்டாம்.

2013 ஹிந்தி திரைப்படங்கள் பற்றிய பார்வையுடன் அடுத்து சந்திக்கலாம்.
......................................................................


Thursday, December 26, 2013

திரை விரு(ந்)து 2013 - மலையாள படங்கள்






ஒவ்வொரு வருட இறுதியிலும் வெளியாகும் மெட்ராஸ் பவன் திரை விரு(ந்)து தொகுப்பில் 'சிறந்த' என்பதை விட நான் பார்த்த சித்திரங்களில் எனக்கு பிடித்தவற்றை பற்றி குறிப்பிடுவது வழக்கம். அதனடிப்படையில் முதலில் 2013 ஆம் ஆண்டு வெளிவந்த மலையாள திரைப்படங்கள் பற்றிய பதிவுடன் துவங்குகிறேன்.

சென்ற ஆண்டைக்காட்டிலும் அதிகமான மலையாளப்படங்களை காணும் வாய்ப்பு 2013 இல் கிட்டியது. கேரள மண்ணில் புதிய தலைமுறையின் எழுச்சி மேலும் வலுப்பெற்ற ஆண்டாக இதைக்கருதலாம். ஏப்ப சாப்பையான படங்களை சற்று மூட்டை கட்டிவிட்டு இளைஞர்களுடன் கடும் போட்டி போட்டாக வேண்டிய நிர்ப்பந்தம் மம்முட்டி, லால் மற்றும் திலீப் உள்ளிட்டோருக்கு. இம்முறை சீனியர்கள் கிட்டத்தட்ட சமபலத்துடனே களமாடி இருக்கிறார்கள். சில ஆண்டுகளுக்கு முன்பு வரை தேசிய அளவில் ஹிந்தி, தமிழ் சினிமா மற்றும் அவற்றின் கலைஞர்கள் வெகுவாக கவன ஈர்ப்பை பெற்றிருப்பினும் இம்முறை அச்சிம்மாசனத்தை கைப்பற்றி இருக்கிறது கேரள திரையுலகம்.


பல்வேறு கதைக்களங்கள், சிறந்த தொழில்நுட்ப கலைஞர்கள், பாராட்டத்தக்க நடிப்பு என மலையாள சினிமா ரசிகர்களுக்கு அருமையான விருந்து படைக்கப்பட்டது இவ்வருடம். லோக்பால், லேடிஸ் & ஜென்டில்மேன், கீதாஞ்சலி போன்ற  கொடுமையான படங்களை தந்த மோகன்லால் த்ரிஷ்யம் மூலம் இழந்த பெயரை மீட்டெடுத்தார். மம்முட்டிக்கு கை கொடுத்தது இம்மானுவேலும், குஞ்சனன்தன்டே கதாவும்தான். ஜெயராமுக்கு லக்கியாக அமைந்தது லக்கி ஸ்டார்.

சத்தமின்றி அழுத்தமான காதலை சொன்ன அன்னயும் ரசூலும், மலையாள சினிமாவின் முன்னோடி ஜே.சி.டேனியலின் வாழ்க்கை வரலாற்றை சித்தரித்த செல்லுலாய்ட் என வெற்றிகரமாகவே வருடத்தை துவக்கியது கேரள திரையுலகம். ஷட்டர், மெமரிஸ் மற்றும் திரா போன்ற த்ரில்லர்கள் ஏகோபித்த ஆதரவை பெற்றன. குடும்பச்சித்திரங்கள் வரிசையில் லக்கி ஸ்டார், இம்மானுவேல், இங்கிலீஷ் உள்ளிட்ட சில படங்கள் பிரகாசிக்க இவ்விரண்டு வகையையும் கலந்து வருட இறுதியில் ரிலீசாகி வாகை சூடியது மோகன்லால் நடித்த த்ரிஷ்யம்.


இதுபோக தனி ட்ராக்கில் பயணித்து பலரையும் திரும்பிப்பார்க்க வைத்த படங்களும் உண்டு. அதிரடி அரசியல் பேசிய லெஃப்ட் ரைட் லெஃப்ட், சமீப  இந்திய ரோட் மூவிக்களில் குறிப்பிடத்தக்க  ஒன்றாக கருதப்படும் நீலாகாசம் பச்ச கடல் சுவ்வன பூமி, பந்த்தால் பந்தாடப்படும் கேரளா மாநில அவலத்தை சுவைபட விளக்கிய நார்த் 24 காதம் மற்றும் புன்யலன் அகர்பத்திஸ், பெண்களின் பெருமையை எடுத்துரைத்த 5 சுந்தரிகள் என நீள்கிறது பட்டியல்.

இனி எனக்குப்பிடித்த திரைப்பட்டியல் உங்கள் பார்வைக்கு:

பிடித்த....

ஒளிப்பதிவாளர்: கிரீஷ் கங்காதரன்(நீலாகாசம் பச்ச கடல் சுவ்வன பூமி)

ஒளிப்பதிவிற்கென்றே படம் பார்க்க எண்ணுபவர்கள் கிரீஷின் கேமரா ஜாலத்தை இந்த நீலாகாசத்தில் பார்க்கலாம்.  

பாடகர்கள்:  வைக்கம் விஜயலட்சுமி, சித்தாரா. முறையே 'காட்டே காட்டே' மற்றும் 'ஏனுன்டோடி' (செல்லுலாய்ட் படத்தின்)  பாடல்களுக்காக. கிராமத்து தென்றலுடன் கலந்து மீண்டும் மீண்டும் மனதை இலகுவாக்கும் இனிய சாரீரம் கொண்ட இருவருக்கும் வந்தனங்கள்.

காட்சி(வசனமின்றி) - சேதுலட்சுமி(5 சுந்தரிகள்): பாலியல் தொந்தரவிற்கு ஆளாகும் சிறுமி அனிகா வீட்டில் நள்ளிரவு நேரத்தில் அச்சத்துடன் பெற்றோருக்கு நடுவே துயில் கொள்ள செல்வது.

காட்சி(வசனத்துடன்) - லெஃப்ட் ரைட் லெஃப்ட்:  ஊர்ப்பக்கம் இருக்கும் சாலை அருகே காரை நிறுத்தி அரசியல்வாதி சகாதேவனாக ஹரீஷ் பரேடி முரளி கோபியிடம் பேசும் அனல் பறக்கும் வசனம். 
    
துணை நடிகர் - வினய் ஃபோர்ட்: ஷட்டர் படத்தில் (இயக்குனர்) லாலை ஆன்ட்டி ஹீரோவாக்க முயற்சித்த ஒரே குற்றத்திற்காக அல்லல்படும் ஆட்டோக்காரராக வினய்யின் பெர்பாமன்ஸ் அதகளம்.

துணை நடிகை - சாந்தினி: ஒடுக்கப்பட்ட இனத்தை சேர்ந்த பெண் ரோசி கேரக்டர் மூலம் மனதில் நின்றவர். ஆதிக்க சமூகத்தாரை காணும்போது பதைபதைப்பதும், சினிமாவில் நடிக்கும் மகிழ்ச்சியை கண்களால் வெளிப்படுத்துவதும் என மெச்சத்தக்க நடிப்பு.


பிடித்த மலையாள நடிகர், நடிகை, இயக்குனர் மற்றும் திரைப்படங்களிள் பட்டியல் நாளை.

.......................................................................


சமீபத்தில் எழுதியது:

மதயானைக் கூட்டம் - விமர்சனம் 





Monday, December 23, 2013

தலைமுறைகள்






நான்காண்டு இடைவெளிக்கு பிறகு மீண்டும் ஒரு பாலுமகேந்திரா படம். மணிரத்னத்தின் கடல், பாரதிராஜாவின் அன்னக்கொடியெல்லாம் காற்றாற்றில் அடித்துக்கொண்டு போக வருடம் நிறைவடையும் தருவாயில் இன்னொரு பிதாமகரின் படைப்பு. செயற்கைப்பூச்சில்லா ஒளி ஓவியம், இளையராஜாவின் இசைத்தாலாட்டு, முதன்முறை தொப்பியற்ற பாலுமகேந்திராவை நடிகராக காணும் வாய்ப்பு. இத்திரைப்படம் பார்க்க போதுமான காரணங்கள் இவையன்றி வேறெதுவாக இருக்கக்கூடும்?

காவேரிக்கரை எனும் ஊரில் வசிக்கும் முதியவராக பாலு மகேந்திரா. தன்னிடம் கூறாமல் திடீரென ஒரு கிறிஸ்துவ பெண்ணை மணமுடிக்கும் மகனை வீட்டை விட்டு வெளியேற்றுகிறார். காலம் கடக்கிறது. அவரது மகனும், மருமகளும் சென்னையில் சொந்தமாக மருத்துவமனை கட்டி முன்னேறி விட பூர்வீக இல்லத்தில் நாட்களை நகர்த்துகிறார் அப்பெரியவர். பல வருடங்களுக்கு பிறகு குடும்பத்துடன் தந்தையை சந்திக்க வரும் மகனிடம் முதலில் வெறுப்பை உமிழ்ந்தாலும் அதன் பின் சமாதானக்கொடி பறக்க விடுகிறார். பேரன் ஆதித்யாவுடன் வலுப்படும் உறவு இறுதியில் என்ன ஆனது என்பதை தனது பாணியில் சொல்ல முயற்சித்து இருக்கிறார் இயக்குனர்.

ஆரம்பக்கட்ட விளம்பரங்களில் முதுகை மட்டுமே காட்டும் அப்பெரியவர் யாராக இருக்கக்கூடும் எனும் ஆவல் மேலோங்கி இருந்தது உண்மைதான். ஆனால் அது பாலு மகேந்திரா என அறிந்தபோது லேசாக மூர்ச்சையானதும் முன் சொன்னதற்கு எவ்விதத்திலும் குறைவற்ற உண்மை. எதிர்பார்த்தது போல் நம் மனதில் அழுத்தத்தை பதிவு செய்ய மறுத்திருக்கிறது அவரது நடிப்பு. குறும்படங்களில் சில நொடிகள் வந்தாலும் அருமையாக பெர்பாமன்ஸ் செய்யும் பெரியவர்கள் எத்தனையோ பேர். இக்கதாபாத்திரத்தை செவ்வனே செய்ய கலைஞர்கள் இருப்பினும்,  பாலு அவர்களுக்கு ஏன் இந்த விபரீத முயற்சி என்றெண்ணி சலிப்பதை விட பரிதாபப்படவே முடிகிறது.  

பேரன் ஆதித்யாவாக சிறுவன் கார்த்திக். புஷ்டியான தேகம். லட்சணமான முகம். சொன்னதை செய்திருக்கிறான். அவ்வளவே. இயக்குனரின் செல்லப்பிள்ளை ‘தாடி வைத்த’ சசி(இயக்குனர் அல்ல), வினோதினி இருவரின் நடிப்பும் தேவைக்கேற்ப.

 நகர்ப்புற வாழ்க்கையையும், ஆங்கில மொழியையுமே கற்று வாழ்ந்த ஆதித்யா தன் தாயிடம் ‘ரிவர்’ என்றால் என்னவென்று கேட்கிறான். ‘உன் தாத்தாவிடம் கேள்’ எனக்கூறிவிட்டு மகன் கேட்ட கேள்வியை தனக்குத்தானே ஒரு முறை கேட்டுக்கொள்வதும், அடைமழையில் பேரனுடம் தாத்தா ஆட்டம் போடுவதும், வளர்ந்த பேரனாக இயக்குனர் சசிகுமார் சிறந்த எழுத்தாளருக்கான விருது வாங்கும்போது ஒட்டுமொத்த அரங்கும் இடைவிடாமல் கரவொலி எழுப்புவதும் எவ்வகையான யதார்த்தத்தில் சேர்த்தி என புலம்பித்தீர்க்க வேண்டி இருக்கிறது.


பாலு மகேந்திராவின் ஒளியாள்கையை பின்னுக்கு தள்ளி முன் நிற்பது காவேரி ஆற்றங்கரையோர பசுமையும், கேனன் 5டி யும்தான். ஊருக்கு வந்த முதல் நாள் தாத்தாவின் அறையை தேடி ஆதித்யா நடக்கையில் அவனுடனே வீர நடை போடும் ராஜாவின் பின்னணி இசை மற்ற சமயங்களில் எல்லாம் காக்கை, சிட்டுக்குருவி, இரவு நேரப்பூச்சிகளுக்கு வழிவிட்டு வாசற்கதவோரம் ஓய்வெடுக்கிறது.

சில்ட்ரென் ஆப் ஹெவன், கலர் ஆப் பேரடைஸ் போன்ற ஈரானியப்படங்கள் மூலம் மஜீத் மஜிதி தந்த சினிமாக்களில் இருக்கும் ஈரம், அதில் பொதிந்து கிடக்கும் மெல்லிய நகைச்சுவை, ஒருவாரமேனும் நம் தூக்கத்தை தொலைக்க வைக்கும் அத்தேசத்து சிறார்களின் நடிப்பு..!! நாம் கடக்க வேண்டிய தூரம் இன்னும் இருக்கிறது.

‘அ’வன்னாவை தாத்தாவிடம் கற்கும் ஆதித்யா அவ்வெழுத்தை மணற்பரப்பொன்றில் சிறுநீரால் தீட்டுகிறான். அதைக்கண்டு தகிக்கிறார் அவர். அங்கிருந்து பேரன் விலகிய சமயம் அந்த எழுத்தை சிறுநீர் கழித்தே அழிக்கிறார். தாய்மொழியின் அவலத்தை உணர்த்தும் இக்காட்சி ஒன்றே உலகத்தரமானது. ஆனால் அதை ஏதோ ஒரு நகைச்சுவைக்காட்சி என்று நினைத்து சிரிப்பொலி எழுப்புகிறார்கள் சந்தான-விமல்-சூரி காமடிக்கு வாக்கப்பட்டுவிட்ட சமகால ரசிக பெருமக்கள்.  ஆதித்யாவின் தாத்தாவிற்கு  ஸ்ட்ரோக் வந்ததற்கான காரணம் அநேகமாக இதுவாகத்தான் இருக்கக்கூடும்.


பாலுமகேந்திராக்காலம்? அது ஒரு கனாக்காலம்.

............................................................


சமீபத்திய விமர்சனங்கள்:

பிரியாணி 






Saturday, December 21, 2013

Dhoom 3







'வருடக்கடைசியில் வந்தாலும் இவ்வாண்டின் மிகப்பெரிய வெற்றிப்படம் இதுதான்', '300 கோடிகளை கலெக்ட் செய்து வசூல் சாதனை படைக்கும்' என சர்வநிச்சயமாக இந்திய சினிமா வட்டாரங்கள் கணித்த தூம் - 3 இன்று ரிலீசாகி விட்டது. ஆமிர் கான், காத்ரீனா கைப் என ஹெவியான மெகா ஸ்டார்களும் இடம்பெற ரசிகர்களின் உற்சாகம் எப்படி இருக்கும் என்று அளவிட இயலாது.  அதுபோக இப்படத்துடன் போட்டி போட வேறெந்த படமும் இல்லாததால் யஷ் ராஜ் பிலிம்ஸ் காட்டில் பேய்மழைதான்.

தூம் சீரிஸ் படங்களில் ஒரு டெம்ப்ளேட் சமாச்சாரம் பின்பட்டற்றப்படுவது உண்டு. அது திருடன் போலீஸ் விளையாட்டு. ஒவ்வொரு முறையும் இண்டர்நேஷனல் கில்லியாக சவால் விடும் திருடனை மடக்க அபிஷேக் பச்சன் வலை விரிப்பார். ஆனால் அவருக்கு டேக்கா குடுத்து தப்பிப்பான் அந்த சோர். தூம் - 2 வில் இருந்த சமாச்சாரங்களை(அபிஷேக், உதய் சோப்ரா இத்யாதி) ஆங்காங்கே வைத்துவிட்டு திருடன், அவனுடைய காதலி கேரக்டரில் மட்டும் சமகால மெகா ஸ்டார்களை புகுத்தி விடுவார்கள். இங்கும் அப்படியே. 

சிகாகோ நகரில் 'இந்தியன்  சர்க்கஸ்' நடத்தி வரும் நபரொருவர் வங்கியில் வாங்கிய கடனை அடைக்க இயலாமல் தத்தளிக்கிறார். 'என்னால் புது யுக்தியை பயன்படுத்தி மீண்டும் சர்க்கஸ் கம்பனியை வெற்றி பெறச்செய்ய  முடியும். இறுதியாக ஒரு முறை எனது ஷோவை பாருங்கள். அதன்பிறகு நடவடிக்கை எடுங்கள்' என கெஞ்சுகிறார். அதற்கு ஒப்புக்கொள்ளும் அதிகாரிகள் ஷோவையும் பார்க்கிறார்கள். ஆனால் சாகசங்கள்  திருப்திகரமாக இல்லை. இடத்தை காலி செய்து தாருங்கள் என்று கட்டளை இடுகிறார் வங்கியின் முதன்மை அதிகாரி. அதிர்ச்சியில் தற்கொலை செய்து கொள்கிறார் அந்நபர். அக்காட்சியை கண்முன் காணும் அவரது சிறு வயது மகன் அந்த வங்கியை நாசம் செய்வதென முடிவெடுக்கிறான். அச்சதியை முறியடிக்க வரும் இ ந்திய போலீஸ் அதிகாரி மற்றும் அமெரிக்க காவற்படைக்கு அவன் காட்டும் கண்கட்டி வித்தைதான் கதை.

கிட்டத்தட்ட மொத்த படத்தையும் சிகாகோ நகரில் எடுத்திருப்பதால் ஒவ்வொரு சீனிலும் ரிச் லுக் நீக்கமற. வங்கிப்பணத்தை தெருக்களில் சிதறவிட்டு பைக்கில் பறந்தவாறே ஆரவாரமாக என்ட்ரி தருகிறார் ஆமிர் கான். இரு கட்டிடங்களுக்கு இடையே கயிறு கட்டி அதில் பைக்கை செலுத்தும்போது...பேச ஒன்றுமில்லை. அதற்கடுத்து அபிஷேக்கின் அறிமுகம்.ஆட்டோவில் பறந்து வந்து அம்மா நகரில் இருக்கும் தமிழக ரவுடிகளை புரட்டி எடுக்கிறார். நெருக்கமாக இருக்கும் வீடுகளின் கூரைகளில் கூட ஆட்டோ பயணம் செய்கிறது என்றால் பார்த்துக்கொள்ளுங்கள்.

தூமிற்கு நேந்து விடப்பட்ட அடுத்த நபர் உதய். இரண்டாம் பாகத்தில் எப்படி போலீஸ் வேலை பார்க்காமல் பெண்களைப்பார்த்து பல் இளித்தாரோ அது போலத்தான் இங்கும். ஆமிர்கானை துரத்தும் சீரியசான காட்சியில் கூட காமடி செய்து மொக்கை போடுகிறார். 'ஐந்து நிமிடம் என் பெர்பாமன்ஸ் பாருங்கள். பிடித்தால் சேர்த்துக்கொள்ளுங்கள்' எனக்கூறிவிட்டு ஒவ்வொரு உடையாக களைந்து அடடா அல்வாத்துண்டு காத்ரீனா போடும் ஆட்டம் ஹாட்டஸ்ட் எவர். அபிஷேக் - ஆமிர் விளையாட்டில் உள்ளே புகாமல் கொஞ்சமே வந்து காணாமல் போகிறது இந்த ஆறடி வெண்ணிலா.

தூம் இரண்டில் ஹ்ரித்திக் ரோஷன் பல்வேறு கெட்டப்களில் வந்து நம் தலையை சொரிய வைத்திருப்பார். ஆனால் அந்த சேட்டையை எல்லாம் ஓரம் கட்டிவிட்டு முதிர்ச்சியான நடிப்பை வெளிப்படுத்தி இருக்கிறார் ஆமிர். முந்தைய பாகத்தில் வெறும் சாகசம் மட்டுமே வியாபித்து இருந்தது. ஆனால் இதில் ஓரளவு கதையும் இருப்பது ஆறுதல். ரசிகர்கள் குதூகலம் அடைய ஒரு இன்ப அதிர்ச்சியையும் வைத்திருக்கிறார் ஆமிர். அதை திரையில் காண்க. ஹ்ரித்திக், ஆமிர் ஆகியோருக்கு மட்டுமே பெருமளவு முக்கியத்துவம் தரப்படும் இந்த சீரிஸில் அபிஷேக்கின் நிலை சற்று பரிதாபம்தான்.


எப்படி வங்கிக்கொள்ளை நடைபெறுகிறது என்பதற்கான விளக்கம் சிறிதும் இல்லாதது, கொள்ளையடித்த பணத்தை உருப்படியாக செலவழிக்காமல் தெருக்களில் ஆமிர் கொட்டுவது, டெக்னிக்கல் விஷயங்களில் முன்னணியில் இருக்கும் அமெரிக்க போலீஸ் படம் நெடுக அவர் பின்னே ஓடிக்கொண்டு இருப்பது என கேள்விகள் எழாமல் இல்லை. ஆனால் அதைப்பற்றி கவலைப்பட அரங்கில் சிற்சிலரே இருப்பதால் 'சுப் ரஹோ' தான்.

முதல் பாதியில் இரண்டு மற்றும் க்ளைமாக்ஸில் ஒன்றுமாக வெளுத்துக்கட்டும் பைக் சேஸ்கள் மாஸ் ரகளை. சிகாகோ நகர வீதிகளில் அதி அற்புதமாக படமாக்கப்பட்டிருக்கும் சேஸ்கள் ஹாலிவுட் தரம். விசுவல் எபெக்ட்ஸ் அணியும் உழைப்பு அபாரம். மூன்று மணிநேர திரைப்படமாக இருந்தாலும் பொழுதுபோக்கிற்கு துளியும் பஞ்சமில்லாமல்  இயக்கி இருக்கிறார் விஜய் கிருஷ்ணா. ஷ்யாம் கவுசல் மற்றும் கான்ராடின் ஸ்டன்ட்கள் அட்டகாசம். கை கலப்பிற்கு வேலை இல்லாமல் கட்டிடங்கள், நீர்நிலை, பரபரப்பான வீதிகளில் பைக்குகளை சீற விட்டு சர்க்கஸ் காட்டி இருக்கிறார்கள்.

 சந்தேகமின்றி  மிகப்பெரிய ஹிட் ஆவதற்கான அம்சங்கள் அனைத்தையும் உள்ளடக்கி இருக்கிறது தூம் - 3. ஷாருக், சல்மான் இருவருக்கும் மீண்டும் ஒரு முறை மாஸ் ஹீரோவிற்கான சவாலை வலுவாக முன்வைத்து இருக்கிறார் ஆமிர் கான். 

தூம் 3 -  பொழுதுபோக்கின் உச்சம்.
..............................................................


சமீபத்தில் எழுதியது:

ஷ்ரத்தாவின் மூன்று குறு நாடகங்கள்

Thursday, December 19, 2013

ஷ்ரத்தாவின் மூன்று குறு நாடகங்கள்







இரண்டு மணிநேர நாடகங்கள் எல்லாம் சுருங்கி தற்போது பெரும்பாலும் ஒன்றரை மணி நேரங்களுக்குள் முடிந்து விடுகின்றன. ஒருநாள் போட்டிகளுக்கு நேரம் செலவழிக்க தயாராக இல்லாத மக்களுக்கு எப்படி T20 க்ரிக்கட் ஒரு மாற்றாக அமைந்ததோ அதே பாணியில் மூன்று அரை மணிநேர நாடகங்களை தொடர்ச்சியாக நடத்தும் யுக்தியும் அரிதாக அரங்கேறுவதுண்டு. புதிய கதைகளை நவீன தொழில்நுட்பங்களின் உதவியுடன் ரசிகர்களுக்கு விருந்தாக படைப்பதில் வித்தகர்கள் ஷ்ரத்தா குழுவினர். 2012 ஆகஸ்டில் மடி நெருப்பு, அந்தரங்கம், இரண்டாவது மரணம் எனும் மூன்று குறு நாடகங்களை தயாரித்து வழங்கியவர்கள் 2013 நவம்பரில் படைத்த குறுநாடகங்கள்தான் ஆழ்வார், சிலிக்கான் வாசல் மற்றும் எழுத்துக்காரர். அரங்கேறிய இடம்: நாரத கான சபா, ஆழ்வார்பேட்டை. 

இந்நாடகங்கள் பற்றி பார்ப்பதற்கு முன்பாக ஷ்ரத்தா குறித்த சில தகவல்கள் உங்கள் பார்வைக்கு. மூன்று ஆண்டுகளை நிறைவு செய்திருக்கும் ஷ்ரத்தா இதுவரை மொத்தம் 12 படைப்புகளை நமக்கு தந்திருக்கிறது. ஒவ்வொன்றும் முற்றிலும் மாறுபட்ட களங்கள். மழையின் உக்கிரத்தை கண் முன் கொண்டுவரும் தனுஷ்கோடி முதல் க்ரிக்கட் பின்னணி கொண்ட தூஸ்ரா வரை. காத்தாடி ராமமூர்த்தி, ப்ரேமா சதாசிவம், சிவாஜி சதுர்வேதி மற்றும் T D சுந்தரராஜன் ஆகியோரால் 2010 இல் துவங்கப்பட்டது ஷ்ரத்தா. மூன்று மாதங்களுக்கு ஒரு முறை புதுப்புது நாடகங்களை மேடைக்கு கொண்டு வருவது இதன் தனிச்சிறப்பு.

'நேற்று இன்று நாளை' கான்சப்டில் முறையே இவர்கள் அளித்த நாடகங்கள்: ஆழ்வார், சிலிக்கான் வாசல் மற்றும் எழுத்துக்காரர். மூன்று கதைகளையும் எழுதி இருப்பது இரா.முருகன்.

ஆழ்வார் - இயக்கம்: T D  சுந்தரராஜன்
எண்பதுகளில் இருந்த திருவல்லிக்கேணி சாலையொன்றை அப்படியே கண்முன் நிறுத்தும் முதல் காட்சியின்போதே  போதே ஆச்சர்யம் கலந்த கைத்தட்டல்கள் ஓங்கி ஒலிக்க, என்னை ஆட்கொண்ட பிரமிப்பு அடங்கவும் சில நிமிடங்களானது. இவ்வளவு தத்ரூபமாக செட் போடுவது எப்படி சாத்தியம் என பெருத்த ஐயத்துடன் மேடையின் கீழே உற்று நோக்குகையில்தான் அதற்கான விடை கிடைத்தது. மடிக்கணினி மற்றும் ப்ரொஜக்டர் துணையுடன் ஒளியை மேடையின் பின்புறம் நேர்த்தியாக பாய்ச்சி இருந்தனர். மேன்ஷனுக்கு  மட்டும் செட் போடப்பட்டு இருந்தது. 

சடகோபன் எனும் நண்பரைத்தேடி திருவல்லிக்கேணி மேன்ஷன் ஒன்றின்  அருகே உலவும் பெரியவர் ஒருவரை சந்திக்கிறான் வேறொரு நபரை தேடி அலையும் அடைக்கலராஜ். அவனது முயற்சி கைகூடாமல் போக பேருந்து நிறுத்தம் வரை பேசிக்கொண்டே செல்லலாம் என வலுக்கட்டாயமாக அழைத்துச்செல்கிறார் ஆழ்வார். வழிநெடுக பழங்கதைகளை பேசும் பெரியவரிடம் இருந்து அவன் தப்பிக்க முயன்றாலும் சென்று சேர்வதேன்னவோ அவரது வீட்டிற்குத்தான். ஏழ்மையான குடும்ப பின்னணியுடன் சிரமப்படும் ஆழ்வார் மகளுடன் அடைக்கலம் நடத்தும் உரையாடல் எவ்வித  திருப்பத்தை உண்டாக்குகிறது என்பதே மிச்சக்கதை.

ஆழ்வாராக  T D சுந்தரராஜன் கனப்பொருத்தம். கிராமத்து பேச்சு வழக்கில் அடைக்கலமாக நெல்சன் இளங்கோ மற்றும் வைதேகியாக ஷாலினி ஆகியோரின் நடிப்பும் சிறப்பு. அவ்வப்போது கற்பனை உலகில் சஞ்சரிக்கும் தந்தையை வைத்துக்கொண்டு அல்லல்படும் மகளுக்கு அவர் மூலமாகவே நற்காரியம் ஒன்று நடந்தேறுவதை மெச்சும் வண்ணம் ஆக்கமாக்கி இருப்பது அழகு.சுந்தரராஜனும், நெல்சனும் அளவளாவியவாறே திருவல்லிக்கேணி தெருக்களில் நடந்து செல்லும் பின்னணியில் டிஜிட்டல் காட்சிகளும் மாறும் இடம் கண்களுக்கு விருந்து. ரசிகர்களுக்கு புதிய அனுபவமும் கூட.

சிலிக்கான் வாசல் - இயக்கம்: கிருஷ்ணமூர்த்தி


வீட்டில் மனைவியின் புலம்பல், அலுவலகத்தில் மேனேஜர் தரும் குடைச்சல். நிம்மதி இன்றி தவிக்கும் நடுத்தர வர்க்கத்தின் சாப்ட்வேர் பிரதிநிதியாக சோலையப்பன். அதி முக்கியமான ப்ராஜக்ட் ஒன்றை குறுகிய காலத்திற்குள் முடிக்க வேண்டிய நிர்ப்பந்தம். இரவு முழுக்க வேலை பார்க்கும் இடத்திலேயே தங்க வேண்டிய கட்டாயம். 'வாசல் அந்தப்பக்கம்' என அடிக்கடி கரம் நீட்டியவாறு கடந்து செல்லும் உயரதிகாரி. பதட்டத்தில் சோலை எப்படி செயல்படுகிறான் என்பதுதான் கதை.

அடுக்கு மாடியில் நிறுவப்பட்டிருக்கும் சாப்ட்வேர் கம்பனியின் பிரதி அப்படியே கண்முன் வந்து பிரமிக்க வைக்கிறது. வெளிநாட்டு க்ளயன்ட் வருகைக்காக உள்ளூர் ஆட்களுக்கு சிகப்பு சாயம் அடிக்காமல் அசல் அயல்நாட்டு பெண்ணொருவரையே நடிக்க வைத்திருக்கிறார்கள். ஒரு சில நிமிட காட்சி என்றாலும் நம்பகத்தன்மைக்காக சிரத்தை எடுத்து அப்பெண்மணியை தருவித்து இருப்பது பாராட்ட வேண்டிய செயல். மன உளைச்சலால் வாடும் சோலையாக சிராஜ் கவனத்தை பெறுகிறார். எந்திர வாழ்க்கை சமகால இளைஞனை எப்படி புரட்டிப்போடுகிறது என்பதை பெரிதாக பிரச்சாரம் செய்யாமல் எளிமையான வசனங்களால் கையாண்டிருப்பது சிலிக்கான் வாசலின் பலம்.

எழுத்துக்காரர் - இயக்கம்: கிருஷ்ணமூர்த்தி 



எதிர்காலத்தை மனதில் கொண்டு பின்னப்பட்டிருக்கும் கதையிது. சாப்ட்வேர் நிறுவனம் ஒன்றில் பெரும் சம்பளம் பெறும் தம்பதியர் நந்தினியும், பரனனும். என்னதான் கணினி மூலம் கடிதப்பரிமாற்றங்கள் நடந்தாலும், பேனாவால் கடிதம் எழுதுவதில் உள்ள ஜீவனுக்கு இணையில்லை என ஒரு நாள் எண்ணும் நந்தினி பிழையின்றி தமிழில் கடிதம் எழுதும் வயதான நபர் ஒருவரை வேலைக்கு வைக்கிறார். 

நித்தம் அவளது வீட்டிற்கு வந்து கணினியில் டைப் அடிக்கப்பட்ட மெயில்களை அப்படியே பேனாவால் எழுத துவங்குகிறார் எழுத்துக்காரர். தன் வீட்டில் இருக்கும் பொருட்களை புழங்கக்கூடாது, தன் பிள்ளை மற்றும் அக்கம் பக்கத்தாரிடம் அதிகம் பேசக்கூடாது உள்ளிட்ட ஏராளமான கட்டளைகளை இடும் நந்தினியிடம் அப்பெரியவர் என்ன பாடுபடுகிறார் என்பதை விவரிக்கிறது இந்நாடகம்.

எழுத்துக்காரராக சந்திரசேகர். நந்தினியின் கட்டளைகளால் சிக்கித் தவிக்கும்போது காட்டும் முகபாவங்களே கைத்தட்டல்களை அவருக்கு பெற்றுத்தருகிறது. பொருத்தமான நந்தினி வேடத்தில் கவிதா. செக்யூரிட்டியாக சட்டென வந்து காணாமல் போகிறார் சிவாஜி சதுர்வேதி. 

முதலிரண்டு நாடகங்களில் இருக்கும் அழுத்தம் இதனுள் இல்லாதது குறையாக படுகிறது. எதிர்கால சந்ததியினர் கண்டதுக்கெல்லாம் கண்டிஷன் போடுவார்கள் என்பதைத்தாண்டி புதியதாக வேறேதேனும் சங்கதியை கருவாக கொண்டிருக்கலாமோ எனும் எண்ணம் மேலோங்க செய்கிறது.

ஆக மொத்தம் இக்குறு நாடகங்களில் பெரிதும் பேசப்பட்டது மேடையின் பின்னே கணினி உதவியுடன் உருவாக்கப்பட்ட காட்சி அமைப்புகள்தான். வித்யாசமான களங்கள், தற்கால தொழில்நுட்பத்தை லாவகமாக பயன்படுத்திக்கொள்ளும் பாங்கு என தனக்கான இடத்தை தமிழ் நாடக உலகில் பிடித்திருக்கும் ஷ்ரத்தா குழுவினருக்கு நன்றிகளும், வாழ்த்துகளும்.

...............................................................




Friday, December 13, 2013

இவன் வேற மாதிரி



எங்கேயும் எப்போதும் மற்றும் கும்கி தந்த வெற்றிக்களிப்புடன் முறையே இயக்குனர் சரவணனும், விக்ரம் பிரபுவும் கைகோர்த்திருக்கும் படம். சமீபத்தில் முற்றிலும் மாறுபட்ட களத்தில் தமது முதற்படைப்புகளை தந்து தனி அடையாளத்தை ஏற்படுத்திக்கொண்ட இளம் இயக்குனர்கள், அடுத்ததாக காதல் கலந்த ஆக்சன் படங்களைத்தான் தேர்வு செய்திருக்கிறார்கள். அதற்கு சரவணனும் விதிவிலக்கல்ல. இவ்வாரம் இ.வே.மா.விற்கு போட்டியாக வேறெந்த தமிழ்ப்படமும் இல்லாததால் எந்த தியேட்டர் பக்கம் திரும்பினாலும் ஒரே மாதிரி ப்ளெக்ஸ்கள் மூலம் வரவேற்கப்போவதும் இச்சித்திரமே.

தமிழகத்தின் சட்ட அமைச்சர் சதாசிவம் தனது கோட்டாவில் 30 நபர்களுக்கு சீட் தருமாறு சட்டக்கல்லூரி முதல்வரிடம் அழுத்திச்சொல்ல 'அவர்களில் பலர் கிரிமினல்கள். உங்கள் கோரிக்கையை நிறைவேற்ற முடியாது' எனும் பதில்தான் வருகிறது. விளைவு: கல்லூரி வளாகத்தில் மாணவர்களுக்கிடையே தீ மூட்டி வன்முறையை கட்டவிழ்க்கிறார் அமைச்சர். இந்த அராஜகத்தை தட்டிக்கேட்க துணியும் நாயகன் குணசேகரன் பரோலில் இருக்கும் அமைச்சரின் ரவுடி தம்பியான ஈஸ்வரனை கடத்தி கட்டுமானத்தில் இருக்கும் பலமாடி குடியிருப்பின் உச்சியில் அடிக்கிறான். ஒரு கட்டத்தில் விடுதலையாகும் ஈஸ்வரன் குணாவை கொன்று தீர்க்க அலைகிறான். ஜெயித்தது யார்?

கும்கியில் 'நடிப்பு மீட்டர் என்ன விலை?' எனக்கேட்டு அடர்தாடியுடன் எஸ்கேப் ஆன விக்ரம் பிரபு இம்முறையாவது தேறுவாரா என்று பார்த்தால் 'நான் அதே மாதிரி' என்று அடம்பிடிக்கிறார். கதைக்கு முக்கியமாக தேவைப்படும் ஆக்ரோஷம், காதல் போன்ற உணர்ச்சிகளை (நம்) கண்ணில் காட்டாமல் அன்னை இல்ல வாசலில் வீற்றிருக்கும் கணேசக்கடவுள் போல் தேமேவென்றிருந்தால் ஆகிற கதையா தோழர்? அம்மாஞ்சி அறிமுகமாக சுரபி. ஓரளவு காதலைக்காட்டும் கண்களுடன் முதல் பாதி நெடுக விக்ரமை வலம் வந்தாலும் கெமிஸ்ட்ரி திவால் ஆகிறது. 'ஏன்? ஏன் இந்த மூஞ்சில ரொமான்ஸே வர மாட்டேங்குது'....சிம்மாவிற்கு பதில் விக்ரம் பிரபுவை போட்டிருந்தால் ஏக எடுப்பாக இருந்திருக்கும். யூ மிஸ்ட் தி கோல்டன் சான்ஸ் நலன். பிரபஞ்ச காதலர்களின் நெஞ்சை உலுக்கவும் மறுபாதியில் மெனக்கெட்டிருக்கிறார் சரவணன். தெய்வீக காதலை இவ்வளவு உயரத்தில் ஏற்றி அழகு பார்த்திருக்கும் இயக்குனர் வாழிய வாழியவே.

நாயகனுக்கு இணையான கேரக்டர் வம்சிக்கு. முறுக்கேறிய உடற்கட்டுடன் சிலமுறை ரௌத்ரம் பொங்க கட்டிப்புரள்கிறார். அமைச்சராக ஹரிராஜ் மற்றும் சாக்லேட் பாய் போலீஸதிகாரியாக கணேஷ் வெங்கட்ராம். சொல்லிக்கொள்ள பெரிதாக ஒன்றுமில்லை. நாயக, நாயகி குடும்பத்தார் உள்ளிட்ட பிற கதாபாத்திரங்களும் மனதில் பதிய மறுக்கின்றன. 

'ஏன்? ஏன் இந்த மூஞ்சில ரொமான்ஸே வர மாட்டேங்குது'


குறைந்த பட்ச சுவாரஸ்யம் கூட இன்றி முடியும் முதல் பாதியின்போது 'வட' போன கடுப்பில் முணுமுணுத்தவாறே அகன்றனர் சில ரசிக மகா ஜனங்கள். அதன் பிறகாவது வேகம் எடுக்குமா என எதிர்பார்த்தால் அதுவும் நடந்தேறவில்லை. விக்ரமிடம் லிப்ட் கேட்டு வம்சி பயணிக்கும்போது மட்டும் சடாரென தொற்றும் விறுவிறுப்பு அதே ஸ்பீடில் அமுங்கிப்போகிறது. 

இரண்டு நாளாகியும் தொடர்பில் இல்லா தம்பி பற்றி அமைச்சர் கவலைப்படுவதாக காட்சி இல்லாதது(இத்தனைக்கும் அவன் பரோலில் வந்திருக்கும் கைதி வேறு), மொத்த போலீஸும் சல்லடை போட்டு தேடும்போது பட்டப்பகலில் அடியாள் சகிதம் வம்சி வாகனம் ஓட்டுவது, அவன் அடைக்கப்பட்டிருக்கும் அறை அருகேயே வங்கி எண்ணை விக்ரம் உச்சரிப்பது..ஏன்? எப்படி? எதற்கு?... ஆங்காங்கே தொக்கி நிற்கின்றன கேள்விகள். துவக்கம் முதல் இறுதிவரை அடுக்குமாடி கட்டிடத்தை சுற்றியே கதை சுழல்வது நமக்கு சோர்வைத்தருகிறது. படத்தின் முக்கியமான பலவீனம் இதுவென்றால், அடுத்தது சுரத்தையற்ற விக்ரமின் நடிப்பு. 

அவையெல்லாம் போகட்டும். எதற்கு 'இவன் வேற மாதிரி' எனும் டைட்டில்? நாள் முழுக்க யோசித்தாலும் எதுவும் பிடிபட வாய்ப்பில்லை. அதையும் மீறி மூளைக்கு வேலை தந்தால் லாபம் பார்க்கப்போவதென்னவோ அமேசான் காட்டின் அரிய மூலிகைகளால் தயாரான எர்வா மாட்ரின் தான்!!

இவன் வேற மாதிரி - என்ன கொடும (டைரக்டர்) சரவணன்!
........................................................................
   




Monday, December 9, 2013

ஆளும் வர்க்கத்திற்கு ஆப்படித்த AAP



                                                                     

முதல்வன் அர்ஜுன்களும், ஆயுத எழுத்து சூர்யாக்களும் செல்வாக்கு மிக்க அரசியல் கட்சிகளை வீழ்த்தி விஸ்வரூபமெடுப்பதெல்லாம் திரைக்கதைக்காகும் ஆனால் நிஜக்கதைக்காது என கதைத்தவர்கள் பலர்.  அதெல்லாம் டெல்லி சட்டசபை தேர்தல் எண்ணிக்கை தொடங்குவதற்கு முன்புவரைதான். கட்சி துவக்கி ஓராண்டுதான் ஆகியிருக்கிறது. அதற்குள் அதன் தலைவர் மும்முறை முதல்வராக இருந்தவரை அகற்றிப்போட அவரது சேனையோ இதர பெருந்தலைகளை வீழ்த்தி வெற்றி வாகை சூடி இருக்கிறது. ஆம். ஆம் ஆத்மியின் ஆட்டம் ஆரம்பம்!!

தலைநகரில் இளம்பெண்ணுக்கு நேர்ந்த கொடூரம், அராஜக விலைவாசி ஏற்றம், மூன்று முறை நகராண்டு ஷீலா  (மௌனம்)  சாதித்ததால் ஏற்பட்ட ஏமாற்றம்...பொங்கி விட்டது டெல்லி. 'நம் ராஜ(குமார) தந்திரங்கள் அனைத்தும் வீணாகி விட்டதே? இன்னும் பயிற்சி வேண்டுமோ?' என ராகுல் குமுறலாம். நண்பா...பயிற்சியை நீங்கள் துவக்கவே இல்லை என்பதே உண்மை. இதற்கு முன்பு நாட்டில் நடந்த மாநில தேர்தல்களில் ஊத்தி மூடிக்கொண்டபோது கூட சவடால் பேசிய காங்கிரஸ் நேத்தாக்கள் இம்முறை மன்மோகன் மந்திரத்தை பின்பற்றி ஆக வேண்டிய கட்டாயம்.

மாய்ந்து மாய்ந்து சோனியாவும், ராகுலும் செய்த சுரத்தில்லா சூறாவளி பிரச்சாரங்கள் அளப்பரியது.  நேரு, இந்திரா குடும்பக்கொழுந்துகள் எனும் ஒரே காரணத்திற்காக மட்டுமே ஓட்டளித்து ஓய்ந்து போன பாமர பாபுக்களும் சூதானமாகிவிட்டார்கள். என்னதான் நையப்புடைக்கப்பட்டாலும் 'தற்போது பா.ஜ.க.விற்கு கிடைத்திருக்கும் வெற்றி மோடி அலையால் அல்ல' என்று மீடியா தோறும் கொக்கரிக்கிறார்கள் இரண்டாம் 'மட்ட' காங். தலைவர்கள். இவர்கள்தான் பிரச்சார நேரத்தில் 'மோடி அலை வெறும் மாயை. நான்கு மாநில சட்டசபை தேர்தல்களில் இவை ஓட்டுக்களாக மாறாது' என ஆரூடம் சொன்னவர்கள். ஆவி பறக்க கொதிநீரை பின்னால் ஊற்றிக்கொண்ட பிறகும் காயத்திற்கு மருந்து தடவாமல் வீராப்பு பேசுவதும் தனிக்கலைதான்.
 
காங்கிரஸ், பா.ஜ.க வுக்கு ஆதரவு தரவோ கேட்கவோ போவதில்லை. எதிர்க்கட்சியாக அமரப்போகிறோம் என உறுதியாக சொல்லிவிட்டார் அர்விந்த். 'ஜனாதிபதி ஆட்சி எனும் நிலை வந்தால்..?' என்று முன்வைக்கப்பட்ட கேள்விக்கு இவர் தந்த பதில்: 'ஏன் காங் மற்றும் பா.ஜ.க. ஒன்றிணைந்து டில்லியில் ஆட்சி செய்யலாமே'. சபாஷ் கேஜ்ரி.
 
ஆம் ஆத்மியின் இந்த புலிப்பாய்ச்சல் தேசத்தை சுரண்டிக்கொண்டு இருக்கும் கட்சிகளின் வயிற்றில் தேவையான அளவு புளியை கரைத்திருக்கும். 'இதெல்லாம் தமிழ்நாட்ல நடக்காதா' முணுமுணுப்புகள் கேட்கத்துவங்கி விட்டன. மனமிருந்தால் மார்க்க பந்து. ஆனால் ஏற்காட்டில் போட்டியிடாமல் எகிறி ஓடிய கட்சிகளை வைத்துக்கொண்டு ஒற்றை ஆணியைக்கூட புடுங்க இயலாது. நமக்கு வாய்த்திருப்பதோ நிரந்தர ஹீரோ வில்லன் காம்பினேஷன் தான். அந்தப்பக்கம் எம்.ஜி.ஆர். (அ.தி.மு.க), இந்தப்பக்கம் நம்பியார்(தி.மு.க.). இந்நாள் வரை என்னதான் பெர்பாமன்ஸ் செய்தாலும் மற்ற கட்சித்தலைவர்களுக்கு ஒதுக்கப்பட்டிருக்கும்/அவர்களே தேர்ந்தெடுத்திருக்கும் கேரக்டர்கள்...... எஸ்.வி.சுப்பையா, பக்கோடா காதர், மனோகர் அல்லது கள்ளபார்ட் நடராஜன்களைத்தான்!!
                                                                         
     
'ஓட்டு போட்டா ரெட்ட எலைக்குத்தான்' என்று பல்லாண்டுகளாக அடம் பிடிக்கும் ஆயாக்கள், 'என்னது எம்.ஜி.ஆர்.செத்துட்டாரா?' ஜெர்க்கடிக்கும் தாத்தன்மார்கள், 'நான் ஒருத்தன் அந்த மூணாவது கட்சிக்கு ஓட்டு போட்டா மட்டும் ஜெயிச்சிருவாங்களா?' என வினவி தேர்தல் தினத்தில் குண்டியை தேய்த்துக்கொண்டு டி.வி.பார்க்கும் மேதாவிகள் இருக்கையில் இரு பெரும் கழகத்தின் தலைவர்கள்தான் சுழற்சி முறையில் அமர்வார்கள் போல இருக்கையில்.

'காங்கிரஸுடன் கூட்டணி சேரலாமா?'...யோசித்தவாறே இலங்கைத்தமிழர் பிரச்னையில் பொத்தி வாசித்து, கூரையேறி கோழி பிடிக்க வக்கில்லாமல் டெல்லி ஏறி வைகுண்டம் போக எத்தனித்த கேப்டன், 'பெரியப்பா, மாமா, கொழுந்தியா' உறவு முறை கொண்டாடி முஷ்டியை ஓங்கினாலும் ஆளுங்கட்சிக்கு எதிராக பம்மோ பம்மென்று பம்மும் சீமான், அறிவார்ந்த அரசியலை விட உணர்வுபூர்வ அரசியலுக்கே வாக்கப்பட்டு விட்ட வைகோ...இன்னும் எத்தனை வருடங்களுக்குத்தான் 'தொழிலாளர் ஒற்றுமை ஓங்குக' கோஷம் போட்டுக்கொண்டே இருக்கப்போவதாக உத்தேசம்?

தேர்தல் புறக்கணிப்புகளை விட பங்கேற்பதன் மூலமே மாற்றத்திற்கான விதையை தூவ முடியுமென்பதை அறிந்தும் இன்னும் கூட்டணி லாப நஷ்டம் பார்க்கும் 'கணக்குப்பிள்ளைகளாகவே வலம் வந்தால் இருக்கும் முகவரியும் தொலைந்து போகலாம். இருபெரும் தேசிய அல்லது திராவிய கட்சிகளின் முதுகில் தொற்றிக்கொண்டே 'இது தேர்தலுக்கான கூட்டணி மட்டுமே. கொள்கை ரீதியாக அவர்களிடம் நாங்கள் ஒத்துப்போக வாய்ப்பில்லை' போன்ற மாயாஜால மந்திரங்கள் நீண்ட காலம் கை கொடுக்காது சாமி. 2016, 2021 என்று உங்கள் இலக்குகளை சந்தர்ப்பத்திற்கு ஏற்றவாறு இலகுவாக தள்ளிப்போட்டுக்கொண்டே போனால் ஆம் ஆத்மி வகையறா கட்சிகள் உங்கள் ஓட்டு வங்கிகளை அள்ளிப்போடும் காலம் வந்தாலும் ஆச்சர்யமில்லை.
 
ஆம் ஆத்மி கட்சியின் வெற்றிக்களிப்பும், வேகமும் ஒரு சில மாதங்களுக்கு நீடிக்கலாம். எப்படி இங்கே முதலிரண்டு கழகங்களும் மூன்றாவதாக முளைக்க நினைக்கும் தலைவர்களின் வாலில் சமயம் பார்த்து பட்டாசு கொளுத்திப்போடுகிறார்களோ அதுபோல தலைநகரில் கேஜ்ரிவால் தொப்பிக்குள் தீவைக்க காங்கிரஸும், பா.ஜ.க.வும் சிறப்பு பயிற்சிகளை மேற்கொண்டே ஆகும். அதையும் மீறி வெளக்கமாறை எப்படி AAP கையாளப்போகிறது என்பதை பொறுத்திருந்து பார்க்கலாம்.
                                                                         


முன்னணி தனியார் டி.வி.க்கு கேஜ்ரிவால் நேற்று அளித்த பேட்டி ஒன்றில் கேட்கப்பட்ட கேள்வி: "காங், பா.ஜ.க. போன்ற பெருங்கட்சிகளிடம் பண, அதிகார பலம் இருக்கிறதே. எதிர்காலத்தில் உங்களால் தாக்குப்பிடிக்க இயலுமா? ஆப் கே பாஸ் க்யா ஹை?"

பதில் வந்து விழுந்தது இப்படி: "மேரே பாஸ் சச்சாயி ஹை". அந்நொடிப்பொழுது மட்டும் 'தீவார்' சசி கபூராக கண்களுக்கு தெரிந்தார் கேஜ்ரிவால்!! 

..............................................................



Sunday, December 8, 2013

வெற்றிக்கோடு - மோகன்குமார்




                                                                        

'வெற்றி நிச்சயம்', 'விரல் நுனியில் சக்சஸ்', 'ஜெயிக்கலாம் வாங்க' 'இலகுவாக இலக்கை அடைய' என்று அட்டைப்படத்தில் தம்ஸ் அப்புடன் ஒரு மாடல் அல்லது விபரீத முயற்சியாக அதன் ஆசிரியரே போஸ் தருவார்கள். இல்லாவிடில் மலை உச்சியில் இருந்து ஒரு மேற்கத்திய கை ஊசலாடிக்கொண்டிருக்கும் இன்னொரு நபரின் சிவந்த கையை இறுகப்பற்றி இருக்கும். 'என்னை நம்பி முன்னேற நினைத்தாயே. உனக்கு இதுதான் கதி' என்று அக்கரம் பிரியாவிடை அளிப்பது போலவும் ஒரு உதறல் நமக்குள் இருக்கும். கிட்டத்தட்ட 99% சுயமுன்னேற்ற/தன்னம்பிக்கை புத்தகங்கள் சளைக்காமல் பின்பற்றும் யுக்தி அது. கல்லூரி முடிக்கும்போதே 'ஏழு கழுதை வயதாகிவிட்டது. சுற்றிலும் நடக்கும் செய்திகள்/நிகழ்வுகளை கிரகித்து முடிவெடுக்க கூட முடியாமல் திடீர் சாம்பார் போல ஒரு புத்தகம் சு.மு./த  படித்தால் போதும். அது ஏதேனும் ஒரு விதத்தில் நம்  வாழ்வை மாற்றியமைக்கும் என்பது எப்பேர்பட்ட அபத்தம்' என நினைத்ததுண்டு. அதிகபட்சம் குறளும், பட்டுக்கோட்டையார், கண்ணதாசன், எம்.ஜி,ஆர், டி.எம்.எஸ். பாடல்களும் போதாதா? 'போதாது. உன்னை சிகரத்தில் ஏற்றி விட்டுத்தான் மறுவேலை' என நமக்காக உருகி ஏணிப்படிகளுடன் காத்திருக்கும் சான்றோர்களின் புறங்கையில் ஆனந்த கண்ணீர் துளிகளை சிந்திவிட்டு விஷயத்திற்கு வருவோம்.

வெற்றிக்கோடு எனும் நூலை எழுதி இருப்பது வீடு திரும்பல் எனும் வலைப்பூ மூலம் அறியப்பட்ட மோகன் குமார் அவர்கள்.  தனியார் நிறுவனமொன்றில் உயர்பொறுப்பில் இருக்கும் இவரது புத்தகம் இவ்வாண்டு சென்னையில் நடந்த பதிவர் சந்திப்பின்போது வெளியானது. அச்சமயமே இதன் இணைய பிரதியை எனக்கு அவர் அனுப்பி இருந்தபோதும் படிப்பதற்கான வாய்ப்பு நேற்றுதான் அமைந்தது. சுயமுன்னேற்ற/தன்னம்பிக்கை நூல்கள் என்றால் அதில் குறைந்தபட்சம் நாம் எதிர்பார்ப்பது: ஒன்று நூலின் ஆசிரியர் தனது துறையில் எப்படி வெற்றிக்கொடி நாட்டினார் என்பதை அர்த்தத்துடனும், நேர்மையுடன் வெளிப்படுத்தி இருக்க வேண்டும் அல்லது சமூகத்திற்கு (குறிப்பாக இளைஞர்களுக்கு)  தற்காலத்திற்கேற்ப புதிய அணுகுமுறையுடன்  சொல்ல வரும் கருத்து/அறிவுரைகளை நேர்த்தியாக சமர்ப்பித்தல் வேண்டும். ஆனால் வெற்றிக்கோட்டின் பாதை வேறு வழியில் பயணிக்கிறது.

தயக்கம், முயற்சி, கோபம், பயம், அலட்சியம் என பல்வேறு உணர்ச்சிகள் மற்றும் பண்புகளை எப்படி சீர்படுத்த வேண்டும் என வரிசை வாரியாக எடுத்துரைத்திருக்கிறார் ஆசிரியர். ஆங்காங்கே ஆங்கிலப்பழமொழிகள் வியாபித்து இருக்கின்றன. I expected atleast a tamil translation for those in the brackets like the legendary actor Major Sundharrajan. அதாவது....குறைந்தபட்சம் மேஜர் சுந்தர்ராஜன் போல அவற்றின் தமிழாக்கமாவது இடம் பெற்றிருக்கும் என எண்ணினால் ஏமாற்றம்தான்.    ஒரு இடத்தில் 'Aim for the moon. You will get stars' என்று குறிப்பிடப்பட்டு இருந்தது. கொஞ்சம் நஞ்சம் தெரிந்து வைத்திருக்கும் ஆங்கிலமும் மறந்து விட்டதோ எனும் பதட்டத்துடன் இணையத்தில் தோண்டிப்பார்த்தால் 'Aim for the moon. Even if you miss you'll land among the stars' என்றிருந்தது. Take care in the next edison edition, author.
                                                                      


'அந்நியன் படம் பார்த்திருப்பீர்கள் தானே' பாணியில் சில பக்கங்களில் தானே புயலின் தாக்கமும் உண்டு. 'ஜப்பானியர்கள் ஒவ்வொரு வருடமும் தேநீர் குடிக்கும் திருவிழா என்று ஒன்றை கொண்டாடுவார்கள். இதில் தேநீர் குடிப்பதுதான் விசேஷமே' போன்ற ப்ராண்ட் மோகன்குமார் வார்த்தைகள் சிம்ப்ளி டிலைட்புல். 'மது, புகைப்பழக்கம் போன்றவை கொடிய நோய். மிகவும் கொடிய நோய்' எனும் அறிவுரைகளை ஆசிரியர் குரலிலேயே இந்நூல் மூலம் கேட்பது  அலாதி சுகம். போதுமென மறுத்தாலும் இன்னும் ஒரு வாய் சாப்பிடு என ஊட்டும் தாயுமானவர் போல மேற்சொன்னதைத்தாண்டி 'எல்லோருக்கும் தர என்ன உண்டு என்னிடம். புன்னகை தவிர' உள்ளிட்ட சிற்சில கவிதைகளையும் சமைத்திருப்பது கிரீடத்தில் இன்னுமோர் வைரக்கல்.

இந்நூலில் எனக்கு பிடித்தது வைரமுத்து எழுதிய வாக்கியங்கள்: 'உன்னை விட மிகப்பெரிய மனிதரை சந்திக்க வேண்டுமெனில் அதிகாலையிலே அவர் இல்லம் சென்று விடு. சற்று தாமதமாக சென்றால் அவர் தன்னை விட பெரிய மனிதரைக்காண சென்றிருப்பார்'. பகிர்வுக்கு நன்றி மோகன் குமார்.


'Too many cooks spoil the broth' என்பது போல சொந்த அனுபவம், ஆங்கில சொற்றொடர்கள், தியானம், உடற்பயிற்சி செல்லும் முறைகள், ஐம்புலனடக்கம் என உள்ளடக்கங்கள் வெவ்வேறு கிளைகளாக படர்ந்து இருப்பதும், இதற்கு முன்பு வந்த ஆயிரக்... லட்சக்கணக்கான சுய முன்னேற்ற/தன்னம்பிக்கை புத்தகங்களில் இருந்து துளியும் வேறுபடாமல் போவதும் வெற்றிக்கோட்டின் பிரதான பலவீனம். 

இவ்வகை சார்ந்த புத்தங்கள் குறித்து அமெரிக்காவின் புகழ்பெற்ற பேராசிரியர்களில் ஒருவரான திமோதி வில்சன் சொன்ன செய்தி ஒன்று: "உலகெங்கும் சு.மு/தன்னம்பிக்கை நூல்களை எழுதுவோர் தரும் போதனைகள்/தீர்வுகளை படிக்கையில் நன்றாகத்தான் இருக்கும். ஆனால் அவை நம் குறைகளை போக்கும் வலிமை அவற்றுக்கு இல்லை என்பதுதான் நிதர்சனம்". மேஜர் பாணியில் இன்னும் அவர் சொல்வது: Reading a self-help book is like  buying a lottery ticket. For a small investment, we get hope in return - the dream that all our problems will soon be solved, without any real expectation that they will be.



தமது பதிவுகளில் எழுதுவது போலவே சகலகலா வல்லவத்தனம், அநியாயத்திற்கு எளிய நடை போன்றவற்றை தவிர்த்து தற்போதிருக்கும் நிலைக்கு எப்படி உயர்ந்தார் என்றோ அல்லது ஒரு குறிப்பிட்ட வயது/தொழில் சார்ந்த நபர்களுக்கோ புதிய பாணியில் கூர்தீட்டி எழுதி இருந்தால் வெற்றிக்கோட்டை தொட்டிருக்கலாம். 

இறையருளால் ஒருவேளை இன்னொரு நூலெழுதும் வாய்ப்பு கிடைத்தால்/அமைத்துக்கொண்டால் இக்குறைகள் களையப்படுமென நம்புகிறேன்.

'உன் வாழ்க்கை உன் கையில்', 'கடன் வாங்கறதும் தப்பு, கடன் குடுக்கறதும் தப்பு' போன்ற அரிய தத்துவங்களை சேகரித்து புத்தகம் போடாமல்  'என்றேனும் ஒரு நாள் நக்மா வருவார்' என்கிற நப்பாசையுடன் சத்யா ஸ்டுடியோ ஆட்டோ ஸ்டாண்டில் தன்னம்பிக்கை பொங்க காத்திருக்கும் பாட்ஷா பாய் எப்போது சுய முன்னேற்றம் அடைவார் எனும் பெருத்த சோகம் என்னுள் தொக்கி நிற்கிறது இத்தருணத்தில். 

I am Malala எனும் ஆங்கில புத்தகப்பார்வையுடன் மீண்டும் 'என் வாசகர்களை' சந்திக்கிறேன் நன்றி.
................................................................


சமீபத்தில் எழுதியது:


................................................................
 




Saturday, December 7, 2013

Punyalan Agarbattis


                        
                                                                               

நாயகன், துணை நாயகன், சிறப்புத்தோற்றம் என பாரபட்சம் பார்க்காமல் நடித்து தனக்கென ஒரு இடத்தை தக்க வைத்துக்கொண்டு வரும் இளம் நடிகர் ஜெயசூர்யா புன்யாலன்(வெள்ளை மனசுக்காரன்) அகர்பத்திஸ் எனும் படத்தை தயாரித்து நாயகனாவும் நடித்திருக்கிறார். தனது முதல் படமான Passenger மூலம் பேசப்பட்ட ரஞ்சித் சங்கர்தான் இதன் இயக்குனர். சனிக்கிழமை முதல் மம்முட்டியின் 'சைலன்ஸ்' படத்திற்கு மவுசு இருக்கும் என்பதால் நேற்றொரு நாள் மட்டும் இவ்வூதுபத்தியை மாலை நேரத்தில் மணக்க விட்டிருந்தது எஸ்கேப்.

தனது புதுப்புது கண்டுபிடிப்புகள் மூலம் வியாபார உலகில் எப்படியும் உயர்ந்த இடத்தை எட்டிவிடலாம் என்று விடாமுயற்சி செய்கிறான் ஜாய் தொக்கல்காரன். ஆனால் அதற்கான நேரம் கை கூட மறுக்கிறது. தனியார் நிறுவனத்தில் வேலை பார்க்கும் மனைவியின் வருமானத்தில் காலத்தை கடத்துகிறான். ஜாயின் ஐன்ஸ்டீன் மூலையில் உதிக்கும் அடுத்த விஷயம் யானைச்சாணம் மூலம் ஊதுபத்தி செய்வது. குறைந்த முதலீட்டில்(!) அயல்நாடுகளுக்கு ஏற்றுமதி செய்தி நிறைய லாபம் பார்க்கலாம் என தேவஸ்தான போர்ட் மற்றும் யானைச்சங்க உயரதிகாரிகளிடம் பேசி சம்மதம் வாங்குகிறான். வியாபாரம் செழிக்க ஆரம்பிக்கும் சில நாட்களுக்குள் கேரளத்தில் நடக்கும் ஹர்த்தால்(முழு அடைப்பு) ஜாயின் வாழ்வை திருப்பிப்போடுகிறது. அரசியல் கட்சிக்கு எதிராக நஷ்ட ஈடு கோரி வழக்கு போடுகிறான். அவ்வழக்கையொட்டி நடக்கும் சம்பவங்கள்தான் கதையின் பெரும்பகுதி.

குறுந்தொழிலதிபராக ஜெயசூர்யா செம பிட். எப்படியும் பிசினஸில் வென்று விடத்துடிக்கும் ஜாயாக யதார்த்த நடிப்பில் பெயர் வாங்குகிறார். ஜெயசூர்யாவின் மனைவியாக நைலா நாயகி அல்ல பொருத்தமான 'துணை' நடிகை. 'மாதச்சம்பளம் வாங்கும் சராசரி கணவன் அல்ல நான். வியாபாரத்தில் நான் வென்றால் அம்பானி மனைவி போல வாழலாம். தோற்றால் பைத்தியக்காரன் மனைவி....' என இவரை பெண் பார்க்க செல்லும் சூர்யா கூறும்போதும், அலுவலக அலுப்பில் சோர்ந்திருக்கும் நைலாவை பார்த்து கர்ப்பமாக இருக்கிறார் என்றெண்ணும் கணவனை நைலா கடிந்து கொள்ளுமிடத்திலும் இயல்பான அன்யோன்யம்.

சூர்யாவின் நண்பராக அஜு வர்கீஸுக்கு காட்சிகள் நிறைய இருந்தாலும் கம்பனியின் 'குட்டி யானை' ஓட்டுனராக வரும் ஸ்ரீஜித் அப்பாவியான முகபாவத்துடன் அப்ளாஸ்களை அள்ளி விடுகிறார். அடுத்ததாக காமடியில் பெயர் வாங்குவது நீதிபதியாக வரும் சுனில் சுகடா. சூர்யா சார்ந்த வழக்குகளை இவர் விசாரிக்கும்போதெல்லாம் சிரிப்பிற்கு உத்தரவாதம். யானையொன்று சாணம் போடும் தருணத்திற்காக ஜாய் & கோ காத்திருத்தல் உச்சகட்ட தமாஷ். 'கண்ணழகி' ரச்சனா,  கௌரவ தோற்றத்தில் இன்னசன்ட், காந்தியவாதியாக டி.ஜி. ரவி என நட்சத்திர பட்டாளத்திற்கு குறைவில்லை. அனைவரையும் சரிவர பயன்படுத்தி இருக்கிறார் இயக்குனர். 
                                                                                

கேரளத்தின் கலாச்சார தலைநகரான திருச்சூரின் புகழ் பாடும் டைட்டில் பாடலில் மண்ணின் பெருமையை கண்ணிற்கு விருந்தாக படைத்திருக்கிறது சுஜித்தின் கேமரா. ஜெயசூர்யா பாடிய 'ஆசிச்சவன்' ஏற்கனவே சேரநாட்டில் மெகா ஹிட்.  பிஜிபால் இசையமைப்பில் சிற்சில பாடல்களே எனினும் அனைத்தும் அமிர்தம். 

எடுத்ததற்கெல்லாம் ஹர்த்தால் என்று மக்களின் அன்றாட வாழ்வை முடக்கிப்போடும் அரசியல் கட்சிகளுக்கு கடுமையான எதிர்ப்பினை இப்படைப்பின் மூலம் வெளிப்படுத்தி இருக்கிறார் ரஞ்சித். எந்த அளவிற்கு நகைச்சுவைக்கு முக்கியத்துவம் தரப்பட்டுள்ளதோ அதற்கிணையாக ஹர்த்தால் பிரச்னையையும் வலுவாக முன்வைத்திருப்பதற்கு பாராட்டலாம். கதையை முடிக்க மட்டும் சினிமாத்தன முடிவை கையாண்டிருப்பது சிறு சறுக்கல். மற்றபடி இந்த புன்யாலன் அகர்பத்தி மணம் கமழும் மத்தாப்பு.  

                                                                   
...................................................


சமீபத்தில் எழுதியது:

தகராறு - விமர்சனம்
 



Saturday, November 30, 2013

விடியும் முன்




                                                                         

விடியும் முன்? கண்டிப்பா பேய்ப்படமாத்தான் இருக்கும் எனும் அனுமானம் ஒருபுறம். பூஜாவைத்தவிர பெரிய ஆர்டிஸ்ட் யாரும் இல்லாததால் நவீன சரஸ்வதி சபதம், ஜன்னல் ஓரம் ஏசிக்காற்று வாங்க பலர் சென்றது மறுபுறம். வழக்கம் போல லோ பட்ஜெட் படங்களின் ஊக்க சக்தியான உண்மைத்தமிழன் அண்ணாச்சி 'கண்ட மசாலாவை எல்லாம் பாக்கறீங்க. இத பாருங்கலேய்' என்று கெனாவில் வந்து ஆக்ஸா 'ப்ளேடை' சுழற்ற விடிந்தவுடன் விடியும் முன் பார்க்க கிளம்பியாயிற்று. சரியாக வெட்டப்பட்ட ட்ரெயிலரும் வி.மு. பார்க்கும் எண்ணம் வந்ததற்கான மறு காரணம்.

விலைமாது ஒருத்திக்கு பழக்கமான ப்ரோ 'செல்வாக்கு மிக்க வாடிக்கையாளர் ஒருவருக்கு சிறுமி வேண்டும். பார்த்து செய்' என பணத்தாசை காட்ட ஆவன செய்கிறாள் அவள். ஆனால் அச்சிறுமியை வேறொரு காரணத்திற்காக பயன்படுத்த நினைக்கிறான் அந்த பெரிய மனிதன். மானும், மான் குட்டியும் அங்கிருந்து தப்ப ஓநாய்கள் துரத்துகின்றன. மறுநாள் விடியும் முன் நடக்கும் சம்பவங்களை கோர்த்து சஸ்பென்ஸ் த்ரில்லராக தந்திருக்கிறார்கள்.

வி.மு.வின் மைய பாத்திரம் (சற்றே பழமையான) பூஜா. வழமையாக நாயகிகள் தேர்ந்தெடுக்கும் இக்கிலி பிக்கிலி கேரக்டர்களை உதறிவிட்டு ரேகா எனும் விலைமாதாக நடித்திருப்பது நல்ல மாற்றம். 'வயசாயிடுச்சில்ல' என வெளிப்படையாக ஒப்புக்கொள்ளும் வசனம் பேசி இருப்பது ஒப்பனை கலை ப்பு. சிறுமி நந்தினியாக மாளவிகா. மென்மையும், பிடிவாதமும் கலந்த கேரக்டரில் சிறப்பாய் நடித்திருக்கிறாள். இருவருக்குமிடையேயான உரையாடல்களில் செயற்கைத்தனம் இல்லாதது அவர்களுடன் ஒன்ற வைத்து விடுகிறது.

வித்யாசமான சிறு பட்ஜெட் படங்களில் அவ்வப்போது தென்படும் ஜான் விஜய் இங்கும். தான் தேர்ந்தெடுக்கும் படங்கள் ஒவ்வொன்றும் தனித்தன்மையுடன் இருக்க வேண்டும், தனது கேரக்டரும் மாறுபட்டிருத்தல் அவசியம் என்பதில் ஜான் கவனம் செலுத்துகிறார் என்பது உண்மைதான். ஆனால் முந்தைய வேடங்களின் சாயல் அப்பிக்கொள்வதை தவிர்க்க இயலவில்லை. எனினும் இம்முறையும் அசால்ட் வில்லத்தனம் மூலம் பெயர் வாங்கி விடுகிறார். ஸ்ரீரங்கத்து மத்யம தேவதையாக லட்சுமி ராமகிருஷ்ணன் சற்றே வந்தாலும் ஆள்/ல் இஸ் வெல். தாடி வைத்த கோவக்கார சின்னையாவாக வினோத் கிஷன்('நந்தா'வில் குட்டி சூர்யா இவர்தேன்). பஸ் டிக்கட் பின்புறம் எழுதும் அளவிற்குதான் தம்பிக்கு வசனமே. 'வில்லனுங்க எல்லாமே இவ்வளவு வெறப்பாத்தான் இருக்கனுமா?' என வினவியது தத்துவ பதிவர். ஒப்புதல் புன்முறுவல் பூத்தது பயமில்லா சிங்கம். அதுவும் ரைட்டுதான். 
                                                                     

ஒரு நாளில் நடக்கும் சம்பவங்கள் என்றாலும் திரை ஓரத்தில் அவ்வப்போது நேரத்தை காட்டாமல் விட்டது இயக்குனரின் சாமர்த்தியமாகக்கூட இருக்கலாம். கருநாகத்தை சுற்றி அடியாட்கள் விளையாடும் காட்சி சில நொடிகளே வந்தாலும் நல்ல விஷுவல். அதை க்ராபிக்ஸ் படுத்திய அணிக்கு தம்ஸ் அப். இளம் வரவு கிரீஷ்ஷின் இசை சிறப்பு. சஸ்பென்ஸ் சினிமா என்பதற்காக அடிக்கடி தடதடக்காமல் அளவோடு வார்த்திருக்கிறார். நல்லா வருவீக தம்பி. குறுகிய பட்ஜெட் படங்கள் என்னதான் நன்றாக இருந்தாலும் பொதுவாக சொதப்புவது ஒளிப்பதிவு. ஆனால் அக்குறை ஏற்படா வண்ணம் நிறைவாக வேலை பார்த்திருக்கிறார் சிவகுமார். 

திணிக்கப்படும் திடுக் திருப்பங்கள், தேவையின்றி பயமுறுத்தும் வசனங்கள் ஆகியவற்றை களைந்து மித வேகத்தில் களமாடியிருக்கிறார் இயக்குனர் பாலாஜி. ஸ்ரீரங்கத்தில் ஜான் விஜய் முகவரி விசாரிக்கும் பொழுது சைக்கிள் ஓட்டிக்கொண்டே ஒரு மாமி செல்வது பின்னணியில் அதிகபட்சம் இரண்டு நொடிகளே வரும். இந்த பெர்பக்சனுக்காக மெனக்கெட்டு அக்மார்க் ஸ்ரீரங்கத்து மாமியை தேடி சைக்கிளோட்ட வைத்திருக்கும் இயக்குனருக்கு ஸ்பெஷல் சபாஷ்.
  
முதல் மூன்று குவார்ட்டர்கள் வரை  'நல்லாத்தான போயிட்டு இருக்கு?' என என்னும்போது கடைசி ரவுண்டில் சினிமாத்தனம் எட்டிப்பார்க்கிறது. சிறுமி மீது இரக்கப்படும் சின்னவரே அவள் முன் ரத்தக்காவு வாங்குவது முரண். ஓரளவு யூகிக்க முடிந்த க்ளைமாக்ஸ். மற்றபடி மெச்சத்தக்க டீம் வொர்க். வாழ்த்துகள் பாலாஜி & கோ.
 .................................................................  
  




Thursday, November 28, 2013

மாதவ பூவராக மூர்த்தியின் - நாற்காலிக்கு இடமில்லை




சில நாட்களுக்கு முன்பு தி.நகர் ராமகிருஷ்ணா பள்ளி இன்போசிஸ் ஹாலில் குருகுலத்தின் 'நாற்காலிக்கு இடமில்லை' அரங்கேறியது. புகழ்பெற்ற கார்த்திக் பைன் ஆர்ட்ஸின் 2011 கோடை நாடக விழாவில் சிறந்த நாடகத்திற்கான விருதை வென்றதோடு மாதவ பூவராக மூர்த்திக்கு சிறந்த நடிகர், வசனகர்த்தா மற்றும் மாலதி சம்பத்திற்கு சிறந்த நடிகை ஆகிய கிரீடங்களை வென்று தந்தது இந்நாடகம் என்பது குறிப்பிடத்தக்கது.  

துரித கதியில் வாழ்வை நகர்த்திக்கொண்டிருக்கும் குடும்பம். பணி ஓய்வு பெற்றதால் ஹாலின் நடுவே அமர்ந்தவாறு அமைதி காக்கும் பெரியவர். அவரிடம் பேசக்கூட நேரமின்றி கடந்து செல்லும் நபர்கள். 'வெளியே செல்கிறோம். வீட்டை பார்த்துக்கொள்ளுங்கள்' என மனைவி உட்பட அனைவரும் கிளம்பி விட தனிமையின் துயரை நாடகம் பார்க்கும் மக்களிடம் பகிர்ந்து கொள்ள ஆரம்பிக்கிறார் கதை நாயகன் ஸ்ரீனிவாசன்/சீனு(மாதவ பூவராக மூர்த்தி). இளம்பிராயத்தில் தன் பெற்றோரிடம் வளர்ந்த முறை, கற்றுக்கொண்ட சங்கீதம், அவர்கள் நினைவாக வைத்திருக்கும் பொருட்கள் என நினைவலையில் மூழ்குகிறார். தந்தையின் காலம் முதல் குடும்பத்தின் அங்கமென தான் கருதி இருக்கும் நாற்காலியை தன் மகன் அகற்ற சொன்னதை எண்ணி கண் கலங்குகிறார். இறுதியில் என்ன கதிக்கு ஆளானது அந்நாற்காலி? உங்களுக்கான அமர்வு வாய்த்தால் கண்டு நெகிழ்க.

இவ்வாண்டு நான் பார்த்த நாடகங்களில் பிரமாதமான நடிப்பை வெளிப்படுத்தி இருந்தது மா.பூ.மூர்த்திதான். 70 வயதை தாண்டிய நடிகர் ஒருவர் பல பக்க வசனங்களை தடையின்றி உச்சரித்து நம்மை அக்கதாபாத்திரத்துடன் ஒன்ற வைத்திருப்பது அபாரம். ஒரு மணி நேரத்திற்கும் மேலாக ரசிகர்களை பார்த்த வண்ணம் யதார்த்தமாக மூர்த்தி கூறும் மலரும் நினைவுகள் சில வாரங்களுக்கேனும் மனதை விட்டு அகலாது. இக்கால இளைஞர்களின் உழைப்பு மற்றும் நவீன சாதனங்களின் அத்யாவசியத்தை தந்தைக்கு உணர்த்தும் பரத் ஆக வெங்கட். வெங்கட்டின் கெரியரில் மிக முக்கியமான கேரக்டர் இது. இரு தலைமுறைக்கான இடைவெளியை ஆரோக்யமான வாதங்கள் மூலம் பேலன்ஸ் செய்கிறது இந்த இறுதிக்காட்சி.




சீனுவின் மனைவியாக மாலதி சம்பத் சில நிமிடங்களே வந்தாலும் தமது முத்திரையை படித்து செல்கிறார். 'மணமான புதிதில் அசதியான நேரமொன்றில் அந்நாற்காலியில் அமர்ந்து விட்டேன். என் அப்பா உட்கார்ந்த நாற்காலியில் ஏன் அமர்ந்தாய் என நீங்கள் வலுவாக கடிந்து கொண்டீர்கள். அந்நாள் முதல் இன்றுவரை அதில் அமர்ந்ததில்லை. எனவே அதன் மீது எனக்கு எந்தப்பற்றும் இல்லை' என்று மாலதி பேசும் வார்த்தைகள் சாந்த சொரூபிகளாக மன அழுத்தங்களுடன் காலத்தை நகர்த்தும் பெண்களின் வலி.

 'புத்தகத்தில் இருக்கும் மயிலிறகு குட்டி போடாது. ஏமாறாதே' என மகனுக்கு சீனு அறிவியல் பூர்வமாக பாடமெடுக்க அவர் சென்றபின் 'அப்பா அப்படித்தான் சொல்வார். எல்லாரும் பாக்கறாப்ல புக்கை திறந்து மயிலிறகை பாக்காதே. புத்தகத்த கண்ணுக்கு கிட்ட வச்சிட்டு கைகளை கூப்பி வச்சி மெல்ல திறந்து பாருடா. கண்டிப்பா குட்டி போடும்' என்று மாலதி சொல்லுமிடம் அன்பின் ஆராதனை. என்னை மிகவும் ரசிக்க வைத்த காட்சியிது.

பரத் நண்பன் மகேஷாக கார்த்திக், சீனுவின் இளம்பிராய பக்கத்து வீட்டு பெரியவர் சிவாவாக ரமேஷ் ஓரிரு முறை கண்ணில் பட்டு மறைந்தாலும் நடிப்பில் குறையில்லை. சீனுவின் பேரனாக மாஸ்டர் புவனேஷ். ஒத்திகை செய்ததை வஞ்சனை இல்லாமல் வெளிப்படுத்தி இருக்கிறான். எளிய அரங்கை அமைத்திருப்பது குமார். சீரியசான கதையின் தன்மை புரிந்து அளவாக பின்னணியை ஒலிக்க விட்டிருப்பது இசையமைப்பாளர் கிச்சா.     
 
'இப்போது வீட்டில் என்னிடம் பேச யாருமில்லை. உத்தரத்தில் எத்தனை பல்லிகள் ஓடுகின்றன என எண்ணிக்கொண்டு இருக்கிறேன்', 'என்னது பேங்க் லோனா? எனக்கு இப்ப தேவை நல்ல ஆஸ்பத்திரி, ஆம்புலன்ஸ், சுடுகாடு விவரங்கள்தான். அது இருந்தா சொல்லு' போன்ற இயல்பான நகைச்சுவை வசனங்கள் மாதவ பூவராகமூர்த்தியின் எழுதுகோல் வாயிலாக மிளிர்கிறது. இப்படைப்பின் பெரும்பலம் இவரது சிறந்த நடிப்பும், வசனங்களும்தான். நாடகம் முடிந்ததும் ரசிகர்கள் மேடையேறி விமர்சிக்குமாறு அழைப்பு விடுத்தார் ஒருங்கிணைப்பாளர் முத்ரா பாஸ்கர். முதன் முறை மேடையேறி பேசும் வாய்ப்பு கிட்ட எனது விமர்சனத்தை சில நிமிடங்கள் அங்கே வைத்துவிட்டு சுபம் போட்டேன். மாதவ பூவராக மூர்த்தி எனும் அற்புதமான கலைஞரின் ஆக்கம் மற்றும் நடிப்பில் வைரம் தீட்டப்பட்டிருக்கும் இந்நாடகம் மறுமுறை அரங்கேறினால் தவற விட வேண்டாம் என்பதை நாடக விரும்பிகளுக்கு கூறிக்கொள்கிறேன். 

Images: madrasbhavan.com
 ...........................................................
  
சமீபத்தில் எழுதியது:


  
Related Posts Plugin for WordPress, Blogger...